هل تســـامح مــن ظلمـــك ؟؟؟
الظلم
الظلم الظلم

الظلم منتشر في كل زمان ومكان ...
وهي كلمة يتألم منها الكثيرون ...
ولقد شرب من كأسه معظم البشر ...
وهو لا يفرق بين صغير ولا كبير ...
ولا الفقير ولا الغني ...
ولا الأهل ولا الغريب ...
ولا الحبيب ولا المحبوب ...
كلمة تبكي القلوب قبل العيون ...
ولكن لا مفر منه في كثير من الاوقات ...

لذا اخوتي الاحباء أضع بين أيديكم سؤالا...

إن كنت أنت من ظلم فهل تعذر وتسامح من ظلمك من غير سبب مقنع ؟؟؟؟


مع حبي لكم

مشكور أوي يا كيمو على الموضوع الجميل دة.أنا عن نفسي بسامح بس مش على طول . يعني ممكن أسامح الي يعتذر و يكون فعلا حاسس ان الي هو عمله غلط و يعرف ان هو ميكررش الموضوع دة معايا تاني .
ممكن أسامح كل شخصية محترمة جديرة بالاحترام. ممكن أسامح حد عمل حاجة مش أصده . أما اذا حد ظلمني هاشوف لو هو ظلمني لأنه مش عارف الحقيقة و بعد كدة عرف الحقيقة و حس ان هو ظلمني أكيد هاسمحه بدون تردد لكن واحد ظلمني عشان سبب شخصي عمري ماهنسى الظلم دة والموضوع دة فعلا حصل معايا و لحد النهار دة مش قادر أنسى الموضوع دة لأن المبرر كان هايف أوي و السبب كان غير مقنع بالمرة .
و طبعا انت هاتقولي ان انا ممكن اظلم حد وبعد كدة هاطلب ان هو يسامحني.أنا لو عملتها و ظلمت حد مش هاقدر أحط وشي في وشه بعد كدة.و صدقني الظلم صعب أوي .
ومرة تانية شكرا يا كيمو

انا فيه مثل بيت شعر أهو حاجه بحبها جداااً
وماشى بيها

من حبنا حبناه وصار متعنا متاعه ومن كرهنا كرهناه ويحرم عليا إجتماعه
على فكره
أنا مش بسامح بسهوله وخصوصاً لو كان الشخص اللى غلط فيا عزيز عليا

شكرا ياتيمور
وشكرا ياسادات
وفعلا كل ماكان الشخص اللي ظلمني عزيز عليا يبقي صعب اني اسامحه
وفعلا الظلم حاجه مره وانا محسيتش بيه اللما حصلي اللي حصل لاكن الحمد لله الكل عرف اني مظلوم
وبالنسبه اني لو ظلمت حد انا ممكن ادفن نفسي عشان مشفوش وياسلام بقي تبقي كملت لو هو سامحني من غير ما اكلمه
يبقي مش عارف اعمل ايه معاه وعمري طبعا ما اظلمه خالص
بس المهم كلنا لازم نسامح بعضينا
ومه تانيه شكرا ليكم

الظلم طبعا وحش جدا وعمره مابيفضل لان الخير بيتغلب عليه دايمااا

فعلا هو ده اللي بيحصل ياميدو
وشكرا ليك

الظلم طبعا وحش جدا وعمره مابيفضل لان الخير بيتغلب عليه دايمااا
مش فى كل الاوقات يا ميدو
وبعدين ساعات الخير بيظهر متأخر قوى بعد ما تكون حاجات كتير حصلت وقلبت الدنيا

اناهرد بكلمتين بس


الظلم مهما طال فهو ساعة والحق مهما غاب فهو قائم

وشكرا لموضوعك

قال صلى الله عليه وسلم:
"أفضل أخلاق أهل الدنيا والآخرة أن تصل من قطعك
وتعطي من حرمك وتعفو عمن ظلمك".

عندما يظلمك الخلق ... تدكر الخالق فهو العفو الغفور....
عندما يغضبك الخلق ... تدكر الخالق فهو الحليم الصبور....
مادا تفعل لمن ظلمك..هل تنتقم؟..هل تسامح و تعفو؟
ام أنك توكل أمرك للرحمان الرحيم ....
أخي .. اختي ..
اعف عمن ظلمك
سامح من أساء إليك
و اعرض عن الجاهلين
لا تقل ساقتص ممن ظلمني غدا يوم القيامة
لا تقل سياخد الله من حسناته و يعطيني
سامح أخاك المسلم قبل أن يحول الموت بينكما
اللهم اغفر لي و لمن ظلمني
اللهم إني اشهدك بأني قد سامحت كل من ظلمني

جزاكم الله كل الخير

على حسب الظلم وجاي من مين

بس لو سامحت مش بقدر انسى

شكرا ع الموضوع

جزاك الله كل الخير علي المرور الجميل
بس ازاي لو سامحت مش تقدر تنسي

جزانا واياكم

انا كنت اقصد يعني اني ممكن اسامح اللي ظلمنى واتعامل معاه عادي ولو واحدة صحبتي مثلا معزتها هتفضل ف قلبي زي ماهي

بس هيبقى جوايا نقطة سودا منها مش هيبقى نفاق ولا حاجة
يعني هبقى متوقعة منها الظلم ف اي وقت عشان اللي ظلم مرة ممكن يظلم تاني وتالت

شكرا مرة تانية ع الموضوع

فعلا
بس علي فكره انا ممكن بكل سهوله اسامح اي حد
لاكن صعب صعب صعب اسامح اقرب الناس لسه
يعني لو واحد صاحبي من اعز الناس ليه ظلمني صعب صعب اني اسامحه
ودي فعلا حصلت معايا كان احب الناس ليه وكنت بحبه جدا
بس سامحته ودلوقتي مش بمشي معاه وده مش بمزاجي ده غصبن عني مش قادر امشي معاه لاني انجرحت جرح كبير قوي
والله يسامحه وانا مسامحه
وشكرا ليكي علي مرورك

انا واحد من الناس كانت كلمة الظلم دي بتعدي علي وداني عادي جدا زي اي كلمة
وبعدين لما حسيت بيها بجد واتظلمت عرفت معناها وحرقتها
ووالله انا عمري مهسامح اي حد يظلمني ابدا ابدا
لاني باذن الله ناوي اني مظلمش حد علي قد ما اقدر في حياتي
وشكرا علي الوضوع الجميل جدا

انا واحد من الناس كانت كلمة الظلم دي بتعدي علي وداني عادي جدا زي اي كلمة
وبعدين لما حسيت بيها بجد واتظلمت عرفت معناها وحرقتها
ووالله انا عمري مهسامح اي حد يظلمني ابدا ابدا
لاني باذن الله ناوي اني مظلمش حد علي قد ما اقدر في حياتي
وشكرا علي الوضوع الجميل جدا

لا انا لا اتفق معك في فكرة انك عمرك ماهتسامح اي حد ظلمك
ولا انك عمرك ما هتظلم علي قد ماتقدر وطبعا كل بن ادم خطاء واحنا بشر وممكن في اي لحظه تظلم اي حد وانت ماتقصدشي والشخص ده مش هيسامحك يبقي انت رد فعلك ايه


نرجع ونقول نحاول نسامح