يا جماعة اللى انا كتبتة فى موضوعى اللى فات هو انعكاس للوضع فى مصر يعنى ناس بتتظاهر فى الميدان وكل واحد فى سلطة معينة عاوزين يشيلوة والغريبة ان الناس اللى بتتشال كلها بتطلع حرامية انا كتبت دة من منطلق حزنى على الاوضاع اللى بتحصل فى مصر
ولو كنت اقصد اقول انهم غلطانين فى كل حاجة عملوها او احكم عليهم مكنتش قولت ان ناس كتير طلعوا حرامية ودة بيدعم موقف المتظاهرين لو انا ضدهم
ولو عاوزين رأيى الشخصى انا انبسطت جدا انهم قالوا لاء وشالوا واحد زى حبيب العادلى وزعلت على الناس اللى ماتوا
بس بردة انا بختلف معاهم فى حاجة اننا نشيل حد من غير سبب هم بيقولوا شيلوا فلان من غير ما يقولوا علشان كذا بخلاف طبعا الناس اللى معروفة بطغيانها زى واحد زى احمد عز لكن لو هنشيل كل اللى النظام السابق عينهم يبقى هنشيل معظم البلد والطريقة اللى نشيل الناس بيها لازم تبقى منطقية يعنى احنا بنتظاهر علشان نسقط فلان لأنة عمل كذا وكذا فى ورقة ونتحقق من الكلام لكن منقولش احنا مش عاوزين فلان وخلاص ويجى واحد يقولك اصلة ممكن يكون دمة تقيل مثلا
وانا بعتذر عن انى قولت عيال ولو انى طبعا مكنتش اقصدها ولكن دة احتراما للناس اللى استشهدوا واهاليهم
وبدعوا الناس انهم يقروا الموضوع مرة تانية وهيكتشفوا الكلام اللى انا قولتة فى الموضوع دة

انا حاولت اوضح الكلام دة فى اول مشاركة ليا فى الموضوع اللى كتبتة لكن واضح انة متقرأش او موضحش فكتبتة فى موضوع لوحدة

ربنا يرحمنا يارببببببببب

اللهم ولي علينا خيارنا ولا تولي علينا شرارنا

تريد مبرا من كل عيب .... و هل نار تفوح بلا دخان
******

كل ابن ادم خطاء .....

لا احد معصوم من الخطا ....

و الاعتراف بالخظا حسنة لا يمكن سترها..

احسنتى يا استاذة

شكرا يا جماعة على المشاركة وياريت الناس تقرأ الموضوع دة كمان علشان انا بجد تعبت من الردود بتاعة الموضوع التانى وبقول دة حماس علشان مزعلش نفسى

و لا يهمك يا جميل الحرج مرفوع و الزعل ممنوع

السلام عليكم و رحمة الله

اختى اسمحى لى ارد على كلامك

وانا بعتذر عن انى قولت عيال ولو انى طبعا مكنتش اقصدها ولكن دة احتراما للناس اللى استشهدوا واهاليهم


انا احترمت فيك اوى القدرة على الاعتذار ناس كتير اوى بتغلط و ميش بتقدر تعتذر

والغريبة ان الناس اللى بتتشال كلها بتطلع حرامية انا كتبت دة من منطلق حزنى على الاوضاع اللى بتحصل فى مصر

طيب كلامك بيأكد ان الشباب على حق فى تطهير البلد يبقى لازم نشجعهم ميش نحبطهم
وكمان اختى مفيش داعى للحزن على مصر الثورة دى اجمل حاجة حصلت لمصر يعنى لازم نفرح و نخطط لمستقبل اجمل

بيقولوا شيلوا فلان من غير ما يقولوا علشان كذا

الشباب قال كتير اوى عن فساد و فلسفة احمد شفيق اللى مينفعش تكون موجود المرحلة القادمة دورى و انتى حتوصلى لارائهم بس انتى اكيد محاولتيش تعرفى رائهم لانك ميش مقتنعة بيهم اصلا

حاولى تعرفى اراء الطرفين الشباب و الثورة المضادة و بعدين قررى تختارى اى طرف مع اقتناع

وانا بطلب من المشرف غلق الموضع الاول لانه اصبح الان مفيش اى داعى لاستمرار النقاش فيه

بصى يا امل انا بحترم قدرتك على الحوار وكلمة اختى طالعة منك زى العسل
بس انا ليا اعتراض على حاجة انتى بتقولى فساد وفلسفة احمد شفيق هل كلمة فساد دية ينفع نقولها من غير اثبات
صدقينى يا امل ومتزعليش منى كل حاجة بيبقى ليها مميزات وعيوب وانا لما اقول بعترض على حاجة فى الثورة مش معنى كدة انى ضدها وكل الثورات اللى قامت كان ليها عيوب بردة والتاريخ بيثبت دة ودة يوضحلك ان من حقى اعترض على حاجات فى الثورة متزعليش منى دية مش حاجة دينية مثلا
كمان انا قريت مثلا المطالب انهم يقيلوا كل الناس اللى عينهم النظام السابق من وكلاء وزارة وغيرة طيب لية منفحصش ثروتهم واللى يطلع مدان يطلع ويتحاكم ويبقى استفدنا محاكمتة والشريف نستفيد بة فى مكانة
دة بالظبط زى قرار الوزير بتعين الناس بتوع الحصة لية الناس قلقانة منة لأنة مش مبنى على قانون او اساس دة كدة ممكن الوزير بكرة يعين ابن خالتة بأعدادية
اللى عاوزة اقولة ان لازم يبقى فى اساس بنشتغل بة عاوز اقيل حد يبقى بطلب ومكتوب فية اسباب والشعب بيقول يبقى استفتاء او نمضى مجموعة كبيرة على كدة انا قصدى العملية تكون منظمة
يعنى واحد زى احمد شفيق فى ناس كتير بتحبة ولسة لم يثبت فسادة ومقضاش فترة كافية فى الوزارة للحكم علية اشيلة لية علشان الشعب عاوز كدة فين اللى يثبت الكم مليون بتوع التحرير ولا ال 80 مليون بتوع مصر وشكرا

السلام عليكم

على فكرة و الله كلمة اختى بجد زى ما انا حاسة ان اللى فى ميدان التحرير اخواتى برضه
المنشور ده اتوزع فى ميدان التحرير و موجود كل النت فى كل مكان

http://www.alwafd.org/images/news2/2010/m/ahmedshafeek.jpg (http://forums.fatakat.com/thread1264228)

احمد شفيق كان وزير طيران قبل كده ومعروف الفضايح بتاعته زى كل الوزراء

اما بالنسبة لموضوع ان كل حاجة ليها مميزات و عيوب انا بتفق معاكى

ممكن يكون الثورة ليها عيوب بس الاكيد ان مميزات الثورة اكتر بكتير من عيوبها

وهو ده اللى بيميز الحاجة الحلوة من الوحشة

الحلو مميزاته اكتر و الوحش عيوبه اكتر

يبقى الثورة حاجة جميلة لان عيوبها لاتساوى شىء بالنسبة لمميزاتها

رأيى أن كل واحد يسأل و يعرف قبل أن يقول رأيه.

ده انا كنت فكره راجل جدع طلع ابن ................. ربنا يعلم مين الصح ومين الغلط

اللهم ولي علينا من يستحق

احنا ما نقدرش نرمى حد بدون دليل واذا وجد فعلينا بمواجهة صاحب الشخصية ومحاسبته

مش عارفة بجد بس اكيد كلة هيبان يعنى لو الراجل دة كمان طلع حرامى هيبان فى الايام اللى جاية علشان بردة منبقاش ظلمنا حد
بس بجد بقى انا كل ما واحد مصرى يطلع حرامى بيحزنى بجد ربنا يرحمنا ويستر من اللى جاى دة كمان ميطلعش كدة دة الواحد بعد كدة هيشك فى كل الناس اللى بيتعامل معاهم
وشكرا على التوضيح

أحييكى اختى الفاضلة على الشجاعة الادبية
ومرحبا برجوعك
والايام هتثبت ان شباب الثوار كان معهم كل الحق

رأيى أن كل واحد يسأل و يعرف قبل أن يقول رأيه.

اتفق معك تماما

زى ماقولت لحضرتك قبل كدة "الاحترام من شيم الكرام "
ويا ريت دة يكون طبعنا كلنا عدم التشبث بالراى لان دة بصراحة من افات الشعب المصري
مع وافر تحياتى لانسانة محترمة

مجرد سؤال
هو مين اللى ليه الحق فيه قبول الاعتذار او رفضه
اعتقد الاعتذار المفروض يكون موجه للرجاله بتوع ميدان التحرير مش لينا احنا
و عامة هذا لا ينفى انك انسانة محترمة و الرجوع الى الحق فضيلة و عن نفسى انا خلاص المسامح كريم