منقووووووووووووووول للافادة :)
بسم الله الرحمن الرحيم
السلام عليكم ورحمة الله وبركاته

انا ده الكلام اللى انا عرفته عن عمارع ومنقول ع فكره

في البداية .. عايز أعرفكم أكتر عن طبيعة وجود قسم العمارة في الكلية الهندسة

معلومة مهمة جدا لازم تتوافر عند الكل .. قسم العمارة ليس له علاقة بأي من الرياضيات أو الفيزياء أو ماشابه .. اللي هما أساس كلية الهندسة .. لذلك لا تجد في أوروبا مثلا قسم للعمارة في كلية الهندسة .. بينما توجد كلية للعمارة .. خمس سنين .. دراسة للعمارة .. مفادها تخريج شخص يطلق عليه معماري وليس مهندس معماري وده طبعا ليس تقليلا من المعماري .. انهم ينزعوا عنه لقب مهندس .. لكن بالعكس ده حاجة بيخصوا بيها هذا المجال وإن المعماري في أوروبا له شأن كبير جدا وبريستيج خاص جدا أكتر كمان من المهندس .. ويمكن في منكم يعرف معماريين كتير مشهورين أمثالن نورمان فوستر وفرانك لويد رايت وغيرهم كتير .. وده طبعا لأن المعماري هو اللي بيرتبط اسمه أكتر بالمشروع .. يعني مثلا لما بيكون في مشروع كبير في أوروبا مثلا أو في الشرق الأوسط حتى .. دائما بيذكر اسم المعماري .. ولا يذكر اسم مهندس المشروع المنفذ .. وده والله ليس انحيازا .. لكن دي الحقيقة ...

قسم العمارة في الأساس .. المفروض انه لا يرتبط بكلية الهندسة .. ولذلك تجد المسمى بالانجليزي للمهندسين كله ماشي على وتيرة واحدة وبييجي عن المعماري ويتغير ..

يعني مثلا لو قلنا مهندس مدني بالانجليزي .. هايتقال

Civil Engineer

وكذلك مهندس الكهرباء .. اسمه

Power Engineer

وهكذا مع كل الأقسام

لكن المهندس المعماري اسمه

Architect

وده طبعا بيبين بصورة بسيطة ان القسم خارج نطاق الهندسة شوية ..

هو يعتبر هندسة بس من نوع خاص يختلف عن باقي أقسام الهندسة

في مصر وفي دول عربية كتير .. يوجد القسم داخل كلية الهندسة وده مش حاجة غلط برضه .. لأننا برضه بندرس في الكليات بعض المواد من الأقسام التانية .. لذلك جدير بنا أن يطلق علينا لقب مهندس .. ده غير ان المهندس المعماري .. سهل جدا انه يعمل في مجال الهندسة المدنية وده اللي هنعرفة قدام

ثانيا .. طبيعة عمل المهندس المعماري

علشان أشرح النقطة دي .. لازم اعرف الأول يعني ايه عمارة ..

العمارة .. هي الوسيلة اللي من خلالها بعمل مشروع ..

يعني مثلا لو في واحد عنده حتة أرض مثلا .. وعايز يبني عليها مول تجاري .. هايعمل ايه ..

أول حاجة هايعملها .. هايروح لمكتب استشاري هندسي .. اللي هو مكتب المعماريين يعني .. ويقولهم أنا عايز أبنيى مول تجاري في الحتة دي .. كل اللي المعماري بيعمله .. انه بيعد برنامج لتصميم المشروع كرسومات .. يعني بيشوف مثلا هو ايه اللي المفروض يكون موجود في المول ده علشان يعمله اعتبار اثناء تصميمه ..

وصل مثلا انه هايحتاج محلات بمساحة معينة .. ومحلات بمساحة مختلفة عن سابقيها .. وأماكان للكافيهات .. وأماكن للملاهي مثلا .. وخلافة من احتياجات المول .. وبيبتدي يعمل دراسة عن الحاجت دي كلها .. علشان يعد برنامج نهائي للتصميم .. ويبدأ يصمم المشروع كرسومات .. من وحي فكرة معينة .. وطبعا لام يكون عنده جزء من الخيال .. لانك بترسم حاجة من وحي خيالك .. لكن متلائمة مع البرنامج اللي انت أعديته ومتلائمة مع النظريات الصحيحة للعمارة .. يعني كعلاقات الفراغات مع بعضها وكدا .. علشان يوصل في النهاية لحاجة اسمها

Plan

أو المسقط الأفقي ..

بعد مابيخلص الرسومات دي بيطلع من المكتب حاجة اسمها تصميمات تنفيذية .. مش هاتعرض ليها بشكل كبير لكن هي ببساطة حاجة بكون موضح عليها كل الأبعاد والمناسيب والمعلومات اللي هايحتاجها المنفذ علشان ينفذ

وببطبع منها 3 نسخ .. نسخة بتروح للمهندس المدني .. علشان يعمل عليها الرسومات المناسبة ليه علشان يبني ... ونسخة بتروح لمهندس الكهرباء .. علشان يعمل عليها رسومات الكهرباء ويحدد عليه الشبكة الكهربائية بتاعته هاتبقى عاملة ازاي .. ونسخة بتروح لمهندس الميكانيكا .. يعني علشان نظم التكييف وكدا .. وإن كان مطلوب نسخة لمهندس الاتصالات .. علشان شبكة الاتصالات في المبنى برضه بتروح ..

يبقى في النهاية ان الرسومات المعمارية .. هي المرجع الأساسي لأي مشروع ..

وأي مهندس آخر بيحب انه يغير حاجة .. فده مش من حقه اطلاقا دون الرجوع للمعماري

الموضوع ببساطة يا سادة ان دلوقتي لو انت عايز تعمل حاجة في شقتك .. بتجيب واحد تقوله انا عايز أعمل كذا وكذا وهو بيعملهالك .. ومش من حقه يعمل حاجة من دماغة .. لازم يسألك الأول ..

بالظبط ده دور المعماري .. بيعتبر هو صاحب المشروع لأنه بيحل محل العميل اللي جه طلب المشروع وهو الوحيد اللي من حقه انه يتصرف في المشروع بالطريقة اللي هو عايزها .. علشان كدا أنا قلت في الاول .. ان المعماري له بريستيجه الخاص .. نتيجة لأهمية وضعه في أي مشروع

ومن تجربتي وتدريبي في المواقع .. رأيت فعلا وأثبت بالتجربة إنه المعماري هو المرجع الوحيد .. ومافيش حاجة بتم في الموقع دون استشارة المعماري وموافقته .. طبعا هو لا يتدخل في عمل المهندسين الآخرين اطلاق .. لكن هو بيطلب تنفيذ شيء معين .. ولابد من تنفيذه

وسبب الموضوع ده باختصار .. هو لأن المعماري هو المهندس الوحيد اللي بيتعامل مع العميل اللي جه طلب المشروع وبالتالي هو بيحل محله في الموقع .. لكن باقي المهندسين .ز مش بيتعاملوا مع العميل .. لكن بيتعاملوا مع المعماري فقط

طبعا كل ده بيتم داخل منظومة معينة . اما ان تكون المنظومة دي كلها كدا على بعضها شركة واحدة أو شركات مختلفة ..

يعني ممكن تبقى شركة مقاولات كبيرة .. تتبنى تصميم المشروع وتنفيذه أو تكون شركات مختلفة .. يعني في البداية يبقى مكتب استشاري وبعدين نروح نودي المشروع لمكتب مدني علشان يبني وبعدين نروح لشركة تعملنا الكهرباء وهكذا

أو أخيرا الحاجة اللي منتشرة أكتر .. انه يبقى مكتب استشاري يتبنى التصميم .. وشركة مقاولات تتبنى التنفيذ لاخراج المشروع

.

.

أظن بكدا أنا وريتكم طبيعة عمل المهندس المعماري بالظبط .. علشان كدا دائما يذكر اسم المعماري على أي مشروع وده طبعا ليس تقليلا من شأن أي مهندس آخر .. كل واحد وله دوره .. وكلنا سواء في المشروع .. الفرق فقط في نوع التخصص

.
.

ندخل بقى على نقطة مهمة جدا ودي اللي بتهم الناس أكتر

هي الدراسة في القسم .. وطبيعة العمل فيه

عايز أقولكم ان الدراسة في قسم عمارة .. من أحلى الحاجات اللي بتميز القسم ودي مش بشهادة طلاب القسم .. دي بشهادة طلاب الكلية كلهم

طبعا ناس كتير .. بتحاول تاكل دماغكم في اعدادي .. وتقولكم ده قسم الرفاهية واللعب ..

أنا هاقول كلمة حق ..

القسم بتاعنا .. مافيهوش مذاكرة كتير .. تقريبا 45 % فقط من الدراسة

لكن الباقي .. مجهود جبار .. عارف يعني لما تفضل مثلا صاحي يومين أو تلاتة .. علشان شغال في مشروع

أكيد طبعا القسم مرهق لدرجة كبيرة .. بس انت لو حابب الموضوع والقسم هاتحس انه مش متعب ولا حاجة .. احنا الشغل عندنا لذيذ جدا .. بتعمل حاجة ممتعة .. واللي بيضيع الملل .. ويحسسك بعدم التعب .. هو أن الشغل في القسم .. جماعي إلى أقصى درجة .. غير اننا أوقات الامتحانات مش بنحس بالمعاناة اللي بيحس بيها باقي الأقسام .. يعني عبء المذاكرة للامتحانات وكدا .. لأنك كدا كدا طول التيرم شغال في مشاريع وأبحاث .. وبالتالي الامتحان في النهاية بيبقى مجرد تطبيق للايحة بتاعة الكلية وخلاص اللي هي بتنص ان الطالب لازم يمتحن في كل المواد .. وطبعا بنبقى مجبرين اننا نمتحن كذا مادة المفروض مايبقاش فيها امتحان .. وده لأن القسم عملي بدرجة كبيرة جدا وبيعتمد على أعمال السنة بصورة واضحة جدا .. يعني مثلا أغلب المواد بيبقى 60% منها على أعمال السنة و40% فقط للامتحان .. ده غير ان القسم بيتميز بحاجة مهمة جدا في حياتكم .. هو أنه أقرب الأقسام للواقع ... يعني انت بتتعلم بصورة كبيرة الحاجات اللي هاتشتغل فيها فعلا بعد التخرج .. لكن الأقسام الاخرى انت بتقعد تحل في مسائل ورياضة وفيزيا ومعادلات وفي الآخر بتتخرج مابتشتغل أبدا في الحاجات دي .. وكل ده مابينثل تقريبا غير نسبة ضئيلة جدا من الشغل بتاعك .. لأن شغل الهندسة عملي بحت

بالنسبة للشغل عندنا عامل ازاي

الشغل عندنا تلت حاجات

مشاريع

أبحاث

مذاكرة

.
.
1- المشاريع

ودي نواة القسم .. لان هنا انت بتتعلم الحاجة اللي هاتشتغل فيها بعد كدا

وطبعا عندك انواع كتير من المشاريع بترتيب أهميتهم

مشاريع الديزين (التصميم المعماري )

مشاريع الووركينج (التصميمات التنفيذية)

مشاريع مختلفة

طبعا يأتي في المقام الأول مشاريع الديزين .. ودي هي تصميم المباني يعني اعداد برنامج التصميم وعمل الأبحاث والدراسات المختلفة لموقع المشروع ثم بادية تصميمه يعني تعمل رسومات واسكتشات للمبنى اللي انت بتصممه .. وبتطلع كمان بالإضافة لده .. صور للمشروع تبدو وكأنها حقيقة باستخدام الكمبيوتر .. ودي طبعا بتبقى صور بتوضح المشروع بعد تنفيذه واخراجه هايبقى عامل ازاي ...

الحاجة التانية ودي لا تقل أهمية .. هي االتصميمات التنفيذية

ودي زي ماقلت في السابق .. هي الحاجة اللي بيطلعها المكتب الاستشاري علشان يوديها للمهندسين المنفذين علشان ينفذوها

.
.

يبقى سؤال هام

طب ايه الفرق؟

الفرق .. انه زي ماهناك تخصصات مختلفة للمهندسين

كمعماري ومدني وكهربا وخلافة

هناك أيضا داخل التخصص نفسه .. تخصصات أخرى

يعني في واحد بيصمم .. اللي هو بيجيب الفكرة .. اللي هو بيعمل الاسكتشات .. اللي هو الواد الفت يعني بالمعنى العام .. اللي بيجيب حاجة من وحي خياله .. وده طبعا اعلى درجة .. التوب بمعنى أصح .. وده هو اللي بيعمل الرسومات التصميمية (التصميم المعماري)

وواحد تاني .. مهندس معماري برضه .. بس بتيجي مهمته بعد مهمة المصمم .. وبيبتدي يبيض التصميمات دي .. ويعملها حاجة اسمها تصميمات تنفيذية .. يعني اللي هاتروح تتنفذ ..

هاضرب مثل

لما يكون واحد بيتكلم عربي .. وواحد بيتكلم انجليزي .. عمرهم ماهيتفاهموا مع بعض .. لابد من وجود مترجم بينهم

المعماري والمنفذ ده حالهم .. والتصميمات التنفيذية .. هي المترجم .. علشان المهندس المدني او المنفذ يعني .. يفهم دماغ المعماري وايه اللي عايزه بالظبط

.

.

أخيرا

مشاريع مختلفة

زي مثلا مشاريع التخطيط

أنا مش هاتكلم عنها باستفاضة الحقيقة .. لأنها حاجة مش من أساسيات القسم أوي .. مع اننا بندرسها لتلت سنين .. لكن هاعطي فكرة عامة

المهندس المعماري .. بيبص من فوق .. ولما بيكون في مبنى عايز يتبنى .. المعماري بيروح يشوف الارض .. ومداخلها ومخارجها علشان يصمم

طب لو في مدينة جديدة كاملة عايزة تتبني .. لازم يعرف يصمم المساحة الكبيرة دي.. علشان يقسم المدينة دي لأراضي .. وعليها المباني

تمام .. ده كلام جميل

طب ايه برضه التخطيط ده

هاقول .. انه هناك كلية اسمها التخطيط العمراني .. ودي بتخرج مخططين .. اللي هما اساسا بيقسموا المدن .. ويعملوا تخطيط بينهم

بيقولوا انا عندي كذا مدينة طلعتهم بالشكل الفولاني .. وكل مدينة .. هاتتقسم لكام حي بالشكل الفلاني .. وكل حي هايتقسم لكام مجاورة .. ودي اصغر وحدة تصميمية ..

ييجي المعماري .. يمسك المجاورة دي ويعملها تصميم .. يقسمها لأراضي .ز ويبنيها

فطبعا لازم يكون فاهم شغل المخطط أو مهندس التخطيط يعني علشان يعرف يتعامل معاه

عارف ان الكلام كبير شوية وصعب استيعابه .. وانصحكم أنكم ماتهتموش بيه أوي .. لأن دي كمان حاجة .. هاتدرسوها في سنة تالتة ان شاء الله

.
.

نوع تاني من المشاريع وهي مشاريع الإسكان

ودي عبارة عن تصميم وحدات سكنية مختلفة بتعتمد على معدلات وأساسيات لتصميمها .. لأن أغلبها بيبقى تابع للحكومة .. مش هاتكلم عنها كتير برضه لأن ده لسة بدري عليه أوي انني أتكلمه عنه ..

ملحوظة مهمة

مشاريع الديزين والووركينج دي حاجة بتعملها لوحدك

أما مشاريع الاسكان والتخطيط فدي بتبقى داخل جروب

2-الأبحاث

ودي حاجة منتشرة كتير أوي في القسم .. في البداية هاتحس ان الأمور صعبة .. لكن بمرور الوقت هاتلاقي إن الأبحاث دي .. أسهل حاجة ممكن تعملها في القسم

الشغل فيها غالبا بيبقى شغل جماعي .. يعني جروب من عدد معين من الطلبة .. بيشتركوا في بحث وبيعملوه ..

الغرض منها .. انهم يعلموك ازاي تعمل ضمن فريق عمل .. لان شغلك بعد كدا هايبقى بالشكل ده

Team Work

وده اللي بيميز القسم

وطبعا الأبحاث دي بتبقى في المواد اللي انت بتدرسها .. وده طبعا لما تدخلوا القسم بقى هاتعرفوها بشكل كبير

الشغل فيها ممتع .. لأنك بتشتغل مع أصحابك.. بتقضوا وقت حلو .. بتخرجوا مع بعض علشان الأبحاث ..

انتوا بتقضوا معظم وقتكم في الكلية وبيصبح البيت وسيلة للنوم فقط .. وطبعا بتقضوه مع بعض .. صحيح شغالين .. لكن مش حاسس بالملل .. لأنك قاعد شغال مع أصحابك

.
.
3- المذاكرة

ودي طبعا مش هاتكلم عنها كتير .. لأن كلكم عارفينها كويس .. ودي بتتركز أكتر في مواد قسم مدني اللي بندرسها .. وبعض مواد القسم

ودي مابتاخدش وقت كبير منكم

.
.
أهم حاجة هاتتعلمها في القسم ده .. هي روح التعاون اللي بتسود القسم .. وحاجة كمان إنك لما هتدخل هاتلاقي نفسك بتتعرف مش بس على أفراد دفعتك كلهم .. لأ كمان على أفراد الدفعات اللي أكبر منك .. ودي طبعا ميزة مهمة .. لأنك هاتستعين بيهم علشان يساعدوك في مشاريعك

.
.
آخر حاجة هاتكلم عنها هي ..

متطلبات القسم

الحقيقة القسم مش بيفرض أي متطلبات على الطلاب اللي داخلينه .. يعني لا بيعمل اختبار قدرات ولا كلام من ده ...

لكن حاجة زيادة بقى ليك

انت لما هاتدخل القسم وتتعرض للجو ده من الدراسة هاتلاقي نفسك بحاجة الى استخدام الكمبيوتر .. وهاتبقى محتاج تتعلم البرامج اللي بنحتاجها للشغل في القسم

أنا وريتلكم صور قبل كدا .. الصور دي طالعة بالكمبيوتر واللي عاملها معماري

طبعا استخدم برامج مشهورة جدا

أولهم .. واللي بنستخدمه كتير في القسم ... هو برنامج

AutoCad

وده من أقوى البرامج لعمل الموديلينج .. لازم تتعلموه وانتوا في القسم لأنكم هاتستخدموه

في برنامج آخر

3DMax

وده برضه بيعمل نفس الوظيفة .. لكن ميزته أنه بيطلع صور أحلى من الأوتوكاد .. لكن أوتوكاد أفضل في حتة الموديلينج .. يعني انك ترسم عليه

برضه من الافضل أنك تتعلمه وانت في القسم وبالمناسبة هو اللي مطلع الصور اللي فاتت

في برنامج آخر اسمه

Sketch Up

بيعمل نفس الوظيفة وبرضه لو حبيت تتعلمه .. هو سهل جدا مش لازم تاخد في كورس يعني

وغيرهم كتير من البرامج اللي بتساعدك في عمل المشاريع

في كمان برنامج

Photo Shop

ودي من أهم البرامج اللي لابد انك تكون عارفها علشان الأبحاث بدرجة أولى .. وكذلك المشاريع بدرجة تانية

يا حبذا .. لو اتعلمت كمان التلوين وتظهر مشاريعك ألوان مية مثلا زي الصورة دي كدا

كل ده طبعا هاتتعرضوله بصورة أكبر لما تدخلوا القسم .. زمايلكم اللي أكبر منكم .. هايشرحولكم باستفاضة الكلام ده كلوا

ناقلة الموضوع بالنص من منتدى يونى مصر

انا ناقلاه من بيدج ع الفيس d: اكيد بقى هو ناقلها من الموقع ده
انا نقلتوا بس علشان افيد الناس مش اكتر :)

ناقلة الموضوع بالنص من منتدى يونى مصر

يا سيدى مادام فى افادة للناس يبقى جزاها الله خيراً :)

شكراً على الموضوع انا بجد أستفدت ..

تحياتى

شكرا جدا على المعلومات دى جزاك الله خيرا

جزاكم الله خيراً

العفو ى جماعة :)