مشاهدة النسخة كاملة : يوميات طالب ثانوي (الخازوق) 1


ahmed H capo
02-01-2012, 01:22 AM
بسم الله الرحمن الرحيم
مين مننا مش عايش في تعاسة ابدية بسبب الثانوية العامة
او مين معداش المرحلة دي
اظن مفيش حد معش الايام دي
مفيش حد ممرش بالنكسة دي :excl:
مفيش حد متعلمش عليه وعايش في مصحة نفسية بسبب خازوق الثانوية :006et4:
الثانوية في كل مكان وكل شارع وكل بيت زي الخازوق بظبط
مبدئيا عشان محدش يفهم غلط الخازوق دة

الخازوق من أكثر الطرق بشاعة في الإعدام و معاقبة المذنبين , إبتكره العثمانيون و اشتهروا به , ثم أخذه عنهم حاكم رومانيا الشهير آن ذاك " فلاد دراكولا " و الذي حكية عنه القصص و نسجت الخرافات و إليه ترجع أسطورة " دراكولا "


http://www.tomsoter.com/files/images/bela_lugosi2a.jpg


مصاص الدماء ,, يروى مرة أنه لما سمع بأقتراب الجيش العثماني قام بقتل جميع الأسرى المسلمين لديه و غيرهم من المساجين و علق على خوازيق طويلة و قد كان عددهم بالآف , فكان منظرهم كغابة من الأموات جذوعها الخوازيق و فروعها الجثث , و قد أقامهم في طريق الجيش العثماني بغية إرهابهم .

استنتاج بسيط :

الثانوية من أكثر الطرق بشاعة في الإعدام و معاقبة المذنبين

بعيدا عن جو اندر ورلد و الزومبيز و the walking dead اللي دخلنا فيه دة نرجع للنقطة الاساسية الخازوق

قصدي الثانوية

واحد يقولي الثانوية سهلة انتا مكبرها ليه
اقولوا حضرتك بتضحك علي مين ؟؟

طب حصدقك تعالي نمسك math كدة ونحللنا كام مسألت trig

انتا ياعم المثقف مش عارف احل المسئلة دي

بتقول اييه ؟؟ احلها بالقانون اللي خدناه في اولي ثانوي

شوفت انك بتشتغل نفسك

هو في حد راح المدرسة اصلا في اولي ثانوي ولا في حياته

انا كل صلتي بمدرستي الثانوية اني اروح اسجل اسمي وانوط من فوق السور


http://sphotos.ak.fbcdn.net/hphotos-ak-ash1/hs739.ash1/163158_177448595610491_150134241675260_479697_2577 467_n.jpg



حتقولي دي مشكلتك انتا

حقولك مشكلت ايه يابو مشكلة هو انا لما اروح والاقي المدرس مسكلي خرزانة وعمال يربي ف كرشوا ويكرهني في ام المادة عشان اخد معاه درس هحب التعليم واحضر ؟؟
وبعدين فين المدرس الي بيشرح دلوقتي في المدرسة يا راجل كبر دماغك

http://www.ibtesama.com/vb/imgcache2/69833.gif

لو روحت اديها (قمر علي الدسك)

طبعا كلنا روحنا حضانة وشوفنا الحاجات المعوقة الي كانت بيعلموهلنا ولما اقلكوا قمر علي الدسك تناموا
ولما اقلكوا شمس تقوموا عشان غالبا اقلكوا قمر علي الدسك تاني
ومرت السنين
واكتشفت ان نظرية قمر علي الدسك مكنتش مجرد حاجة بيلهوا بيها شوية عيال هبله
لا دي نظرية مفيدة للحياة الدراسية كلها
انا امتع ايام حياتي لما كانت في اعدادي
كنت اسهر لحد معاد المدرسة علي النت
وكان اياميها لعبة كوانتر وهاف لايف وفيفا 2007 وموصلين وصلة وافضل العب اونلاين مع الجيران لحد مبقيت بروفيشونال

http://gamingbolt.com/wp-content/uploads/2010/01/halflife2.jpg


اخلص الجيم واجري علي المدرسة اعمل احلي قمر علي الدسك
وطبعا مفيش ولا شرح ولا اي بطيييييييخ :)
حد حيقولي في مدرسين عندهم ضمير
عفوا انتوا مطلومين في البلد دي انتوا تخدوا اول سفينه وطيروا علي البلاد الي بتقدر العلم
وللاسف ديما تلاقي المدرس الكويس في المدرسة الزبالة والعكس :angry2:

مقدرش انسي مدرس الكيمياء الاسطوري صاحب الحواجب التي هزت عرش مصر
الاستاذ طارق !!
الراجل دة سوكرة
تشوفه كدة تحبة لله في لله
تزويغ تلاقي
شرح متلاقيش
امتحانات مفيش اصعب من كدة
لا ويسبنا نزوغ وننزل ويخصم من اعمال السنة يعني حضرتك عايزني اسقط عشان اخود درس معاك
بدل مروح البلاج واعاكس البنات في الصيف :blush:

لا ولا الامتحانات
مفيش احلي من كدة بجد
بيجبلك حاجات اينشتاين وابن سينا والعتاولة ميقدروش يحلوها لدرجة انوا قلنا مرة انا في حاجات مش بعرف احلها من الامتحان دة
طب وحضرتك جايبوا منين ؟ يرد بكل برود من النت

http://www.ibda3world.com/wp-content/uploads/2011/09/dd-FORBES_RICHES_0495696109.jpg

ويقول الي يسقط في واحد منهم كدة فقد نص الدرجة بتاعت اخر السنة
قلتلوا معني كدة اننا مشرفين في الصيف لجنة لم ينجح احد :)

ومرت الايام وفضل الخازوق يطاردني
قولت اما اخد معاه درس وبالفعل روحت
اول مدخلت لقيته طلع خرزانة وقال 30 جنية يا حيوان انتا وهو

30 جنية ؟
ليه ياعم
دة انا لو خدت درس مع جابر بن حيان حيديني اوفر عليه

روحت قولت لبابا
قالي انا عيزك تسقط 30 جنية ايه دة انتا بتتكلم في تمن مرتبي يا بني ادم
ومررت الايام وفضلت اتخزوق 3 شهور
احوش وادفع
احوووووووش وادفع

كنت بدفع شهريا 120 جنية باين وماما كانت بتساعدني والحياة كانت ماشية

وجية امتحان العلمي افتكر سعتها كانوا عاملين ضجة عليها
ولو قفلت امتحانات الشهر وامتحان اخر السنة وسقط في العملي
تعيد المادة هو كدة
ورمانا في معمل معفن ريحتوا عاملة زي الخرابة او جايز كان لسه مدهون المهم كان في ريحة وحشة اوي
الغريب ان كان في سبت مليان مشابك واضح انهم بيحاولوا ييسروا علي الطلبة بسد الانف من الرائحة
http://www.ceres.dti.ne.jp/%7Eumezu/contents08/clothespin.jpg

وجابلنا 4 انابيب ازاز وكوباية وترمومتر
وقلنا يالا يا حبيبي
حطهم علي بعض وقيس بالترمومتر
وقولي ايه دة انهي مادة
المهم عملت كل حاجة وجيت اشم
لقيتها ريحة صعببببببببببببببببببببببببببببه
ريحت عرق الشعوب كلها
يا فندم مش قااااااااادر ايه ياحج طارق دة
الريحة صعبة
الريحة اخترقت المشبك
دة EFFF-HC-RE7A W7SHA-L ? ودي علي غرار NHCL
غلط بررررررررة وخدت درجة من 4 درجات
وتأزم الموقف


ومرت الايام وجاءت ليلة الامتحان بما لا تشتهي الحواجب :o

ادانا 43 ورقة انا فاكر سعتها خد علي كل ورقة 20 قرش واحسب يا حسااااب كان محسسني انه مقطعهم من علي الشجرة

قلنا دة كدة 20% من المنهج
قلتلوا ينهارك اسود
وال80% فين في جيبي ؟
قالي اخرص انتا الي مش بتذاكر
قلتلوا وانتا بتشرح حاجة اذكرها ؟؟
عمل فيها من بولاق الدكرور امام سوبر ماركت الفاروق :)
وروحت الامتحانات وفوجئت ان حتي مفيش 20%
الورق تبله وتشرب حواجبة

لولا ادهم اللي ورايا كان زماني شيلت طييييييين
مهو لو الحياة مفيهاش ادهم هنعيش ازاي بس ؟؟

http://4.bp.blogspot.com/_GLYth3RFmnU/TF7moxCQ2bI/AAAAAAAAALA/ycJ4n3TOQPs/s400/man_question_mark.jpg

بمناسبة الصورة الي فوق دي دة ادهم بيحضر لل5 سنين الجايين وبيفكر في مسائل بيخترعها في دماغة ويحلها متخافوش

ومرت الاسابيع وطلعت النتيجة :giljotiiniug3:
ومسكت الشهادة لقيت الاسامي بتاعت فصلي
ساقط
ساقط
ساقط
ساقط
ساقط
دور تاني
ساقط
ساقط
ساقط
http://farm6.static.flickr.com/5135/5454235178_a14fc778b2.jpg
الحقيقة مكنتش عارف ايه الفرق بين ساقط ودور تاني مال اتنين ملحق ؟!! :006et4:

ولقيت اسمي انا وادهم
نجحناااااااااااااااااااااااااااااااااااااااا :av4056bb7jp3::av4056bb7jp3::av4056bb7jp3:

ومن هنا روحت اروش علي الواد طارق
خلاص بقي ينسي الالقاب
مش نجحتتتتتتتت
وعملتلة بيدج علي الفيس بوك
:006et4:
الشعب يريد اسقاط حواجب مستر طارق

وحدث تفاعل كبير في المدرسة


ثورة طلاب مدرسة الفراعنة ضد حواجب مستر طارق

http://www.almhml.com/static/uploads/pictures/homepage%5B1%5D.jpg

ومرت الشهور
وعادت الخزوقة مرة اخري :av4056bb7jp3:

كابوووووووووووووووس الثانوية
مش عارف اذاكر
مش عارف اركز
بقالي 11 سنة مرفه وبلعب
ودلوقتي لازم اذاكر عشان مستقبلي
طب ازاي منظومة ربتني علي الدلع 11 سنة وجاية ببساطة تديني خازوق الثانوية بكل حنان :006et4:
مش دة برضو مخالف لشروط الكون العقلية
حقيقي الدنيا دي زي المرجيحة خازوق تحت وفوق
وصدقت يا كابو لما قلت
في كل شارع في بلادي صوت الثانوية بينااااااااااااااااااادي

واختم حلقتي بقصيدة من تاليفي



سنين وانا عايش مية المية
كمبيوتر تلاقي هروب تلاقي هي دي العيشة العالية
لاكن ماتلاقي حاجة بتتشرح اصلك حقيقي رايح في داهية
حواجب كتيرة فلوس تتصرف مفيش طريقة جهنمية
طريقك مفرولش للثانوي وجية الدور يا حلو تبقي انتا الضحية
عدت سنين غبية من منظومة بدرسلك مهلبية
تروح فين دة بقيت خلاص في حفرة الثانوية

وعجبي

والي اللقاء في حلقات اخري
دة لو مجتليش ازمه قلبية من الثانوية


*ملحوظة اخيرة لون الثانوية الاسود ليس مجرد تلوين ولا حبا في الرسم لان اصلا لحد دلوقتي مشفتش مدرس رسم :d بل هو يعبر عن الكلمة نفسها


بقلمي وممكن تتابع تدويناتي من هنا
http://ahmedhcapo.blogspot.com/

..: Pink rose :..
02-01-2012, 01:54 AM
رووووووووووووعة 00عجبني اسلوبك في الكتابة
في انتظار التكملة

TheMobiler
02-01-2012, 02:05 AM
بص أنا هقلك على حاجة ..

لو الكلام دة كلامك مش ناقله .. تبقى إنت فنان :d

بجد الموضوع عجبنى أوى, وإسلوبك فى السرد مفيش أحلى من كدة ^_^

منتظرين باقى الحلقات ..

أخوك : مطحون تالتة علمى رياضة ( زميلك فى الخازوووق )

ahmed doula
02-01-2012, 05:15 AM
بص يامعلم

بعد اللى حصلك ده اكيد عمرك ماهتعرف تذاكر طول مانت فاكر الحاجات دى

كبر دماغك يا عمونا وانسى احسن :d

واوعى تضايق او تحرق فى دمك لحسان يجيلك الضغط والسكر وبالذات السكر

مانت عارف د بياخد الصغيرين اللى قدك دلوقتى

هتستفيد ايه لما يجيلك مرض وحش احنا عايزينك :006et4:

كبر دماغك خاااااالص بجد مش هزار وابتدى من الاول كل ماتنسد فى وشك ابتدى من الاول ولا كأن حصل حاجه خالص او عملت اى حاجه فى حياتك كأنك لسه داخل الكى جى:p

;) مدونتك لذيذه بالمناسبه

هارى12345
02-01-2012, 08:50 AM
مش عارف مكبرين ليه الثانوية اوى كده !!!!!
انت كه هتخوف اللى لسة مدخلوش الثانوية

lolo cat
02-01-2012, 12:12 PM
ههههههههههههههههههههه والله رووووعة رووووعة اووووووووووووى انا موووت من لضحك
بس علموم ربنا معانا جميعاااااااااااااااااا

قلبي ملك لربي
02-01-2012, 12:56 PM
هو ممكن يكون الثانويه العامه صعبه اوي كده لكن ربنا اكبر من اي حد وقادر علي كل شئ وربنا عمره مايضيع اجر حد تعب

قلبي ملك لربي
02-01-2012, 12:57 PM
يعني ياجماعه لازم نتعب اوي عشان نلاقي نتيجه لتعابنا

alsakr30
02-01-2012, 06:32 PM
موضوع جميل جميل جميل وهو ده اللى بيحصل بالظبط ياريس
انت جبت المفيد منظومة التعليم فى مصر منظومة فاشلة ولا تؤدى الى تخريج جيل يكون قادر على رفع البلد
ربنا يكرمك وتحقق كل احلامك
وننتظر المزيد
وشكرا

eve deen
02-01-2012, 10:43 PM
طريقة الكتابة تحفة بجد..و احنا في انتظار الباقي ,,بس لو كان الموضوع بجد و مأثر فيك للدرجة دي يعني مش مجرد كلام و بس يبقى لازم

تسمع كلام "Ahmed doula"...


NiCe work,,keep Going :)

APIDO
02-01-2012, 11:11 PM
هى دى مصر يا عبلة !! موضوع أكثر من رائع يا أحمد و فى أنتظار الباقى !! ممتاز :)

$ Hager $
03-01-2012, 12:03 AM
بجد أنت اسلوبك حلوو اوى فى الكتابه
و فعلا نظام التعليم عندنا فى مصر ما بيعلمش حاجه اصلا و نظام فاشل
واكيد هنستنى كتاباتك الجديدة
و مدونتك كتيييييير جميلة و روعه

222ahmed222
03-01-2012, 12:22 AM
انت عارف بقى لما تدخل كليه وخصوصا لو كليه من كليات القمه هتعرف بجد ان كلامك دا صح مليون الميه منظومة التعليم فاشله جدا ودا بسبب انك هتفاجأ ان الثانوية دي كانت لعب عيال وانا كنت بقول اكتر منك كدا بس لما شوفت الجامعه بيتكلموا عن حاجات غريبه وربناا هههههههههههههههههههههههه
بجد ببقى قاعد قدام الدكتور بحسه انسان عبقري بس مبفهمش منه حاجه وبطلع من المحاضرة فرحان ان عندنا دكتور بالعبقريه دي بس مش فاهم اي حاجه ف الدرس
كلام بجد يعني
المشكله الكبرى ف فشل التعليم الى جانب مشكلة المدرسين والاجور والدروس الخصوصيه وما الى ذلك
ان الاجزاء اللي بندرسها بعيده كل البعد عن الاشياء اللي هنتخصص فيها
يعني واحد يقولي بجد
واحد عايز يدخل رياضه اتنين ليه يدرس علم نفس او فلسفه او اي ماده ادبيه؟
لو كانوا لغوا الماده دي وكبروا الرياضه اتنين كان احسن لنا لأننا بعد مادرسنا الرياضه اتنين ف تالته ثانوي داخلين الكليه وربنا ما فاهمين الدكاتره اصلا بيحكوا ف ايه ودي مش قضية هندسه بس لا دي قضية كليات كتير زي طب وعلوم وحاجات كتير نحن في غنى عن ذكرها ف الوقت الحالي
لذلك مشكلة تعليمنا صعبة الحل بشكل كبير لأنك عشان تحلها مش لازم تحل التعليم الاساسي والثانوي بس لا دا لازم كمان تعمل اعادة تهيئه للتعليم الجامعي
وانا عارف اني بعدت عن موضوعك الاساسي بس بقول عشان التعليم بجد يترابط انا شايف ان المفروض اللي يحطوا مناهج الرياضه يبقوا دكاتره من كلية هندسه واللي يحطوا احياء يبقوا دكاتره من طب وهكذا عشان يعرفوا يربطوا اللي بناخده باللي هناخده بعدين مش زي نظام كله عند العرب صابون
.
.
اما عن مشكلتك الشخصيه فصدقني انت هتحس المذاكره صعبه والمناهج صعبه بس لطالما عملت اللي عليكي هتلاقي نفسك داخل الامتحان بتقفل المواد كلها بإذن الله وبالنسبه للرياضه ياعم والله من رأيي هي والكيمياء بجد اسهل مادتين ممكن تقابلهم ف ثانويه عامه لطالما انت علمي الى جانب طبعا اسهل ماده ع الاطلاق علم النفس

صفــاء الروح
03-01-2012, 02:23 AM
ربنا يكون فى عونك وفعلا طريقة كتابتك حلوة ودا جزء إيجابي المفروض تهتم بيه فى حياتك

مسمعتش أحمد مكى وهو بيقول دور بنفسك جوا نفسك ^_^

التعليم اللى بنتعلمه دا مجبرين عليه حاول تعمل اللى عليك على قد ما تقدر وتقولش أنك اتعودت على الدلع بس حاول تحس أنك الوحيد اللى هتفيد نفسك وـنك لو عايز حاجة هتقدر تعملها

أنا شوفت ناس كتير بتبقى بتدرس مجال وفالآخر بتلاقى ناجحها فى مجال تانى..زي مثلا واحد فى كلية طب وبيكتب روايات وشعر وبيستمتع بكدا وناجح فيه
وأعرف ناس من خلال النت ..اتعلم برمجة كويس وفى طريقه لتأسيس شركة برمجيات..ممكن بعد سنين مش كتير يكون صاحب شركه ناجح لأنه عايز..وبيحاول حتى لو هدفه محتاج وقت كبيير !!
مفيش حاجة بتيجي بسهووولة
ربنا يوفقك ^_^

حسونة بيه
03-01-2012, 02:23 PM
انا اول مرة اضحك كدة بعد ما دخلت ثانوى عام اصلى انا زميلك فى الخازوق بس حط نفسك كدة يوم ما تجيب النتيجة وتبقى فى كلية طب او هندسة صدقنى احساسك ساعتها هيبقى مختلف اجتهد وخلى الباقى على ربنا انا كان بقالى اكتر من 3شهور مبفتحش كتاب بسبب انى يائيس بس الحمد لله نويت انى اذاكر واخلى الباقى على الله عشان يوم ما اجيب النتيجة مزعلش واقول انا قصرت والوم نفسى