اول ماتعينت ولقيت مرتباتنا اقل بكتير من مرتبات البترول والبنوك والضرائب استغربت لان اللى شغالين فى الوزارات دى اصحابى واكنوا معايا فى ثانوية عامة وكلنا مؤهلات عليا زى بعض
عرفت اننا وزارة خدميه مستهلكة وهما وزارة منتجة طيب هما بيجيبوا الفلوس منين من الشركات اللى ورثوها من اهاليهم
يبقى ده اول حاجه ميزت بيها الدولة ناس عن ناس احنا وزارة مستهلكة بنصرف فلوس ومبنجبش وهما بيجيبوا فلوس ويدوها للدولة وبيصرفوا علينا يبقى ازاى نبقى زيهم
طيب مادام الموضوع كده واحنا عبء على الدولة يبقى نخفف العبء وبلاها تربيه وتعليم ونروح كلنا نشتغل فى البترول والبنوك والضرائب وفلوس الدولة تكتر مادام هى متقسمه كده اللى يجيب فلوس ياخد فلوس اكتر
وفى الوقت ده لما ماحدش فى الدولة يلاقى معلم يدى حاجه لابنه يمكن يحسوا اننا لينا دور اكبر من اى حد
تخيلوا لو سنة واحده مادخلناش امتحانات ثانوية ولا اعدادية ولا ثانوية مافيش دخول كليات ولا طب ولا هندسة ولا كليات عسكرية ولا تجارة يمكن فى الوقت ده يحسوا اننا مش عبء عليهم وان هما اللى محتجلنا
انا معكم فى اعتصام بكرة انشاء الله لحد مايحسوا أننا مش مواطنين درجة سابعه لان المطالب مش عاوزينها فلوس بس لا عاوزينها تغيير نظرتهم لينا تماما

مشكوووووووووووووووووووووووووووووووررررررررررر

عندك حق ويا ريت كلنا نشارك بكرة فى الاعتصام

احنا لينا حق فى البلد لينا حق فى البترول فى البنوك فى قناة السويس مش فلوس اللى شاغلين فيها بس
واللى ليه جنيه عند حد لو ماطلبش بيه مابيخدوش
لازم نطالب بحقنا ياريت ماحدش يسيب حقه تانى ليهم يوزعوه بمزاجهم
يارب بكره نبقى ايد واحدة

والله عندك حق
دا انا من يوم ما اتعينت وانا بسأل نفسى السؤال دا
يعنى احنا هانفضل طول عمرنا كدا ولاد البطة السودا مش هايجى يوم ونترقى شوية ونبقى حتى ولاد البطة البنى بلاش البيضا لحسن اخوانا بتوع الوزارات الانتاجية يزعلوا اننا هانتساوى بيهم .
انا بس ليا رجاء عند السادة الوزراء بتوع الوزارات الانتاجية دية وبالذات بتوع الكهربا والاتصالات ارجوهم واتوسل اليهم لما يكونوا عاوزين يدوا للموظفين بتوعهم مكافأت فى بعض المناسبات مثل دخول المدارس وشهر رمضان وعيد الفطر وعيد الاضحى وسبوع بنت اخت الوزير وطهور حفيد معاليه والتى عادة ماتكون شهر مكافأة من اجمالى الراتب واحيانا ما تكون شهرين ودا طبعا لما يكون مزاج معاليه عنب ارجوهم مايبقوش يعلنوا عن هذة المكافأت فى الصحف وذلك مراعاة لشعور السادة موظفى الوزارات الخدمية اللى عمرهم ما خدوا اى مكافأة فى اى مناسبة فى حياتهم ولا حتى كيس حمص فى مولد النبى .

وتقبل تحياتى

والله معاك حق يا استاذ هانى
وينطبق عليهم كلام محمد هنيدى ( اراك توزع من مال أمك )

والله معاك حق يا استاذ هانى
وينطبق عليهم كلام محمد هنيدى ( اراك توزع من مال أمك )


هههههههههههههههههههههههههههههههههههههههههههههههههه ه

نحن فى نظرهم just some air

ياجماعةالخير ايها المعلمون ..... لايضيع حق وراءه مطالب ولو طال الزمان .....أفيقوا واعتصموا وكلنا معا نضرب ضربة رجل واحد
وبلسان واحد وقلب واحد ....فوالله الذى لا اله الا هو للمؤمن القوى خير وأحب الى الله من المؤمن الضعيف
ولن ننال حقنا المسلوب هذا الا اذا دافعنا عنه باستماته وتفان .....ولن يعيننا الله عليهم الا اذا دبت فى أرواحنا صيحة الدفاع عنه والرغبة فى استرداده بأى شكل ....مصر هى بلدنا نعم وقلوبنا وارواحنا فداء لها ولكن ليس فى ظل هذا الظلم الفادح الذى نعيشه ونموت منه نحن وعائلاتنا كل يوم ....أرضها .....تراثها ....حضارتها ....حمايتها ....حق لها علينا متى كان ذلك ....نعم فهذه حقيقة ولكن ....اتركوا هذه الشعارات التى لاثمن ولا تغنى من جوع اليوم ....اتركوها فالأمر لايستدعى ....وكنا نتمنى أن يكون للعداله وجه واحد ....ولا نرى الأطباء وغيرهم سيتقاضون 1300 جنيه كحد أدنى ....ألسنا جزء لا يتجزء من كيان هذا البلد ؟...ألا نستحق أن نكون آدميين شرفاء ؟ ....أما نبذله من جهد فى رسالتنا تلك لايستحق من أولئك الكلاب أن ينصتوا الى مطالبنا تلك ...وينفذونها ؟؟؟
الوقت ليس وقت شعارات ووطنية ....فالأمر لايستدعى ولا يلزم .....الأمر يستدعى أن نحقق الحق والعدل لأنفسنا ...لأننا لانطالب بما ليس لنا ...فهذا حق واضح وجلى لنا جميعا وعلينا أن نأتى به ولو كان فى فم السبع مثلما يقولون ......وأقسم بالله أن حقنا هذا قريب منا جدا وسنحظى به طالما كانت فينا روح الفريق طالما قمنا من هذا السبات والاستنكانه .....ياأخى غير من نفسك ودافع عن حقك وحق اولادك الصغار فهم فى أمس الحاجة اليه منك ....تخيل مرة واحدة لو اضربنا عن يوم واحد من ايام الامتحانات
أو يوم واحد من ايام الدراسة ....او عن أى شئ من هذا القبيل .....أٌقسم بالله وكلكم تعلمون ....أن الحكومة كاملة ستهب واقفة
مرعوبة لتلبية كافة مطالبنا وعلى وجه السرعة ......أقسم بالله ...أن حقوقنا تلك لن تتحقق الا على هذا النحو ولابد من السرعة
ياأخى حاول أن تقتلع من نفوس المسؤولين ذلك الانطباع الذى ربما قدأخذوه عنا بأننا ملطشة للجميع باننا اللقمة السائغة والفريسه السهلة.....حاول ولو لمرة واحدة أن تكون آسف ان قلت أن تكون رجلاااااااااااااااااااااااااااا بمعنى الكلمة .....وياحسرتاه على المعلم المصرى ......ذلك الرجل الذى هو الأصل مفروض أن يكون على رأس القائمة قائمة الدخل والرواتب العالية ...التى توازى مهمته التربوية وعمله الذى هو عمل الرسل والأنبياء فى بث التربيةوالتعليم وتخريج أجيال من شأنها أن تبنى مصر ةترتقى بها ....أرأيت كم هى مهمتك هامة ولها من الشأن العظيم ....أرأيت ؟؟؟؟؟؟؟؟؟ ولكن ......انت بسلبيتك تلك واستكانتك ....أٌقسم أن مقامك للأسف لايضاهى حتى مقام الكلب الذليل الذى لطالما عاش يرتضى بلقمة عيش حتى ولو كانت لقمة عيش معفنة....وتحياتى للمعلم المصرى ويحيا معلمو مصر الشرفاء الذين لاينتمون للشرف ولا للأمانة بصلة

نحن المعلمون أصحاب الفضل على جميع العاملين في الدولة لنا فضل على الطبيب و المهندس و المحامي و المحاسب . لنا فضل على الوزير و السفير و الغفير و رئيس الجمهورية لأن كل هؤلاء تخرجوا من تحت يد المعلم الذي يقولون عنه أنه يعمل في وزارة مستهلكة غير منتجة . كيف يقولون عنا ذلك و نحن الذين علمناهم و أنتجناهم ؟ إنهم قوم لا يعقلون !!!!!!!!!!!!!!!!!!

كلامك مظبوط 100 %
بتوع البترول بيجيبو فلوس من آبار أهلهم أو من دمهم إللى بينزفوه وبيعبوه فى البراميل بملايين الدولارات وبتوع البنوك بيطبعوا فلوس بطابعة أهلهم ونحن نعيش سفلقة وعالة عليهم لأننا وزارة خدمية فلا بد من أن نرضى بالفتات الذى يلقى إلينا...هذه للأسف هى نظرة الحكومة إلينا ويجب علينا أن نغيرها ليس لمصلحتنا فقط بل لمصلحة الجميع.

نحن فى نظرهم just some air

الهواء اهم شيء بدونه يموت كل شي ياريتنا فى نظرهم just some air ما اخشاه ان نكون فى نظرهم nothing

nothing
لاىشىء

تقدمت بطلب عرض الى مكتب خدمة المواطنين بالوزاره بعد مشوار طويل وسفر شاق متعب من المنصوره الى الوزاره للعرض على الشئون القانونيه على لجنة الفتوى بالوزاره فى بداية شهر 6
للفتوى فى اقدمية الكادر بينى وبين زميل
ثم اتصلت بعد ذلك فقالوا
قدمنا الطلب الى التوجيه المالى والادارى بالوزاره
الطلب تم تسجيله للعرض على الفتوى الشئون القانونيه
وبعد هذه المده يذهب الى التوجيه المالىوالادارى
مال التوجيه المالى والادارى بالفتوى
هل خدمة المواطنين تعيش فى غيبوبه
فى جاهليه
فى اميه
لاتعرف القراءة والكتابة
ماذا نفعل فى هذا التخلف
ىاهتمام باحوالنا وقضايانا وظروفنا
وكأننا نعيش فى بلاد الواق الواق
حسبنا الله ونعم الوكيل عدد ما كان وعدد ما يكون فى كل ظالم جاهل لا يهتم بامورنا واحوالنا فى هذه الوزاره

والله يا جماعه اللى يحرق الدم اكتر ان اول ناس قاموا باعتصام فى وزارة التربية والتعليم هما البشوات اللى مشاهم ذكى بدر من ديوان الوزارة علشان جايين بالمحسوبيه ورجعهم وظايفهم القديمه وهما برضه اول ناس استجابوا لطلباتهم ورجعوا ديوان الوزارة وما ادراك ايه اللى فى ديوان الوزارة ناس عايشه فى عالم تانى غير باقى الوزارة خالص
هاقولكم على ابسط حاجه وكلنا شايفنها بعنينا يبعتوا لجنه من الوزارة تلاقى اللجنه كل مؤهلاتها انها شغالة فى الوزارة وتفضل شهر فى المحافظة وطبعا بياخدوا بدل خرافى وطبعا البشوات بيتحكموا فى كل اللى شاغلين من اول وكيل الوزارة لاصغر عامل

الكلام ده ملوش لازمه
انتوا عاوزين عصا سحرية تحقق المطالب كل حاجة لها وقت

المشكلة فى سلبيتنا ياأساتذتى الاعزاء**وبالتالى فهم يتجاهلوننا عند تحقيق امال الناس

لازم يحسوا اننا موجودين

ولاه التعب ده كله تعالوا ننشا صفحات على كل المواقع ونجمع ملاين التوقعات ونطالب بالنقل الى وزارات تانيه بس نكون ايد وحده مثبتين وغير مثبتين ونضغط عليهم ساعتها هيلبوا طلبتنا ادينا ان شاء الله

بصراحه حكومه متخلفه عقليا .و ده اقل وصف ليها.يعنى ايه ثوره بدون الاهتمام بالتعليم .حد يعرف دوله جاهله متخلف اصبحت متقدمه بدون التعليم؟!

رايك صح مليون فى المية هو بتاع البترول بينتجوا من بيته ولا من الدولة

عند حق والحل الوحيد لازم المعلمين يكون ليهم صوت مسموع يهز الدنيا صوت زي الرعد في قوته وزي الزئير في شدته ولازم يكون ليهم وقفة جامدة تخوف الكل زي الأسد لما بيظهر في مكان الكل بيخاف ويعمل ألف حساب وحساب لأن له هيبة وغضبته لها ثمنها فالحل نجمع بعض بجد ونعلي صوتنا ونسمع المسؤولين عشان يعرفوا قد ايه المعلم مظلوم ومطحون ويعرفوا إن المعلمين مش شوية عصافير تطيرهم طوبة ولا شوية قش ترميهم الريح في كل مكان شوية احنا زي النخل جدورنا متبتة في الأرض وراسنا علية قوي قوي قوي في السماء ومحدش عمره هيطول قامتنا مهما عمل بس كفاية تحديف طوب لأننا خلاص مش هنرمي بلح خلاص ويعرفوا كمان إن الرماد تحته نار ممكن شوية هوا صغيرين يخلوها جهنم حمرة تاكل كل حاجة قدمها وساعتها لا ينفع الندم

مشكووووووووووووووووووووووووووووووووووررررر

ولا حاجه
لا قيمه
لامعنى

اول مرتبي كان 120 جنيه بالاضافة لحوافز 25 جنيه كنا بنقبضهم لوحدهم بعد المرتب يمكن بشهر وكانوا بينقطعوا في شهور الصيف كمان

والله العظيم ما كنت اقدر اشتري بيهم جزمة ، شغل 30 يوم ماتقدرش تشتري بيه جزمة او بنطلون عدل