مشاهدة النسخة كاملة : دا شعب فقرى **** ادخل وشوف بنفسك بجد جااااااامده


كركركوكو
24-04-2008, 03:09 PM
دا شعب فقرى
أحمد فؤاد نجم

نظرًا لأن النعمة فاقت حدها

ولأننا مش قدها

ولأن فعلاً إنجازاتك

فوق طاقتنا نعدها

ولأننا غرقنا فى جمايل

مستحيل حنردها

نستحلفك.......نسترحمك

نستعطفك......نستكرمك

ترحمنا من طلعة جنابك

حبتين

عايزين نجرب خلقة تانية

ولو يومين

إسمع بقى

إحنا زهقنا من النعيم

ونفسنا فى يومين شقا

عايزين نجرب الإضطهاد

ونعوم ونغرق فى الفساد

بينى وبينك حضرتك

دا شعب فقرى مايستحقش جنتك

أنا عارف إنه شعب ماينفعوش

إلا شارون وبلير وبوش

عايز يجرب الإمتهان

ويعيش عميل للأمريكان

بيمد "غازُه" لإسرائيل

ويومين كمان ويمد النيل

أهو يعنى نشرب ميه واحدة

ندوب فى بعض

ماء وماء وماء

ونفض سيرة الإنتماء

وبلاها نعرة وطنطنة

وتبقى البلاد "مستوطنة "

متسلطنة ومتسرطنة

إيه اللى خدناه م الكرامة والإباء

حبة خطب وكلام...كلام

إحنا راهننا على النظام

ورضينا بخيار السلام

خيار حنسد عين الشمس بيه

علشان مايطلعش النهار

ويطلع لمين؟

حبة معارضة مغرضين؟

وحسب بيان السلطة

شلة مأجورين؟

ياعم فضك سيرة

وإرضى بقسمتك

دا شعب مش فاهم أكيد

يالا أُطرده من رحمتك

وإن كنت غاوى الحكم

خليك مطرحك

حاغطس وأقب وأعود

بشعب يريحك

راضى وعمره مايجرحك

أخرس وما بيسمعش

وأعميلك عينيه

مش كل قرش يبص فيه

مايقولش لأه، وفين، وليه

يضرب ينفض فى السليم

وعلى الصراط المستقيم

كل اللى يعرف ينطقه

عاش الزعيم

يحيا الزعيم

أسيل رزق
24-04-2008, 03:16 PM
هههههههه

جميلة جداً

أحمد فؤاد نجم

بجد الراجل ده كلامه كله واقعى وبيعبر تعبير جميل واسلوبه الساخر تحفة بس بيودى فى داهية

جزاك الله خيراً

عاشقـــ الانمى ـــة
24-04-2008, 10:14 PM
ههههههههههههههههه
ايه الجمال دا كله
بيتكلم بجد وبصراحة
يا راجل
أنا حسه إن الراجل دا هيعتقلوه قريب

مس رانيا حسن
24-04-2008, 10:15 PM
لا تعليق
مشكور على اى حال

طالب الهدى
24-04-2008, 10:31 PM
الله عليك يا فواد مصر والله العظيم
الرجل ده راجل من الرجال القليله فى مصر
ربنا يكثر من امثالك.

شكرآ يكريم على الموضوع الجامد
ده

مسيو محمد عياد
25-04-2008, 02:04 AM
وكم ذا بمصر من المضحكات ولكنه ضحك كالبكا

كــــــــــــــــــــــــر شكراً يـــــــــــــــــــــــــــــم

asmaag
25-04-2008, 06:47 AM
والله الراجل زي العسل
بس يا ريت حد يوصل رسالتة
وياريت حديقول لجنابة كتر الف خيرك

كركركوكو
27-04-2008, 05:19 PM
جزاكم الله كل الخير جميعا علي المرور
واللي هيروح في داهيه انا مش مسؤل
انا بريئ

asmaag
28-04-2008, 08:32 PM
كلنا ابرياء

مروج البحر
30-04-2008, 10:48 PM
ههههههههههههههههه
ايه الجمال دا كله
بيتكلم بجد وبصراحة
يا راجل
أنا حسه إن الراجل دا هيعتقلوه قريب

وانا كمان ربنا يستر عليه بجد هو راجل محترم جيدا

dr.saeed
30-04-2008, 10:50 PM
حلوة
هههههههههههههههه

بندق__2007
02-05-2008, 02:40 AM
فؤاد ده من القلة بس مش المأجورة من القلة الشجاعة اللى بتتكلم بلسان الشعب

يسلم نجم و يسلم منقولك يا كريم

زهرة الياسمين
02-05-2008, 02:53 AM
الله الله كلام جميل وواقعى جدا وخطير ولكنه ينقل ما يحدث على ارض الواقع وهو حقيقة وليس افتراء ولكن اريد ان اوضح ملحوظة صغيرة فهو قال((يلاا طردة من رحمتك )) وهذا القول لا يجوز فإن من يطرد من رحمته هو الله وليس لعبد ان يطرد احد من رحمة الله وشكرا لتقبل النصيحة :):):):):):):):):):):):):):):):):):):)

زهرة البنفسج
09-05-2008, 09:50 AM
شكرا على الموضوع الجميل دة بجد موضوع رائع وكلام خطير جدااااااااااا بس فعلا زى ما قالوا بينقل اللى على ارض الواقع ربنا يهدى الناس كلها ويارب مضمون القصيدة يوصل للناس كلها ويتحقق اللى بيدور فى راسى عشان نرتاح باة