أرجو المساعدة محتارة أكمل علمى علوم ولا لأ [الأرشيف]

مشاهدة النسخة كاملة : أرجو المساعدة محتارة أكمل علمى علوم ولا لأ

نور الصباح *

17-07-2011, 11:09 AM

السلام عليكم

أتمنى تساعدونى كلكم ودى أول مشاركة ليا فى المنتدى

أنا فى سنة تانية وجبت 84.9 علمى علوم

للأسف السنة دى كانت عندنا فى عيلتنا ظروف صعبة جداً ومكنتش بقدر ألاقى ولا وقت ولا مكان أذاكر فيه

بس الحمد لله على كل حال

دلوقتى محتارة جداً جداً أنا كان حلم حياتى أدخل كلية صيدلة ودلوقتى مش عارفه حتى لو حولت

علمى رياضة أقدر أحصل هندسة ولا لأ أنا عارفه السنة اللى فاتت ناس كانوا تقريباً 93 % وجالهم هندسة

بس أنا مش عايزة أكمل رياضة خالص أنا الحمد لله جبت الدرجة النهائية فى الرياضة بس مش طموحى

انى أكمل رياضة وخايفة أكمل علمى علوم وملحقش حاجة

عايزة أعرف لو سمحتم أقل مجموع يلحق صيدلة ايه علشان أعرف هكمل ولا لأ وبرضو أقل مجموع يلحق

هندسة ايه

آسفة جداً طولت عليكم وياريت تدعولى ربنا يكرمنى بالخير

fataalahlam20

17-07-2011, 11:27 AM

الاخت الفاضلة محمد من المنصورة معكى محاسب أنا شايف ان المجموع بعيد شوية والانسب انك تحولى القسم الادبى ... والاهم أنك تدخلى كلية أو مجال معين أنت حباه علشان تتميزى فيه . وغالبا اللى بيروح ثالثة أدبى بيزيد جامد وتمنياتى لكى بالتوفيق والرأى الاخير لكى طبعا

مجروح من الزمن

17-07-2011, 11:33 AM

اذا جبتى 100% فى تالتة
على ال84
يبقى كدة المجموع كلة 92% ممكن تيجى هندسة بسفى منطقة بعيدة

libero

17-07-2011, 11:38 AM

كملي على بركة الله

zoom22

17-07-2011, 11:44 AM

السلام عليكم أنامحمد من المنصورة وجبت أيضا 85 % وهكمل علمى وبالتوفيق

Dr. Toka

17-07-2011, 11:45 AM

بصى حبيبتى نصيحة كملى رياضة او ادبى بس قبل كل دة صلى استخارة الاول بس انا شايفة ان مجموعك يخليكى تلحقى هندسة فى رياضة ومضمون ان شاء الله انما فى علوم صعب شوية تلحقى صيدلة فحولى رياضة احسن او ادبى ومتزعليش على النتيجة دة اختيار ربنا والحمد لله على كل حال قدر الله وماشاء فعل

نور الصباح *

17-07-2011, 12:12 PM

شكراً على المساعدة ربنا يكرمكم

بس بعد اذنكم عايزة حد يأكدلى يعنى مجموع

93 % مثلاً بيبقى أكيد ان شاء الله يجيب هندسة فى أى مكان ولا ايه ؟

الملاك السعيد

17-07-2011, 03:04 PM

بصي ياقمر نصيحة منى حولى ادبى ومتكمليش علمى خالص
لانك هتتعبى جدا ومش هتلحقى
انا مش بهبطك و لا حاجة انا بقولك الاحسن ليكى
تالته هتبقى تقيلة عليكى و خصوصا لو فيها احياء
اما رياضة 2 فأنا مش عارفة بص هى صعبة
و متخديش سنة الفراغ مقياس
والسنادى مجاميع تانية عالية جداااااااااااا
فالافضل ليكى حولى ادبى وارفعى مجموعك و خشي كلية كويسة
و ربنا يوفقك

نور الصباح *

17-07-2011, 08:36 PM

أنا بس عايزة أعرف

الحد الأدنى للهندسة

بيكون 93 % فى الحدود دى ولا أعلى بكتير ؟؟؟؟

حد يجاوبنى لو سمحتم

احمد رجب صقر

17-07-2011, 08:46 PM

الصيدلة ممكن تاخد من كام

بيبو العمده

17-07-2011, 10:35 PM

kokogan

18-07-2011, 12:00 AM

ربنا يوفق الجميع

That's Me

18-07-2011, 12:01 AM

اولا اري ان ميولك علمية
وبالتالي لا ارشح لكي التحويل الي ادبي

ثانيا ً كما قال الأخ العمده جزاه الله خيرا
اعرفي الحد الادني لهندسة هذه السنة ومنه حددي الحد الادني لها السنة القادمة والذي سيكون قريب جدا منها ان شاء الله

ثالثا ً اجتهدي السنة القادمة في علمي الرياضة لتلتحقي بهندسة ان شاء الله
واذا لا قدر الله ولم يكن فأمامك تربية وتجارة وكل ما تشائين ولا اعلم كلية العلوم ايضا ً ام لا

وابذلي قصاري جهدك من الأن في مواد المرحلة التانية

وقبل كل شيء استخيري الله

وكوني معه

وأسأليه الخير لك
ولن يضيعك الله ابدا ً
وعسي ان تكرهوا شيئا ً وهو خيرا لكم

نور الصباح *

18-07-2011, 01:38 AM

السلام عليكم
اولا مبروك النجاح
ثانيا لو عايزه تعرفى الحد الادنى للهندسه شوفى تنسيق السنه دى هيبقى قريب الى حد كبير من تنسيقكم ان شاء الله
ثالثا بالنسبه لمجموعك انت لو جبت فى تالته (ان شاء الله) 100% وجبت 5 مستوى يبقى التوتال حوالى 94 % طبعا ميعملوش حاجه فى علمى علوم لكن يعملوا فى علمى رياضه
فشوفى انتى مقدرتك تجيبى كام فى تالته لان مينفعش تقلى عن النسبه دى
او قدامك حل تانى ممكن تحولى ادبى وسهل جدا انك تزيدى فيه ولو جايبه درجه حلوه فى الانجلش ممكن تدخلى تجاره انجلش او سهل عليكى تلحقى تربيه قسم كويس
المهم انتى مقدرتك ايه مش بتتمنى ايه لانك ممكن تجرى ورا وهم وتضيعى نفسك وناس كتير عملوها وندموا بعد كده
احسبيها صح كده مع نفسك
وربنا يوفقك يارب ويحبب اليك رزقك
اتمنى اكون افدتك فى حاجه

بجد أنا متشكرة أوى أوى ربنا يكرمك يارب

هو بالنسبة للسنة الجاية ان شاء الله أقدر أجيب كده ان شاء الله بالمستوى الرفيع

لأن السنة دى للأسف هى اللى كانت ظروفها صعبة جداً جداً والحمد لله على كل حال

وأنا تقريباً خلاص قررت أكمل رياضة بإذن الله بعد ما أستخير ربنا طبعاً واستشير

بس بعد إذنك عايزة أعرف لو مثلاً 93 % هيبقى هندسة فى أمل كبير ولا ايه

moon light200

18-07-2011, 03:02 AM

انا علمى رياضة سنة تالتة وجايبة 92.4 هل ممكن الحق هندسة ولا لا اارجوكم حد يرد عليا عشان بجد اعصابى تعبانة اوىىىىىىىىىىىىىىىىىىىىى

هيما دوت كوم

18-07-2011, 04:13 AM

ياجماعه مفيش تحويل من علمى لادبى ولا من علمى علوم لعلمى رياضه

نور الصباح *

18-07-2011, 10:21 AM

ياجماعه مفيش تحويل من علمى لادبى ولا من علمى علوم لعلمى رياضه

مين قال كده

ممكن تقولنا مصدر كلامك لو سمحت

marwa.m

18-07-2011, 10:23 AM

متكمليش علوووم بصراحه مفيش امل وهتلاقى اخرتها تجاره مش صيدله
معلشمش عايزه اصدمك

بصى كملى ادبى وارفعى مجموعك توصلى لالسن او اعلام

نور الصباح *

18-07-2011, 11:04 AM

متكمليش علوووم بصراحه مفيش امل وهتلاقى اخرتها تجاره مش صيدله
معلشمش عايزه اصدمك

بصى كملى ادبى وارفعى مجموعك توصلى لالسن او اعلام

طيب بعد اذنك عايزة أعرف أنا لو كملت علمى رياضة

وقدرت أجيب 93% مثلاً أقدر أدخل هندسة أو حاسبات ومعلومات ولا ايه

ممكن تردى عليا لو سمحتى ؟

marwa.m

18-07-2011, 11:13 AM

طيب بعد اذنك عايزة أعرف أنا لو كملت علمى رياضة

وقدرت أجيب 93% مثلاً أقدر أدخل هندسة أو حاسبات ومعلومات ولا ايه

ممكن تردى عليا لو سمحتى ؟

لو جبتها تلحقققققق
بس صعب اوووى تجيبها خليك فى الادبى اااااحسن
انك عشان تلحق هندسع على على الاقل فى تالته لو حدها
فوووووووق 98 فى الميه

معلش:frown::frown:

That's Me

18-07-2011, 12:01 PM

لو جبتها تلحقققققق
بس صعب اوووى تجيبها خليك فى الادبى اااااحسن
انك عشان تلحق هندسع على على الاقل فى تالته لو حدها
فوووووووق 98 فى الميه

معلش :frown::frown:
وليه متجبش 98 % يعني
تقدر تجيب بإذن الله

كل شيء علي الله يسير

وكمان قال رسول الله صلي الله عليه وسلم
استعن بالله ولا تعجز

وبعدين في حاجه
لو دخلت ادبي هتخش ايه يعني السن واعلام
طب اخرتهم ايه

هتطلع مذيعة يعني

هما وتجارة واحد

يبقي تكمل علمي رياضة وتخش هندسة يأما حاسبات ومعلومات

وإن مكنش لا قدر الله
تدخل تجارة

وغر كده هيا لو في محافظة نائية ممكن تلحق تربية

الموضوع يستحق المخاطرة

ولا تخافي فأن خفتي اليوم
فستبقي خائفة طول حياتك

وفقك الله الجميع

ebnhamido

18-07-2011, 01:34 PM

السلام عليكم ورحمة الله وبركاته
شوفى بجد ومن قلب بيتمنى الخير لكل الناس وأتمنى أكون كدة توكلى على بركة الله ومتسبش حلمك وحلك لمجال العلوم ومهما كانت الظروف بس دة مبدأ ولازم تمشى عليه إنتى اجتهدى بس للأسف الظروف ولكل مجتهدً نصيب كملى على بركة الله واستعينى بالله وأوعى تحولى لأن إنتى لو حولتى لأى قسم آخر ومهما جبتى من مجموع مش هيرقى لحلم إنتى عشتيه وهو حلم الصيدلة وعلى فكرة مش مهم أنا هدخل إيه بس المهم وبجد إيه الكلية اللى من خلالها هأقدر أتعين بشهادتها والله يا أختى فى معاهد ولمدة سنتين بس بتعين فى وظائف كويسة جداً جداً وأهى اسمها معاهد وهاذكر واحد بس معهد فنى صحى وبياخد من مجموع على مش قليل وهما سنتين وتتخرجى وتتعينى على طول وبعد كدة مكن تكملى فى كلية علوم علشان تحملى لفظ أخصائية فى أى مجال انتى اخترتيه فى المعهد . . وأتمنى الخير لكل الطلبة والطالبات . أخوكى ابن حميدو مدرس تربية رياضية وكنت من أوائل كليتى والحمد لله واتعينت بقرار وزارى ونحمد الله

ork3d

18-07-2011, 01:49 PM

انا علمى رياضة سنة تالتة وجايبة 92.4 هل ممكن الحق هندسة ولا لا اارجوكم حد يرد عليا عشان بجد اعصابى تعبانة اوىىىىىىىىىىىىىىىىىىىىى
ان شاء الله

hamada966

18-07-2011, 10:14 PM

اولا لا توفيقى الا بالله والحمدلله على كل كل شئ انا فى راى لو عندك عزيمة ممكن باذن الله تحولى علىمى رياضه وتجيبى 202.5 مع 5 مستوى رفيع على مجموعك تبقى جايبه 93% تلحقى هندسة اقاليم

eslamnabil lord

18-07-2011, 10:27 PM

انا علمى رياضة جبت فى ثانية ثانوى 81
وثالثة 96
يبقى مجموعى 89
انا كملت علمى رياضة
وانتى جبتى 84
مش هتجيبى 92
اليك سر التفوق
1- رتب نفسك فى الدروس والمدرسة سيبك منها وتبعى اللى يهمك
2- ذاكر دروسك اول باول
3- اذكر لنفسك انك جايب 90 فى المائه وتريد 100 فى المائه
4- ذكر نفسك بانك مجتهد وتريد النجاح والتميز
5- صلى الفجر كل يوم
6- علاقتك بربك كويسة جدا جدا
7- اول شهور واكب دروسك
8- اخر 4 شهور لاتنام شهرين هيفضل شهرين سلى نفسك بالمواد وذاكر وراجع على اد ما تقدر
9- حل كتاب المدرسة ودليل التقويم والملخصات الخارجية
10 - الله الموفق واتمنى النجاح للجميع

Amr Eltaweel

19-07-2011, 01:46 AM

بلاش مجاذفة والله مش بعقدك بس دا الصح
رأيي انك تحولي ادبي وتهتمي بالانجلش وتدخلي تجارة انجلش
احسن ما توجعي قلبك في العلمي
ملحوظة : كلامي كله بسبب اني شايف مجاميع تانيه ثانوي السنه دي عالية اوووي

akram_ahmed

20-07-2011, 12:55 AM

bosy 3shan mnd7ksh 3ala nfsna 7wly riada w shdy 7ilk el sana ele gaya isa mat3rfesh el 5er feen w rbna el mwf2 isa