آه و ألف آه من تلك الجملة... تبقى أنت أكيد فى مصر
لو لقيت من كل بيت خارج مدرس خصوصى ... تبقى أنت أكيد فى مصر
لو لقيت فى بلد سنه سادسة ابتدائى و سنه خامسة ابتدائى!... تبقى أنت أكيد فى مصر
لو لقيت فى كل بيت واحد أو أتنين ماتوا من السرطان ... تبقى أنت أكيد فى مصر
لو رحت التأمين الصحى و إدوك حديد و زرنيخ ... تبقى أنت أكيد فى مصر
لو لقيت فى بلد البحث العلمى فيها تايه و لسه بيحاول يجد العلاقة بينه وبين المجتمع ... تبقى أنت أكيد فى مصر
لو لقيت فى بلد ربع سكانها ساكننين فى عاصمتها ... تبقى أنت أكيد فى مصر
لو لقيت فى بلد تعبيرات مثل "السحابة السودة" و "الشفافية" ... تبقى أنت أكيد فى مصر
لو سمعت جملة "اللى نعرفه أحسن من اللى منعرفوش" ... تبقى أنت أكيد فى مصر
لو رحت "دار الفؤاد" و جاتلك الفاتورة و نعشك فى طريقه "لدار الخلد" ... تبقى أنت أكيد فى مصر
لو رحت تطلع مخالفات عربيتك و لاقتها غير صحيحة
لأن بالفعل معندكش عربية ... تبقى أنت أكيد فى مصر
لو لقيت عجوز و عجوزة ماشيين و معاهم سلم خشب لزوم طلوع الرصيف ... تبقى أنت أكيد فى مصر
لو ركبت مترو الأنفاق و ملقتشى هوا و لا تكييف ... تبقى أنت أكيد فى مصر
لو مزنوق و ملقتشى مراحيض عامة ... تبقى أنت أكيد فى مصر
لو مرة لقيت رسوم الزبالة على فاتورة الكهربا و مرة تانية على فاتورة الغاز ... تبقى أنت أكيد فى مصر
لو سمعت بودانك و شفت بعنيك رئيس نادى محترم بيشتم الكل بدون عقاب أو جزاء ... تبقى أنت أكيد فى مصر
لو فتحت التليفزيون و شفت ظرف "البيت بيتك"... تبقى أنت أكيد فى مصر
لو سألت واحد أو واحدة مين الريس فى كل الألفية الثالثة؟! و رد و قال بدون تفكير "مبارك" ... تبقى أنت أكيد فى مصر
لو قرأت الصحف فى 2005 و فى 2016 عن توصيل الكهرباء للعشوائيات و لقيت نفس الكلام "التوصيل عملية مستمرة" ... تبقى أنت أكيد فى مصر
لو قرأت الصحف فى 2005 و فى 2050 و لقيت نفس الكلام "الأصلاح السياسى و الإجتماعى عملية مستمرة" ... تبقى أنت أكيد فى مصر
لو عرفت أن فنانة سابقة و زوجة لوزير داخلية سابق عمرها فوق التسعين مرشحة نفسها لمجلس الشعب ... تبقى أنت أكيد فى مصر
لو رحت الباجور منوفية و سألت مين رئيس الجمهورية و ردوا وقالوا كمال الشاذلى ... تبقى أنت أكيد فى مصر
لو رحت تنتخب و معاك بطاقة إنتخابية و ردوا و قالوا إنك متوفى ... تبقى أنت أكيد فى مصر
لو سألت واحد أو واحدة ليه بالعربى هيه إسمها "مصر" و بالخواجاتى هيه إسمها "إيجبت"؟! و رد و قال معرفش! ... تبقى أنت أكيد فى مصر

*مع الإعتذار لـكلمة "مصر" فى تلك المدونة الشعرية فالذنب مش ذنبها و الله العظيم

اية التشائم ده كله ليه كدة :o
حضرتك مخلتش حاجة (الا طوابير العيش) الا وقلت انها بايظة يمكن تكون نظرتك سوداء شوية و يعنى انا شايفة ان السوء مش للدرجاتى

ايها العضو الفعال ان مصر مهما كان فيها وما زال نحن نحبها ونريد دائما ان نكون في مصر الى ان نموت فيها "الله اكبر والعزة لمصر" وانني اعلم بانك ما زلت طفلا لكي تقدم هدة السطور المليئة بالتشاؤم دون ان تقدم حتى ولو حلا واحدا لهدة المشكلة فان كنا سنظل كالاطفال نشتكي فلن نتقدم ابدا الى الامام وانت كالطفل وارجو تحسين اسلوبك لكي نرتقي بهدا المنتدى الرائع واني لا اشتمك ولكن انتقدك لكي تتطور في اسلوب كتاباتك "الله اكبر والعزة لمصر"

السلام عليكم
متقولش خدت لإيه من مصر قول إديت إيه لمصر


لاتعليق
اللهم إهدي المسلمين والمسلمات
وصلي اللهم علي سيدنا محمد وعلي اله وصحبه وسلم

يا سلااااااااام

أولاً : شكراً على الموضوع

ثانياً : أنا فعلاً نفسى أغمض عينى وأفتحها ألاقى مصر مش هى مصر

بس هيحصل إزاى

تقريباً ده مستحيل دلوقتى

ويا ريت محدش يدخل يقول مافيش حاجة مستحيلة
لا معلش بقا

فى الزمن المنيل ده مستحيل مصر تبقا دولة محترمة و مستحي تكون دولة متقدمة

بقا احنا توصل بينا الدرجة اننا نستورد قمح من السوادن

الله يرحمك يا عثمان كنت أجدع بواب فى المنطقة

دى مش سخرية بس بتحسر على بلادنا واهو برده احسن مانشحت من اوربا وامريكا

وشكراً على الموضوع

طالما الرئيس اسمة حسنى مبارك يبقا انت اكيد فى مصر

شكرا

موضوع متميز جداااا

شكرااااااااا بورسعيدى على ردك الجميل

:huh: بصراحة انا نفسي مصر تتغير بس طبعا احنا مش هنغمض عنينا ونفتحها نلاقي مصر اتغيرت :huh:
:eek: لا احنا اللي هنغيرها باذن الله :eek:
:rolleyes: مش احنا برده اللي بنينا الاهرامات وعملنا حضارة وحاجات كتييييييييييييير :rolleyes:
:huh:عجز العلم الحديث اللي في اوروبا انه يعرف سره:huh:
:mad: وايه اللي يخلينا منقدرش نعمل حاجة:mad:

:D احنا الفراعنة عارفين يعني ايه الفراعنة :D
مش عشان في فساد في مجتمع او اتنين يعني معنى كدة ان مصر مش هتتصلح او مش هترجع زي زمان

:( احنا لازم نفكر قبل ما نتكلم او نعيب على مصر واحنا في مصر :(

يا ميدو ياحالمة مصر بلدنا مش هنعيب عليها العيب عند الضمائر الغافلة عند كلمة وأنا مالى وسلمولى على الطناش

:rolleyes::cool::rolleyes::cool::rolleyes::cool:يا ميدو ياحالمة مصر بلدنا مش هنعيب عليها العيب عند الضمائر الغافلة عند كلمة وأنا مالى وسلمولى على الطناش

لما تمشي في الشوارع ال........ و تلاقي الناس قاعدين عالقواهي و بيقولوا :
" مصر بتتقدم بينا " ... يبقى انت اكييييييييييد اكيد فمصر ..
و حاجات تانية كتييييييير ...
ثانكس عالتوبيك !

لما تلاقي الجد في ايده حفيدة .. والناحية التانية رغيف العيش في ايده .. يبقي انتا اكيد في مصر

لما تلاقي شباب طموحة و عفية و عالقهاوى مرمية .. يبقى انت اكيد فى مصر

لما تلاقى ادنى النفوس تمص دم البشر عشان الفلوس و على الغلابة بجزمهم تدوس

يبقى انت اكيد فى مصر ..

لما تبقي تلاقي الشباب قاعد 24 ساعة قدام النت طول اليوم .. ويبقي دماغه في هم والدنيا في كوم وهوا في كوم

يبقي انتا اكيد في مصر ..

عمااااااااار يا مصر !!

الموضوع جميل
بس احنا ما ينفعش نقعد نتكلم وبس
كل واحد لو قدر يصلح من نفسه المجتمع كله هيبقى صالح
لكن سلوكياتنا احنا هي اللي بتعمل فبنا كده
في منا طق في مصر بيعتبروا الوظيفة الحكومية دي ولا حاجة
وبيعتمدوا على نفسهم وكل واحد بيعمل لنفسه شغل ينفعه وينفع أولاده

مشكوووووووووووووووووووووووووووووووووووووووور على الموضوع

العيب فينا مش في البلد يا جماعة
كل واحد بيقول وانا مالي واللي يشوف غلط قدامه يسكت
الكل بينتقض اللي حواليه وهو زيهم يعمل العمله ويرجع ينتقض اللي بيعمل نفس الشيء
مش الدوله هي السبب في السحابة السوداء دا استهتار المزارعين
ولا السبب ان ربع السكان في العاصمة المدن الجديدة مليانه بيوت فاضية
لو كل واحد بدأ بنفسه وبدأ يصلح من جواه ومن اللي حواليه بلدنا هتبقى جنة بجد

مشكووور على الموضوع
وطبعا اكيد الغلط مش فى مصر
الغلط فينا احنا
وكلنا طبعا عارفين ليه

يا مصر ده إنت مولد كبير ............. من غير فراشة ولا فول نىّ
ناس بتاكل حلاوتك .......... وناس تقول الله حىّ
يا غالية خسارة فيكى اسمك ....من بكرة هقولك يا مىّ