احد الزملاء ذكر فى موضوع له ان مستشارة المانيا عندما طالب القضاه ان يتساوا بالمعلمين رفضت قائله ( انتم عاوزين تتساوا بالى علموكم ) يا ربى على جمال الجمله - - و هو ده الفرق بينا و بين الدول المتقدمه - - قدرت المعلم فتم انشاء اجيال محترمه متعلمه فعلا - - و لكن عندنا مليون حسره ادخل ديوان الوزاره او الادارات التعليميه او المدارس و اتعرف و شوف

المفروض - - معلش خلينا اضرب مثل و سامحونى فيه - - بحس ان وزارة التربيه و التعليم ذى الام و الدوله ذى الاب - - فيه مثل كده فلاحى بيقول ( الى جوزها يقولها يا عوره الناس تلعب بيها الكوره ) لكن الى جوزها يحترمها و يقدرها و يحسن معاملتها فسوف تستطيع ان تنتج جيل محترم واثق من نفسه - - ناجح يقدر يكون حاجه فى المستقبل

و علشان كده وزارة التربيه و التعليم لازم تكون اعظم وزاره فى الدوله - - لازم المدرسه يكون لها كيان اهم و اعظم كمان من الكليه علشان هنا بتصنع الشخصيات هنا المستقبل يبنى - - لازم الى بيعمل فى التربيه و التعليم يكون له اعلى تقدير و احترام - - لازم يكون فيه نادى و مركز طبى عظيم و خدمات كبيرة جدا للمدرس

يعنى انا امامى سنوات حتى المعاش و لكن دى كلمة حق امام الله - - لازم العاملين فى التربيه و التعليم يكون لهم شان و مكانه محترمه - - و دخل يحقق لهم لقمة العيش و الحياة بكرامه - - و بعد كده حاسبوه بقوة على اى تقصير

الحكومه الى مش هتراعى التعليم و العاملين فيه هى بكل المقاييس حكومه - - - - - - - و الله الواحد يستحى من الكلام - - لكن الى بيحب مصر هو الى هيراعى التعليم - -و لا ننسى انها مهنة الانبياء و الرسل

ونعم الكلام بس مين يسمع