http://www4.mashy.com/photoalbum/data/3898/abu_zayet.jpg





الجنية المصري بقى ملطشة !
بالذمة ده منظر عملة وطنية؟!
ايه اللي بيخلي الشعب المصري يتعامل بالأسلوب ده مع الفلوس؟

أصبح من الطبيعي جدا انك تتعامل بفلوس لها لون وطعم وريحة كمان، فلوس تعرف ان اللي اتعامل بيها قبلك كان ميكانيكي او طعمجي او نقاش.. مش بس كده.. المصريين بيتعاملوا مع الفلوس مش كأنها عملة للبيع والشرا ..لا .. وانما كانها وسيلة للدعاية والإعلان! (راجع الصورة بالأعلى)

جنيه مصري غلبان يصبح مكتوب عليه انه يكون طول عمره للذكرى الهباب وايام العذاب والنوم ع التراب او واحد تاني يجيله مزاجه يكتب ع الفلوس اسم مولوده الجديد .. انا جيت نورت البيت 1/1/2007 .. او واحد تالت يكتب كلمات للذكرى لحبيبته .. او واحد رابع بيعد فلوس مثلا وعشان مينساش يكتب اخر رقم وصله على اول جنيه يقابله، او واحد بيعد رزم ويكتب على كل رزمه اسم صاحبها الخ.. والجنيه المسكين غلبان وبيستحمل

والحقيقة ان ده جزء من ثقافة المصري سليل الفراعنة اللي كانوا بيكتبوا ع الحيطان، فمش غريب انه هو كمان يكتب على حيطان المترو وابواب الحمامات وكراسي الاتوبيس.. الجنيه يعني هو اللي جدع!

وعلى رأي عمنا بيرم لما قال:
هتجن يا ريت يا اخونا مرحتش لندن والا باريس
دي بلاد تمدين ونضافة وذوق ولطافة
وحاجة تغيظ

عمرك مسكت ورقة دولار او يورو .. بالذات اليورو .. ايه النضافة دي يا جدعان .. العملة ماسكة نفسها والوانها هتنطق حتى الورق ابن حلال مبيطبقش كده زي الجنيه .. عملة اليورو معمولة من اوراق بنكنوت مخصوصة تشبه البلاستيك عشان متتوسخش والا تتقطع .. بينما سهل وطبيعي جدا انك تتعامل بجنيه مهربد وملزوق بالوان زاهية ! شيكارتون بني او شريط لحام ازرق واحمر !!

مش غريبة ان السواح يرفضوا يتعاملوا بالجنيه بتاعنة ويقرفوا يمسكوه...

صاحبنا اللي عامل الخمسين قرش اللي فوق دي (وهي بجد على فكرة) شاف انه ارخصله يعمل ختم ويطبع اسمه على كل العملات اللي بيتعامل بيها كنوع من الدعاية غير المكلفة وسريعة الانتشار كمان.. مش غريبة بقى لو لقينا في يوم من الايام الواحد بيكتب ايميله على الجنيه بالطريقة نفسها .. عباس عباس اندرسكور فيفتين @ طرف الحاج ياهو دوت كوم :)

ههههههههههههه يعني هو بيتعامل مع الفلوس كدا وبس لا دا مع كل حاجه

والله موضوع حضرتك هام جدااا
بس تفتكر إن الجنيه ده عمله
الجنيه ده بقى شىء منقرض دلوقتى

ماسك فى الهيافات حضرتك وسايب الكبائر

لما الجنيه يبقى له قيمه أكيد هيهتمو به

فعلا انت عارف ان لو الجنيه ده لو قيمة


الكل هيحافظ عليه ومستحيل تلاقى


ورقة عملة اجنبية زى الدولار او خلافة مكتوب


عليه او بس متشخبط عليه ده ليه لانه ليه قيمة


وشكرا لموضوعك

هههه
الجنية اصبح حاليآ ما هو الا قصاصة ورقية تحمل توقيع (فاروق العقدة)!!!!!

كدا ممكن نقول الكرنيه غلب الجنيه

بصراحة زى ما الاعضاء اللى قبلى قالوا لو الجنية اصلا له قيمة فعلا مكنش استهتروا كدة بية
ودة ان دل يدل على عدم تحضر المصريين اللى بيعملوا كدة

بس انا ليا تعقيب بسيط لو تسمح لى

(والحقيقة ان ده جزء من ثقافة المصري سليل الفراعنة اللي كانوا بيكتبوا ع الحيطان، فمش غريب انه هو كمان يكتب على حيطان المترو )


حضرتك المقارنة هنا فيها فرق كبير الفراعنة كتبوا على الجدران مش عدم تحضر ولا اهمال لا دة تدوين حضارة وطبعا كانت فى كتابات خاصة بالمعابد والديانات انما المصريين دلوقتى بيكتبوا على الجدران اهمال وعدم تحضر

حلو جدا الادرس بتاع الايميل بتاع عبس ده

مش عارف انا ايه حكايه الجنيه دا

يا عالم دى عملة السودان اغلى من العملة المصرية !!

عباس دوت نت
هه

خلاص فعلا زى السادات ماقال
الجنية مش بقى ليه اهمية

شكرا

اولا احب ارد علي العضو MohammeD el_SadaT
واقولة دي مش هيافات يا سيدي الفاضل
لان الي انت بتقول عليها هيافات دي بتعبر عن شكل بلد قدام اي واحد غريب بيدخلها
بذمتك مبتقاش مكسوف واي حد من برة ماسك عملة زي دي وبيتريق عليها
وبيقول علينا اننا عايشين في بلد متخلف وهمجي
مش عارف هنفضل لحد امتي نفكر بالطريقة بتاعتك دي علي العموم دي وجهه نظرك وانت حر
......................
واحب اقول للعضو fares elnet
ان الجنية اكيد لية قيمة حتي ولو كانت بسيطة
لان من غير الجنية اكيد مش هتعرف تعيش علي الاقل مش هتعرف تركب مواصلة
....................
واحب اقول للعضو dody_cat
ان الي هملوة الفراعنة رغم جماله الا انه علم بيقت الشعب الهمجية وعدم التحضر وعلمهم ان الطريقة الوحيدة لتخليد الكتابة انك تكتبها علي الحيطة
لاكن علي العكس في الغرب اي حد بيدون في حاجة اسمها مدونة وبعد كدة بتنزل علي شكل كتاب اي حد ممكن يستفيد منه
انا مش معاكي في الي انتي قولتية دة حتي ولو كان الي بيكتبوه الفراعنة حاجات مهمة وحضارة غلط برضة انهم كتبوه علي الجدران
.........................................



...........................

السلام عليكم و رحمه الله وبركاته
احب اشكرك جدا يا AM_Online علي الموضوع

بص ياسيدي انا مش هقولك ان الجنيه ملوش قيمه و من غيره مكنتش مكنتش جبت الكمبيوتر ووصلت النت و بكلمك دلوقتي
رغم ان قيمته صغيره بس برده اهوه بينفع

انما مش ده موضوعنا
حضرتك تقصد عدم التحضر و الهمجيه في التعامل مع الفلوس
وانا معاك في كدا
بس لما هكلمك عن عدم التحضر
يبقي بجد هرجع لنفس النقطه ان الجنيه ولا حاجة
يعني الدائرة مقفله
يعني مثلا هاتي ورقه بـ 100 جنيه كدا و قارنلي بيها
اتحداك لو جبتلي ورقه بـ 100 جنيه و متعامله المعامله دي
هوا فعلا لو حاجة قيمه كانوا حافظوا عليه
بس هوا لا شئ


واحب اقول للعضو dody_cat
ان الي هملوة الفراعنة رغم جماله الا انه علم بيقت الشعب الهمجية وعدم التحضر وعلمهم ان الطريقة الوحيدة لتخليد الكتابة انك تكتبها علي الحيطة
لاكن علي العكس في الغرب اي حد بيدون في حاجة اسمها مدونة وبعد كدة بتنزل علي شكل كتاب اي حد ممكن يستفيد منه
انا مش معاكي في الي انتي قولتية دة حتي ولو كان الي بيكتبوه الفراعنة حاجات مهمة وحضارة غلط برضة انهم كتبوه علي الجدران
.........................................



...........................




بص حكايه الكتابه دي مش غلطه الفراعنه
الفراعنه كانوا ناس بيفكروا
علموا حضارة
دونوها في اماكنها المخصصه
جدران المعابد .. القبور

مش ماشيين يعلمه علي كل حاجة زي الحيوانات بدون درايه
يعني المشكلة مشكلة الغبي المتخلف - سوري في الالفاظ - اللي اتعلم غلط

بس ...
ده رأيي الشخصي
شكرا

اه صحيح ليا تعليق صغير عن انك بتقول للسادات " انت مش مكسوف من نفسك و هما بيبصوا علي العمله و بيتريقوا عليها "

و النبي تسكت
هما يعني مستنيين يشوفوا العمله عشان يتريقوا علينا و يعترفوا بتخلف البلد
احنا في خيبه و هما عارفين كدا كويس ... مش العمله هيا اللي هتبين يعني

صحيح ده مش جنيه ... ده 50 قرش(^_^)..

ياعم الحج مش هتفرق كتر خيره وفعلا الجنيه من حقه يروح المحكمه ويشتكي

انا ببين لك بس سؤ استخدام الحرية عند الشعب المصر (( مش كل الشعب ))

معظم الناس بتفتكر ان الفلوس الي معاها بتعتها وعلشان كدة بيتعاملوا معاها بالطريقة دي

لكن الصح ان الفلوس دي ملكية عامة يعني بعد ساعة ويمكن اقل الفوس الي في جيبك هتبقي مع غيرك يعني المفروض تحافظ عليها زي ممتلك عام

انا ببين لك بس سؤ استخدام الحرية عند الشعب المصر (( مش كل الشعب ))

معظم الناس بتفتكر ان الفلوس الي معاها بتعتها وعلشان كدة بيتعاملوا معاها بالطريقة دي

لكن الصح ان الفلوس دي ملكية عامة يعني بعد ساعة ويمكن اقل الفوس الي في جيبك هتبقي مع غيرك يعني المفروض تحافظ عليها زي ممتلك عام


اوك انا في دي معاك
بس مش تقول ده جزء من ثقافه المصري سليل الفراعنه
ده كلام يا راجل

اية يا احمد هوة المصري مش سليل الفراعنه ولا اية ؟؟
دي طريقة لنسب الحاضر الي الماضي مش اكتر
وبعدين يا سيدي انا اسف
المصري ابن الفراعنة (اقصد ابن حضارة الفراعنة )
حلوة الصيغة دي ؟؟؟

علي العموم الاختلاف في الراي لا يفسد للود قضية
احيك اخ احمد علي ردودك

ههههههههههههه يا سيدي و الله انا عارف سليل يعني ايه
اوعي تكون فاكرني مفكرها شتيمه
انا الحمد لله افهم في اللغه العربيه شوية
بس انا عملت ايجاز بالحذف
يعني انت بتقول في الموضوع
ده جزء من ثقافه المصري سليل الفراعنه اللي علموه يكتب علي الحيطان
و وضحتلك ان المتعلم هوا اللي متخلف مش المعلم
فهمت قصدي ؟
شكرا للموضوع الجميل من العضو الاجمل

شكرا اخي الكريم احمد باشا رضا
وعلي العموم انا متاكد من قوة فهمك للغة العربية