السلام عليكم ورحمة الله وبركاته

ببقى فى امان الله وبحل الامتحان والاقى اتنين بيغشوا
مش برضالهم الاذيه فبحذرهم الاول بعيني بس
وبعد كده بقولهم بصوت واطي وبعد كده بشتكى للمراقبين .
.................
نفسى افهم اللى بيغشوا دول عايزيين ايه ؟؟
هل عايزيين ينجحوا ؟؟
ولا عايزيين يطلعوا الاوائل ؟؟

لو عايزيين ينجحوا كانوا ع الاقل اوى ذاكروا قبل الامتحان بيوم وياما يجيبوا درجة النجاح او يسقطوا ويترفعوا بعد كده
ده غير انهم لما بيغشوا مش شرط ينجحوا .

اما لو عاييزين يطلعوا من الاوائل فمش معقوله انه اللى مش بيذاكر وهيجي يغشله كلمتين هيبقى الاول !!
...........................
أما بقى اللى بيغششوا
بعتبرهم من اغبى الناس فى العالم ..
اولا انهم بيذاكروا طول السنه وجايين يضيعوا مجهودهم فى ثانيه ..
ما يسألوا نفسهم
كام مره اتنازلوا عن انهم يقعدوا مع اهلهم فى سبيل انهم يذاكروا
فى حين ان الفاشل اللى عايز يغش
كام مره اتنازل عن وقت المذاكره وراح يلعب ...

وامتحان ايه ده اللى يخليكم تطلعوا من الاسلام عشانه !!
من غشنا فليس منا ..
ده غير انكم ممكن تتـقـفشوا وفى الحاله دى الله اعلم بمصيركم ..
.........................
واما بقى الطلبه اللى قاعديين فى حالهم يحلوا الامتحان
اللى لا دول ولا دول
هم اكتر ناس خسرانه
لان اللجنه بتبقى فوضى
وبيبقى حاسس بظلم وان تعبه هيروح ع الفاضى ..
..................................
بس برجع والوم ع المراقبين احيانا
لانهم بيقعدوا يتكلموا مع بعض عشان يسلوا وقتهم
( وان كنت فعلا بعذرهم عشان اللجنه ممله .. الله يكون فى عونهم)
.........

و لو قلنا ان الاتنين اللى بيغششوا بعض دول صحاب اوى ..
تفتكروا ان ..
اللى غش ده ممكن بعد كده يثق فى اللى غششه !!
يعنى ممكن يقوله اسراره ... ممكن يتطمن معاه على اهله ... ممكن يدخله بيته الا لما يشك انه سرقه ...؟؟

ما أظنش
عارفيين ليه ؟؟

عشان الرسول عليه الصلاة والسلام قال :
"من أسخط الله فى رضا الناس سخط الله عليه وأسخط عليه من أرضاه فى سخطه .
ومن أرضى الله فى سخط الناس رضى الله عنه وأرضى عنه من أسخطه فى رضاه
حتى يزينه ويزين قوله وعمله فى عينيه " صدق رسول الله صلى الله عليه وسلم ...
........................
وبالنسبه للهيقولوا ده فلان ده جاري ازاى ما اغششهوش
دا مامته هتزعل من مامتى ....
دا الدنيا هتتهد ...
بقولهم انتم مش بتعملوا حاجه غلط
انت اه بتعمل حاجه هما مش عايزنها
(كونك مش راضى تغششه)
لكن فى الاخر ده الصح
فشويه وهيصفوا من ناحيتك
زي ما الرسول صلى الله عليه وسلم قال فى الحديث السابق.
...............
اتمنى ما اشوفش الظاهره دى تانى
يارب
..

لا يضركم من ضل إذا اهتديتم

جزاك الله خيرا
عندك حق يا مستر
.........
دايما القران فيه حل كل حاجه

فعلا والله حاجة وحشة اوى انا فى امتحان الشهادة الاعدادية والله اغلب الامتحانات كانت فوضى والمراقبين بيتكلموا وملهومش دعوة بللى بيحصل ف اللجنة من اساسه واللى يطلع من بنطلونه ورق واللى واللى.... والله ببقى عايزة اعيط وانا قاعدة ف حالى كدا لا وايه وكمان بيبقى فيه طلاب متدينين وبيغشوا ويغششوا يلا بقى

فعلا للاسف الشديد دى اكبر مشاكل ومصائب الامتحانات المشكلة ان الواحد يبقى قاعد فى امان الله فجاة المراقب يجي يساله ( حصلت معايا) خلصت ؟ اقوله خلصت براجع يقولى هات الورقة !!!! ارد اقوله ايه الراجل ده يقولى دا زميلك وعادى يعنى لازم تساعده !!! بكل بجاحة ورخامة وقلة ادب حاجة تخنق بجد
وناس تدخل اللجان بورق ويتوزع على اللجنة اللى يخلص يدى للى بعده ولما اطلع واقول لا يقولوا اسكت والا حنلغى امتحانك ونعملك محضر غش !!!! لله الامر من قبل ومن بعد
عموما تسلم ايدك على التوبيك الروووعة ده

جزاكم الله خيرا ع المرور

ياجماعة دي مشكلة فعلا وحاجة تخنق بجد يعني احنا كطلبة تربية وتعليم في التزام عندنا شوية / لكن أقسم بالله إن عندنا ف البلد السنة اللي فاتت واللي قبلها أكتر من 12 واحد دخلو كلية طب وزيهم هندسة وحوالي 7 صيدلة وكليات قمة كتييييير تقريبا مفيش حد دخل كلية عادية والمصيبة بقي أنهم أزهرية يعني أكتر ناس عارفين ربنا / طبعا الامتحانات كانت بتبقي عندنا ف البلد " قرية صغيرة ف محافظة الشرقية " أقسم بالله إن ورقة الأسئلة كانت تنزل للمدرسين تحت وتطلع محلولة وتتوزع علي الطلبة واحد واحد والطالب الناصح اللي فتح كتاب أثناء الدراسة وعارف مكان المعلومة كان يفتح الكتاب ف قلب اللجنة قدام المراقبين وعادي خالص والسنادي لما منعو الامتحانات ف القري وخلوها ف المراكز بمجرد إن أولياء الأمور عرفو المراقبين وأساميهم بقو بيعزموهم ع الغدا مرة ويدوهم فلوس مرة والطلبة حاليا ف إمتحانات الأزهر هايصين وشغالين الله ينور غش علي ودنه / واللهي حرام كده هما يدخلو كليات قمة زي ماهما عايزين دون بذل أدني مجهود وإحنا نقعد ندح طولة السنة ويطلع عين أبونا و ف الأخر ندخل تجارة و زراعة والحاجات دي / أنا واللهي محبط جدا ومفيش أمل خالص من نحيتي وربنا يسترها معانا وتعدي السنة دي علي خير .

بجد البلد دى مش هتنضف اللى لما كل واحد ضميره يصحى بقى
بجد فى ناس بتغش بطريقة عجيبة والاسوأ من كدة انهم حاسيين ان الموضوع عادى بجد ربنا ما يريحهم ابدا
لانهم بعد كده لما غيرهم اللى مش بيغش ونفسيا مهزوز ويسمع درجات عالية لناس مش يستحقوها بيتهز زيادة فى نفسه
للاسف ما فيش ثقة فى نفسه ولا ايمان بربنا يقويه ويخليه واثق من نفسه :( :( :(
والمشكلة الكبيرة ان المال اللى بياخدوه نظير عمله اللى ناتج من درجات بالغش حرااااااااااااااااااااااااام :o :o :o
لان ما بنى على باطل فهو باطل
ربنا يهدى ويستـــــــــــــــــــــــــــــــــر

يا ريت نبطل عادتنا في التجريد والتهويل .يا جماعة الموضوع مش مستاهل ، اتا عن نفسي ياما غششت في امتحانات الشهور السنادي. أنا مش بقول لحد كلمة في أي امتحان مهم او مصيري ولا حد غيري بيهون عليه كلمة اصلا لكن في امتحانات الشهور الموضوع ودي جدا ، وأحيانا امتحانات بأكملها كنت بديها لاصحابي ومرتين او تلاتة ابقى غعلطان في حاجة واصحابي يعدلوهالي او ينبهوني عليها . ولو مغششتش اصحابي هيزعلوا مني والحكاية مش مستاهلة لانها امتحانات ملهاش لزمة (بالمرة افتكرت في تالتة اعدادي امتحانات الشهور كنا بنكتب انظر الاجابة في الخلف للمدرسين وفي الخلف نكتب انظر الكتاب المدرسي او ضحكت عليك مفيش حاجة ).
بس بأمانة ان ربنا بيعاقب الواحد لو غشش يعني الامتحانات الشهرية الترم الاول كنت بغشش فيه اصحابي ونتيجة اعمال السنة الترم الاول زفت والترم التاني نادرا ما غششت حد وربنا كرمني وتقريبا جبت درجات حلوة اعمال سنة .

انا الحمد لله مبعرفش اغش او اغشش ولو فى فرصة حتى ضميرى مبيسمحش ابدا

اه والله واللي قاعد في حاله للأسف هو اللي بينضر
في امتحان الأحياء اللجنة سابت شوية اتلخبطت وماكنتش عارفة اعمل حاجة بس الحمد لله النتيجة جت كويسة
ويارب نظام الغش ده يُقضي عليه بقي خلونا نعيش صح

بسبب الغش بقت نتيجة الثانوية العامة كلوا فوق ال 90 % و تلاقى اللى تعب زى اللى متعبش

حزبى الله و نعم الوكيل

صحابي في المدرسة
مستوى متوسط والعملية كانت كوسة وكتير منهم جابوا 96 وحتى 98

السلام عليكم
جسبي الله ونعم الوكيل والله الناس كانت بتغش في اللجنة ولو المراقب اتكلم يا ويله كانه حق للطالب انه يغش ويا ريته سؤال ولا اتنين في ناس بتاخد الامتحان من بابه والله الواحد دمه اتحرق كتير في الامتحانات الي فاتت دي

لا يضركم من ضل إذا اهتديتم



اكيد

بس انا بكره الغشاشين جداااااااااااااااااا

لا وفي ظاهره جديدة كمان يمكن انتو لسه ماسمعتوش عنها
وهي شراء اللجان
عارفين يعني أيه شراء اللجان؟؟؟؟؟
يعني أهالي الطلبه اللي عايزين يغشو يتفقو مع بعض ان هم يشترو اللجنه يعني يدفعو مبلغ لرئيس اللجان ويعملهم لجنه خاصه بيهم ونماذج الأجابه تدخلهم زي الباشوات
هو التعليم في مصر باظ من شويه ياجماعه .... والله حراااااااام
حسبي الله ونعم الوكيل في كل طالب وكل مراقب وكل ولي أمر ماعندوش ضمير وبيسمح بكده

الغشاش ده مش فاهم ان ربنا شيفه ومش فاهم كمان ان الي بيغش ؤيدخل كلية غير الكلية الي يستحقها ربنا بيخلية افشل الناس فيها ومش بيكمل فيها اصلا

فعلا والله حاجة وحشة اوى انا فى امتحان الشهادة الاعدادية والله اغلب الامتحانات كانت فوضى والمراقبين بيتكلموا وملهومش دعوة بللى بيحصل ف اللجنة من اساسه واللى يطلع من بنطلونه ورق واللى واللى.... والله ببقى عايزة اعيط وانا قاعدة ف حالى كدا لا وايه وكمان بيبقى فيه طلاب متدينين وبيغشوا ويغششوا يلا بقى


انزلى لرئيس اللجنه وقوليله ومتسكتيش عن حقك حتى لو استدعى الامر ان تخلى ولى امرك يقدم شكوى ضد رئيس اللجنه نفسه