علشان خاطر مصر بقولك ايه انت هتقول ايه فى الموضوع بتاع الدستور والانتخابات؟؟ هتختار ايه ---------- انا هقول الانتخابات اولا علشان دا رأى الاغلبية فى الاستفتاء وكمان عايزين استقرار علشان خاطر مصر انا شوفت كام واحد محترم فى البرنامج الفلانى بيقول كدا والصرا...حة شكلهم بيفهموا وانا صدقتهم لو قلت الانتخابات الاول اكيد حتى ولو بدئت كلامك بإنك تحلف انك مش من الاخوان برده هيقولوا عليك انك اخوانجى وان الاخوان طول عمرهم بتوع صفقات مع اى حد المهم مصلحتهم وعايزين الانتخابات الاول علشان يبقوا اغلبية ويعملوا دستور بمزاجهم ويخلوا الستات تلبس الحجاب بالعافية والراجل اللى مش هيلبس جلابية ويربى دقنه هيتجلد واللى يفكر يسرق هيتقطع ايده واللى هيبص على واحده هيترجم وبعدين الاخوان مشاركوش فى الثورة اساسا دول وصلوا بعد ما الثورة خلصت وعايزين بس يكسبوا من وراها خلاص مش هقول الانتخابات اولا ------------- انا هقول الدستور اولا علشان دى ثورتنا وعايزين نكتب- اه تبقى هتطلع تشتم وتقول ان الناس اللى بتتخانق على الانتخابات دستور جديد نطمن فيه على نفسنا من الاسلاميين علشان خاطر مصر انا شوفت كام واحد محترم فى البرنامج الفلانى بيقول كدا والصراحة شكلهم بيفهموا وانا صدقتهم اه نسيت اقولك لو قلت ان الدستور اولا تبقى انت اكيد حتى ولو برده بدئت كلامك انك تحلف انك مؤمن بربنا وبتصلى برده هيقولوا عليك انك علمانى كافر لانك ماشى ورا الليبراليين والعلمانيين ودول اساسا كفرة وملحدين وعايزين يعملوا الدستور الاول علشان خايفيين من نتائج الانتخابات وعايزين ينقلبوا على رأى الاغلبية وعارفيين انهم ملهمش تأييد فى الشارع المصرى تتدخلهم البرلمان فعاييزين يلحقوا يعملوا الدستور الاول علشان يدمروا كل حاجه لها علاقه بالدين, دول ناس عايزين الستات تمشى ملط فى الشارع ومش عايزين حد يعرف ربنا ولا يصلى هما دول اساسا كانوا هيعرفوا يعملوا حاجه من غير الاخوان والتنظيم اللى هما فيه دا كفاية يوم موقعة الجمل لما كلهم جريوا وخافوا والاخوان هما اللى حموا الميدان وعلموهم يعنى ايه تنظيم خلاص مش هقول الدستور اولا ----------- اولا ولا الدستور اولا دول ولاد كلب علشان نسيوا الفقرا الللى هما السبب فى نجاح الثورة وان لازم الفقرا اولا علشان خاطر مصر هيطلع واحد يقولك انك مش فاهم حاجه وان الدستور دا مش رفاهية دا الدستور هو دا اللى هيجيبلك العيش والاكل للفقرا اللى انت زعلان علشانهم وبرده علشان خاطر مصر خلاص مش هشتم فى حد ولا هطالب بحاجه لا انتخابات ولا دستور ولا فقرا انا هسكت خالص علشان خاطر مصر ----------------------- انا هبعد عن السياسة انا اصلا مليش دعوة بالكلام دا كله واللى يعملوه فى الاخر انا هوافق عليه اه يعنى هترجع تقعد على الكنبة وتتفرج على برامج التوك شو وتشتم فى دول شويه ودول شويه او تجيب فيلم تتفرج عليه وتبعد اساسا عن السياسة هيقولوا عليك انك من بتوع حزب الكنبة اللى قاعد قدام التلفزيون يشتم شويه وملوش علاقة بالبلد ومش خايف عليها وغالبا هتطلع من الناس اللى كانوا ضد الثورة وانك منزلتش التحرير هو انت صحيح معاك صورة تثبت انك كنت فى ميدان التحرير ؟؟؟ متقوليش انك من المحافظات او انك كنت فى لجنة شعبية بتحمى بيتك لو منزلتش التحرير ومعاكش صورة بكده تبقى متتكلمش عن الثورة والبلد لانك متستاهلش تكون مصرى وانت بقى اللى هتخرب البلد خلاص مش هقعد على الكنبة ولا هتفرج على التلفزيون وهحاول اعمل صورة على الفوتوشوب تثبت انى كنت فى ميدان التحرير او حتى اتصور فى البيت وورايا علم مصر او اقولك انا هسيب البلد خالص واسافر على اى حته تانيه علشان خاطر مصر اممممم هتسافر وتسيب البلد مش قولتلك انك متستاهلش تكون مصرى خلاااااااااااااص انا هموت نفسى وهنط من الشباك علشان خاطر مصر --------- طيب قولى اعمل ايه علشان خاطر مصر ------------- ربما تكون المواقف السابقة كوميدية ولكنها للاسف تعبر عن الواقع اللى احنا فيه الواقع الذى سيطر علينا ان اللى يختلف معايا فى الرأى يبقى مبيفهمش حاجه وانه هيخرب البلد وأنه إما بيتاجر بالدين او انه كافر وعمره ما بيعمل حاجة علشان خاطر مصر نسينا واحنا فى وسط الحرب دى ان هناك مايسمى (ثقافة الاختلاف) هذه الثقافة اللى غابت عننا فبدئنا فى ثقافة التخوين وتبادل الاتهامات فكانت النتيجه ان عدد الناس اللى كانت متحمسه للمشاركة فى صناعة مستقبل مصر بعد الثورة بدئت تتوه وترجع تنضم لحزب الكنبة العظيم ودا بسبب انه مش لاقى حد يفهمه ايه الاختيارات اللى قدامه ومزايا وعيوب كل اختيار ويسيبله حرية الاختيار ويفهمه انه هيتحمل مسئولية اختياره اذا كان صح او غلط لما ضاعت مننا ثقافة الاختلاف بقى من الطبيعى اننا نلاقى ناس كتير بتقول ان مصر خربت وان فين ايامك يا مبارك لاننا ببساطة توهناهم معانا فى اننا نصر على انهم لازم ياخدوا الموقف بتاعنا والا البلد هتخرب ولما يسمع من الناس التانيه يسمع نفس الكلام فبالتالى فقد الثقه فى كل الاطراف وحس بالضياع واننا على وش حرب اهلية ومستقبل اسود نسينا واحنا فى وسط الحرب واحنا بنقنع الناس حتى ولو بالعافيه انهم يبقوا فى الصف اللى احنا عايزينه نسينا ان لولا الاختلاف بين الافكار والايدلوجيات والاتجاهات ماهيكون فى ديموقراطيه وحراك وانتعاش لمصر. لان اهم حاجه تخلى الدولة قوية هى وجود اختيارات من الافكار والايدولوجيات المختلفة وبالتالى يتنافسوا على تقديم افضل ماعندهم نسينا ان الديموقراطيه هى بمنتهى البساطه اننا نقول للناس ايه الاختيارات ونسيبهم يختاروا حتى ولو اختاروا حد تانى غيرنا ويتحملوا نتيجه اختيارهم حتى ولو غلط لأن مفيش فى الديموقراطيه وصايه لحد على حد واللى هيختار غلط وهيلاقيك المرة اللى بعدها انت جاهز اكيد ومعاك برنامج قوى يفيده هيختارك ومش هيكرر غلطته تانى ثقافة الاختلاف ببساطة هى احترام وجهة نظرك وثقتك فيها وكذلك احترام وجهة نظر الأخرين والبحث عن كيفية الاستفادة من هذا الإختلاف -------------- رسالة اخيرة ======== اولا إخواتى حبايبى شباب الثورة وانا معاكم لازم نسمع بعض ونعرف ازاى نحضر كلامنا ونقرا ونعرف عن بعض معلومات صح مش اننا نهاجم بعض بكلام غالبا معظمه بيطلع غلط اسأل نفسك قبل ما تتكلم عن اى موضوع معلوماتى فيه صح ولا غلط ولو مش عارف اقرا ولما تيجى تقرا يبقى من اكتر من مصدر علشان متقراش لحد يكون متحيزللموضوع او رافض ليه مثلا: تعرف ايه عن الليبرالية – تعرف ايه عن العلمانية - تعرف ايه عن الاخوان – تعرف ايه عن الدستور – تعرف ايه عن اللجنة التأسيسية لصياغة الدستور وازاى بتتكون وبتعمل ايه – تعرف ايه عن الاستفتاء والانتخابات وايه الفرق - تعرف ايه عن وظيفة ومهام عضو مجلس الشعب – تعرف ايه عن المحليات – تعرف ايه عن النظام البرلمانى او الرئاسى او شبه الرئاسى وايه مزايا وعيوب كل نظام – تعرف ايه عن الانتخابات بالقائمة او النظام الفردى – اسئلة كتير بس انا جبت شويه كأمثلة بعد لما تقرا وتعرف ياريت متحاولش تفرض رأيك حتى ولو صح على حد – كل اللى مطلوب منك توضحله ايه الاختيارات اللى قدامه ومزايا وعيوب كل اختيار وتعرفه ازاى يختار وتفهمه انه هيتحمل نتيجة اختياراته وأخيرا لو انت فى حزب معين وعايز تقنع الناس بأفكارك فبلاش علشان خاطر مصر تهاجم الاحزاب الاخرى والافكار اللى انت مختلف معاها --------- ثانيا للاساتذة الافاضل اعضاء النخبة العظيمة ارجوكم بلاش الكلام بتاعكم دا بلاش نرجع لطريقة ان محدش بيفهم غيركم و وان انتو لوحدكم اللى عارفين الصح فين والغلط فين – انا مش عايز اقول ان الشباب اتحرك لما ضرب بكلام النخبة عرض الحائط وعمل المستحيل اللى فضلوا طول السنين اللى فاتت بيقولنا انه مستحيل يحصل فى مصر وخصوصا من الجيل اللى مبيفهمش دا ارجوكم تانى ياريت تراعوا اننا بنفهم وبنعرف نتصرف وحتى لو غلطنا فسيبونا نتعلم من غلطنا ماهو الواحد مبيتعلمش ببلاش – الظباط الاحرار لما حكموا مصر كان زعيمهم عنده 32 سنة ياريت بما انكم اللى مليين الاعلام وواخدين الشاشات كلها لما تشرحوا للناس ايه الاختيارات اللى قادمهم تقولوا ايه المزايا والعيوب بتاع كل اختيار من غير ماتخوفوا الناس من الاطراف التانيه او الاختيارات اللى مش عاجباكوا -------------- ثالثا احبائى اعضاء حزب الكنبة العظيم بجد الكنبة مش هتنفعكوا فى حاجه واوعى تفتكروا ان البلد لو باظت هتقولوا احنا كنا بعيد ولو البلد بقت كويسه تبقى مصلحة البلد دى بتاعتنا كلنا بما فيهم سيادتك يعنى معلش اتعب شويه واقرا عن كل حاجه مش فاهمها واسأل واعرف من اكتر من مصدر متحكمش بسرعة على الأمور وتسمع كلمتين من هنا ولا هنا تقوم تهاجم التيار دا شويه والتيار دا شويه انت مسئول عن اللى هيحصل فى الفتره اللى جاية حتى ولو سيادتك منزلتش وقت الثورة او كنت ضدها او كنت بتحمى بيتك فى الللجان الشعبية او كنت مع الثورة بس معرفتش تنزل التحرير علشان اى ظروف وحتى لو معاكش صورة تثبت انك كنت فى التحرير علشان اصدقك انك بتحب الثورة الفتره اللى جاية محتاجه كل واحد مننا يكون له دور ونتعب كلنا شويه بس البلد بتاعتنا تبقى فى اعلى مكان واهو كله علشان خاطر مصر انا عارف انى طولت اوى والناس دلوقتى بقت بتقرا بالعافية وعايزة نظام هات من الاخر بس معلش اللى بيحصل دلوقتى ميتسكتش عليه وانا كتبت النوت دا علشان خاطر مصر

الدستور اولا لاسباب منطقية عدة.
لان الانتخابات اولا هو وضع للعربة اما الحصان.
كيف سآتي رئيس و انا لا اعلم ما وظائفي كيف سننتخب برلمان دون ان نعلم مهامه.
خروج هذه المرحلة بشكل مشوه سيجل التاريخ لن يرحم من تسبب بهذا.
و بصراحة معاني كنت متعاطف مع الاخوان و كنت ناوي انتخب مرشحهم للبرلمان .. لكن الانتهازية و البراجماتية بتاعتهم واضحة جدا.

موضوع رائع جزاك الله خيرا

Thanks ........