اولا يا جماعة عارف ان الموضوع مكانة مش هنا بس هو دا المكان اللى نفسى ابقى فية السنة الجاية عشان كدا فضلت انا المساعدة تجيلى من هنا وابقى مديون للمكان دا بجميل كبير
انا يا جماعة طالبة 3 ثانوى كل المشكلة انى طموحة جدا بس للاسف سعات بيكون الطموح الكبير كتير الواحد يتحمل عواقبة انا والحمد لله جايبة فى سنة تانية 98% والسنة دى خايفة جدا لان النهاردة 23/4 وخلاص الامتحانات ع الابواب المشكلة انى مش مركزة خالص السنة دى بالرغم انا مفيش غير حوالى 5 % فاقل من المنهج هو بس اللى متراكم يعنى دروس قليلة بس فى العربى وبعدين احنا ف الدروس للاسف لسة مخلصين مبقلناش اسبوعين ودا طبعا فى كل المواد انا مش قادرة اراجع كويس ولو رجعت مش بلاقى وقت للحل وبعدين كمان مش قادرة اعمل اى جدول للمراجعة وحاسة كمان ان الوقت بيضيع خاصة انى المراجعة بحس ان هى بتاخد وقت كتير منى انا عندى شوية انا خلاص جالى اكتئاب وكل اللى يشوفنى يقولى كدا نفسى احافظ على مجموعى وادخل كلية الطب وللاسف اخويا فى سنى 4 طب ومش قادرة استفيد منة ساعدونى يا جماعة وطلعونى من الهم دا انا خلاص هتجنن لسة مخلصناش فى الدروس حل الدليل ومحلناش فى اى كتب سواء مع نفسى او مع الددرس اية الحل من وجهة نظركوا واسفة جدا على التطويل ياريت الحل يكون بسرعة لان العد التنازلى بدا

Same like u.....nafs el magmoo3 w nafs el moshkela :P

ان شاء الله حبيبتي ربنا هيحققلك كل اللي تتمنيه

وخليكي طموحة براحتك

بس انا شايفة ان اخطر حاجة عليكي هو القلق اللي انتي فيه دا

اهدي كدا وخليكي ريلاكس مفيش مشكلة انتي شطورة اهو

شوفي انا هقولك اللي انا عملته لنفسي عشان اوفر وقت للمراجعة وانتي احكمي وشوفي ايه اللي يناسبك لأن كل واحد أدرى بنفسه

انا عن نفسي مكنتش باخد كل المواد مراجعة

يعني أنا بحاول اقلل على قد ما اقدر عشان اوفر وقت وبقول المنهج وفهمته في الشرح ومش ناقص غير اني اذاكره مع نفسي كويس واوفر وقتي
مأخدتش مراجعة ولا احياء ولا فيزيا ولا انجليزي ولا عربي ولا علم نفس

انا بكلم على عموم السنتين تانية و تالتة لاني كنت واخدة الاحياء في سنة تانية

المهم ان دا نفع معايا جدا مع ان كل اللي حوالية خوفوني وقالولي ان انا هضيع من غير المراجعة مع المدرسين وفيه اللي كان بياخد في المادة درسين

بس انا بالنسبالي طالما حسيت بالمسئولية بذاكر مع نفسي وبعمل جدول وعندي وقت تمام

واهم حاجة تعملي جدول ترتبي فيه وقتك

و انتي شوفي ايه يناسبك وانتي بتعرفي تذاكري لوحدك ولا لازم مدرس لان فيه ناس مش بتذاكر غير مع المدرسين

وأهم من كل دا بلاش القلق اللي انتي فيه لان التوتر هيخليكي متعرفيش تذاكري وممكن يأثر عليكي في الامتحان

وربنا يوفقك يا رب

القلق ده احساس طبيعي لكل طالب مجتهد لما يقرب من فترة الامتحانات
كلنا تقريبا كنا كده .. ومازلنا في كلياتنا لما تقرب الامتحانات يظهر القلق والتوتر

في البداية استعيني بالله واطلبي منه يوفقك ويسهلك
حاولي دايما تعملي اللي عليكي وخليكي مطمئنة طالما بتجتهدي ربنا مش هيضيع تعبك لأن ربنا قال {إن الله لا يضيع أجر من أحسن عملا}

دايما في الآخر فيه طلبة اللي هم مهملين طول السنة - نلاقيهم يتوتروا ويوتروا غيرهم ويبدأوا يبصوا لغيرهم .. ملكيش دعوة بيهم
هتلاقي انهم بيهولوا الأمور لأن من منظورهم انهم مش هيجيبوا مجموع


لازم تمشي مع الدروس في أيام المراجعات بمعنى ان كل جزء تراجعوه لازم تذاكريه كويس وتحاولي تحلي عليه .. نظمي وقتك

ابدأي بحل المواد اللي شايفة انها محتاجة حل كتير أو مكنتيش مركزة عليها زي الفيزياء مثلا أو الأحياء .. انتي أدرى

هتيجي بعدين تخلصي مراجعات في الدروس ابدأي تحلي امتحانات

في الفترة الأخيرة ركزي ع الامتحانات لأنها أفضل من انك تركزي على حل باب معين مثلا .. لأن الامتحان بيغطي المنهج كله ويخليكي تراجعيه كله

خليكي واثقة في نفسك واعملي اللي عليكي

ربنا يوفقنا ويوفقكم جميعا