بسم الله الرحمن الرحيم

مشاهد من الحياة:

شاب فى مقتبل العمر لسة على اول الطريق
و تلاقيه بيقول انا تعبت
محدش حاسس بيه مش عارف اعمل ايه
انا خلاص يئست من الدنيا ديه ................... الخ

شاب اخر مريض بمرض صعب (فى نظره )
مثلا حساسية فى الصدر او كده
و برضه تلاقيه بيقول ايه القرف ده
انا تعبت
اشمعنا انا اللى يحصللى كده
ده ظلم و خلاص مش قادر استحمل اكتر من كده........ الخ

فتاة غير جميلة (فى نظرها )
ليه كدا بس يا رب
اشمعنا بقية البنات
اشمعنا انا اللى كدا , يعنى مكانش ينفع واحدة غيرى ............ الخ

اب او ام ,
ابنهم / ابنتهم متاخرين فى الدراسة
ايه ده بس يا رب ليه كدا
ليه العيال غبية كدا
ايه البلوة السودة ديه
ليه ماطلعوش اذكية زى باقى العيال
ليه ليه ليه ................. الخ

و غيره و غيره من مواقف الحياة
اللى الانسان بيعترض فيها على حكم ربنا
و هو مش عارف النعمة اللى هو فيها

يعنى يا جماعة اكيد اى واحد فينا دايما بييجى عليه وقت
و يضايق من حاجة و تطلع من بقة سواء بارادته او من غير ارادته كلمة

" لييييييييييييييييييه؟ "

محدش مرة وقف وقفة مع نفسه و سال نفسه
ايه اللى بعمله ده؟

محدش وقف كده و دور على مميزاته بدل ما يتعب نفسه
و هو بيدور على عيوبه؟

محدش قال لنفسه كدا
" انا احسن من غيرى "
و عمل بمثل
" اللى يشوف بلوة غيره تهون عليه بلوته " ؟
وفى الاخر لا نملك الا انا نقول :
(احمد ربك على كل شىء يا مسلم فانت افضل من غيرك كثيرآ )
وربنا يارب لا يجيبلنا ولا لغيرنا حاجة وحشة
منقول بتصرف

أيوة عندك حق دا فعلا إل بيحصل
شكرا على الموضوع يا محمود

تحياتى اليك ايها الاسطورة

لو كل إنسان دور فى مصيبته على رحمه ربنا
وفى قدره على حكمه ربنا

أكيد حاجات كتير هتتغير
لو الإنسان أيقن إن فى إبتلاء ربنا له حب هيعرف أد إيه ربنا رحيم

يا جماعه ربنا سبحانه وتعالى
خلقنا وكرمنا ليه إحنا بنهين نفسنا بنفسنا

حب نفسك فى الله هتلاقى الدنيا حلوه والأخره أحلا


جزاك الله خيراً
على الموضوع الرائع ده يا محمود

أيوة عندك حق دا فعلا إل بيحصل
شكرا على الموضوع يا محمود
وشكرآ على المرور يا حنان

وربنا يارب لا يجيبلنا ولا لغيرنا حاجة وحشة

اللهم اميــــــــــــن

عن جد موضوع رائع

وفعلا كل واحد بيحصله حاجه بيفتكر ان كده خلاص نهاية المطاف

لكن لو بص حواليه هيأمن فعلا ب "اللى يشوف بلوة غيره تهون عليه بلوته"

جزاك الله كل خير على هالموضوع

تحياتى اليك ايها الاسطورة
مشكورة على المرور اخت سلوى

والله موضوع جيد يا اسطورة
بالنسبة ليه بالرغم من المشاكل الكتير اللي عندي
الا اني بقول الحمد لله علي كل حال
وبعدين اللي بيقول ليه ومش ليه ده حرام
لانه غير قابل بأمر الله
دايما الواحد يقول الحمد لله
وقدر الله ما شاء فعل احسن من كل حاجة في الدنيا

السلام عليكم ورحمة الله وبركاتة


ازيك ياحودا .. موضوع جميل جدا

وفعلا حال احنا بنشوفه كتير
وبمعني ادق عايشينه دايما

تعرف مشكلتنا ايه يامحمود ؟
اننا بنخلط بين حاجات كتير
وبنرمي الغلط دايما علي جوانب حوالينا
ويمكن انا احيانا بعمل كدا
بس بدأت اعرف الحقائق دي مؤخرا ً يعني

يعني مثلا واحد عنده مشكلة
ونيجي علي مشكلة انا عشتها
او قريب منها
المسألة بتاعت الأمراض المزمنه والوراثيه دي
بتكون بجد من اجمل الهبات اللي ربنا بيوهبهالك

تخيل
يعني مينفعش نقول عليها مرض أصلا
لاء دي هبه من ربنا
ومفروض تشكر ربنا عليها

انا اللي عايز الناس تعرفه
ان ربنا عادل لأبعد الحدود
لا يمكن ربنا هيظلمك
خدها قاعده في حياتك
هتقول مثلا ما ربنا عايز كدا ومش عامل حاجة - بتتواكل بقى -
- ده لما تلاقي كل السكك مقفوله -
ايوه طبعا كل حاجة بإراده ربنا
بس بيديك اللي يعوضك
وبيسخرلك الظروف علي اد اللي عندك
عشان انت وانت جاي تتحاسب مش هيوقفك في لجنه خاصه
لاء انا اديتك كل حاجة
متتحججكش

يعني سبحان الله بجد بتلاقي مثلا حاجات واقفه بسبب مرضك ده
ربنا بيجازيك بحاجات احسن منها وعمرك ما تفكر تحلم بيها

ده من الجانب نعتبره الايماني شوية


ننتقل لجانب تاني وهو انك تكون انت المشكلة

فيه ناس بتتخيل دايما ان كل حاجة بتحاربها
مع انهم هما اللي بيحاربوا نفسهم
تخيل بقى !!
يعني يقولك ياخي الظروف .. المشاكل .. يخربيت كذا .. الله ينعل كذا

ويفضل يسب ويشتم ويلعن
مع انه أصلا هو المشكلة

واحد ممكن فكرة ميقبلش الفكرة دي وهو بيقرا ردي دلوقتي

اقوله ياسيدي لو انت مش المشكلة
خلي نفسك انت المشكلة
هيقولي ازاي ؟
هقوله يعني لما تلاقي مثلا الظروف ضدك
ابدأ قول المشكلة مش الظروف
المشكلة انا
هصلح نفسي
هتلاقي الظروف اتصلحت صدقني

والله هتلاقي الظروف اتصلحت مش هقولك بقدرة قادر عشان فيه عقليات مش بتقبل الكلام المعنوي الخالص
لاء هقولك اننا بنشوف الحياة زي ما هي جوانا
انت يائس
والله يابني ما انت شايف الحياة غير سودا
حتي لو هي حلوة
بس انت دخلت نفسك سجن اليأس خلاص
جواك ظلام هيبقي الواقع انعكاس لما بداخلك

عندك أمل - بس مع واقعيه -
هتشوف الحياة جميله جدا وهتقدر تتعايش معاها

عشان عارف انه هيقولك مفيش حاجة اسمها أمل
اللي عندهم أمل بيحلموا
لاء ياسيدي مش بيحلموا
انا مش بقول انا عندي أمل اطلع انقل المريخ واجيبه طنطا
انا بقولك اشوف الحياة زي ما هي ايوه
بس ادي لنفسي أمل عشان اكمل الطريق

يمكن انا خرجت عن الموضوع شوية

بس صدقوني كلها منظومه واحده

كنت انا وواحد صاحبي بنتكلم
فبقوله
ياخي خلي عندك أمل
وبكره هيكون ان شاء الله كويس الي حد ما لو اشتغلنا

فبيقولي اهوه ده اللي جايبنا ورا

فأنا قولتله مهو لو ممشيناش بالعبارات دي في الأول
هنفضل في مكاننا
ومش هنعمل حاجة
ايه اللي يخليني اشتغل
طالما انا عارف ان مفيش فايده
لاء لازم يكون جوايا أكل عشان اكمل الطريق
وفي الاخر بقى اسيبها علي ربنا
بس اكون عملت اللي عليا

ومشكلة تانيه بقى انا بعيشها اوي
ان الانسان بيبص لغيره .. وبيبص لنفسه
بس عايز اقول حاجة
نظرتك ليك .. مش زي نظرة الناس ليك
يعني انت ممكن تكون مش جميل في نظرك
لكن فيه ناس تقبلك وتبقي عندها احسن من توم كروز

وبعدين ياسيدي حتي لو انت شايف واحد حلو قدامك
انت ايش عرفك انه عايش حياته كويس
او مش مريض
او معندهوش مشاكل
والله لو شوفت مشاكله
وعيوبه
هتقول لاء يارب الحمد لله اني وحش

انا طولت جدا بس انا بتكلم بغرض الافاده
واكيد ناس كتير هتحس الكلام اللي انا كاتبه
عشان ده الواقع

في النهايه
اهم حاجة الرضا بما قسمه الله لينا
ودايما اعتقد ان ربنا عمره ما هيظلمك
وياسيدي لو مأخدتش اي حق في الدنيا
مثلا مثلا يعني
والله هتاخده تالت ومتسع مش متلت في الاخره

وبالتوفيق للجميع

معلش يامحمود طولت عليك
واسف ياباشا لو الرد مش منظم
بس اكيد مفهوم ان شاء الله
:)

لو كل إنسان دور فى مصيبته على رحمه ربنا

وفى قدره على حكمه ربنا

أكيد حاجات كتير هتتغير
لو الإنسان أيقن إن فى إبتلاء ربنا له حب هيعرف أد إيه ربنا رحيم

يا جماعه ربنا سبحانه وتعالى
خلقنا وكرمنا ليه إحنا بنهين نفسنا بنفسنا

حب نفسك فى الله هتلاقى الدنيا حلوه والأخره أحلا


جزاك الله خيراً
على الموضوع الرائع ده يا محمود

اكيد طبعآ يا سادات
وجزانا الله واياك كل خير وشكرآ لمرورك العطر ,