باختصار شديد دي أول مشاركة ليا في المنتدي الجميل ده وأتمني اني ألقي اهتمام من أخوتي وأساتذتي في هذا المنتدي : أولا : أنا اسمي أحمد طالب في الثانوية العامة المرحلة الثانية أنا جبت في المرحلة الأولي بالظبط مجموع " 78.8 % " طبعا دي كانت بالنسبة ليا أنا وأهلي وكمان جيراني ومش حبالغ لو قلت البلد كلها اللي أنا قاعد فيها مفاجئة وصدمة كبيرة لأن كان في أمل كبير فيا إن أنا أقدر أعمل حاجة كويسة والمجموع ده كان سببه مادة الكيميا ودي كانت مشكلة بالنسبة لي من أول السنة وللأسف دخلت فيها الامتحان وانا مش عارف فيها أي حاجة وفكرت وأنا في اللجنة أني أشيلها معايا في تالتة وأضاعف المجهود مش مشكلة بس برضه وللأسف الشديد ركبت دماغي وحليت فيها أي كلام وده اللي خلاني أجيب فيها المجموع المعجزة " 24 " محدش يضحك لو سمحتو / ومن ساعة ماشفت النتيجة الجميلة دي وأنا بقي خلاص اتدمرت ويأست جدا ولابقيت بذاكر ولا بصلي وعلاقتي بربنا بقت ضعيفة جدا أو معدومة تقريبا والصراحة أنا معرفش المناهج بتاعت تالتة فيها ايه لعند دلوقتي وده دفعني أني أخذ قرار التأجيل السنادي وعدم دخولي الامتحانات يعني السنة دي ضاعت رسمي / وأي حد ينصحني أو يحاول يعقلني كده أهب فيه واتنرفز وبكون عايز أولع فيه / فأنا حاليا فاقد الأمل تماما ومتدمر نهائيا ومش عارف أعمل ايه / دي كانت فضفضة بس يمكن تزيح عني الهم شوية أخوكم " أحمد ".

قوى صلتك مع ربنا وصلى صلاة استخارة وانت الوحيد اللى حتقدر تعمل احسن حاجة لنفسك كل واحد عارف مصلحته اكتر بس ساعات بنحتاج لمساعدة واقرب الناس ليك ماما وبابا انا من راىى عيد السنة وتوكل على الله واولها ان شاء الله سمى بسم الله وخلى عندك امل وعزيمة وان شاء الله تجيب 85 او اكتر من كده كمان والتنسيق من حضيع مجهودك ماتخافش المهم ربنا الاول بس يكون هدفك ترضيه مش مصلحة عشان تنجح وتبعد تانى وبالتوفيق ان شاء الله

قوِ صلتك بالله واعلم
إذا لم يكن عون من الله للفتى***فأول ما يجني عليه اجتهاده
وكن كما قال القائل:
إذا هم ألقى بين عينيه عزمه***ونكب عن ذكر العواقب جانبا

إذا قويت صلتك بالله انصلح لك كل حال
وفقك الله

بارك الله فيكم أخوتي وشكرا لمروركم / واللهي بحاول بشتي الطرق أني أبعد عن كل مايغضب الله وأحاول التقرب لما يرضيه وربنا يبعد عني الشيطان ويقيني شر نفسي عشان أرجع زي الأول تاني بس أتمني منكم الدعاء لي بالهداية والتوفيق .