كلهم كانوا فداك
ـــــــــــــــــــ
اللي ماتوا واللي عايشين عالسواء
واللي عايشين مشغولين بالثناء
وناسين اللي بيوتهم في العراء
اللي ماتوا في الخناء
واللي ماتوا مالشقاء
واللي ماتوا بدون دواء
واللي ماتوا بالتلوث في المياه
او في الهواء او في الدماء
كلهم كانوا فداك
اللي ماتوا بدون أشعة
واللي ماتو بالاشاعة
واللي ماتوا في الحجارة
واللي ماتوا تحت أنقاض العمارة
واللي ماتوا في طريق من غير اشارة
واللي عايشين ميتين في قبور في حارة
كلهم كانوا فداك
واللي ماتوا في الكنيسة
وكانت اللعبة الخبيثة
واللي ماتوا مالمجاعة
واللي ماتوا في مركبة بتشيل بضاعة
واللي ماتوا بالغرق في السلام في ساعه
واللي ماتوا في سجن الزراعة
اللي ماتوا في لحظة شجاعة
كلهم كانوا فداك
و اللي ماتوا بالفيارس المباعة
واللي ماتوا مالغش في لبن الرضاعة
واللي ماتوا من شكوكهم فالاستطاعة
واللي ماتوا بعد سماعك في الاذاعة
كلهم كانوا فداك
واللي ماتوا عشان جمال
واللي ماتوا بالجمال
واللي حاربوا واللي عبروا واللي ماتوا عالقنال
واللي ماتوا بره مصر بالارتحال
واللي ماتوا وانت سايق للدلال
كلهم كانوا فداك
اللي ماتوا محروقين في القطار
واللي ماتوا بالخبز في طوابير الانتظار
واللي ماتوا واقفين عالمعابر والجدار
واللي ماتوا في نشرة الاخبار
واللي ماتوا بعد خطابك من قرار
كلهم كانوا فداك
وتستحق البراءة عن جدارة
مانته شاطر في الفكاك
وكلهم كانو فداك
-------------------
بقلم صديق الصفحه
الشاعر سيد دسوقي