رياضة 2 مش حل بس [الأرشيف] - بوابة الثانوية العامة المصرية

صفــاء الروح

11-09-2011, 08:25 PM

أولا السلام عليكم

ثانيا أنا عايزة أسأل سؤال دلوقتى الرياضة بتاعت تالتة دى 3 فروع تفاض وتكامل..جبر وهندسة فراغية..ميكانيكا(استاتيكا وديناميكا)

كل المدرسين اللى سمعت شرحهم بيعلمونا أزاى نحل أكتر من ما بيفهمونا اللى احنا بنعمله دا ايه..يعنى أنا مثلا مكنتش فاهمة النهايات دى بتدل على ايه ولا الاشتقاق..
مثلا أعرف أن المشتقة الأولى هى ميل المماس للمنحنى عند نقطة..أعرفها كدا لفظيا ..ومحدش أبدا قالى أن المنحنى مينفعش نجيب ميله عشان الميل بيتغير عند كل نقطة بالتالى بنجيب ميل المماس عند النقطة دى...هى المعلومة مش صعبة بس بستغرب أنى فى تالتة ثانوى والمعلومة دى مكانتش فى دماغى:o عرفتها بالصدفة وأنا بدعبس على النت

وحاجة كمان مثلا موضوع متوسط التغير هو عبارة عن التغير فى ص على التغير فى س...يعنى فرق الصادات على فرق السينات يعنى ميل..سألت مرة عن الفرق بينه وبين المعدل..بس محدش أبدا فهمنى أن متوسط التغير دا بيعبر عن ميل القاطع للمنحنى..والمعدل بيعبر عن ميل نقطة لما التغير يكاد يكون صفر...معلومات بسيطة بس لما بسأل حد محدش بيدينى الإجابة اللى تفهمنى وبدور وبفهم من كلام مكتوب على النت

بالنسبة للاستاتيكا..المدرس بدأ معانا بالقوى على طول وادالنا مسائل عليها أنا بعرف أحل المسائل بس لما بقرأ فى الكتاب بحس أن فى كلام لازم يتفهم..لأن انا عايزة أبقى مهندسة مش هصلح غسالات؟؟!! :(
المفروض أفهم عشان يبقى عندى قدرة على الابتكار..صحيح دورت وفهمت..بس أنا ايه اللى يضمنلى أنى بعد كدا هفهم كل حاجة لوحدى...

أصحابى حولوا علوم عشان الاسباب دى وأنا مش هحول..لأنى عايزة رياضة بجد..السؤال بقى هو اللى بيحصل دا طبيعي؟؟ يعنى طبيعى أنى المفروض أفهم نفسي والمدرسين يعلمونا أزاى نحل بس؟؟
:excl:

Eng..LiNa

11-09-2011, 10:15 PM

السلام عليكم يا قمر
اولا احييكي علي كلامك اللي في الصميم بجد

ثانيا هعلق علي كلامك من اللي انا بعمله "وده لا يتعدي كونه راي شخصي "
انا من زمان مبحبش اعتمد علي حد خالص بزاكر الدرس لوحدي وبحضره وبحاول استوعب ع قد مااقدر
المهم ان بعد الحصة يبقي استيعابي مش اقل من 90 % وشوية حل بعدها ويبقي الحمد لله موووووز :d
فعشان كده بعد ادور علي المعنى الهندسي للكلام وعلي فكرة لو معاكي كتاب المدرسة هتلاقي معرف معظم الكلام ده
واي حاجه تبقي غلسة معايا بروح ارخم ع المستر واطلع عينه لحد ما افهم :006et4:

يعني ده بيديك معلومات من بره المنهج ودي حاجه مفيده بتخليكي فاهمة اكتر وقادرة تتصرفي فاي مسئلة صعبة
وكمان ساعات بروح اسال المستر ع حاجات حتى مش علينا بس قريتها ومش فهمتها واغلب المدرسين بيشوفوا كده بيساعدوا والله وبيبقوا حابين يساعدوا عشان اي مدرس بيبقي عاجبه الطالب اللي بيفهم :)

خلاصة كلامي يعني جزء كبير اوى من المجهود عليكي ييجي اكتر من 80 %
فمتستنيش حد يجي يشربك المعلومات بمعلقة
وكمان حاولي تدوري من برا وتتوسعي هتحسي انك فاهمة بجد وعارفة يعني ايه رياضة :)
وكمان لو حاجة استغربتيها ممكن تحطيها هنا والله كلهم مدرسين محترمين وبيساعدوا ربنا يكرمهم وهتلاقي الزملا كمان بيساعدوا :)

وزي ما قولتلك ده لا يتعدي كونه راي شخصي لزميلة ليكي :078111rg3::078111rg3:

صفــاء الروح

12-09-2011, 02:06 PM

omrseif

13-09-2011, 12:12 AM

تمــــام أنـا فعلا جربت موضوع التحضير دا قبل كدا ومفيد جدا..ولو على أنى أسأل المدرسين فدا مش هيبقى صعب بس لما استقر مع مدرس لأنى كنت لسة بسمع من أكتر من مدرس عشان أشوف ايه اللى هيريحنى..لكن الموضوع فعلا محتاج اعتماد على النفس كتيـــر

أنا دلوقتى عندى اختيارين ..على حسب المدرسين الموجودين عندى.الأول بيحل كتير جدا وبيدينا اسئلة صعبة وبيخلينا نفكر فى السؤال لحد ما نوصل بفسنا...وبيتابع الطلاب اللى معاه كويس..لكن بصراحه شرحه لأساسيات الدرس نفسه مش كويس..زى ما قولت بنتعلم نحل بس فهحتاج اعتمد على نفسي فى الفهم وعلى مصادر خارجية :028ja7:

والتانى ما شاء الله شرحه فى الميكانيكا بيدل على أنه متمكن منها أوى..وبيفهمنا بتسلسل جميل..وهو بيحل بس مش بيدينا فرصة نفكر يعنى بيحل بنفسه ومش بيدى اسئلة كتير زى الأول..مش بيتابع الطلاب اللى معاه،،الشاطر بيظهرش عنده..فهحتاج اعتمد على نفسي فى الحل...بصراحة مش عارفة أكمل مع مين؟؟

بس هو غالبا هكمل مع التانى:bosyht9:

وهأحاول بقدر الإمكان أحل أسئلة كتير من أى مكان ألاقيه

ربنا يوفقنا كلنا...وشكرا جدا على ردك
^_^

لى فكرة انتى عندك حق انا برضو بعانى من نفس المشكلة مع انى جايب مجموع عالى وفى البيت عايزينى احول علوم وصحابى كلهم علوم بس انا عاوز ياضة لانى بحبها بس برضو المدرس مش بيفهمنا اة هى المفاهيم دى هى طريقة الحل وبس ودى مشكلة بيعانى منها كتير منا ودة بيزعج الواحد لانو عاوز يبقى كامل فى كل حاجة ويكون متميز لان ساعات كتير اكون عارف معلومة ولو انطلبت منى بشكل اخر مش بكون فاهم معناه ولذلك ما بقدرشى اطلع المعلومة اللى عندى وعندك حق فى اللى قولتية وربنا معانا ويوفقنا جميعا

صفــاء الروح

14-09-2011, 01:04 AM

لى فكرة انتى عندك حق انا برضو بعانى من نفس المشكلة مع انى جايب مجموع عالى وفى البيت عايزينى احول علوم وصحابى كلهم علوم بس انا عاوز ياضة لانى بحبها بس برضو المدرس مش بيفهمنا اة هى المفاهيم دى هى طريقة الحل وبس ودى مشكلة بيعانى منها كتير منا ودة بيزعج الواحد لانو عاوز يبقى كامل فى كل حاجة ويكون متميز لان ساعات كتير اكون عارف معلومة ولو انطلبت منى بشكل اخر مش بكون فاهم معناه ولذلك ما بقدرشى اطلع المعلومة اللى عندى وعندك حق فى اللى قولتية وربنا معانا ويوفقنا جميعا

والله اللى مصبرنى أنى عايزة رياضة ودى أحلى حاجة فى الموضوع..وكمان لما لقيت أنى قدرت أدور وأفهم من مصادر خارجية..حسيت أن فى أمل

تقريبا المشكلة فى أن امتحانتنا مش بتعمتد على الفهم فاتعودنا اننا نذاكر عشان نجيب الدرجة النهائية وبالتالى بقت مهمة لمدرس انه يخليك تجيب الدرجة النهائية
!!

Eng.ABDO2015

14-09-2011, 02:02 AM

آسف يا جماعة بس علشان ما قدرتش أقرأ كل تعلليقاتكم بس أحب أقولكم إن الرياضة الفهم فيها أهم حاجة
وكمان دليل للي يا دوب فاهم الدرس بس بيعتمد على الحل الكتير بنسبة كبيرة إنه لو اتحط له كرة معقدة شويتين مش هيعرف يحل بس لو فاهم كل كلمة في الدرس سواء في الكتاب المدرسي أو في أي كتاب خارجي أضمن له إنه يقدر يحل أي مسأله فلازم الفهم دي رياضة يا جماعة مش كيمياء وبردو أنا هنا ما بأقللش من قيمة الحل الكتير هو يعتبر ربع المذاكرة إنما الفهم -من وجهة نظري - أهم حاجةز
دا أنا السنة اللي فاتت و الله ما حليت مسائل رياضة هما كل اللي حليتهم 20 - 30 مسأله في أيام مراجعة الرياضة وبس كده و ياريتهم كان فيهم أفكار كتير بس دول كانو الأساسيات و الحمد لله جبت 50 بدون ما ابص ورايا. يعني من الآخر افهم افهم افهم أهه توكيد بالتلاته يلا سلام

الزهراء2

14-09-2011, 08:29 AM

كلامكم صح وجميــــــــــــــــــــــــــــــــل جدا
وفعلا انا باتمنى اننا نهتم بالفهم بدل ما انا حاسة انهم بقى كل همهم يحفظونا طريقة حل وخلاص

وزي ما قلتم اننا لازم ندور على المعلومة بنفسنا مش نستنى حد يشربها لنا بمعلقة

فإيه رايكم

إننا في المنتدى الجميل ده نساعد بعض في الموضوع ده ونطلب مساعدة المدرسين العظماء اللي موجودين على المنتدى
يعني نبقى مثلا نجيب مراجع للرياضة وكده

بس ملحوظة هامة
العلم ده بحر مالوش آخر
يعني لازم نخلي بالنا اننا ما نتوسعش اوي بره المنهج

teacher_2

14-09-2011, 08:42 AM

yusuf reda

14-09-2011, 01:17 PM

99% بيحلو مسائل ومش فاهمين رياضيات (المعلم )
ولما دخلنا كلية التربية شعبة رياضيات عامة
بجد بجد حسينا اننا ماكنش عندنا حد فاهم رياضيات هى مسائل وطريقة حل وشكرا
لكن فهم متلاقيش
لان الفهم الكامل
بيكون بعيد عن ورقة امتحان اخر العام
والمعلم لو حاول يفهم الطالب هيقولو ده مستر وحش مبنفهمش منه
عشان كده بتوع دبلو التجارة والصنايع ومدرسين الإبتدائى شغالين رياضة 2 اكتر من المعلم المتخصص
وسلامات لوزير التعليم اللى بوظ الدنيا بامتحانات ليس لها محل من الإعراب

احييك واحترم رايك بقوووووووة
انا روحت عند 4 مدرسين رياضة 2 ومعجبنيش ولا واحد فيهم بسبب الموضوع ده ..
البقاء لله على التعليم المصرى

صفــاء الروح

15-09-2011, 02:53 AM

صفــاء الروح

15-09-2011, 02:58 AM

صفــاء الروح

15-09-2011, 03:06 AM

99% بيحلو مسائل ومش فاهمين رياضيات (المعلم )
ولما دخلنا كلية التربية شعبة رياضيات عامة
بجد بجد حسينا اننا ماكنش عندنا حد فاهم رياضيات هى مسائل وطريقة حل وشكرا
لكن فهم متلاقيش
لان الفهم الكامل
بيكون بعيد عن ورقة امتحان اخر العام
والمعلم لو حاول يفهم الطالب هيقولو ده مستر وحش مبنفهمش منه
عشان كده بتوع دبلو التجارة والصنايع ومدرسين الإبتدائى شغالين رياضة 2 اكتر من المعلم المتخصص
وسلامات لوزير التعليم اللى بوظ الدنيا بامتحانات ليس لها محل من الإعراب

مجرد بس أن حضرتك شايف كدا ..دا معناه أن فيه أمل أننا فى يوم من الأيام يكون أسلوب تعليمنا مختلف..وعلى فكرة فى مدرسين كتير بيبقوا فاهمين بس الفكرة بتبقى أن كتير من الطلاب بياخد درس عشان يجيب 50 مش عشان يفهم..بالتالى مخه مش بيبقى قابل يفهم..ولما أى حد هيحاول يفهمه مش هيتقبل..وهيطلع منه حكم أن المدرس وحش..

Engineer ..

25-09-2011, 03:25 AM

محدش ييأس أنا كنت بكره الرياضة زي الشيطان,,,, الحمد لله حسيت اني خارج من 3 ثانوي عامل زي نيوتن كده ^_^

أقصد ان المدرس بتاعنا بصراحة راجل محترم جداً فهمنا يعني ايه تفاضل وتكامل و يعني ايه كلمة رياضيات بمعنى صحيح مش بس حل ودش وورق يترمى ع الفاضي
أنا كنت بحل على الدرس الواجب بتاعه بس يعني يوم ما يكتر أوي حوالي 20 مساله

للكن
مفيش مسألة شبه أختها خااااااااالص
وده ربى عندي ابتكار والله لدرجة اني كنت بحط مسائل وبلخبط القوانين على بعض (كنت بعقد مسائل جامده وإسألوا ^_^)
بس بصراحة اللي بيدرس رياضة المفروض يفهمها أولاً مش بس يحل
مثال بسيط جداً في المحددات في الجبر دي في لعبة ليها اسمها المربع السحري ايه اللي يخليه يشرحه لنا ؟ بيشرح لعبة يا ناس واللي عنده يجيبوا 50 و 49,5 أكيد راجل جامد
بالنسبة بئه للتربية والتعليم فعايز أقول كلمة صغيره وأسف اني ولت
وقل رب زدني علما ,,,,,, دول شوية ,,,,,, ماسكين التعليم لكن اللي عايز يوصل لحاجه بيوصلها
أنا شاكر طرح الموضوع ده جداً وربنا يوفقكم

ahmed doula

25-09-2011, 10:59 AM

ايوه طبيعى ومحدش بيفهم حاجه خالص بيرزع القاعده وبيحل عليها ويدينا واجب وخلاص واما بيقول دى جت ازاى بيقول انتو اغبيا ومش هتفهمو فاحفظو القاعده وخلاص بلا وجع دماغ وده بيحصل معايا انا شخصيا

Ƹ̴Ӂ̴Ʒ EsLaM MaSHaL Ƹ̴Ӂ̴Ʒ

25-09-2011, 11:12 AM

اولا :السلام عليكم ورحمة الله وبركاته

ثانيا : انتوا بتتكلموا في ايه؟؟.......احنا اصلا مبناخدش رياضه...هي دي رياضه؟؟

دي مجرد اساسيات هتساعدنا في فهم الرياضه اللي احنا لسه هناخدها ان شاء الله لو دخلنا هندسه

ماينفعش الرياضه اللي هي الرياضه تتذاكر او تتشرح ولو اتقالتلك مليون مره هتلخبط الدنيا عندك

مثلا يعني .....الفرق بين الهندسه الفراغيه و المجسمات ......الفرق شاسع

لو انتي مش عارفه مثلا شكل حاجه من المجسمات والاستاذ قعد يشرح من هنا لبكره

ولو جابوا تلاتين اربعين الف كتاب وقععدوا يوصفوا فيها ويرسموا شكل توضيحي للشكل المجسم ده

عمرك ما هتعرفيه الا لو اتخيلتي صورته في ذهنك

اصبري بس السنادي وامشي مع الاساتذه واعرفي المسائل بتتحل ازاي

وان شاء الله لما تروحي هندسه هتشوفي كل دا بعينك

****************************

صفــاء الروح

26-09-2011, 11:22 PM

د.محمد أحسن كلمة حضرتك قولتها..أن فعلا اللي عايز يوصل لحاجه بيوصلها ..أنا دلوقتى حاسة بإحساس مختلف وأنان بحل الرياضة...وهى فعلا محتاجة تخيل زى ما إسلام قال...ربنا يقدرنا ..

وبيتهيألى مينفعش نسمع كلام حد بيقول أن أحنا أغبية..وهى الرياضة مش ضرورى أنها محتاجة ذكاء فطرى.. بس محتاجة أنك تفهم كل خطوة بتعملها بتبقى ليه وأنك تبقى لماح ..ودا هيساعد فى أنك توصل لأسهل طريقة حل ..و فى مهارات للحل دا كله فى الآخر بيوصلك أن مخك يبقى ذكى رياضيا

:)
نا لو مكنتش فهمت السنة دى مكنتش هكمل علمى رياضة لأن لو مكنتش فهمت الأساسيات مكنتش هفهم حاجة كنت هحول أدبى لأن معنديش استعداد آخد أحياء..بس يمكن فى يوم من الايام كنت بحلم أبقى فى كلية من الكليات الأدبية ^_^

karimadel7

27-09-2011, 12:25 AM

انا المدرس عندي بيشرحلنا معني الدرس الاول قبل منشتغل
مثلا في التباديل و التوافيق فهمهم لينا ببساطة شديدة عشان نعرف معناهم و الهدف منهم
بعد كده بدانا نشتغل بالقوانين

بس خلي بالك احنا لسه صغيرين علي اننا نفهم كل حاجة في المنهج
مثلا في الجبر الوحدة التانية
واحدة سالت و هو ايه فايدة الموضوع ده كله ؟؟؟
قالها يعني انتي عارفه الدرس من نص ساعة و عايزه تعرفي فايدته
و قال يعني بدون الدرس ده مكنش يبقي فيه علوم كهربا او اتصالات او كمبيوتر او اي حاجة من الكلام ده خالص
و قال فهمتي كده ؟؟ طبعا لا لانك متعرفيش يعني ايه كهربا اساسا و ازاي ده ممكن يساعد في حل مشكلة ما
فهو بيحاول يفهمنا بقدر ما احنا نقدر نستوعب من المناهج و المعرفة اللي عندنا

بس الحته بتاعة التفاضل اتفق معاكي جدا فيها لانها حاجة بسيطة و ممكن نفهمها بس في مدرسين وظيفتهم حل و بس
و تقبلي مروري

صفــاء الروح

30-09-2011, 09:31 AM

أحنا لسة صوغيرين على أننا نفهم كل حاجة..بس لازم نبقى متأسسين وفاهمين اللى المفروض يتفهم
^_^