مشاهدة النسخة كاملة : قضية تكييس عام!!
The_Relativistic200 27-09-2007, 10:31 PM السلام عليكم ورحمة الله وبركاته
سامحونى بس انى بضيع وقتكم
مع انى بقالى كتير مش بكتب مواضيع ومش عاوز اكتب:)
بس انا حبيبت اتكلم على حاجة حلوة شوية
ولان ناس كتير شوية هنا عارفة ان من محبى وعاشقى كوكب زحل!!
حبيت اتكلم عن المسلسل اللى اسمه قضية راى عام
اللى مكسر الدنيا واللى فعلا حسيت بالحنين معاه لكوكب زحل...كوكب التكييس والتهجيص
انا شخصيا مش بحب المسلسلات لانى شخص رجعى
مسلسل ولنجمته الفنانة يسرا كل شكر واحترام وتقدير انها قدمت العمل المهم ده!!
مسلسل بيتحدث عن ال****** فى شهر رمضان...اللى هو مفترض شهر الصوم!!
والصراحة ما بقيتش اعرف هم بيصوموا مع الهلال زينا
ولا مع الصفاقسى ولا ايه مش فاهم....!!!
المسلسل متبع طريقة الغاية تبرر الوسيلة...بهدف الوصول بين الزخم الكبير اوى من الهجص
ويتقال عليه بالبلدى احسن الوحشين
وشخصيا نفسى افهم الجرأة اللى بيقولو ا عليها فى ان مسلسل زى ده يتعرض فى رمضان
******......كفاية اللى بيتفرج عايش الحكاية بتفاصيلها وكمان عاملين مشهد ****** محترم الصراحة الله ينور.....
هنخرج نفسينا من حتة ان الموضوع مش مناسب عرضه....اهو اتعرض وخلاص
ولا ان الفتاة المغتصبة تبلغ البوليس ولا تخاف على سمعتها
وفى رايين فى الحكاية دى.....والناس فرحانة......هنبلغ يعنى هنبلغ!!!!
وناس تانية قالت ((اذا بليتم فاستتروا)) و الاتنين....محدش معرض فيهم للموقف وممن ينقلب على عقبيه فى جزء من الثانية......
فى نقطتين بس حبيت اقولهم ...
ان و الحمد لله اكتشفت ان يسرا عندها موهبة فى الافتاء... شيخة يعنى!
مشهد كويس لبنتها بعد محاولة انتحار....وبتقولها الانتحار ده كفر بالله.....وده معروف مش مشكلة
وبتكمل....احنا لازم نخاف ربنا اكتر ونحب ربنا اكتر وكلام تانى ميطلعش غير من خطيب جمعة
ناقص تقول قال البخارى ومسلم...!!!!!
وسبحان الله...كده بقت قمة الاحترام وقمة التدين وقمة الادب
واحتمال تبقى من العشرة المبشرين بالجنة.....عشان البق ده....
هنحول بقى على نقطة تانية خالص موجودة فى المسلسل...
ابن الوزير
يا جدعان فى ابن وزير يتسجن كده ويترمى مع الحشاشين والمجرمين...
الوزير ماشى من غير ولا حرس ولا تشريفة ولا كلام من ده
الوزير...وكيل نيابة كحيان يشخط فيه و العقيد يخبطه على كتفه.....ويقولله يالالا من هنا!!!!
يا جدعان ده امين شرطة معفن لامؤاخذة فى اللفظ بيسحل خلق الله كلهم قدامه على اشارة ولا تذكرة!!
الوزير....يقعد فى النيابة...ويكلم وزير الداخلية ووزير العدل و النائب العام
وينفضوله وكمان يقولوله....القانون لازم ياخد مجراه
!!!!!
هنا بالظبط عرفت ان المسلسل طازة...جاى من زحل
قانون ايه.؟؟؟
ومجراه ايه بس؟؟!!
والله المثل صادق وبيقوللك...كيس تعيش كويس!!!
وسيبنا من حلقات المسلسل اللى كلها عياط وملل وبطء
ولو حبينا نقول اسم...نقول((قضية رغى عام))
وصويت وفتة وعجين ملهوش دعوة بالقضية المطروحة اصلا....بس معذورين...دول تلاتين حلقة هيتملوا يه يعنى!!!!
لكن نعمل ايه..!!!
ما هى الناس بعد كده هى اللى بتصوت وتقول.....هو احسن مسلسل فى رمضان
عموما .......لو حد ناوى يكتب الرد ده يبقى ميكتبوش...عرفناه...واتحفظ:D
حد قاللك تتفرج على تلفيزيون؟؟؟
ما علينا....
سيبك انت
اهم حاجة
اللمة الحلوة....
وتحيا مصر
ويسقط المطر شتاءا
اشوفكم على خير مع كيس تانى!!!
FRANKENSTEIN 27-09-2007, 10:39 PM هي دي مصر يا عبله قصدي يا شعره
كله هجس ف هجس وكله بيمثل وللاسف تمثيل مبتدئين حتي الحزب الحاكم مبيعرفش يمثل :d
Miss_CaR!zma 27-09-2007, 10:40 PM هقوللك الحل
دلوقتى حالا فى برنامج على OTV
السؤال فيه بيقوللك ايه الفتوى اللى نفسك انها تطلع
اتكلم بقى انت فى بلد ديمقراطى :)
بالنسبه للمسلسل انا المشهد ده لفت نظرى واتريات كتير لان صراحه المشهد ده مش عايز يسرا
لكن انا بتفرج لسبب بسيط اسم المسلسل بيوحى انه المفروض هينتهى بحاجه مهمه
so خليك ورا الكداب لحد اخر المسلسل
سؤال بسيط: يعنى ايه تكييس لو سمحت؟؟
..Just Stop 27-09-2007, 10:49 PM هههههههههههه
قضية فشر عام
ايه الحلاوة دى يا خالد
دا مسلسل بعرض اهم مشاكلنا
فى صورة مسلسلية راقية
وحكاية الشيخة يسرا ( عسرا )
بيحصيل سبحان الله تبات ....... تصبح شيخة
اما حكاية بن الوزير
كل اللى اقدر اقولهولك المخرج عايز كدا
فتحياتى لمن اخرج المسلسل ولمن انتجه ولمن ساعد فى عرضه وتنفيذه
ولمن شاهده ولمن اغلق التليفزيون عليه ( دعاء سمعته على المدافن 9
ياللا على الدنباياللا البرنجان
وتحيا مصر
شيخة العصر
Ahmad™ 27-09-2007, 10:59 PM انا كنت عايز اكتب الموضوع ده الصبح
بس كبرت دماغي وقولت بلاش اوجع دماغي ودماغ الناس معايا
فعلا المسلسل ده بيوضح حاجات كتير اوي
بيقولك ان الشعب المصري ده متخلف
وبيقولك ان الحكومه ديه حكومه نازلنا من عند ربنا 10 علي 10 يعني
ده لا يمكن ده يحصل طبعا
ولما تشوف المسلسل ده تعرف انك اكيد اكيد يعني في مصر
Crazy Pharma Boy 27-09-2007, 11:09 PM ههههههههههههههههههههههههههه
يابني :D
زي ما قولت هنزلك القصيدة تاني :D
ههههههههههههههههههههههههههههه
عبقرينومان 28-09-2007, 12:13 AM السلام عليكم ورحمة الله وبركاته
ههههههههههه
بجد والله فعلا جاي من زحل
اولا: اسمه قضية رأي عام
مش قضية رأي الحكومة
عارف المسلسل ده بيفكرني بالافلام اللي بتعملها الحكومة الامريكية علشان تظهر للعالم قوتها في الافلام
وسبحان الله الافلام دي بتخيل على الناس وبيتخيلوا ان امريكا يقدر يعمل وان امريكا مش جبانة
انما المسلسل العربي ده اللي بتقول عليه بتاع يسرا ربنا يهديها مسلسل عربي
عارف يعني ايه عربي يعني مش هتعرف تضحك على العرب
ده احنا مفتحيين ولا نسيوا الضابط اللي قتل المواطن من شهر عندنا في قسم شرطة الفيوم ولسا حتى الان أهل القتيل لم يتسلموا الجثة
كده شكلنا كلنا رايحين في داهية وانا هقول خالد هو اللي كتب الموضوع ما ليش دعوة
احمد رضا 28-09-2007, 12:15 AM :Dلا حول ولا قوة إلا بالله عوده حميده بموضوعات تكيييييس جديده ارحمنا يارب:mad: يارتني ما دخلت .. الله يخربيت يسرا علي بيت ابن الوزير علي بيت التلفزيون من اصله ... ههههههه ... يارتني كنت رحت اتسحرت احسن و اتخمدت يالا مكتوب عليا انام مخنوق الواحد يروح اورانوس و يعيش لوحده :D :p بلا وجع دماغ:mad:
The Lord Of The Rings 28-09-2007, 12:20 AM خالد باشا ... اهلا و سهلا
انت لسة واخد بالك ان انت ف مصر .... حيث توجد الممثلة العبقرية يسرا .... بلد السينما ف الشرق الأوسط .....
البلد اللى فيها 75 مليون و 230 الف و 713 نسمة بيقدسوا المسلسل و يقوللك : " أووووه لا لا ..... ده اجمل مسلسل السنة دي .... من بين الخماشر تماناشر مسلسل بتوع السنة دي "
اسمح لى اقوللك ان العيب الأكبر مش بيقع ع المسلسل ...... العيب الأكبر بيقع ع اللى بيتفرجوا عليه بشغف و لهفة
انا متهيأ لى الشعب المصري بيستناه اكتر من انتظارهم للصلوات أو الفطار حتى .... ده يمكن كمان بعد م يتفرجوا ع الحلقة ... يستنوا اعادتها تاني يوم
العيب مش ف المسلسل ... العيب ف النظام ....
بمعنى آخر ان لو الناس كلها تفكر صح .... تسيب التليفزيون المصري اساسا
لكن تعمل ايه بئا ف ربات البيوت ...
MohammeD el_SadaT 28-09-2007, 01:03 AM بسم الله الرحمن الرحيم
السلام عليكم ورحمه الله وبركاته
والله يا خالد أنا أصلا مش شوفت المسلسل خالص
وكمان انا مش بحب يسرا
بس باين ان المسلسل بيعالج قضيه مهمه
سواء بقه خرج منها أولا لاء
بس أنا من وجه نظرى أحسن من غيره كتييييييييييييير
على الأقل له هدف كويس
وعالج قضيه موجوده
وانت زعلان اوى انهم قالو القانون ياخد مجراه لازم كوسه يعنى سيب الناس تحلم
مش يمكن الحلم يبقى حقيقه يا خالد
عمتاً أهنيك على الموضوع والإسلوب الجميل فى عرضه
_GUIDE_ 28-09-2007, 01:10 AM المسلسل بيتعرض بعد الفطار يعنى
لما يكون بيتكلم عن ال****** فيهمناظر خليه خلاص اليوم عده
والمغرب اذن يعنى اخدت ثواب الصيام اتفرج برحتك
واعتبره فيلم كرتون هجص فى هجص
fares elnet 28-09-2007, 01:40 AM اولا اهنيك على طريقة عرض الموضوع
وثانيا المسلسل ده مش عارف عامل ضجةكبيرة قوى فى مصر
مع انى انا ما بتفرجش عليه مش هقولك انى انا ما بتفرجش على تليفزيون
لا بس لاول مرة مش متابع اى مسلسل ولا حاجة خالص فى رمضان السنة دى
مش عارف ليه والمسلسل اللى عاوز اتابعه مش عارف هو بيتعرض امته
وهو مسلسل خالد ابن الوليد
بس المسلسل بتاع يسرا ده انا حاسس منه كدة انه هجس من كتر ما سمعت عنه وعاجبنى اوى كلمة سيب القانون ياخد مجراه
ياعم بيحسسونى انى فى بلد تانية او فى كوكب تانى مش عارف اقولك ايه بصراحة احنا تيهين بجد تيهين وهنفضل كده لحد امته الله اعلم
وشكرا تانى لموضوعك ومعلش طولت عليك فى الرد بتاعى
ReceptiveGuy 28-09-2007, 01:45 AM حلوة اتفرج براحتك ديه يا إسلام
:d
أنا هقول حاجة واحدة بس
زمان كان الكلام عن Xxxx قذر والحكومات نظيفة
دلوقتي ....
؟؟؟؟؟؟؟؟؟؟؟؟؟؟؟؟؟؟؟؟
أنا بالنسبة لي المسلسلات تضييع وقت عكس الأفلام
لو ضيعت حلقة واحدة من المسلسل بحس إني ما عملتش حاجة
ثم إني لو شفت كل حلقات المسلسل معناه إن أنا مفضيله جزء من وقتي خاص بيه هوه
لمدة شهر تقريباً
ليه يعني
أنا بحب التيك أواي
فيلم في ساعتين واقلب
شكراً عالعرض يا خلود
:d
The Lord Of The Rings 28-09-2007, 02:27 AM والمسلسل اللى عاوز اتابعه مش عارف هو بيتعرض امته
وهو مسلسل خالد ابن الوليد
سما دبي .. 10 مساءا ... توقيت القاهرة
ده خارج الموضوع معلش
بس نلبي طلب الراجل ع الأقل عشان ده المسلسل الوحيد اللى انا متابعه
:D:D:)
mR . mOstafa Fathi 28-09-2007, 02:47 AM هى دى مص....
اشطة يا رجالة موبد
هههه
شكرا ياخالد
واحـد من النــاس 28-09-2007, 05:29 AM يا نهااااااااار أبـــــــــيــــــــــض ..
انت مزعل نفسك عشان المسلسل ده .. وانت مستني ايه يعني من يسرا ومسلسلاتها وافلامها .. لازم .. دي فنانة محترمة .. وبتناقش قضية .. بس مفيش مانع من تجسيد القضية بحتة سخنة في النص .. ههههه عشان الناس تفوق .. وتحس بكبر القضية .. ويحلوها .. ايوة امال يا حسونة ..
وفيه مثل قريب من اللي حضرتك قولته .. بس مفهوش اكياس ههههه .. بيقولك .. هيس هيس .. تبقى كويس !!!!
وفي الآخر هاقولك ..
كبر .. تعيش .. تاكل .. قراقيش !!!!!!!!!!!!
بس تصدق عجبتني اوي حكاية كوكب زحل دي .. ههههه
am_online5 29-09-2007, 07:22 PM هي دي امي
قصدي مصر
مش قالوا زمان مصر هيا امي
ولا قوم يا مصري مصر دايما بتناديك
المهم
شكرا علي موضوعك
وعلي العودة القوية
صوت الحق 29-09-2007, 08:14 PM انا هشهد انك شريكه طلما انت هتقول
عبقرينومان;]السلام عليكم ورحمة الله وبركاته
ههههههههههه
بجد والله فعلا جاي من زحل
اولا: اسمه قضية رأي عام
مش قضية رأي الحكومة
عارف المسلسل ده بيفكرني بالافلام اللي بتعملها الحكومة الامريكية علشان تظهر للعالم قوتها في الافلام
وسبحان الله الافلام دي بتخيل على الناس وبيتخيلوا ان امريكا يقدر يعمل وان امريكا مش جبانة
انما المسلسل العربي ده اللي بتقول عليه بتاع يسرا ربنا يهديها مسلسل عربي
عارف يعني ايه عربي يعني مش هتعرف تضحك على العرب
ده احنا مفتحيين ولا نسيوا الضابط اللي قتل المواطن من شهر عندنا في قسم شرطة الفيوم ولسا حتى الان أهل القتيل لم يتسلموا الجثة
كده شكلنا كلنا رايحين في داهية وانا هقول خالد هو اللي كتب الموضوع ما ليش دعوة[/
الشرطة قتلت عندتا ثلاثة فى الانتخابات وقالت احنا اللى قتلناهم شف دى راى عالمى وليس عام
الاسطورة 29-09-2007, 09:16 PM ههههههههههه
عليك حاجات يا خالد
بس تعمل ايه
تحيا مصر
وتسقط اى حاجة تانية
The Happy Angel 30-09-2007, 02:38 AM ايه السلبيه دي يعني انت او انتي حليت الموضوع يعني ولا اهو رغي رغي وغيبه ونميمه وخلاص
The_Relativistic200 30-09-2007, 11:55 PM تفتكروا اسيب الموضوع كده احسن
ولا ارد على كل رد من العشرين
ويبقى عندى اربعين رد؟؟؟؟!!!
ما علينا
بس اعتقد ان الموضوع افضل كده بتعليقاتكم بس تنور القعدة
من غير ما ارد و اقول شكرا على مروركم وتعليقكم
بدل ما اوسخ لموضوع بردودى:)
بس شكرا على مروركم برضو:p
وعشان محمد قمر لا يلتبس عليه لامر
انا ولد ولله العظيم:)
ده حتى البطاقة طلعت ومش بضحك عليك ده معلومة جاية من الحكومة:):):)
واحـد من النــاس 01-10-2007, 12:09 AM ايه السلبيه دي يعني انت او انتي حليت الموضوع يعني ولا اهو رغي رغي وغيبه ونميمه وخلاص
يابني اقفل بؤك .. ده الحكومة ارحم من المنتدى ده :p .. ماقولنا كده في موضوع مشابه في الاسم .. بس بيناقشه من حتة تانية .. قولنا مش هنحل الموضوع بالكلام ده .. وده موضوع ع الفاضي قالوا ان احنا مش بيعجبنا حاجة وبنخش نتريق على كل المواضيع وخلاص :(:confused::confused: .. واهو .. لقيت عندهم حق .. فيها ايه لما اخش اتكلم واطلع اللي جوايا حتى لو مش هاحل الموضوع .. مش هاخسر .. لا ده انا هاستفيد وردي هيعجبهم ويقولوا اني فيلسوف وبافهم وراجل دماغه عاقلة وتقيلة و ... توزن :D
وانا آسف يا خالد ع المقاطعة دي .. بس الكلام ده مش على موضوعك .. ويا ريت ردي ده مايحصلش ردودي كلها ويتحذف او يتعدل لاني ماغلطش في حد .. معلش بأه انا بخاف ردودي تتحذف اليومين دول .. اصل اللي على راسه بطحة .. بيحسس عليها :)
بس انا طيب وباقولكوا لو انتو شايفين الرد مخالف .. احذفوووه على طول :)
فنكوشه المنكوشه 01-10-2007, 03:22 PM يالهوي كل دا عشان حته سلسل انا دايما كنت بقول انه مسلسل رخم وملوش لزمه مسلسل تبع عقله الاصبح خيال علمي وبتاع
بس بجد اول مره احس ان له لزمه
بس عادي هنا في المنتدي اتوقع اي شيء !
علي فكره دا الموضوع التاني عن المسلسل دا هنا في المنتدي
COoL HEaRT 02-10-2007, 04:31 PM ما علينا من رد كبرياء الصمت بس انا شايفه انه موضوع يستاهل ....
اما بالنسبه لكاتب الموضوع انا بحييك فى البدايه ع اسلوبك الرائع فى النقد وهو بجد اسلوب ساخر بس جميل
بس كان ليا تعقيب صغير اولا انت لم جيت تتكلم عن ان يسرا او عسلاا زى ماذكرت قلت انها بكلامها ع الانتحار ومش عارفه ايه ...كانت داعيه ..بس حضرتك هنا انت بتنقد الممثله وده مش موضوعنا بالنسبه للمثله فمش من حقنا ننقض اخلاقتها مهما كانت هتقولى ده تناقد بين صفاتها وبين دورها ..انا اعتقد ان الجزء ده ميخصناش اللى يخصنا هو ادائها هى فى المسلسل وانا شايفه الى حد ما انه كويس ...
اما بالنسبه انك مش مقتنع ان ابن الوزير يتعامل كده ..فانا بقول ممكن ..بس فى حالتين انه الوزير ده يكون زى شكرى جلال اللى فى المسلسل مش كويس ..او انه يكون وزير فى دوله تانيه
وفى النهايه انا بتفق معاك اتفاق كلى ان المسلسل كله مط وتطويل بطريقه سخيفه بس برده هو زى مانت قلت 30 حلقه لازم يملوها اى حاجه
احلى حاجه ان متفرجتش ع حوالى 4 حلقات ولم اتفرجت عليه تانى حسيت انى اتفرجت عليه ومفتش منه حاجه خالص
اخر حاجه ومعلش ع التطويل انت مش مع فكره عرض قضيه زى اللى بيعرضها المسلسل فى رمضان وانا مش شايفه كده لو انت عاوزه فعلا تعترض ع حاجه كانت مفروض تكون هى مسلسات رمضان بوجه عام اما القضيه المطروحه فانا شايفه ان شهر الصوم مش بيكون خالى من الحوادث سواء قتل سرقه او ******
انا اساسا بتفرج عليه عشان امال ماهر اللى بجد ابدعت فى اغانى المسلسل
معلش ع التطويل ومشكور ع الموضوع
|