السلام عليكم
الموضوع انى شغال عقد مميز معلم مساعد ماده حاسب الى للمرحلة الابتدائية طبعا الواحد والله بيدوخ لغاية مايجيب حاجه للمنهج يشرح بيها للعيال لان مفيش عندنا معمل حاسب الى فى المدرسه
المهم امبارح كنت عند سنه خامسه حصتين وره بعض الخامسه والسادسه اولت حرام اضيع الحصه كده من غير مااعمل حاجه اولت فى اثناء الفسحه عملت امتحان لهم جمعت شويه اسئله كده من المنتدى ده بالظبط سؤالين حساب وسؤالين انجلش وقطعه نحو وطبعته فى المدرسه وصورته بره فى المكتبه على حسابى والله
وربنا انا عملت كده لوجه الله فقط ولا ابغى اى مقابل فى ذلك
قبل مااطلع الفصل وريت للمديره الشغل اللى عملته وفرحت وقالتلى جزاك الله خير وكلام شكر من ده
ده عندى بجد احسن مقابل
طلعت الفصل ووزعت الورق على العيال والموضوع خلص وتمام والعيال حلت
المهم بنت مدرس الحساب تلميذه فى الفصل ده
انا الحمد الله علاقتى حلوه بكل المدرسين فى المدرسه الاستف كله وربنا
المهم كان فيه سؤال حساب البنت ديه معرفتش تحله مع انها تلميذه ممتازه بجد
المهم لميت الورق وطلعت والموضوع خلص على كده
روحت البيت صححت الورق ولقيت بصراحه اغلب الفصل كله حالل العربى والانجلش صح
والاخطاء اغلبها فى الحساب مع ان جايبه من ع المنتدى ده والله ولسنه خامسه
ماعلينا كانت برضه فى الفصل ده تلميذه بنت موجه بس صديقى الروح بالروح
البت ديه لغبطت كتير فى الحساب بس وحلت الباقى صخ يعنى نقصن فى الحساب 4 درجات
رحتله بالليل واولتله شد على بنتك شويه لان كذا كذا كذا
المهم لقيته بيكلم المدرس اللى بيديها خصوصى اللى هوه مدرس المدرسه
اولتله بلاش تكلمه لانه هايعرف ان انا اللى اولتلك ويزعل
كلام من ده كلمه والمدرس عرف وشك انى انا اللى اولتله
النهارده باه رايح قبل ماادخل الفصل اولت اجيب والله جزايز كده للعيال اللى جابوا درجات مرتفعه
هما حوالى 8 بالظبط اقلام وحاجات من ديه
قبل ماادخل لقيت البت بنت الموجه صحبى ده بتقولى الاستاذ محمد اللى هوه مدرس الحساب
قالى لو الاستاذ شريف انا يعنى عطاكم اى سؤال او تمرين حساب محدش يحله
داخل باه الفصل علشان اوزع الجوايز على العيال لقيت تلميذه خايبه بتقولى يااستاذ انت مدرس كمبيوتر
ادينا كمبيوتر بس مش حاجه تانيه انا تجاهلت الموضوع ومعلقاش
بس بجد اتأثرت فى نفسى اوى والله
كملت ووزعت الجوايز على العيال وكانت بنت مدرس الحساب نفسه منهم بس هيه غابت النهارده
طلعت بعد الحصه روحت لمدرس الحساب واديته ورقه اجابة بنته والقلم الهديه بتاعها عادى خالص
كلمته ولا كان حصل حاجه مع ان فى نفسى والله زعلان على الطريقه اللى بيترد بيها على الخير اللى
انا عملته
انا روحت حكيت للمدير والمديره على اللى حصل ده
طيبو خاطرى وقالى انا بكره هاكلم الاستاذ محمد ومعرفش ايه
بجد انا مش عارف اعمل ايه العيب فيا ولا ايه
انا كده غلطان
مش عارف بس بجد بعد كده اولت فى عقل بالى انا مالى اساسا
ادخل الفصل اقرالى كلمتين وخلاص ومش مدى لحد اى معلومه
بجد ياريت حد يرد عليا ويقولى اعمل ايه
انا اسف بجد الكلام خاد بعضه وطولت عليكم
بس عاوز نصيحه منكم اعمل ايه

بصراحة معلش هي ممكن الاسئلة اللى نزلتها تبقي فعلا صعبة شوية عل العيال وانا كنت عارفة انك هتقول مدرس الحساب عمل حاجة قبل ما اكمل قراءة الموضوع ومعلش الحياة تجارب و محدش بيتعلم بالساهل

بص ياسيدى .
لو عاوز تعمل لوجه الله يبقى متنظرشى شكر من أحد . وصدقنى هتتعب كتير وخاصة إنت مدرس على قد حالك . لو مش فارقة معاك وربنا كارمك وعاوز تعمل لوجه الله يبقى اعمل ومتقلشى لحد بنتك كذا وبنتك كذا . نبههم انت وعرفهم الصح من الغلط . والله لا يضيع أجر من أحسن عملا .

يااستاذ انت مدرس كمبيوتر
ادينا كمبيوتر بس مش حاجه تانيه

الله يبارك لك
واستمر يا أخى
فى عملك
ولكن ياريت تبقى تستأذن مدرسى المواد .

نسيت أقولك

حاجة مهمة

عمر ال بيعمل خير ما بيلاقى شر .

بارك الله فيك
وتذكر قول الله تعالى (( إنما نطعكم لوجه الله لانريد منكم جزاءً ولا شكوراً ))
ثواب ماعملت عند الله
ربنا يبارك فيك

طيب ما طالما انت عايز تعمل عمل خير هقول لحضرتك على حاجة
كده كده الولاد دول بياخدوا دروس عربي وحساب وانجليزى وكل الكلام ده
ليه بقي انت متقراش قصة دينية او معلومة او تبسط لهم فقة معين وتشرحولهم ..ومتستصغراش عقول سنة خمسة دول كبار وفاهمين حاجات كتير ومتلخبط عندهم حاجات اكتر
وبكده يبقي علمتهم خير
وبعدت نفسك عن المشاكل
ووفرت الفلوس لبيتك

بالتأكيد فعلا كان قصدك خير

لكن فى ضوابط

بمعنى ان حضرتك مدرس حاسب ما ينفعش تدخل تشرح للتلاميذ حساب او انجليزى
ولا تفدم لهم امتحانات فى غير مادتك
وان كان وأردت ذلك ، فعليك أن تستأذن من مدرس المادة أولا ويتم ترتيب الامر بواسطته

بالتأكيد فعلا كان قصدك خير

لكن فى ضوابط

بمعنى ان حضرتك مدرس حاسب ما ينفعش تدخل تشرح للتلاميذ حساب او انجليزى
ولا تفدم لهم امتحانات فى غير مادتك
وان كان وأردت ذلك ، فعليك أن تستأذن من مدرس المادة أولا ويتم ترتيب الامر بواسطته


فعلا لازم الاستئذان اولا

والله زى ما الاخوة قالوا انت بتعمل ابتغاء وجه الله تعالى
انا زيك اخصائى مكتبة متعاقد ، ولكن تخصصى الاصلى مدرس دراسات ولما بحس ان مفيش حاجة ممكن اعملها فى حصة المكتبة لان العيال اصلا مش فاهمين حاجة فى المواد الاساسية مش هتفلحس انا بقى واقعد احكلهم فى قصة هذا مع العلم ان حتى انشطة المكتبة المختلفة انا اللى بعملها على حسابى الخاص من ابحاث ورسومات وخلافة لان الطلبة مش هتعرف تعمل حاجة مهما قولت وشرحت فضلا عن ان اولياء الامور بردة مش هيعملوا ليهم حاجة على اعتبار انها مطلوبة للمكتبة مش لمادة اساسية

فكنت فى بداية هذا العام اشرح مادة الدراسات خصوصا وان المدرسة كانت تعانى من عدم وجود مدرس للدراسات اللى هى مادة تخصصى فى الاساس
ولكن فجأت بموجهة المكتبات تأتى لى فى زيارة وتطلب منى عدم شرح اى شىء غير حصة المكتبة اللى هى اصلا مش منهج ولا حصة دة مطلوب منى بالظبط اكون عامل زى ابلة فضيلة بتاعت الراديو زمان
او احكى قصص الف ليلة وليلة والشاطر حسن وبنت السلطان

ووبختنى وتعاملت معى بشكل لم اشهده منها من قبل رغم انها موجهتى منذ ما يقرب من 3 سنوات

اقولك كلمة اخيرة وفيها الخلاصة





اربط الحمار مطرح ما يحب صحبة ومن تدخل فى ما لا يعنية سمع ما لا يرضيه

نصيحه
اهتم بمادة الحاسب الالى اللى هى مادتك وعلم العيال فيها وعرفهم كل حاجه عن المادة واجتهد فى شرح المادة حتى يهتم بها الاولاد واثبت لكل مدرس فى المدرسة ان مادة الحاسب الالى مادة مهمه زى العربى والحساب
وان الكمبيوتر لغة العصر ولا غنى عنه فى هذا الزمن
يكفى ان من خلال الكمبيوتر اننى نتواصل مع بعضنا البعض بدون سابق معرفة
ومن خلال كلامك انك تبغى الخير لوجه الله الكريم
وان الله لايضيع اجر من احسن عملا

الله يبارك لك
واستمر يا أخى
فى عملك

شكرا ليكم كلكم على الردود اه انا نسي اقولكم حاجه ان مدرس الانجلش بنفسه دخل والله
راقب معايا فى الفصل على الامتحان ده
وكمان سألت مدرس اللغة العربيه على اجابات بعض اسئلة النحو اللى كان فى الامتحان
وعلى العموم فعلاعمر اللى بيعمل خير مش هيلاقى شر ابدا
يلا قدر الله وماشاء فعل
والواحد مش بيتعلم ببيلاش برضه
جزاكم الله كل خير

نصيحه
اهتم بمادة الحاسب الالى اللى هى مادتك وعلم العيال فيها وعرفهم كل حاجه عن المادة واجتهد فى شرح المادة حتى يهتم بها الاولاد واثبت لكل مدرس فى المدرسة ان مادة الحاسب الالى مادة مهمه زى العربى والحساب
وان الكمبيوتر لغة العصر ولا غنى عنه فى هذا الزمن
يكفى ان من خلال الكمبيوتر اننى نتواصل مع بعضنا البعض بدون سابق معرفة
ومن خلال كلامك انك تبغى الخير لوجه الله الكريم
وان الله لايضيع اجر من احسن عملا

انا اويدك خصوصا ان مادة الحاسب الالى للاسف لم يهتم بها فى المرحلة الابتدائية والولاد بيجوا المرحلة الاعدادية بيتعبوا جدا المادة بتاعتنا " الحاسب الالى " كبيرة وفروعها ومواضيعها اكتر اهتم بيها وسيب العيش لخبازة

انا من رايى انك تحاول اكتر فى مادتك وبلاش فعلا موضوع المواد التانية لان كل واحد فينا عارف تخصصه كويس وعارف نقاط القوة والضعف فيه ولو فى وقت زيادة او حاجة ممكن تعلمهم الاخلاق والفضائل وعلى فكرة ياجماعة انا شايفة ان المفروض كل واحد فينا كل مدة كدة يتكلم مع الولاد فى مسالة الاخلاق دى لان من الملاحظ اليومين دول ان فى انحدار جامد فى الاخلاق عند الطلبة
ممكن برده تحكيلهم قصص عبرة وعظة لعل وعسى يستفيدو ويبقالك الثواب عند الله وربنا يوفقك ويوفقنا ان شاء الله لما فيه الخير

مع افتراض حسن النية في حضرتك
ولا يوجد أدني شك في ذلك
ولكن ليس من حق حضرتك علي الإطلاق أن تفعل ذلك
وإن فعل ذلك أحد معك في مادة الحاسب الآلي لن ترضي بذلك علي الإطلاق
نحن بشر ولسنا معصومين والشيطان يوسوس للبشر بالكثير
فلا داعي لهذا علي الإطلاق
هذه نصيحة وكلمة حق حيث إنني لا أعرف حضرتك ولا أعرف زملائك
ولكن كلمة الحق لا بد أن تقال

ان كنت تنتظر شكر فلن تجدة
وان كان لوجة الله فهو عند الله

ياخي حصل خير

انت تخصص حاسب اشرح حاسب فقط وان فاض لديك وقت فاقصص لهم قصص مفيدة

لو حضرتك ماعندكش معمل زى مابتقول ممكن تشرح لهم الماده نظرى وتلخصها لهم فى الحصه وهما فى بيوتهم يطبقوا اللى خدوه واللى مش فاهم حاجه ييجى الحصه اللى بعدهايسال عنها

لان على الاقل حتى اكتر من نصف الطلبه عندهم اجهزه فى بيوتهم
وبكده انت خدمت الطلبه وخدمت مادتك كمان
وربنا يقدرك على فعل الخير

جزاك الله خيرا

خليك فى نفسك وهذه بلدنا نقتل كل شىء

عند الله ياصاحبى

هذا عدل الدنيا فننتظر العدل الحقيقى عند الله تعالى عز وجل

أنا مدرس رياضيات إعدادي تيجي نبدل سوا

طيب تخيل لو واحد من المدرسين زملائك دخل الفصل وسألهم فى الكمبيوتر وحصل انه غلطو او مستواهم مش اد كدا وطلع يقولك معلش ابقا شد على الاولاد شوية ... هتعمل ايه ؟؟؟ انت قصدك خير بس مدرس المادة معذور لانك كدا طلعته مش بيعمل شغله وانت مش قصدك كدا

معلش سامحنى
لو عايز تعمل خير كنت تحاول تقرب ليهم مادتك مش مادة تانية

انت صححححححححححححححححححح و؟؟؟؟؟؟غلطططططططططططططططط
مدرس الكمبيوتر وأى مدرس اخر لابد ان يكون لديه معلومات عامة فى كل المجالات واحنا بنشغل وقتنا فى الوقت الفاضى من الحصة بتوصيل معلومة للطلبة سواء تفيدهم متفيدهمش احنا بنعمل اللى علينا وجزيت خيرا

اسمع ***قصدي اقرا اللي انا هاكتبوا
انا متعاقدة زيك تماما وزي ما بخاف علي نفسي بخاف علي كل متعاقد انت قصدك خير
وعندك طاقة ورغبة في العمل وتعلي اطفال هم مستقبل مش مصر فقط لا دي منهم اللي ممكن يسافر برة لما يكبر ومن العلم اللي انت علمتم يعلم الأخرين
علشان كدا انا هاقلك بفرض ان كل المدرسين وقفوا معاك وايدوك لكن فجاة جاء تفتيش علي المدرسة ووجدوا انك في حصة الحاسب بتشرح مادة تانية تفتكروا هيقول قصدك خير لا طبعا وخاصة ان معاهم دليل ورق الأمتحان او الشرح علي السبورة وفي الأخر انت اللي هتلام
علشان كدا وبقولك تاني انت كلاك نشاط انا بطلب منك بترجاك انك توضح للطلبة اهمية الحاسب الألي وزي ما ذكر احد الزملاء لخص الموضوع وهم يطبقوا في البيت واللي ميعرفش حاجة يسأل فيها الحصة القادمة
اكد ليهم ان الكمبيوتر مش ألعاب وبس ولا ان النت مواقع سيئة وشات وتحميا اغاني عرفهم علي مواقع مفيدة وأولها منتدنا الغالي
بث فيهم روح التنافس علي العلم وروح الخير اذكر لهم قصص للناجحين واوعي تستصغر عقولهم انا اتعلمت من امين المكتبة كتير لما كان بيدخل لنا حصة احتياطي
وربنا يوفقك

احسن حاجة ف الموضوع ان اسلوبك رائع فى سرد القصة
والله تنفع كاتب قصص هااااااايل بجد والله مش تريقه

يابنى العلام مكش ببلاش وياما تشوف واوعى اوعى تزعل نفسك

كل كلام الزملاء اللى فات انا بتفق علية بس فى حاجة اهم من دا كلو لفتت نظرى حبيت اعلق عليها ازاى تسمح لبنت فى الفصل تقولك الجملة دى وتطنش (لقيت تلميذه خايبه بتقولى يااستاذ انت مدرس كمبيوتر) ازاى
حاول تثبت نفسك فى مادتك وتتفوق على باقى المدرسين كمان
ربنا معاك ويوفقك

ادينا كمبيوتر بس مش حاجه تانيه

الي شريف الصعيدي انا احس من نبرات كلامك انك غير راضي عن مادتك وتحس في داخلك ان الفلوس التي تأخذها ليس يقابلها اي جهد وهذا احساس الكثير من مدرسي المواد التي ليس لها مادة علمية كبيرة ولكني اذا سمحتلي يمكن ان اقدم لك النصيحة
الاتية ممكن حضرتك تتوسع في اعطاء التلاميذ معلومات عن الحاسب الالي بطريقة نظرية من خلال بحثك علي الانترنت ، ومن الممكن لحضرتك عمل مسابقات في المعلومات العامة او في اي مجال ديني او علمي وتنتقي الاسئلة من النت ، ومن الممكن لحضرتك ان تتطلب من التلاميذ مل بحث معين ، وفي النهاية اذا لم تهتم بالاقتراحات السابقة فمن الممكن ان تطلب من المدير ان يعطيك جدول لمادة حية تبدع فيها ، واود ان اقول لك انك اخطأت في اعطاءك للتلاميذ امتحان في المواد التي ذكرتها دون ان تأخذ اذن مدرسيها واخطأت ايضا في طبع الامتحان علي حسابك فهناك ميزانيه في المدرسة لذلك

شكرا ليكم جميعا ايها الاخوه والاخوات الافاضل
والحمد الله والله الواحد استفاد من كل كلة اولتوها
وفعلا اكتر حاجه ضايقيتنى لما بنت قالتلى انت مدرس كمبيوتر بس يااستاذ
مش تدينا غير الكمبيوتر بس طبعا انا ادايقت منها وحاول اتمص غضبى وعديت الموضوع
بس طبعا تانى يوم سألتها سؤال فى الكمبيوتر معرفتش تجاوبه اخدت حقى منها هههههههههههههه
ربنا يخليكم ليا يااااااارب ويجزيك خيرا على قدر افادتكم لى

شوف يا استاذ بصراحه انا لو مكان اى مدرس فى المدرسة هزعل منك لانى مسمحش لاى حد يدخل يمتحن طلبتى فى تخصصى دون اذنى فالموضوع اساسه خاطىء
انا لا اشكك فى حسن نيتك بس الاستئذان من الزميل او حتى اخطاره كان المفروض يكون الخطوة رقم 1
الافضل الاول انك توضح وجهة نظرك و نيتك لكل الزملاء خصوصا مدرس الرياضيات لكى ينتهى الموضوع و بالتالى يكون دور كل واحد فيهم انه يقف فى صفك قدام التلاميذ و يقولولهم ان اللى عملته صح

يابنى
العلام مش ببلاش
وياما تشوف
واوعى اوعى
تزعل نفسك

انت المفروض لو عاوز تعمل لوجة اللة تعمل فى مجال تخصصك وبس انت مالك ومال بائى المواد

انت فعلت خير لكن فى غير مكانه
على الرغم من ان الخير ملوش مكان محدد
بس زى ما اوضح الزملاء الافاضل تخصصك هو الاصل
والحاسب الآلى شيق ومجاله واسع
وزى ماقدرت تبتكر طريقة لافادة تلاميذك فى المواد التانية
تقدر تبتكر طرق لافادتهم وجذبهم نحو مادة الحاسب الآلى
وشكرا