السلام عليكم ورحمه الله وبركاته





انا والمشكله من فضلكم ياجماعه الى يعرف حل يقول وربنا يجازى خير


انا احترت وحيرنى الزمان :bosyht9:



مشكلتى مع الاحيااااااااء مع ماده الاحياء مش لقيالها حل ابدا



ممكن الى يدخل يقول ايه العبط ده دا الاحياء ماده هبله عبيطه تتذاكر بصباع رجلى الصغير :mad:


لكن بجد انا مش فاهمه حاجه خالص فيها ومش عارفه اذاكرها ازاى وكل لما افتح الكتاب

اتخنق واقفله تانى انا رحت ل 3 مدرسين لغايه دلوقتى وبردوا مش قادره افهمها

ورايحه للمدرسه الرابعه بكره :romarioxp6:

فى ناس قالتلى ان فى البلد عندنا هنا مفيش مدرسين احياء كويسين

وخلى بالكم ان عندنا فى بلدنا مفيش غير 4 دول بس الى بيدوا درس احياء :angry2:


وناس تانى قالتلى ان العيب مش من المدرسين العيب من الماده نفسها

هى تقيله ووحشه والاحياء مينفعش تتفهم نظرى كدا بالكلام عشان كدا

اغلب الطلبه بيطلعوا من الثانويه العامه وهما حافظين الاحياء مش فاهمين



وناس تالته قالت ان العيب منى انا الى بستهبل ومش عاوزه افتح مخى




بجد تعبت ومش عارفه اعمل ايه الى يعرف ايه الحل ياريت ينصحنى

وربنا يكرمه

بصى انا هقوولك بصراحة و مش هكدب عليكى
الاحياء دى كانت من اكتر المواد اللى بكرهها
لانى مكنتش بفهمها اوى
او بمعنى اصح مكنتش ببقى مقتنعة بالكلام اللى بناخده
لانه بالنسبة لى ناقصة والمعلومات مش كاملة
واكتر حاجة مكنتش بقهمها و بضطر انى احفظها
اى اى اى حاجة عن النبات
بجد
كانت حاجة خنقة اوى.....وكل لما ييجى فصل الجزء فيه بتاع النبات ببقى بذاكره بالعافية
واكتر فصول كنت بكرها والله
الاول والتانى
بتاع التغذية و بتاع النقل
بعد كده الحكاية هتبقى سلسة
ويا سلام لما تدخلى الباب التانى و ال dna
احـــــــــــــلى حاجة فى المنهج كله
يعنى انى مع الوقت اللى مش هتفهميه هتفهميه و هتحفظيه
متخافيش
وانا على الرغم من ان امتحان الاحياء السنة دى كان غبى اوى
واللى حاطة كان نايم باين عليه
والحمد لله انا جبت 49
عقبالك يا رب ما تجيبى ال 50
ربنا يوفقك :)

بصي أنا حالياً في ثانية

رغباتي أني واخد رياضة 2 في ثالثة

دة لإني بحبها وناوي علي هندسة بإذن الله ، ومبحبش الحفظ وبالتالي مبحبش الأحياء.

من الأخر الأحياء حفظ ، فيه ناس هتنتقدني

بس أنا هقول إن أى مادة فيها الفهم والحفظ زي الرياضة مثلاً فيها قوانين حفظ بس هي أساسها فهم.

إنما الأحياء أغلبها حفظ ، يعني من الآخر إحفظي الأول وبعدين إفهمي.

الاحياء دى عمرى ماشفت حد بيشكر فيها خاااالص سبحان الله

بس انا مشكلتى بقى فى الفيزيا مش فى الاحياء لانى رياضه اصلا بس الفيزيا سهله مش زى الاحياء ياعوذ بالله

مش هاقولك أن الأحياء تافهة بس هاقولك أنها مادة عاوزة حب و علشان الناس كلها بتدخل ضدها أول السنة بتتعذب
الأحياء زيها زى طب كدة من نوعية المواد الى لازم تحبها علشان تمشى فيها
و لازم تبقى فاهمة بتقولى أية الى بيحفظ أحياء و مايفهماش كتيره 43 فى الامتحان
و أهو عندك الامتحان بتاع السنة الى فاتت
لما كان مكتوب فى الكتاب أن ضغط الدم يصبح أعلى فى الشريان كلما اقترب من القلب
و جه سألهم ضط الدم بيكون أعلى فى الذراع الأيمن ولا الكبد و الكلى ؟!

إذا كان عندك صعوبة فى الفهم اضغطى نفسك شوية و اسهرى أمام الفصل لحد ما تفهميه
اربطى كلمة من هنا على كلمة من هنا لحد ما تفهم ىماتسيبيش الكتاب
فهمتى الفصل بقى تافه
و ماتجييش فى يوم تعملوا 10 صفحات حتى لو صفحتين فى اليوم المهم يتم إتقانهم
و حلى كتير و السؤال الى تغلطى فيها شوفى الخطأ و افهميه ماتحفظيش سؤال

و عموماً الأحياء ماينفعش تتدرس بالعربى و أنا واخدها إنجليزى و الأحياء بالإنجليزى مع الفهم تصبح تافهة جداً لأن الطب نفسه كله إنجليزى و تحسوا كدة أن الإنجليزى بيربط الكلام صح أكثر من العربى
و بالمناسبة أنا شايف فصل النقل تافه و سهل جداً و لو واحد فهمه 100 / 100 مش هايلاقى أدنى صعوبة فيه
و التغذية كبير بس تافه برضة هو يمكن أكثر فصل عاوز حفظ أعلي شوية من النقل و التنفس
و عموماً يفضل تصوير دليل تقويم الطالب من الأول بتاع السنين السابقة و حله بعد ما تخلصى لأن فيه تكات مهمة ( بعيداً عن الحاجات الى اتشالت طبعاً ) هى الى هاتفهمك الفهم فى الأحياء بيكون أزاى

السلام عليكم ورحمة الله وبركاته

بناء على كلامك انا حاسة انك بتروحي تذاكري وانتي متعقدة منها وكرهاها اوووووووووووي والموضوع دا غلط
اكيد كرهك الشديد دا بسبب كتر الكلام اللي بيتقال عالمادة
المادة والله ماهي تقيلة للدرجة دي بس مشكلتنا ان احنا بنتأثر بالكلام اللي الناس بتقوله علطول من غير منفكر انه مش اي حاجة يقولها حد اقتنع انا بيها

الاحياء 70 في المية حفظ و30ف المية فهم

برغم قلة الفهم الا ان الجفظ بيعتمد على الفهم دا

عوامل سهولة المادة

1-لازم تروحي لمدرس كويس وشاطر ومافيش حاجة اسمها مافيش حد فيهم شاطر لازم واحد فيهم كويس
2-ابعدي عن اي حد بيعد يكرهك في اي مادة
3-اوعي تروحي تذاكري وانتي حاطة ف دماغك ان الاحياء صعبة ومقرفة ..ممكن ؟؟


اي حد يقدر يقرا كلامك هيستنتج ان المشكلة الاساسية فيكي انتي مش في المادة للااسف
بس دا شيء كويس عشان دا معناه انك بس لو غيرتي مفهومك الموضوع هيبقى ايزي موزو خالص

خدي شوية الافكار الايجابية دي اقريها قبل ماتذاكري

*انا مش اول ولا اخر واحدة هتاخد المنهج دا ،،اللي جابوا الدرجة النهائية فيها مش احسن مني
*لازم افهم ربنا اداني عقل عشان اشغله
*لو ذاكرت كويس وضمنت الاحياء هبقى ضامن مجموع عالي بعون الله لان عليها 50درجة
*لما اذاكر احياء هعرف معلومات كتييير اوي مكنتش اعرفها ودا هيساعد على تثبيتها ف دماغي
*الاحياء دي هتوصلني لله عز وجل لاني كل ما اذاكر مافيش كلمة اقدر اقولها غير سبحااان الله !

وانتي قدها وقدود إن شاء الله
وابقى طمنينا

اهم حاجة اوعي تحطي ف دماغك انها وحشة

بالتوفيق

وانتى مجربتيش رياضه ليه لما مش فاهمه الاحياء؟؟؟؟؟؟؟؟؟؟
يمكن تعجبك