شوفوا يا جماعة انا خبرتى قليله اوى فى وظيفة اخصائى التكنولوجيا فيا ريت اللى عنده اى معلومة يقولهالى
انا معملى عبارة عن جهازين كمبيوتر وجهاز ohp اللى انتهى من زمان ده انا عايزة اعرف دلوقتى لو عايزة اشترى حاجات للمعمل بقدم طلب للمدير وبعدين هو اللى يصرف الفلوس ولا التطوير عشان بصراحة المعمل نقصه حاجات كتير ومش عارفة اعمل ايه وكمان عندى جهاز ohp فيه تراب وجوانب الشاشة مش واضحة هل افكه انا ولا ابعت بلاغ للاعطال للتطوير كمان الدش عندى سلكه مفصول من فوق ومفيش ولا قناة شغالة هل ده ابعت بيه اعطال ولا اطلع انا اشوفه وكمان السجلات المثنتة فى الموقع ال 11 سجل دول لأى معمل ؟
وهل فعلا ورق الطابعة مبيتعملش بيه طلب شراء والمفروض المدرسة اللى بتجيبه ؟
وميرسى اوى وبعتذر على كثرة الأسئلة وشكرا

اهلا بيكى يا ايمى

واتمنى انى حد هنا يفيدك

بس من خلال وصفك للمعمل فهو ضعيف جدا

وربنا يعينك على الشغل فيه

اختى الفاضله حرد عليكى على اد خبرتى ويارب أفيدك
معامل التطوير ليها ميزانيه ولحد علمى بتبقى 10 % من ميزانيه المدرسه فطبعا بتروحى للسكرتير اللى ماسك الخزنه وتقوليلوا عايزه اعرف ميزانيه التطوير السنه دى كام عشان تطلبى حاجات فى حدود المبلغ من صيانه ومشتركات كهرباء وستائر واقلام سبوره ولوحات تعليمية اى حاجه للمعمل بتقدمى طلب بكده للمدير تكتبى فى النص مذكره وتقولى السيد مدير المدرسه تحيه طيبه وبعد نرجو التكرم بالموافقه على صرف مبلغ كذا من ميزانيه التطوير بالمدرسه نظير شراء كذا ولسيادتكم جزيل الشكر تقبضى الفلوس من السكرتير بعد موافقه المدير وتكتبى ايصال على نفسك بالمبلغ اللى استلمتيه وتروحى تشترى الحاجات بفواتير مختومه ولها بطاقه ضريبيه وسجل تجارى وتلاحظى ان فيه دمغات على اى مبلغ اكتر من 50 جنيه فبتسألى السكرتير مثلاُ ال200 جنيه عليها اد ايه دمغات بيقولك مثلاً 10 فبتجيبى الفاتوره ب210 تدى البائع ال200 بتاعته وتتدى 10 جنيه تانى للسكرتير للدمغات اللى على الفاتوره دى يارب تكونى معايه لحد دلوقتى وتشترى بقى طلباتك وكل سنه الميزانيه دى بتجدد ده بالنسبه لاول سؤال حرد عليكى بعد شويه فى باقى الاسئله باذن الله

بالنسبه بقى لجهاز العرض الضوئى الموضوع سهل تفصلى الكهرباء تفتحى الغطاء بتاع الجهاز حتلاقى لوحه شفافه ذى المرايه كده بلاستيك ممسوكه بمفصلات سودة فى الغطاء الزجاج اللى انتى فتحتيه ده تحركى المفصلات السوداء دى وتشيلى اللوحه الشفافه تخديها تغسليها تحت الحنفيه وتنشفيها تانى كويس وقبل ما تركبيها تنظفى اللوح الزجاج بتاع الغطاء بمنديل من الناحيتين وبعدين تركبى اللوحه الشفافه حتلاقى على الناحيه اللى بتتحط من فوق فى الطرف خالص كلمه up يعنى دى الناحيه اللى من فوق تقفلى عليه بالمفصلات تانى وبعدين حتلاقى تحت اللمبه وعليها حته زجاج مربعه تنظفيها بمنديل لان عليها اكيد تراب بس متفكهاش لان تركيبها صعب وبكده خلاص بقى تركبى وتشغلى عادى بس فى الغالب وضوح الصوره مش حيبقى 100% بتنظيف الجهاز ده بس لازم تنظفى الlcd وده بقى تنظيفه حكايه مش حتعرفى لوحدك فلازم تسلميه بنفسك لمركز التطوير او للهيئة انا مش فاكره بس حسأل وأقولك وتقولى يحتاج تنظيف وتسيبهم ينظفوه وتخدى منهم ايصال وبعدين تبقى تروحى تجيبيه كده تمام حستريح شويه ورد عليكى تانى

بالنسبه للدش لأ ده ببلاغ اعطال مينفعش تعمليه أنتى ماد ام مش جايب ولا قناه يبقى محتاج لضبط الطبق او فيه حاجه بلاستيك كده بتتكسر فيه وده فوق السطح فالمسئول هو اللى بيجى يغيرها وبالنسبه للسجلات اللى نشرتها قبل كده فيه منها لمعمل المناهل وفيه منها للبث الفضائى وفيه للنت فعلى حسب القاعه عندك فيها البث الفضائى ولا لوحده وهل ده معمل مناهل ولا شبكات قوليلى هو معمل ايه بالضبط وانا اقولك أسماء السجلات وبالنسبه لورق الطباعه وحبر الطباعه بعد ما تستنفذى كل البالتات اللى جايه مع الطابعه كل ده من ميزانيه التطوير اللى ذى ما فهمتك بتقدمى بيهم طلب للمدير وبكده اكون جاوبت على اسئلتك وللو فيه أى سؤال انا فى الخدمه وربنا يعينك ويعين كل الاخصائئين المطحونين فى البلد دى

جزاكى الله كل خير يا اخت قناويه على افادتك لاعضاء المنتدى

وجعله الله فى ميزان حسناتك

جزاك الله خيرا ياخت قناوية ومشكورة كتير على الشرح المفضل ده
انا اخصائى تطوير ( شبكات ) ولكن مسكت معمل مناهل قبل كده وعارفه كل الحاجات دى ولكن حبيت اشكر على تعاونك وعلى الشرح الجميل ده
وجعله الله فى ميزان حسناتك

جزاك الله خيرا ياخت قناوية ومشكورة كتير على الشرح المفضل ده
انا اخصائى تطوير ( شبكات ) ولكن مسكت معمل مناهل قبل كده وعارفه كل الحاجات دى ولكن حبيت اشكر على تعاونك وعلى الشرح الجميل ده
وجعله الله فى ميزان حسناتك
هو حضرتك بتقولى اخصائى تطوير شبكات يا ترى فى القسم ولا مدرسة ؟؟ اصل معروف اخصائى التطوير فى المدرسة مسئول عن كل معامل التطوير بالمدرسة

توضيح جيد لكن لا تنسوا اشياء مهمة :
1- ان يستفاد الطلاب والمعلمين استفادة حقيقية من المعمل بتشغيل الاسطوانات .والفيديو . والبث الفضائى .والانترنت
2- اهم حاجة ان الاخصائى يطور من نفسه ويحاول يتعلم داتيا
3- مساهمة المعلمين فى انتاج دروس تعليمية وخاصة الحاصلين على الانتل والicdl
4- الاهتمام بتدريب المعلمين " اساسيات الكمبيوتر " و " انتاج دروس بالبوربوينت " و" استخدام الانترنت"