السلام عليكم ورحمة الله وبركاته
أنا محمد من القاهرة
جبت 403 ....
والحمد لله جالى التنسيق على طب القاهرة
أنا عمرى دلوقتى 20 سنة إلا 4 أشهر ((عشان دخلت مدرسة تجريبى أخذت أولى وتانية حضانة ودخلت أولى إبتدائى 8 سنين وأول دفعة تاخد سنة 6))
المهم...
أنا دلوقتى هيبقى قدامى 7 سنين دراسة و4 ماجيستير ودكتوراه وبعد كده ربنا يمن عليا وأفتح عيادة وأعمل أسم ...يعنى أبتدى حياتى على 40 سنة كده
لكن أنا بموت فى حاجة أسمها طب وده حلمى من وأنا صغير ...
إيه المشكلة بقى...!!
المشكلة إن الحمد لله نصيبى كويس
كان فى منحة أسمها منحة لوتس التلعيمية
المنحة دى للى جايبين فوق ال85% ..
أنا أتقدكت لها بحيث إنى لو مجبتش طب ...ربنا يكرمنى فى المنحة دى
المنحة إيه مميزاتها..
بتخلى كل حاجة على حسابها...الإقامة فى المدينة الجامعية((وده شرط حتى لو أنت فى نفس المحافظة عشان تمارس الأنشطة)) وراتب شهرى للأكل وراتب شهرى للبس وكمان وأنت داخل بيدولك لاب توب أمريكى dell وأول 45واحد بيسافروا سنة لأمريكا
وكمان الدراسة بتكون فى جامعات خاصة...وبيكون فى فريق إستشارى لكل طالب...يعنى مكون من مستشار نفسى وتانى إجتماعى وحاجات كده
أتصلوا بيا النهاردة وقالوا لى إنى فزت فى المنحة ...من ضمن 1000 واحد...ربنا وفقنى
وإنى أترشحت لجامعة 6 أكتوبر.... biotechnology تكنولوجيا حيوية...((علما إن المنحة لا تضم كليات الطب))
للى ميعرفش التكنولوجيا الحيوية...يعنى كلام الDNA والجينات
النعجة دولى والإستنساخ وإنتاج الأنسولين ولو فى مسرح جريمة ولقيت ضافر تعرف مين اللى كان هنا...يعنى شغل مخابرات وطب شرعى...
الدراسة 4 سنين وبتخرج تتشفط على شغل على طول
إيه رأيكوا...أضحى بالطب ولا إيه..؟؟؟

أنا رأى انك متتخلاش عن حلمك بسهولة وقدام اى اغراءات وخصوصاً انى الحلم دة فى أيدك وممكن تلتحق بكلية الطب دلوقتى, دا لو انتا فعلاً بتحلم بالطب وناوى تكون حاجة كبيرة فيه مش مجرد كلام وأول ماتشوف أى اغراءات تنسى انت ماشى ليه فى الطريق ديه .
أما بالنسبة لعامل السن والكلام الى مايقدمش ولا يأخر دا كلام مامنوش أى فايدة ، المهم تكمل فى الطريق الى انتا رسمتها لنفسك من الصغر وتسيب الباقى على ربنا .............بدل متندم فى الآخر وتقول ياريت الى جرى ماكان .


ودا رأى بس برضه لازم تعمل صلاة استخارة , وربنا يهديك للخير , والله الموفق .

لو حضرتك حابب طب قوى خشها( بس دلوقتى كل 2 سنتى هتلقى دكتور)
لكن انا من وجهة نظرى انى الكلية التانية اللى انت كاتبها تقنيا هتدرس فيها مواد الطب بس هتكون فرصتك فى الشغل احسن ومستقبلها افضل واسال فى البيت وخد رائيهم ممكن يساعدوك كتير
تقبل مرورى:blush:

السلام عليكم ورحمة الله وبركاته

مش عايزة اخليك تنهار بس للاسف موضوع التكنولوجيا الحيوية دي حالها يمشي اكتر ف دول برا مش جوا مصر
لكن جوا مصر لو قدامك طب خش طب لان دا اللي حاله ماشي وف الاخر دا اكل عيش

والله انا حاسة ان الاختيار صعب بردو
الفرصتين حلوووين اووى
بس اللى حضرتك شايفه ايه ؟
مش حضرتك كان نفسك تدخل طب من زماان
وفرصتك جاتلك بيتهيالى دى افضل
بس بردو بصراحة الموضوع محيير
لان الشغل ف التانية مضموون اكتر
مش عارفة والله ربنا يوفقك للى فيه الخير

مش هاقولك غير استخير ربنا وهو هايديلك على السكة الاحسن