انا 3 ثانوى بس بتلغبط فى استخدامات الازمنة مش عارفة امتى استخدم زمن الماضى التام والمضارع التام والماضى التام المستمر والماضى المستمر والمضارع التام المستمر امتى يااااااااااااااااااااااريت حد يساعدنى عشان الامتحانات قربت :(:(:(:(:(:(

وازاى ساكتة على نفسك الفترة دى كلها

فين شغلك مع المدرس علشان الامور دى مش بتتشرح كتابة

ما تقلقيش .. خلينى أوضحلك المسألة وان كان الشرح هيطول شويه .. بس ان شاء الله تتمكنى من فهم الأزمنة بعد الشرح ..

أولا .. المضارع التام ويتكون have أو has بالإضافة إلى التصريف التالت للفعل

وهذا الزمن يعبر عن حدث انتهى بالفعل .. طبعا السؤال اللى هيجى ف بالك على طول طالما انه حدث انتهى يبقى ايه الفرق بينه وبين الماضى البسيط الذى يعبر أيضا عن حدث انتهى ؟؟ .. سؤال وجيه .. الماضى البسيط يعبر عن حدث انتهى تماما وليس له أى أثر .. أى أنه انتهى كليا .. أما المضارع التام فيعبر عن حدث بالمعنى العامى كدا ( لسه خلصان حالا ) .. أى أنه ما زال له أثر ف المضارع .. يعنى مثلا إيه الفرق بين الجملتين الجايين دول ..

I painted the room

I have painted the room

الجملة الأولى زمنها ماضى بسيط ومعناها أنى قمت بدهان الغرفة والدهان نشف .. أما الجملة الثانية فزمنها مضارع تام ومعناها أنى قمت بدهان الغرفة ولسه مخلص الدهان حالا فالدهان لسه طرى .. دا مجرد مثال يفهمك بس يعنى ايه مضارع تام

لكن فى حقيقة الأمر زمن المضارع التام دائما يأتى معه كلمة تدل عليه ولا يُستخدم بالمعنى .. وكلمات المضارع التام هى

just - already - ever - never
since - for - lately - recently - yet

أول أربعة كلمات تأتى بين have أو has والتصريف الثالث .. والكلمات الخمسة التالية تأتى فى نهاية الجملة .. فإذا وجدنا أى كلمة من هذه الكلمات ف الجملة فإننا نختار أو نستخدم زمن المضارع التام

just معناها حالا
already معناها بالفعل

I have just finished work.
I have already finished work.

وهاتين الكلمتين لا يأتيان مع النفى أو السؤال

ever تأتى ف السؤال
never تأتى ف الجواب وتحمل معنى النفى

Have you ever somked?
No, I have never smoked

since معناها منذ ويأتى بعدها واحدة من ثلاث:
1- جملة : وفى هذه الحالة يكون زمن هذه الجملة التى تأتى بعد since ماضى بسيط .. أما المضارع التام فيأتى قبلها
I haven't seen Ahmed since we met in Alex

2- زمن محدد : بمعنى أن السنة تكون محددة (سنة كام بالظبط) والشهر (شهر إيه بالظبط) واليوم (يوم ايه بالظبط) والساعة (الساعة كام بالظبط) .. أو أى وقت محدد
since 2000 / since April / since Sunday / since 7 o'clock / lunch time

3- last + زمن : since last week

أما for فمعناها لمدة ويأتى بعدها حاجة من اتنين :

1- مدة زمنية : لا أقوم بتحديد اليوم أو الشهر أو السنة كما فى since
for 3 years / for 5 days وهكذا

2- the last + زمن : for the last year / for the last week

lately معناها مؤخرا

recently معناها حديثا

وهاتين الكلمتين لهما نفس الاستخدام تقريبا ما عدا فى حالة النفى فإننا نستخدم lately ولا يمكن استخدام recently .. يعنى فى احدى امتحانات الثانوية العامة من خمس سنوات تقريبا جاب الجملة دى

We haven't met ............ 1
a) lately b) recently c) long time d) yesterday

طبعا الاختيار هنا سيكون lately لأن recently لا تستخدم فى حالة النفى

yet تأتى مع النفى والسؤال فقط
Have you finished your work yet?
I haven't finished yet

أرجو كدا ان يكون زمن المضارع التام واضح من حيث الاستخدام والمعنى

زمن المضارع التام المستمر يتكون من

have / has been + v+ing

وهو يعبر عن حدث بدأ من فترة وما زال مستمرا فى المضارع .. بخلاف المضارع التام الذى يعبر عن حدث انتهى بالفعل .. برضه السؤال اللى هيجى ف بالك طالما ان المضارع التام المستمر يعبر عن حدث ما زال مستمرا ف المضارع يبقى ايه الفرق بيه وبين المضارع المستمر الذى يعبر عن حدث يحدث الآن ؟؟ .. برضه سؤال وجيه .. من حيث المعنى الزمنان متساويان .. فالاثنان يعبران عن حدث ما زال يحدث فى الوقت الحالى .. لكن من حيث الاستخدام فهما يختلفان .. يعنى ايه الكلام دا ؟؟ .. يعنى كل زمن من الزمنين له كلمات يُستخدم معها لا تأتى مع الزمن الآخر .. يعنى المضارع المستمر يُستخدم مع :

now / still / at the moment / Look / Listen

لكن زمن المضارع التام المستمر يستخدم مع ثلاث كلمات :

since / for / all day

عارف والله انك بتقولى ف سرك دلوقتى إيه اللبخة دى ؟؟ .. هو مش since و for دوول بتوع المضارع التام ..

شوفى يا ستى .. المضارع التام المستمر لو دققنا النظر فيه هنلاقيه بيجمع بين زمنين فى تكوينه .. زمن المضارع التام وزمن المضارع المستمر .. مظبوط ؟؟ .. يبقى طالما بيجمع بين زمنين فى التكوين يبقى لازم يجمع بين كلمات الزمنين برضه .. فأنا باخد من كلمات المضارع التام since و for فقط ومعهم كلمة من كلمات المضارع المستمر مثل now أو still أو أى كلمة أو دليل يدل على الاستمرارية وأن الحدث لم ينته بعد .. فيتكون المضارع التام المستمر .. مثال :

I have been studying for 3 hours now
I have been studying for 3 hours and I'm still studying
I have been studying since 3 o'clock and I haven't finished yet

هنلاحظ ف الأمثلة دى اجتماع since و for مع كلمة من كلمات الاستمرارية now و still و I haven't finished yet بالترتيب كدا .. وان كانت I haven't finished yet ليست من كلمات المضارع المستمر ولكنها تدل على أن الحدث ما زال مستمرا ولم ينته بعد ..

يبقى نفهم من كدا ان since و for لو جاءوا ف الجملة بدون أى كلمة تدل على الاستمرارية فإننا نستخدم المضارع التام .. ولو جاءوا فى الجملة ومعهم كلمة من كلمات الاستمرارية فإننا نستخدم زمن المضارع التام المستمر ..

هذا ف الغالب

لكن أحيانا أو فى حالات نادرة لكى يكون اللفظ دقيق .. يمكن أن يأتى زمن المضارع التام المستمر مع since و for بدون وجود كلمة من كلمات الاستمرارية .. وهنا الاشكالية .. خصوصا لو جاب الزمنين فى الاختيارات .. وفى الحالة دى هكون مضطر انى ألجأ لمعنى الحدث أو الفعل عشان أشوف هل الحدث انتهى وبالتالى أختار زمن المضارع التام أم أن الحدث لم ينتهى بعد وبالتالى أختار زمن المضارع التام المستمر .. مثال للتوضيح

I ................... him for 3 years
a) have known b) have been knowing c) knew d) know

نلاحظ هنا أن for جاءت بدون كلمة من كلمات الاستمرارية .. فالمفروض والطبيعى انى أختار المضارع التام وليس المضارع التام المستمر لأنه ليس هناك دليل ف الجملة على استمرارية الفعل .. لأ .. الكلام دا لو مش جايب ف الاختيارات الا زمن المضارع التام فقط .. لكن هنا أتى بزمن المضارع التام المستمر ف الاختيارات .. هنا لازم أرجع للمعنى عشان أكون مطمئن لاختيارى .. المعنى يقول انى أعرفه بقالى 3 سنين .. طيب هل حدث المعرفة انتهى بالفعل ولا ما زال مستمرا ؟؟ .. هو فى معرفة بتنتهى ؟؟ .. اللى بيعرف حد بيفضل عارفه لحد ما يموت حتى وان لم يلتقيا بعد ذلك لكن المعرفة تظل مستمرة .. فهنا حدث لا يصح أصلا أن ينتهى .. وبالتالى معنى الفعل يلزمنى باختيار زمن المضارع التام المستمر حتى وان لم يوجد دليل ف الجملة على الاستمرارية كما ذكرنا .. لكن معنى الفعل نفسه دليل على الاستمرارية ..

فلو جاب ف الامتحان جملة فيها since أو for فقط بدون أى كلمة أو دليل يدل على الاستمرارية ثم أتى ف الاختيارات بزمن المضارع التام والمضارع التام المستمر فالجأى لمعنى الفعل أولا فقد يكون المعنى دليلا على الاستمرارية .. وان لم يكن كذلك فاختارى زمن المضارع التام

ارجو ان يكون المضارع التام المستمر واضح الأن من حيث الاستخدام والمعنى

وانتظرى منى توضيح للماضى التام والماضى التام المستمر

شكرا اوى يا مستر على مجهودك معايا

شرح فوق رائــــع فى انتظار الماض التام

بداية يجب أن نعلم أن الماضى عموما معناه أن الحدث انتهى ولم يعد له أثر ف المضارع .. والماضى كالمضارع له أربع تقسيمات .. الماضى البسيط والماضى المستمر والماضى التام والماضى التام المستمر .. وبالتأكيد كل زمن له معناه واستخدامه ..

الماضى التام ..

أولا يجب أن نعلم أن الماضى التام لا يأتى فى جملة واحدة (اللى بنسميها جملة بسيطة simple) .. ولكن يجب أن يأتى مع زمن الماضى البسيط .. وهذه الجمل تسمى ف اللغة الانجليزية بالجمل المركبة أو المعقدة complex ..

الماضى التام يتكون من had ثم التصريف الثالث للفعل .. والماضى التام يعبر عن حدث حصل أولا ثم حصل بعده حدث آخر .. ولذلك قلنا أنه يجب أن يأتى مجتمعا مع الماضى البسيط .. هنبسط المسألة بمثال ..

لو عندك حدثين .. حدث حصل أول امبارح وحدث حصل امبارح .. يبقى اللى حصل أول امبارح ياخد ماضى تام واللى حصل امبارح ياخد ماضى بسيط .. يبقى انا بشوف الحدث اللى حصل الاول ايه واديله ماضى تام .. مثال ..

Hareedy killed the man who had killed his father

طبعا حدث مقتل أبو هريدى هو اللى حصل الأول .. عشان كدا أخد ماضى تام .. وبناء عليه هريدى هينتقم لأبوه فهيقتل الراجل اللى قتل أبوه .. فدا هيكون الحدث الثانى فى ترتيب الحدوث ولذلك أخد ماضى بسيط .. مثال آخر للتوضيح ..

لما أقولك .. لما وصلت المحطة القطر كان مشى .. أى حدث اللى حصل الأول ؟؟ .. طبعا هتقوليلى ان القطر مشى .. تمام .. يبقى دا اللى ياخد ماضى تام وحدث وصولى للمحطة ياخد ماضى بسيط لأنه حصل رقم اتنين ..

When I reached the station, the train had left

طيب زى ما قلنا ف الأول .. ينفع جملة واحدة يجى فيها ماضى تام ؟؟ .. زى مثلا

I had visited my uncle yesterday

الإجابة لأ .. لو جملة واحدة نجيب فيها ماضى بسيط أو ماضى مستمر لو فى دليل عالاستمرارية .. لكن صعب الماضى التام يجى ف جملة أحادية الحدث زى المثال اللى فات دا ..

طبعا الروابط اللى بيجى معاها الماضى التام والماضى البسيط معروفة وهى ..

after / before / until / no sooner / hardly / scarcely / by the time / as soon as / it wasn't until / it was only when / when

من غير ما نحفظ بقى after بيجيلى وراها ايه و before بيجيلى وراها ايه .. أنا من خلال فهمى للماضى التام والماضى والبسيط أقدر أرتب الأزمنة .. after معناها بعد .. يبقى تلقائيا الحدث اللى هيجى وراها هو الحدث اللى حصل الأول .. يبقى هيكون ماضى تام .. وهكذا

بالنسبة للماضى المستمر فهو يتكون من was / were ثم الفعل مضافا له ing وهو يعبر عن حدث انتهى ولكنه كان مستمرا لفترة أثناء حدوثه ..

الماضى المستمر يمكن أن يأتى فى جملة أحادية الحدث .. أو فى جمل مركبة تتكون من حدثين

اذا جاء فى جملة أحادية الحدث فلا يتم استخدمه إلا إذا كان هناك دليل يدل على الاستمرارية ف الماضى .. وهذا لا يتحقق إلا بتحديد ساعة أو فترة ف الماضى .. كأن أقول مثلا yesterday morning أو yesterday at 7 .. ففى هذه الحالة أستخدم الماضى المستمر وليس الماضى البسيط .. مثال

I was studying at 7 yesterday

أما إذا جاء فى جمل مركبة ثنائية الحدث (أى تتكون من حدثين) .. فإنه إما يأتى مع الماضى البسيط أو يأتى مع ماضى مستمر مثله .. ولكل تركيبة معناها ..

خلينى بس ف الأول أوضح ان الماضى المستمر يأتى ف الجمل المركبة مع الروابط while / as / when فقط لا غير .. لو بعبر عن حدث مستمر ثم جاء حدث قطع هذا الحدث المستمر فإننى أستخدم الماضى المستمر مع الماضى البسيط .. الماضى المستمر يعبر عن الحدث اللى كان شغال .. والماضى البسيط يعبر عن الحدث القاطع .. مثال

While I was studying, the phone rang
I was shopping when I met my friend

طبعا حدث المذاكرة كان شغال ثم جاء حدث رن التليفون فقطع المذاكرة .. ولذلك جاءت التركيبة ماضى مستمر (كان شغال) مع ماضى بسيط (قاطع) .. وكذلك ف المثال الثانى.

أما اذا كان الحدثان متوازيان فى الحدوث .. أى أنه لا يوجد حدث قاطع لحدث بل الاثنان كانا يحدثان فى وقت واحد .. فهنا يكون الحدثان ماضى مستمر .. مثال

While I was studying, my mother was cooking

هنا أنا أذاكر وأمى تطبخ .. حدث الطبخ غير قاطع للمذاكرة وحدث المذاكرة غير قاطع للطبخ .. فكلاهما كانا يحدثان فى نفس الوقت .. ولذلك جاء الحدثان ماضى مستمر

ربنا يجعله فى ميزان حسنات حضرتك شرح حضرتك بجد ممتااااااااااااز

معلش يا مستر اتعب حضرتك معايا شوية تشرحلى بس المستقبل التام المستمر والمستقبل التام والمستقبل البسيط

شكرا دندون .. أنا بس حابب أقول قبل ما اشرح المستقبل ان زمن الماضى التام المستمر اللى بيتكون من had been + ing لا يختلف كثيرا عن زمن الماضى المستمر على اعتبار ان كل منهما يعبر عن حدث انتهى ولكنه كان مستمرا لفترة من الوقت أثناء حدوثه .. طبعا هناك فرق بينهما لكنه فرق لا يكاد يُذكر .. أو نقدر نقول كدا ان الفرق دا فرق أكاديميى شوية .. يعنى للمتخصصين فى اللغة الإنجليزية .. تماما كالفرق بين would rather و had better وكالفرق بين must و have to .. لذلك يكاد يكون من الصعب جدا أن يأتى بزمن الماضى التام المستمر وزمن الماضى المستمر ف اختيارات جملة واحدة ليكون المطلوب أن أختار زمن من بينهما .. ف الغالب بيجيب زمن واحد بس منهم ..

كدا يبقى انتهينا تقريبا من الماضى تماما .. وندخل بقى ف المستقبل

نسيت أقولك ان مافيش تعب ولا حاجة .. لو فى أى قاعدة مش فاهماها انتى أو غيرك قولى وانا اشرحهالك .. أنا أصلى واخد التدريس دا هواية قبل ما يكون احتراف .. عشان كدا تلاقينى دايما مستمتع وانا أقوم بتفهيم الطلاب أى شىء مستعصى عليهم ..

ندخل ف المستقبل .. والمستقبل له ثلاثة أقسام وليس أربعة كالمضارع والماضى .. هناك مستقبل بسيط ومستقبل مستمر ومستقبل تام .. ولا يوجد زمن يسمى المستقبل التام المستمر .. وحتى ان وُجد فسيكون أكاديمى ليس له علاقة من بعيد أو من قريب بمنهج الثانوية العامة ..

طبعا الطريقة الرئيسية للتعبير عن المستقبل عموما بأقسامه الثلاثة هى باستخدام will .. وطبعا هناك وسائل أخرى للتعبير عن المستقبل بخلاف will .. لكن لا داعى لذكرها الآن ربما فى وقت لاحق نقوم بشرحها .. والمستقبل طبعا يعبر عن حدث سوف يحدث ف المستقبل القريب أو البعيد .. وأزمنة المستقبل لا تأتى إلا مصاحبة لكلمة تدل على الزمن ..

المستقبل البسيط يتكون من will وبعدها الفعل ف المصدر .. وطبعا يأتى مصاحبا لكلمات كلها تدل على المستقبل وهى ..

tomorrow / next / future / soon

أما زمن المستقبل المستمر .. فهو يتكون من will be + ing .. وهذا الزمن يستخدم عند تحديد ساعة أو فترة ف المستقبل .. يعنى هذا الزمن يستخدم مع نفس كلمات المستقبل البسيط ولكن مضافا لها ساعة أو فترة مثل tomorrow morning / tomorrow at 7 زى بالظبط الماضى المستمر كان بيستخدم برضه فى حالة تحديد ساعة أو فترة ولكن ف الماضى ..

Tomorrow at 9, I will be studying

أما زمن المستقبل التام فيتكون من will have + pp .. وهذا الزمن لا يستخدم إلا مع by وبعدها زمن قادم مثل by 2020 / by next week

By next year, the government will have finished the project

أزمنة المستقبل سهلة ومش بنفس التعقيد بتاع الماضى والمضارع بأقسامهما .. وزى ما قلت لا تأتى إلا ملازمة ومصاحبة لكلمة تدل على الزمن .. يعنى ما ينفعش أستخدم المستقبل التام مثلا بدون كلمة by ووراها زمن قادم .. وناخد بالنا أوى من حكاية الزمن القادم دى .. يعنى مش أى by يجى معاها مستقبل تام .. ممكن by دى تكون حرف جر بمعنى بواسطة .. ف الحالة دى ما تكونش علامة على استخدام المستقبل التام .. لازم تكون by وراها زمن قادم عشان تعبر عن المستقبل التام ..

شكرا يا مستر اوى شرحك حضرتك بجد ممتاز جدااااا