مشاهدة النسخة كاملة : سؤال وإجابه ( الناس دى عند الداخليه ليه وعايزين إيه )


I promise you
05-02-2012, 03:52 PM
س: هي الشباب عند وزارة الداخلية ليه؟
ج: عشان غضبانة من القتل المجاني

س: أيوه يعني ناويين يعملوا ايه؟
ج: محدش عارف، هما نفسهم مش عارفين، هما عارفين الموت و الغضب بس

س: طيب ليه متقولهمش يروحوا التحرير؟
ج: عشان التحرير فشل يجيب حق اللي مات بدل المرة عشرة

س: طيب متقولوهم ... ؟
ج: أقولهم ايه بس، حد فيكم عنده حل بجد؟ أروح أضحك عليهم ولا أقولهم كلام شعارات؟

س: أصل مش عايزين دم؟
ج: القاتل مش مستنيك تروحله عند وزارته، بيخطفنا من الشوارع و يقتلنا في ماتش كورة، تفرق في ايه بقى!

س: طيب هما عايزين ايه يعني؟
ج: عايزين عيش و حرية و عدالة اجتماعية و كرامة انسانية، عايزين حق الشهيد، عايزين يفهموا ليه عواجيز بتخطط لمستقبل و أطفال بتكتب وصيتها

س: ايوه بس عايزين ايه دلوقتي حالا؟
ج: ولا أعرف، دي مش مظاهرة رافعة مطالب، بس هما بيهتفوا ضد المشير تعرف تجيبلهم المشير؟

س: سيبنا التحرير ليه؟ التحرير واسع!
ج: لا التحرير بقى ضيق قوي، كله مشاكل و خناقات و مخترق من التحريات و فيه ناس بتركب على المنصات و تزعق و ناس بتعمل حفلات تعذيب و ناس بتفرض ارضية على البياعين و ناس ثانية بتضرب البياعين و أخوان بتشارك بمطالب عكس مطالب الجماهير و ماخوانش نازلة عشان تتخانق مع الأخوان مش مع اللي بيقتلنا، انتم ازاي مش شايفين ده كله؟

س: طيب معلش و النبي مشيهم كفاية دم!
ج: و الله العظيم ما أعرف أمشيهم، محدش يعرف يمشيهم.

س: طيب لما أنت مش عارف موجودين ليه، و مش عارف عايزين ايه، و ملكش كلمة عليهم واقف معاهم ليه؟
ج: عشان اتعلمت في الثورة أقف مع دائما مع اللي بيتحدى الرصاص، مع اللي بيرفض السلطة، مع اللي يبدوا ضعيف و هو قوي، اتعلمت أن اللي بيوجع أكثر مش جرح الرصاص لكن جرح الغدر و البيع من على المنصات و الفضائيات، اتعلمت أني لو مش المكان اللي ممكن أتصاب أو اتقتل أو اعتقل فيه و فيه غيره بيتصاب أو بيتقل أو بيعتقل يبقى بعمل حاجة غلط. لو مش فاهم ده مش هعرف أفهمك.

س: طيب أنا أعمل ايه دلوقتي؟
ج: متشتمش اللي قدام الرصاص حتى لو أنت مش فاهمه، بلاش تنظير ما تقولش بلطجية ولا مندسين، متتكلمش كأنهم خراف في حد بيسوقهم، الشباب دي مش فاضله الا الارادة، اتاخد منه العمر و الحلم و الأخ و الصديق و العين و الرجل و الروح و نادي الكورة و الميدان و الثورة و كل حاجة و أي حاجة، مش فاضله الا الارادة، أنه هو اللي بيقرر يعمل ايه و محدش متحكم فيه، و قمة الارادة هي أنك تختار هتموت ازاي و تعيش ازاي.

س: اه بس أنا عايز أعمل حاجة ايجابية؟
ج:انزل اقف معاهم، مش لازم تشارك في الاشتباك بس انزل شم من نفس الغاز اللي بيشموه و افهم يعني ايه رش و خرطوش، انزل اتطوع في مستشفى ميداني أو وزع عليهم خل أو أكل.

س: مش عاجبني المواجهة مش عايز أنزل هناك؟
ج: خلاص انزل اتظاهر قدام وزارة الدفاع، أو في ميدان التحرير، أو شارك في مسيرات تسليم السلطة، أو انزل قدام ماسبيرو، أو اعمل عرض كاذبون، أو شارك في حملة حاكموهم، أو اشتغل على المحاكمات العسكرية، أو انزل سلاسل الثورة، أو انضم للجان الشعبية. المهم اعمل حاجة.

س: و لحد امتى هيفضل الحال ده؟
ج: لحد ما يسقط النظام




منقول

aymaan noor
05-02-2012, 04:13 PM
http://files.fatakat.com/2010/6/1277547429.gif

mzbh1973
05-02-2012, 04:59 PM
بسيييييييييطة
بص في وش ال"متظاااااهرين" اللي هناك و ركز فيهم و هما بيرموا طوب و مولوتوف على الداخلية و خصوصا الكام واحد اللي كانوا لابسين ماسكات متخصصة ضد الغاز المسيل و واقفين يستفزوا عساكر الأمن بالإشارات و الحركات
و انت تعرف هما عايزين إيه بالظبط

محمد حسن ضبعون
05-02-2012, 05:08 PM
أصدرت الحكومة مرسوم فتسارعت البلطجية
الشهيد 100 ناقة
المصاب 30 ناقة + عمل خكومى + شقة + تليفون
الثوار بميدان التحرير ولهم مطالب بالورقة والقلم
لا للملتوف والطوب والخرطوش

I promise you
05-02-2012, 09:41 PM
أصدرت الحكومة مرسوم فتسارعت البلطجية
الشهيد 100 ناقة
المصاب 30 ناقة + عمل خكومى + شقة + تليفون
الثوار بميدان التحرير ولهم مطالب بالورقة والقلم
لا للملتوف والطوب والخرطوش


حضرتك تاخد كام وتموت ؟
تاخد كام وتتصفى عينك ؟
تاخد كام وتقف قدام الرصاص ؟
لو البلطجيه اللى هايحرروا مصر فأنا بلطجى وافتخر
لا للملتوف والطوب والخرطوش
دة بس اللى يهم حضرتك ؟!!

بسيييييييييطة
بص في وش ال"متظاااااهرين" اللي هناك و ركز فيهم و هما بيرموا طوب و مولوتوف على الداخلية و خصوصا الكام واحد اللي كانوا لابسين ماسكات متخصصة ضد الغاز المسيل و واقفين يستفزوا عساكر الأمن بالإشارات و الحركات
و انت تعرف هما عايزين إيه بالظبط

حضرتك الناس اللى هناك
اللى فقير واللى مش لاقى يجيب هدوم
الفقر نحل جتتهم وبقى شكلهم كده
مش دة شعبك ؟
هاقولك بردو اقرا الموضوع كويس !

أ/رضا عطيه
05-02-2012, 11:58 PM
شكرا جزيلا

راغب السيد رويه
06-02-2012, 01:53 AM
جزاك الله خيرا

محمد حسن ضبعون
06-02-2012, 02:46 PM
نخون بعض
نكره بعض
نموت بعض
فتسقط مصر
هذا ما يريده أعداء مصر
واسهل من السهل الأستمرار فى ذلك
أعلام مغرض ومحرض
فوضى وفراغ أمنى
تشكيك فى المجلس العسكرى
تعطيل لمجلس شعب ثورى منتخب
شعارات معسولة ومحتواها سم قاتل
مصالح شخصية تعلوا الصالح العام
أغلبية صامتة تنظر للأحداث من بعيد
قلة قليلة مأجوره ومغيبة ولا تنتمى للوطن
!
!
#
مصر فوق الجميع
نداء إلى مثقفى مصر من الوطنين
إنتبوا وأحترسو وأفيقوا
مصر فوق الجميع

sahar2012
06-02-2012, 04:49 PM
شكراً لما قدمته


جزاك الله خيراً

gonejn
06-02-2012, 05:13 PM
دول اسمهم المحتكين و ليس المحتجين
عشان مسابوش حد الا و احتكوا بيه
الجيش فى العباسية و قدام مجلس الوزرا
الشرطة فى كل حتة بيحتكوا بيهم
الباعة الجائلين دة فى حالة ملاقوش حد يحتكوا بيه
الاخوان و قلعوا الاحذية و حاولو يحرقوا المنصة
الشيخ صفوت حجازى و بثينة كامل و عمرو موسى طردوهم من التحرير
الشيخ حسان و الشيخ ابو اسحاق ما بطلوش شتيمة فيهم
المرشد العام للاخوان المسلمين الدكتور بديع
المرشد السابق للاخوان المسلمين مهدى عاكف لم يرحموه
جابو شرف و شركوه
جالهم الجنزورى لم يسلم من لسانهم و تريقتهم



الوحيد الذى لم يسبوه او يجيبوا سيرته و سلم من لسانهم الزفر و اعلامهم القذر امريكا و اسرائيل


عشان كدة اسمهم المحتكين