( شباب 25 يناير)

من وسط ميدان التحرير جايين من كل البـــــــــــلدان

اللي مهندس واللي غفير كلنا إيد واحدة وجــــــــدعان

وبنهتف بالصوت العـالي بحقوق ضايعة بقالها زمـــان

نفسي أتعلم نفسي أتكـلم نفسي أعيش في سلام وأمــان

عايز مرة أعيش إنسـان من غير خوف من غير كتمان

مصر يا غالية يا أم الدنيا مش هتأخر عنك ثانيــــــــــــة

لما أحس بأي مؤامرة جوه ميدانك هاعمل ثـــــــورة

وأرمي الخوف وأجيلك علشان شارب من نيـــــــــلك

وهاغني يا بلدي بمواويلك لاجل ما تقومي علي حيــــلك

بشتقلك جوه و بره يا حبيبتي يا مصر يا حـــــرة

نسيني الأيام المرة هنيني يا بلدي ولو مـــــــــرة

ياللي العالم يشهد ليكي ياللي شبابك هيعليـــــــــــــكي

ويخليكي في أعلي مكان ياللي المولي تمللي راعيـــــكي

لما ذكرها في القرآن للعالم والناس أجمعين ادخلوها بسلام آمنيـــــــــــــــن

شعر/محمد عبدالرحمن النجار(الشهداء-ــ منوفية )

قصيدة جميلة ومعبرة مشكـــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــور

جزاك الله خيرا
فنان وموهوب

عزبة مبارك..

عزبة مبارك عزبة جميلة..
عمرك ما تلقى فيها فسيلة..
عايشين في هم ليلنا ونهارنا..
والغم ساكن معانا دارنا..
ولا مرة شوفنا راحة في ليلة..
في عزبة مبارك ..

عزبة مبارك عزبة غنيَّة..
فيها العدالة شحَّة شويَّة..
فيها الكآبة.. فيها المشقة..
اتنين معاهم وألف لأ..
ما يشوفوا لحمة غير في الضحية..
في عزبة مبارك ..

عزبة مبارك عزبة قلوب..
في قلب أسود مليان ذنوب..
وقلب فاكر الدنيا أمه..
وقلب عايش وكل همه..
يخلى شمس الوطن غروب..
في عزبة مبارك ..

عزبة مبارك عزبة سعيدة..
فيها العذاب له صنوف جديدة..
عذاب ملون.. عذاب مشجر..
عذاب يخلِّي قلبك يحجَّر..
والرحمة عن حياتك بعيدة..
في عزبة مبارك ..

عزبة مبارك عزبة أمان..
ضاع الأمل واليأس حان..
أوعاك تفكر إنك مواطن..
ليك حق عنده وفقلبه ساكن..
ده الحق باطل.. والخير شيطان..
في عزبة مبارك ..

عزبة مبارك عزبة كريمة..
طوابير كتيرة وجيوش عظيمة..
من الغلابة والمحتاجين..
مادين إيديهم.. حبة طحين..
بقت الكرامة موضة قديمة..
في عزبة مبارك ..

عزبة مبارك عزبة سعادة..
الحزن فيها له الريادة..
دموع بتنزل من كل حاجة..
وقلوب كسيرة.. وعقول سذاجة..
نسيوا السعادة.. ماالذل عادة..
في عزبة مبارك ..

عزبة مبارك عزبة إخوَّة..
حرافيش كتيرة تحت الفتوة..
يضرب ويقلع عين المخالف..
والقاضي قاعد باصص وحالف..
الخسة عدل.. والظلم قوة..
في عزبة مبارك ..

عزبة مبارك.. عزبة سوزان..
بإشارة تحكم في البرلمان..
وبغمزة يبقى الوزير غفير..
وبضحكة تبقى الأسود حمير..
وفي عيدها يرفع لها الأذان..
في عزبة مبارك..

عزبة مبارك.. عزبة جمال..
واد ابن أمه مش مالرجال..
فاكر إنه باشا وإحنا الوسيَّة..
يحكم ويأمر.. ماهى كت تكيَّة..
عزبة أبوه.. ليها اسم عال..
عزبة مبارك..

عزبة مبارك.. عزبة علاء..
راجل في حاله.. مش بالغباء..
اللى في أخوه راعى الحمى..
سمع الشباب راح ارتمى..
في حضن سوزى وهات يا واء..
في عزبة مبارك..

عزبة مبارك راحت خلاص..
لمَّا الولاد قالت خلاص..
بكفاية عدلك.. وعز عصرك..
بكفاية شرفك.. بكفاية قرفك..
قام البطل بالـ(جزمة) داس..
فوق راس مبارك.. في عزبة مبارك..

من أشعارى