يا ريت انا طالب من أي حد دخل هندسة ودرس فيها سواء خلص أم لا ان يقولنا نظام المذاكرة في هندسة وكيفية تنظيم الوقت وظروف اعدادي هندسة


:022yb4:;)

اعدادى هندسة توهاااااان :D كل المواد ملهاش اى علاقة ببعض

اسهل سنة تجيب فيها تقدير و اسهل سنة تشيلها

فيه مفاهيم كتير لازم تتغير عند الطالب و هيمشى فيها كويس اوى

الحل بالايد طول السنة مهم اوى اوى اوى حتى لو حد متعود يزاكر قراية كل المواد طول عمره لان بالكتير الكلام هيتزاكر مرة و يتقرى مرة قبل الامتحان فمش بيلحق يثبت

اعمال السنة دا حاجة اساسية جدااااااا و ممكن هى اللى تنجح و اكيد هى اللى بتجيب تقدير فاى حاجة الدكتور او المعيد يطلبوها مهمة و الغياب مهم

اخر محاضرة غالبا كل الدكاترة بتقول نظام الامتحان و ممكن كمان تقول سؤال او جزء من سؤال, هيكون بدرجات عبيطة يعنى اكيد مش هيدونا الامتحان بس اللى ميحلش السؤال دا بالذات اكيد بيحضرش و الدكتور مش هيبقى طايقه و هو بيصحح

مفيش حاجة اسمها لو مزاكرتش شابتر من 10 يبقى هجيب 90%

لان ممكن الامتحان كله ييجى من الشابتر دا

الامتحان مينفعش يتساب فاضى لاى سبب من الاسباب, من غير فتى مستفز بس عالاقل تنقل السؤال تانى فى ورقة الاجابة و تطلع ال given و اى قانون او معلومة تفتكرها عن الجزء دا

لما الدكتور بيحس ان الطالب حاول مش بيديله صفر مع انه ممكن ميكونش كاتب حاجة صح "الكلام دا فى اعدادى"

كمان لو السؤال محلول بكذا طريقة الدكتور مش بيحترم الطالب بس بيصحح كله و يديله اعلى درجة عادى جدا فبلاش يبقى دا الطبيعى فى الحل بس لو مضطر خلاص

اى خطوة لازم تتكتب لان اللخبطة سهلة جدا و كل حاجة عليها درجات


انا معظم كلامى عالامتحان مش عالمزاكرة لان فعلا الامتحان هو اللى بيفرق
مصدر المزاكرة واحد للناس كلها و الضغط بيجبر كل الملتزمين فى الدراسة و مش بايعين القضية انهم يزاكروا زى بعض تقريبا علشان كل شوية كويز فى مادة او ريبورت مادة تانية
فمش صعب حد يعرف ايه نظام المزاكرة

لكن فى الاخر كل دول بيفرقوا فى التقديرات

بالرغم بقى من اهمية الامتحان دى , بس النتيجة احيانا ملهاش دعوة بحلك فى الامتحان
ربنا مش بيضيع تعب حد و دى حاجة عرفناها اوى فى الكلية
ممكن ناس خارجة عندها اسئلة كاملة غلط و تلاقى نفسها امتياز و ناس بتقول احنا مقفلين و يشيلوا المادة

مش كروتة تصحيح بس الورقة بيبان فيها اللى مزاكر و اتلخبط و غلط و اللى حفظ كلمتين قبل ما يدخل الامتحان او يمكن كمان سمع كام سؤال منا للى جنبه و سبحان الله كل الدكاترة عندهم الموهبة دى انهم يميزوا الورق

الله يبارك فيكي يا باش مهندسه رحاب بجد معلومات جامده ومفيده جداً

عايزين بعد اذنك روتين طالب في كلية هندسة لو سمحتي بغض النظر عن اللي سمه يستحمل التعب أو لأ

الله عليكى يا باش مهندسه رحاب طيب ياريت تقولى ايه المواد اللى عايزه مذاكره جمده وحتاجه مجهود سؤال كمان مش الدراسه بالانجلش ده هيبقى مرخم العمليه حبتين تلاته يعنى ولا ايه

معلومات جميلة جداااااااااا ... تسلــــــــــمى

جزاكم الله خيرا على الافادة العظيمة وربنا يبارك فىكى يا هندسة وكنا بصراحة فى حاجة للمعلومات دى 00000000

الله عليكى يا باش مهندسه رحاب طيب ياريت تقولى ايه المواد اللى عايزه مذاكره جمده وحتاجه مجهود سؤال كمان مش الدراسه بالانجلش ده هيبقى مرخم العمليه حبتين تلاته يعنى ولا ايه


اولا الدراسة الانجلش مش مشكلة خااااااااااااااااااااالص

كل اللى اعرفهم مدارس عربى تعبوا اول اسبوعين تلاتة بالكتير اوى و اتاقلموا عالوضع

و الدكاترة واخدة بالها من النقطة دى و بتراعيها جدااااا فى الشرح

احنا لحد دلوقتى مسموحلنا نحل عربى فى الامتحان لو كلام مش عارفين نكتبه انجليش

بس الحضور مهم لان الدكاترة فى الاول بتحاول تعود الطلبة على فرق اللغة و مينفعش حد يسيب الدراسة خالص و ييجى نص الترم يصطدم بالواقع بعد ما يكون كله اتعود عالانجلش خلاص



المواد اللى عايزة مزاكرة جامد بتفرق من شخص للتانى

الغالبية العظمى بالنسبالها الفيزيا اصعب مادة لانها محتاجة حفظ اثباتات و مسائل صعبة و عملى و شفوى

و فيه اللى ممكن يحبوا الفيزيا و يستسهلوها و يكون صعب عليهم المواد الجديدة اللى مش متعودين عليها زى الانتاج مثلا او الرسم الهندسى

كل جامعة بيكون معروف فيها ايه المواد الصعبة او دكاترتها صعبين شوية و نسب النجاح فى المواد ايه

طاب ممكن تفيدينى يا با شمهندسة رحاب لو سمحت انا داخل ان شاء الله هندسة منوف السنة دى واعرف ان الاعدادى فى كل الهندسات شكل بعضة وانا هاحول بعد الاعدادى ان شاء الله منها لانها بعيييييييييييدة عنى اوى والسؤال ممكن تقوللى نظام الدراسة فيها هل هيه صعبة ولا سهلة بيختلف عن غيرها كتيييييير وخاصة ان هيه الكترونية ولالا وممكن معلش بعض المعلومات المهمة عنها وجزاكم الله خيرا يا هندسة :redface:

انا عين شمس و معرفش النظام فى اى هندسة تانية

يمكن القاهرة شوية صغيرين علشان بنشوف طلبة من القاهرة فى الاكتيفيتيز و كدا

بس معلومة ان اعدادى فى هندسات زى بعض دى اكيييييييد غلط

اعدادى فى نفس الكلية النظام ممكن يتغير من دفعة للتانية و المناهج تتغير حسب الدكتور

الدكاترة عندهم حرية كاملة تقريبا يدوا المنهج اللى عايزينه و يقسموا اعمال السنة بالطريقة اللى عايزينها و يجيبوا الامتحان بالاسلوب اللى يعجبهم

يعنى الثوابت عندنا فى الكلية نتيجة ان نفس الاشخاص لسة موجودين بس كل دكتور جديد بييجى بتفكيره

جزاك الله خيراً وجعله في ميزان حسناتك