أولا مش عايز حد يحطلي صورة الاقسام الرياضية
انا حطيت الموضوع في قسم الزمالك عشان لو في زملكاوي مش واخد باله ولو في حد اهلاوي عايز يناقش يناقش هنا
القسم مش ضلمه يعني

- أ -
بسم الله الرحمن الرحيم
و بة نستعين

الف مبروك يا اهلى الف مليون مبروك
( زغروتة حلوة رنت فى بيتنا ) ( وزع الشربات الاحمر يا واد يا حمو )
وزع الشربات خلينا نفرح .. الناس كلها فرحانة .. الناس أصلها مطحونة
و طلعان طراطيرها و لازم كل فترة تحصل نصرة حتى و لو كانت فى الكورة
عشان الناس تنسى القهر اللى عايشة فية و الفساد و الضياع و التلوث
و المدارس و الامراض و ضيق العيش .. فعلا الناس لازم تفرح
و هو يعنى أحنا مكتوب علينا نعيش فى قرف و خلاص
مش مهم بقى نفرح ازاى و الا لية المهم نفرح بقى و نزقطط و نرقص
و نهيص و نغنى كلنا و نقول .. نقول ..
طب ها نقول أية ؟ ها نقول أية يا شباب ؟
مفيش غير أهلى .. مفيش فى مصر غير الاهلى !!!
أصل منتخب مصر خلاص بقى موضة قديمة مش مهم يلعب مع مين
و مش مهم مين يدربة و مش مهم ها يلعب امتى
لكن المهم أنة يكون فى حاجة أسمها منتخب مصر المزيف
و أحنا اصلنا مش ها نخلص من التقاد و الاعلام و الكتاب و التقطيع
يبقى لازم نعمل منتخب مصرى مزيف و نسيبهم يهربدوا فية زى ما هما
عاوزين و يروح و يلعب و يسافر و نجيب حسن شحاتة مدرب أو نجيب مدرب
بأسم عالمى قاعد على القهوة خللى الناس تفرح بالاسماء و خللى الزملكاوية
يسكتوا اهة جبنا شحاتة مدرب للمنتخب .. فى أكتر من ة عدل ؟؟
بس فى نفس الوقت ها نعمل منتخب تانى أصلى و حقيقى و نسمية أسم مموة
اسم رنان أسم يدق فى القلب نسمية أية نسمية أية ؟
نسمية ( الأهلى ) .. آه هو الاهلى اية مستغربين لية ؟؟
هى دى الحقيقة الناس 70 % على الاقل فى مصر اهلاوية
مش هى دى الحقيقة .. اللى بيفهم كورة و اللى ما بيفهمش و اللى مالوش فيها
و اللى بيكرة الكورة و الستات و البنات و ربات البيوت
و كل الفئات الشعبية مع وافر الاحترام لها و الاطفال و اولاد الشوارع و كل الفئات التى تنتمى للجهلة كرويا
كلهم على بعض كدة أهلاوية و نهتم بقى بهذا المنتخب الاصلى اللى اسمة الاهلى
بجد بقى و نعمل عشان خاطر عيونة كل حاجة على راحتنا
ما اهو أصل ما حدش ها يهاجمنا خلاص و لا يقرفنا
الكتاب و النقاد و الاعلام و الجرايد و المجلات و الحكام و الكبار و رؤساء الاتحادات
و الناس و الستات و العيال كلهم اهلاوية
مين بقى اللى ها يهاجمنا .. بالعكس دول ها يحبونا و يساندونا
و يدمروا اى حد يفكر يقف فى مصلحة و سعادة الأهلى
و نحقق البطولات جوة و برة و نحلق فى سماء الانتصارات المحلية
و الافريقية و العالمية و العربية و كل حاجة و نعيش عيشة زى الفل
و كل سنة نضمن كام شهر فى السنة
البلد كلها فرحانة و مبسوطة و 70 % من اهل البلد يطلعوا لسانتهم لل 30 % الباقيين
و يقعدوا يذلوا فيهم و يطلعوا حبابى عنيهم
و فى الاخر ها نقول دة الاهلى بيلعب بأسم مصر ... فيين الروح فين الاخوة فين المحبة
لازم كلنا نقف جنب الاهلى ما هو اللى رافع راسنا
ما هو اللى بينول المراد و بيحقق السعادة و بيجيب الافراح
لازم كلنا نقف جنب مصر ... أسف جنب الأهلى .. ما هو برضة مصر !!!
مش هو دة اللى الاهلاوية بيطحنوا فى كل الفرق و خلق الله عشان يوصلوا لة الحمد لله بردت خلاص ؟؟؟
زرعت .. سقيت .. رويت .. يا اهلى ( ظلما و نفاقا و جورا و فسادا و كذبا و خداعا )
فحصدت (بطولات و انتصارات ) زائفة ظالمة غانمة و حبا من ملايين لا يفهمون فى اصول اللعبة
لكى حق يا امريكا فيما تفعلينة فى العالم فنظامك فى الحياة هو الامثل اضرب اليمين فى الشمال و الشرق فى الغرب تسود العالم و الاهلى الان يسود مصر كرويا و رياضيا و لسة الغزوات قادمة
هذا الموضوع يقرع كل ما هو واقع اليم نحياة منذ الصغر وصولا بنا حتى الكهولة ان اعطانا الله العمر
فالنادى الاهلى وصل الى ان يكون النادى النجم و الاوحد فى مصر و حدد اهدافة منذ زمن للوصول الى ما وصل الية فهو نادى الدولة و نادى المليونيرات و نادى الحكومة كما يطلق علية البعض ..هو احسن نادى فى مصر لكن لماذا ؟؟ لماذا يعتقد الناس او يظن انة الاحسن ؟؟
سنتحدث عن كثير مما يحدث حولنا فى ساحة الرياضة التى تم أغتيال برائتها عن عمد و عن سوء قصد و ترصد
كنت أتصور و انا طفلا يحبو - بمناسبة الحديث عن علاقة و ارتباط النادى الاهلى بالحكومة الوطيدة و اللصيقة – انهم أى رجال الحكومة الكبار المنتمين منهم الى النادى الاهلى سيسمحون لروساء الاهلى القدامى ثم و انا كبيرا لحسن حمدى و بيبو و القيعى و من قبلهم حتى لا ننسى صالح سليم رحمة الله سيسمحون لهم بأنشاء حزب يسمى بحزب الاهلى و كذا كم كنت أتخيل و أنا صغير انة يوما ما سيتم اقامة دورى لكل الفرق المصرية العادية المسكينة .. دون ان يشارك فيها النادى العظيم و الصرح العالمى كما يطلقون علية فى صحافة مصر الغير شريفة .. و سر عدم مشاركة الاهلى هنا هى انهم يقوموا بأهداء النادى الاهلى درع يحتفظ بة دون ان يلعب حتى لا تغضب جمهورية مصر الحمراء كما يظنون ايضا ...و لكننى تفهمت تماما عدم قيام الحكومة ممثلة فى الكبار المتخفيين و اتحاد كرة القدم و صاحبة بالطبع رجل اهلاوى الانتماء بلا جدال و كالعادة ... و السر فى عدم اهداء الاهلى الدرع دون ان يلعب معناة واضح جدا
و هو ان فرحة الجماهير ستكون مكبوتة محبوسة ليس لها طعم ...او حلاوة ... او متعة فكان الحل الامثل هو الاصرار على اقامة البطولة و مساندة الاهلى بكل الطرق و الاساليب الشرعية و الغير شرعية بالاستعانة برجال الصحافة و النقاد و الاعلاميين و الكبار من رجال الدولة و كذا بالطبع الحكام و معهم رئيسهم و فى غالب الظن يكون منتمى اليهم حتى تكون الطرق غير وعرة للوصول الى اهدافهم و تظل المساندة قائمة بكل السبل حتى ينال النادى الاهلى المراد و يعتلى قمة الدورى المحلى و الكأس بالطبع و تتوالى الانتصارات ثم تتوالى بقوة
فيطلقوا على ناديهم الالقاب و التعريفات منها المارد الاحمر .. الشياطين الحمر .. الفارس الاحمر .. روح الفانلة الحمرا ... فتسحر اعين و عقول الناس فى مصر خاصة الغلابة و الجهلاء منهم و يعيشون وهما اسمة الاهلى الفغريق الذى لا يهزم قط .. الفريق الذى عندما يهبط لاعبوة الى ارض الملعب يرتعد المنافس و يتكهرب الحكم و النتيجة محسومة مسبقا و الحلول معروفة و كأنها لاعبا احتياطيا داخل ارجاء الملعب ... ثم تعرف جماهير الاهلى الطريق الى الثقة فى فريقها حتى و هو فى اضعف حالاتة فهناك ثقة فى تحقيق الفوز و نشعر بها دوما فى ماتشات الاهلى مع الزمالك و تلك الثقة سلاح قوى مع الجميع و هى الطريق الى الاجادة و التألق و لو خالفهم و عاندهم الحظ فادواتهم موجودة تحت السمع و الطاعة مولاى المارد الاحمر .. وقت بدل ضائع فى الشوط الاول اكثر من الثانى ... ضربات جزاء لطيفة خفيفة على القلب مريحة للاعضاء و النفس و يفوز الشيطان الاحمر فى النهاية ..( كالعادة ) الطبيعية فالغير طبيعى هو ان يهزم !!! فاذا فاز الاهلى بجهدة و هو يستحق طبعا لقوة و روح لاعبية المعهودة و التى وصلوا اليها بعمل و جهد رهيب من ادارة و حكام و حكومة و اعلام و مساندة خرافية نعلمها جميعا اضافة الى انتقاء الافضل من اللاعبين و بالطبع من يريد ان يلعب سيتمنى اللعب دائما فى الاهلى فهو من سيفوز و من خلفة تأتى الخيرات لانة يفوز .. فلماذا يذهب اللاعب الى نادى ضعيف ؟؟
و اذا ذهب فيكون بعد فوات الفرصة للعب فى صفوف الفارس الاحمر و ليس كما يظن البعض حبا فى الاخر
و اذا حقق الاهلى الفوز باستخدام احد ادواتة من حكام وما يملكونة من وقت ضائع و ضربات جزاء و همية و تحجيم للملعب و للمنافس بكل الطرق الغير محسوسة لمن لا يفهم فى كرة القدم و هم كثيرون جدا فى مصر ممن يهللون للفوز و يصرخون بمجرد تحقيقة دون وعى او ادراك بكيفية الوصول الية و احيانا بوعى و ادراك و لكن بالبلدى ( كدة يعملوا فيها عبط )و يهاجموك قبل ما تتكلم بموضوعية و لو اتكلمت يعد لك البطولات و لو اتكلمت اكثر يفكرك بالنتائج الكبيرة الساحقة و لو تبقى لديك نفس تخرجة يسبك و يتهمك بانك معقد و تعانى من الاظطهاد ثم السب و الشتم بلا موضوعية فيقول الغالبية منهم بالبلدى برضة ( هو كدة كسبنا بالكوسة بالعدل المهم كسبنا مش مهم ازاى )
و نعود الى موقف ان يفوز الاهلى باستخدام احد ادواتة عند ( الزنقة طبعا ) تجد فورا اعلام قوى مساند يفند لك و يشرح بكل الطرق كيف كان الحكم عظيما و كان موفقا و عشرة على عشرة و من يظن العكس فهو مسكين لم يرى لان جهاز التفاز عندة قديما او عتيقا او تالفا ..و هنا ترى علاء صادق و شوبير و مدحت شلبى و الشيخ طه و زيزو و بيبو و حبايبهم الحلوين ( هناء و شيرين ) و هاتك يا دفاع عن الاهلى و عن فوزة المستحق حتى تسكت الاقلام الشؤيفة و تقع دون مقاومة و يتمكن جمهورهم الغفير من العيش فى هدوء حتى لا تعكر عليهم جماهير المنافس فرحتهم بالفوز الحقير كما حدث مع حرس الحدود و المنصورة و كثيرون من قبل
ثم يأتى دور الصحافة فى ارهاب الفرق المنافسة و اضعاف شوكتهم قبل ان ينزلوا الى ميدان الملعب
فيجهزوا علية نفسيا و معنويا و ما اقوى تأثير هذا الاسلوب فى المنافسين الغير مؤهلين فعلا للعب امام الاهلى
أعرف تماما ان الله موجود و يرى كل هذا الظلم و كثيرا بالطبع ما تنزل رحماتة فى الملاعب ضد الظلم ........ و لكن الستم معى ان الله دوما ما يترك ظالمين يهيمون فى البلاد و يسفكون الدماء و يسرقون و يزنون و يتلاعبون بالناس و يرتشون و يتمتعوا بالدنيا مثل الخنازير طويلا حتى ياتى عقابة .. و هو آت بالطبع لا محالة و لكن احيانا يؤخرة الله تعالى و لا اعتراض ابدا على ارادة الله فهو يفعل ما يشاء ..
و من هنا يتوغل فى عقول المصريين ان الاهلى هو نادى مصر الاول لان المهم عندهم هو الكم و ليس الكيف الفوز و ليس الجهد النصر و ليس العدالة البطولات و لن يسألوا كيف جاءت فالردود مقنعة و منطقية و الاسباب الخفية مهما كثرت فهى عند لحظة الفوز و الفرح صوتها خافت يتوة وسط غابة ترتدى اشجارها لونا احمر
فلن ترى الا الاحمر فى كل مكان و اذا ظهر لك صوتا قام عليك حروب حملة الطبول و المباخر و اوسعوك سخرية و اتهامات بالاظطهاد و الغباء و التخلف و هكذا و هلم جرة و يسود لدى المجتمع المضحك القناعة التامة بان الاهلى لا محالة البطل المستحق لاى و لكل شىء فهم الجميل العفيف المنتصر و هم يحبوا الانتصار و فرحتة و بالطبع لا يحبون الهزيمة و الانكسار حتى لو كانت هى العدالة فهم هنا لن يسمعون و لن يفهمون و يتواروا هروبا من الحقيقة بكل الطرق و الردود الغبية و لذلك تجد الزملكاوى فى اى مكان فى العالم يقول دائما ان الاهلاوية لا يفهمون فى الكرة هم فقط يفهمون لغة الفوز و لا يهمهم كيف يتحقق و من اين يأتى المهم ان يأتى و يسعدهم و ينسيهم مشاكل الحياة و ضيق العيش و اهى مش ناقصة بقى ..
اضف الى ذلك امر هام جدا و هو دور المعلقين الرياضيين على مر الزمن و منهم بالطبع ( حسين مدكور و على زيوار و ميمى الشربين و مدحت شلبى و محمد حسام و احمد شوبير ) فدورهم بالطبع كان رهيبا فى تعميق حب الاهلى فى قلوب الجماهير و الشعب المصرى عامة بالصراخ و التهليل و الاشادة غير الطبيعية بالاهلى و الخطيب و زيزو و اكرامى و البطل و شطة و فلفل و كمون و حسام و بلال و متعب و بركات .. و وليد صلا الدين الذى بمجرد ان ترك الاهلى تركتة الشهرة و حب المعلقين و الاشادة .. ضاع يا ولداة .. لانة تجرأ على العملاق الاحمر .. لن انسى و انا صغير على زيوار و هو يصرخ كالمصعوق ذعرا من فن الخطيب و هو يقول كلمة يا بيبو يا لعيب مع تخشين الصوت بكل قوة عند ذكر كلمة بيبو فتشعر معها انة ليس لاعبا بل ساحرا او قائدا عملاقا فيترسخ بالطبع فى اذهان البسطاء من الناس العشق و الرعب و الفخر و المشاعر المختلفة التى تؤدى بنا و بهم فى النهاية الى حب و عشق الاهلى ... اكرة شىء الى قلبى ...
و لن انسى افلام المقاولات التى شارك فيها اكرامى و عادل امام لترسيخ فكرة الاهلى هو البطل هو الحب هو العشق هو كل شىء و الاخرين خاصة بالطبع الزمالك ( بعوضة فى طبق غسيل بلاستيك ) فهو اى الفيلم لا يحبب الخلق فى الاهلى فقط لا بل يحثة على كرة الزمالك ايضا بالسخرية منة و التقليل من شأنة تماما مثلما فعل
تامر حسنى و بلال فضل و عبلة كامل و على النقيض تجد الوحيد الذى تجرأ و هو نور الشريف ليؤدى دور لاعب الزمالك تجدة لم يتعرض بالاساءة للنادى الاهلى او التقليل من شأنة و لكن لفيلمة كانت قصة اجتماعية تناقش من خلال الرياضة و ليس فيلما للساءة الى النادى الاهلى كما يفعل الاهلاوية المتعصبين فعلا .. و يمكن كان صعب علية انة يعمل فيلم يهاجم فية الاهلى لأنة كدة ها يبقى بيهاجم مصر !!!
ثم لن ننسى كلمة الاهلى نادى المبادىء و القيم و نسوا ان يضيفوا اليها و سارق اللاعبين و محطم الاندية خصوصا الاسماعيلى عدوة الخفى و المقاتل الشرس لة فى سواحل مصر ..
الاهلى سرق لعيبة الاسماعيلى كلهم فى ثلاث سنوات ركن اللى ركنة و رمى اللى رماة و استعاد بالباقى المهم الاسماعيلى يبعد عن وشة
و نفس الكلام بيعملة طبعا مع الزمالك يفاوض كل لاعبية
الجدد و القدامى و ياخد اللى يقدر ياخدة و يرمية او يلعبة أو يركنة
لكن المهم ندمر الزمالك
و اينو فين دلوقتى ؟؟ أينو زى البيت الوقف لا أحنا مستفيدين بية و لا الاهلى لسة اخدة
المهم على الاقل احنا خسرناة خلاص
و الجديد اوى أن الاهلى بنفسة هو اللى بيحرك البيت الابيض من الداخل
فيأتى برئيس لنادى الزمالك يسمع الكلام و يقول حاضر طيب نعم
و لو جعجع و فتح صوتة فى الاهلى زى ما عمل مرتضى منصور و ان اخطأ
كثيرا فى الاسلوب و لم نتفق معة رغم ان كل ما قالة كان صحيحا
تثور كل الطوائف ضد مرتضى منصور حتى يصبح فى نظر المجتمع
مجرم حرب .. ما هو أصلة بيحارب الاهلى و أنتوا نسيتوا مين الاهلى ..
الاهلى هو مصر بس مموة و فى السر
الاهلى لعبة سياسية بحتة
فرضتها علينا الظروف و الاهواء
الاهلى ياتى بمجالس ادارة للزمالك تذهب الية فى عقر دارة
و تدين لة بالولاء و الطاعة حتى تنال الرضا و الثناء
حتى تنال رضا عظمة مولاى حسن حمدى و كبار رجال الاهلى
فى مصر و المعجزة الابدية التى لن تنتهى و لن تزول ابدا
محمود الخطيب .. الاهلى هو اللى بيعين عضو مجلس ادارة
زملكاوى نسى كل الظلم و القهر اللى عملة فينا الاهلى السنسن اللى فاتت
و رايح يشجعهم و يمسك علمهم و يقول بيب بيب أهلى
و يوزع عليهم فلوسة و النادى بتاعة مش لاقى ياكل
و لعيبتة فى منهم اللى بيشحت بياتة فى شقة مفروشة
و بيصوتوا عشان ماخدوش فلوسهم .. الاهلى هو اللى أطاح بمرتضى منصور
و هو اللى ها يطيح باى رئيس زملكاوى عاوز اى فايدة للزمالك
و ها يجعجع فى وش الاهلى و يقول لهم لأ يا أهلى ..
اللى ها يقول للاهلى لأ ها يطير و ييجى بدلا منة
اللى يطاطى و يبوس جزمة مولانا السلطان
هى دى القيم و المبادىء بتاعت الاهلى مش كدة
بيسرقوا الفرحة من عيون الناس بالقوة و القهر و الظلم تحت مسمى
المبادىء و القيم و المثل
و مين ها يشهد لهم ؟؟ شوبير و الا مجدى و الا هادى و الا علاء صادق
و الا محمد حسام الدين و الا الغندور دلوقتى ؟؟
مين يقدر على الاهلى ؟
مين قدر على عصام عبد المنعم لما ضيع منتخب مصر المزيف باهمالة الجسيم
مين قدر علية لما صنع و غير و بدل و الف لوايح و قوانين و قرارات جديدة عجيبة من اجل الاهلى ( منتخب مصر المموة الأصلى )
مين قدر علية لما مرمط المصرى البورسعيدى بقراراتة اللعيبنة
و مرمط الزمالك و سرق منة لاعبية و ضرب باحكام القضاء كل الحوائط
و انشا محكمة رياضية مضحكة مكان انعقادها كان تحت سلم عمارة
لا يعلم مكانها الا هو .. عصام مرمط الزمالك و مرمغ الدورى و الاندية كلها
فى التراب من اجل خاطر و عيون الاهلى و الكل وقف ساكت و بيتفرج
عمل البدع عشان الاهلى يبقى الفريق اللى انتوا شايفينة من ثلاث سنوات
و سيظل هكذا الى الامام و لن يقع طالما الاساسات قوية و الاعمدة لن تنهار
عصام عبد المنعم طلع لسانة للناس كلها لكل الاندية كبيرها و صغيرها
محدش قدر يقول لة تلت التلاتة كام ؟؟
مين قدر على عبد صالح الوحش ؟ مين قدر على سيد متولى لما بهدل
الزمالك قبل كدة فى بورسعيد و لما طلع تانى بهدل الزمالك فى قناة الاهلى
و قعد يعتذر و يقدم فروض الولاء و الطاعة للاهلى على الهواء ؟
مين يقدرعلى محمد حسام الدين ؟ مين يقدر على سمير زاهر و شوبير
نائب رئيس مجلس ادارة الاهلى ( مصر ) ؟؟؟
مين يقدر على شوووووووبير ؟؟ مفيش حد قادر علية
بيعمل كل حاجة و أى حاجة و ما حدش قادر يفتح بقة
كلكم عارفين هو عمل أية من داخل الاتحاد و الفاكس أياة !!!
و لا حد قدر يقول كلمة و اللى قال لة كلمة الله اعلم احوالة اية دلوقتى ؟؟
شوبير قاعد لنا ليل نهار فى دريم يمرمغ فى الزمالك و يفتح فى مشاكلة
كل يوم و كل ساعة و كل ليلة و فى نفس الوقت عمال يعمل دعاية
من كل الانواع للأهلى ناقص يجيب شيوخ تقول ان الدعاء للاهلى فرض علينا
بعد ما جاب شيوخ كفرونا و دخلوا تشجيع الاهلى و حبة فى سور القرآن الكريم
مين يقدر على عدلى القيعى و محمود الخطيب و مين يقدر على الاهلى ؟
مين يقدر يقف فى وش الاهلى ؟
يقدر اى حد يهزم الحزب الوطنى الحاكم ؟؟
يقدر حد يهوب او يقرب من وزير او عضو مجلس شعب كبير ؟
حواليهم جيوش جرارة بتحميهم وحشين كانوا او حلوين
مين يقدر على الفساد ؟؟
يبقى مفيش حد ها يقدر على الاهلى ...
لان الوجة الاخر للكبار و لعبة السياسة فى مصر المحروسة
و هناك اشياء اخرى
تلتف حول اعناق رجال الادارة فى النادى العظيم الاحمر لن نتحدث عنها الان الا بعد ظهور الحقائق و الخبايا و القصص المرعبة عن الفساد و المفسدين .. كم أنا ىسفا لاننى اضعت مثل هذا الوقت فى الحديث عن امر يمس الرياضة و هى من امور اللهو و التسلية و كم اخشى ان يحاسبنى الله على هذا الوقت الكبير فى الكتابة و لكننى مؤمنا و بشدة ان ما يحدث فى مصر بلدنا الحبيب و فى مجال الرياضة التى هى لغة الحب و الود و الصداقة و التنافس الشريف تحولت بفعل الاشرار فى مصر الى سبب من اسباب الشقاق و العداء و الخوف و السب و الاذى و الحقد و الكرة تحولت الى ما نحن فية الان من منافسة غير شريفة و محاكم و قضايا و خرجت عن نطاق اللهو و التسلية و ارتدت ثوبا اسود يلهو فى ساحات المحاكم و ليس فى الملاعب الخضراء .. ما يحدث فى الراضة فى مصر من بغض و كراهية تولد حقد و عداءات مسمومة قد يؤدى برجال و شباب الى جهنم الحمراء و بئس المصير لانهم و هم فى سبيلهم عن الدفاع عن امر يسير مثل نادى او مباراة قد يخسون دينهم بكلمة من كلمات السباب او بلعنة لدين او فسق فى القول كم هى خطيرة اذا الرياضة التى قد تهوى ببعضنا الى النار فلهذا تحدثت و اعلم ان الله لن يغضب منى ان شاء الرحمن
كل ذلك لم يحدث بالصدفة بل هو بفعل فاعل و الفاعل متعمد و مترصد و غير شريف و هو المتعصبين و الفاسقين الفاشلين ...و لننى مؤمن بخطورة دور الرياضة فى مصر و تأثيرها المباش فى النشىء و الاجيال و الشباب و الشعوب لم اكن لاضيع ثمين وقتى فى الحديث عنها لكننى اتحدث و بقلبى المنظور الايمانى لدور الرياضة الحقيقى فى تنمية الحب بين الشعوب و الود و الجمال و ليس ما يحدث حاليا من تخلف فى الساحة الرياضية و اصبحت مجالا بغيضا و مرتعا للخبثاء و المتملقين و المنافقين و الكاذبين
هذ ة هى قصة النادى الاهلى محليا و أنا سأختلف معكم انها قصة فى ايجاز فما يقال يحتاج لسطور عريضة ضخمة لن تتحملها صفحات الموقع الجميل الاحب الى قلبى من الناحية الرياضية لانة موقع لا يكذب و لا يتجمل و يقول الحق لنا او علينا و هذة ابسط معنى العدل و الطهارة و الشرف كرويا على الاقل
اتمنى ان تكون الفكرة قد وصلت الى العقول و الالباب البضاء الشريفة التى لا تحب ان يفوز فريقها بظلم او جور على حق الاخرين ... قريبا سوف نتحدث عن الاهلى الافريقى او كيف وصل الى ان يجلس متربعا على قرن الخرتيت الافريقى !!!
حسبى الله و نعم الوكيل فى كل من شارك للوصول الى ما نحن فية الان من بغض و كراهية و دنس و لكى الله يا مصر فى اولادك الاشرار و تحية من القلب الى اولادك الشرفاء و هم قليلون جدا
و حسبى الله و نعم الوكيل حسبى الله و نعم الوكيل حسبى الله و نعم الوكيل

هههههه مشكوررررر
موضوع طويل بس فعلا فى كلام صح