http://bp2.blogger.com/_ZloL6-qQl6I/RzHmuLlnC9I/AAAAAAAAADs/cNMvrekbFKU/s320/96863295.jpg


http://bp2.blogger.com/_ZloL6-qQl6I/RzHm4LlnC-I/AAAAAAAAAD0/DcAQhbp0Opg/s320/86743932.jpg






سلام أحلى سلام
انا جاي في الكلام
وناوي أبدأ كلامي
بسلامي للنظام

وسلامي للحكومة
الطاهرة والعفيفة
اللي واكلة البارومه
عاملة خضره الشريفة

وكمان تعظيم سلام
للحزب وللإخوان
اللي صوتنا في إيديهم
في مجلس عمو فُلان

عارفين دا مجلس مين ؟ !!
واحد من وسط الشعب
وعلشان مخلص ـ أمين !!
بأى فوق وعالي الكعب

وسلام أحلى سلام
لعمو الشيخ حسين
قايل أحلى كلام
بيجيب فتواه منين ؟ !!

ويقول كمان دا عادي
الرشوة والمحسوبية
زي أكل الزبادي
والكوسة والملوخية !!

عارفين عمو الشيخ
بيفتي بإيه كمان
بأن الشيشة جامدة
بتكيف الإنسان !!

ولا عمو الوزير
عامل شغله تمام
ومظبط التظابيط
عامل أحلى نظام !!

ولا أمين الشُرطة
بأى بيه وإبن بيه
لما تشوفه شاورله
أجري وحب إيده !!

عشان تبأى صح
وتمام ومية مية
وتقول للظلم بح
صحيح أبو مفهومية !!

تعالى ارمي السلام
لحبيبك الغلبان
دا مغرق العبارة
عايش بعيد هربان !!


وأرمي أحلى تحية
لعمكـ الحرامي
تلاقاه بُكرة وزير
خليك فاكر كلامي !!

ودحرج التماسي
على كل شيخ في القعدة
بيألف الفتاوي
أصل الفلوس مساعدة !!

بيفتي بكل كريم
ويقول وصى وقال
وينفي في التحريم
ويكتب عليه
موال !!


وسلامي للداخلية
العادلة والأبية
بتقول للظُلم لأ
ونِعم الإنسانية !!

مفيش أي حاجا
ولا اي مُعتقل
ولا تعذيب وغيره
ومفيش فُلان إتقتل !!

ومفيش أي إهانة
للعدل والقضاء
واللي انضربوا أمانة
غلطوا وأخدوا الجزاء !!

أصلها تمثيلية
كبيرة حبيتين
قلنا نعمل قضية
تشغلكم لو يومين !!

وسلامي للتعليم
للأخلاق الرفيعة
دا التفكير السليم
إبعد عني قطيعة !!


وسلامي للشباب
اللي عايش يكافح
وداخل كُليات
والله ما هو نافع !!

خلاص يا ابني انتا
راح زمن المُعجزات
لو كان عندكـ أمل
فأمل أبوها مات !!

هتتخرج يا عيني
ومسيرك ع الرصيف
هتتشحطط يا قلبي
على حتة رغيف !!

الا في حالة واحدة
عارف انا اقصد إيه
معاك واسطة تزقكـ
ظهر بتسند عليه !!

هتلاقي نفسك فوق
في القمة الأخيرة
لو حتى كنت فاشل
عارف لُبنا وسميرة !!

وسلام أحلى سلام
وخلصت الكلام
وناوي أختم كلامي
بسلامي للنظام
بسلامي للنظام




محمد البري ـ نوفمبر 2007

هايل يا دكتور محمد

بس مين حسين

تمنياتي لك بالتوفيق

وانا كمان سلامي للنظام

هههههههه فيه غيره مُفتينا حبيبنا :)

منور يا أستاذنا والله :(

علي فكرة انا مش هعلق و اقولك القصيده روعه
ومش هعلق و اقولك ان الأحداث اللي انت ذاكرها جامده اوي و اكتر حاجة تغيظ في البلد الرخمه دي

ومش هعلق و اقولك انت شاعر تمام
خلصت فيك الكلام
ومعاك يابري مهما خبطت في النظام
ههتف معاك في سري و من غير كلام
سلامي للبري اللي مبهدل النظام
ربنا يستر يابري انا رايح انام

تسلم ايدك يا بري بجد كلماتك روعه يا دكتور

منور يا بو حيمد وشُكراً يا عمي للكلام الجامد اللي في حقي دا والله انا ما قده :)

ومنورني دايماً ـ خلي قلبك جامد ـ فيه حُرية وديُمقراطية

بجد جميلة يابرى
شىء طبيعى منك
انتوا غيرتوا اسامى عضوياتكوا ليه؟

منورة يا مُحبة الله

غيرنا ــ ههههههههه ـ لا قولي اتحذفت يلا انا بدخل كل شهرين مرة

ع العموم منورة يجميل وشُكراً لمروركـ

جميلة اوى يامحمد
فاكر انا يمكن اول واحد قراءها لما كنت لسه بتظبطها
بس بجد جميلة بتفكرنى بشعر
احمد فواد نجم

منور يا إسلام

بس دي غير دي التانية أحسن ناس دي سلامنا للنظام

شكل الخطوط ضربت

ع العموم منورني