سيادة المخلوع.....ارجعلنا .. ... مش أنت واحد مننا ؟؟ ...
و عمرك في يوم ما سرقتنا ... ما تيجي طب ترجعلنا
تقعد بأهلك وسطنا .... أهو مرة تاكل أكلنا
وتلبس يا خويا من لبسنا .... قلت ايه ؟؟ يا حارق دمنا ... سيادة المخلوع ... ارجعلنا
وغداك يا سيدي عندي أنا ... رز و بطاطس مسرطنة ..وفاكهة ؟؟. تعيش انت و أنا
و الشاي .. بآخر معلقة م السكر اللي كان عندنا
سيادة الرئيس ... ارجعلنا .... مش سبت الحكم .. لأجلنا ؟؟ـ
ما تيجي تسمع حكمنا !! ... أفكرك ؟؟ ولا انت فاكر زينا
قطار أتحرق من كام سنة ... وغازنا اللي طار من أرضنا ... لعدونا
وعبارة مللي بيغرقوا ..!! غرقت في عرض البحر و راحوا أهلنا ... و الجاني فلسع مننا
ومركبة بأحلى شباب ... ييجوا من ايطاليا غرقانين .. والقرش ياكل لحمنا
والله كانوا زينا .. ويمكن أحسن مننا .. لهم بيوت و ولاد و عيشة و حلم .. زي حلمنا
اتغربوا و اتبهدلوا .. لما الفساد طال كل حاجة في أرضنا
واللي ما ماتش .. قاعد في غربته .. والغريب بيذلنا
اقول كمان ؟؟ ولا كفاية ... و اهو انت عارف عننا
أصبر هتسمع حكمنا ... سيادة الرئيس ... ارجعلنا
بينا عالنائب العام .. تفتنله على ولاد الحرام ... مصوا بلدنا و دمنا
و افتن دي فتنة مش حرام .. ده حقنا .. دا لو انت واحد مننا
أصبر هتسمع حكمنا ... سيادة الرئيس ... ارجعلنا
اقعد معانا و زينا... فسر و احكي و قللهم .. و قللنا
واستسمح الروح اللي منورة في الجنة عند ربنا
هتقول مكنش قصدنا ؟؟ـ دول ماتوا غصب عننا ؟؟ـ
كداب و فاجر .. و اللي يصدقك زيك .. والكدب ريحته منتنة
تتشل إيد اللي ضرب ،، و اللي أمر ،، و عليكوا لعنة ربنا
أصبر هتسمع حكمنا .. ياللي سرقت حلمنا ..وغربتنا و نهبتنا ... و في كل حتة أهنتنا
إحنا اللي سال دمنا .. في الأربعين و اسكندرية و التحرير يشهدلنا
آدي القفص ... أقف هنا .. والشعب يحكم .. مش أنا
صدقني ... هي بينة .. من فوق سبع سماوات .. قالها ربنا
العين بالعين والسن بالسن ... و هو دا بقه حكمنا ... و مفيش غيره عندنا

تسلم ايديك .......