هندسة بترول وتعدين ! ... اتفضل :) [الأرشيف] - بوابة الثانوية العامة المصرية

Mohamed Omran

16-07-2012, 09:44 PM

السلام عليكم ورحمة الله وبركاته

اولاً الف مبروك النتيجة لكل واحد :)

انا محمد عمران طالب بالفرقة الأولى هندسة بترول وتعدين قسم هندسة البترول إن شاء الله

نخش ع الموضوع

ناس كتير داخلة علمى رياضة عشان هيا بتحب الرياضة وهتموت وتخش بترول

طبعن فى ناس عارفه ايه وضع الكلية وناس دخلوا الكلية قبليهم حكولها عنهم ;)

وناس تانية بتحلم بالكلية من زمان عشان صيطها وفلوسها واللذى منه :o

انا موجود إن شاء الله لأى استفسار عن الكلية نظامهما دراستها اقسامها ... وهكذا

ملحوظة : مش هقول لحد تعالا الكلية او متجيش ! مع ان معظم الى هتقابلهم من الكلية هيقولكوا متجيش ! والسؤال دا مش هجاوب عليه !

و الي عاوز معلومات اكتر و يتعرف على ناس داخلة بترول يدخل على الجروب دا
https://www.facebook.com/groups/2e3dady.13/

totopopo

16-07-2012, 09:55 PM

اولا اشكرك على الموضوع
ابنى كان نفسه يدخلها بس للاسف جاب السنة دى 98.29 يا ترى فيه امل وممكن تقولى ايه مميزاتها

XxAmRxX

17-07-2012, 06:38 AM

انا جبت 99 و حتى لو مجموعى كان جابها مكنتش هخشها لأنى شايف نفسى فى الهندسة العادية احسن بالمسطرة الطويلة و القلم الرصاص و الشييت الابيض الكبير :d

Mohamed Omran

18-07-2012, 12:12 AM

اولا اشكرك على الموضوع
ابنى كان نفسه يدخلها بس للاسف جاب السنة دى 98.29 يا ترى فيه امل وممكن تقولى ايه مميزاتها

الف مبروك اولاً

مش هقدر اتكهن بالتنسيق خصوصن ان مجاميع الرياضة وقعت شوية السنة دى

مفيش ممزات غير ان زى ما حضرتك عارف لو حصل ولقيت فرصة عمل فمرتبها هيكون ميزة

مع العلم ان ممكن اى مهندس مميز فى اى قسم ممكن يتوظف بمرتب اعلى من مهندس البترول

Mohamed Omran

18-07-2012, 12:13 AM

انا جبت 99 و حتى لو مجموعى كان جابها مكنتش هخشها لأنى شايف نفسى فى الهندسة العادية احسن بالمسطرة الطويلة و القلم الرصاص و الشييت الابيض الكبير :d

الف مبروك اولاً

ثانياً احنا بناخد رسم بالمسطرة الـ t والقلم الرصاص والشيت الابيض :)

issac-newton

18-07-2012, 06:41 AM

يـثـبـت للأهـمـيـة و لـلـعـلـم مـحـمـد عـمـران مـن أوائـل دفـعـة بـتـرول

عمرو صال

18-07-2012, 09:39 AM

مصرى و افتخر

18-07-2012, 03:03 PM

لو سمحت انا الحمد لله السنه دى كنت فى تانيه وجبت مجموع 99% الحمد لله وناوى السنه الى جايه احافظ عليه وكمان اعليه ......بس كنت عايز اعرف من حضرتك هى هندسه بترول بتقبل طلبه من شعبه علمى علوم فى ثانوى عام ولا لا ؟!!

عبدالرحمن حسين خليل

18-07-2012, 04:27 PM

ياريت تقولنا يا باشمهندس مميزات الكلية دى وعيوبها وايه الى بيشتكى منه الطلبة علشان فى ناس يامه جدا بيشتكوا منها وشكرااااااااااااا وأنا صراحة خايف أكتبها رغبة أولى وأندم بعد كدة ياريت تساعدنا

السيد فتحى2

18-07-2012, 05:28 PM

السلام عليكم و رحمة الله و بركاته
ممكن اعرف من حضراتكم توقعاتكم لمجموع كلية هندسة بترول الحد الادنى للقبول من الثانوية العامة 2012
لانى بصراحة قلقااااااااااااان جدا و مرعوب جدا و اكيد انتو مريتو بالقلق ده فيا ريت تفيدونى بشيء .

انا عاوز احط صور فيها احصائيات للناجحين و المجاميع فى الثانوية العامة بس انا مش عارف لان لازم عدد مشاركات معين على العموم التقارير دى على موقع اليوم السابع .. هتلاقو فى الجنب نتيجة الثانوية العامة اضغطو عليها هتلاقو التقارير فى الصفحة .

يا رييييييييت تفيدونى بخبرتكم ارجووكم

khadija samy

18-07-2012, 08:53 PM

انا بفضل الله جبت98.17 عارفة ان هيه ممكن متلحقش الكلية دى بس لو ربنا قدر يعنى..... هل الكلية تنفع للبنات ولا لأ ؟......مع العلم انى من محافظة بعيدة جدا عن السويس

يوسفباشا

18-07-2012, 09:30 PM

phpx_f4e

18-07-2012, 11:25 PM

هل فعلا يتم تعيينك بمجرد التخرج أو يتم تدريبك فى السنة الأخيرة مثلا ب5000 جنيه
حسب ما سمعت
+ ما أوضاع السكن هناك وهل الدراسة اصعب من الثانوى ام لا
وجزاك الله كل خير

The Egyptian Hulk

19-07-2012, 12:28 AM

ما هي افضل اقسام الكلية

mizo1166

19-07-2012, 06:10 AM

هندسة بترول متوقع تأخد من كام السنادي ؟

phpx_f4e

19-07-2012, 12:02 PM

هل هندسة بترول يتم التعيين فيها مباشرة
+ ما ظروف جامعة زويل وما شروط التقدم لها ومتى يتم فتح باب القبول

Mohamed Omran

20-07-2012, 02:47 AM

ماشاء الله الله أكبر
ربنا يوفقوا اكثر واكثر باذن الله
بس انا عندى استفسار
انا الحمد لله جبت 99.3 بس كل ما اسال واحد على بترول وتعدين
يقوللى انا ندمت انى دخلتها .. مش عارف ليه
بيقولوا محناجة وسطة كبيرة والاولوية لايناء المحافظة ثم لابناء العاملين
وبعدين بتوع محافظة السويس مبتخدش عندهم من مجموع عالى زينا
المهم انا الكلام ده كله خلانى اخد جنب منها شوية
زيادة انى والدى ووالدتى مش عايزينها علشان السفر وكده_ انا من القاهرة _ بس هى ديه الحكاية كلها
فانا عايز اعرف وجهة نظرك يا بشمهندس

بص يا حج بيندم زى اى حد فى هندسة ما بيندم انه دخل هندسة

للعلم احنا من أسهل الكليات فى اعدادى فى ناس طالع عينهم فى كليات هندسة عادية

كل واحد بيشوف حاجة سيئة بيرجع ويوقلك الله يحرقك كلية

كل واحد كان اقاعد فى مدرج 2 زيي فى الميد تيرم والدكتور كان فى مدرج واحد وقال للناس على حل مسالة بيلعن فى الكلية :d

كل واحد بيقابل مشكلة بيعلن فيها

وزكل واحد لما بيشوف التنافس الفظيع على قسم هندسة البترول بيحبط وبيلعن فى الكلية

لان معظم الناس -وانا منهم - بالنسابلهم يا قسم حفر - بترول - يا الكلية دى ملهاش لازمة
لان عندك بعديها تكريروبرتوكميا - فلزات قسم كويس جدن لكن واخد سمعه وحشة لان ترتيبه فى التنسيق التلت - جيلوجيا ومناجم ودول عليهم العوض مفيش غير 40 طالب بيخشوهم

دى وجهة نظر الناس

ولما حد يحب يقول انه فاشل يقولك انا اخرى مناجم ، زى اى هندسة تانية فى المنصورة مثلاً يقولك انا غزل

يعنى بيضرب بالقسمين دول المثل فى الضياع

بخصوص الواسطة انت يا معلم هتلاقى فى معارفك كل التخصاصت اللى فى الدنيا اللى ممكن تشغلك الا ممكن متلاقيش تخصص رائد فضاء

يعى اطمن والشغل والكلام دا بايد ربنا

بالنسبة للسفر اوعى تقلتق خالص دا فى ناس بتجيى من الصعيد يا راجل مبتروحش غير كل اجاززة كبيرة

احنا بنروح كل اسبوع اربع وخميس وجمعة وسبت

لو انت عاوز تخش ومحابب موضوع يا بتاع الجاز وشغل البريمة والذى منه تعالا وفوكك من اى كلام

وانا كنت ممكن اكتب القاهرة لو كانت منطقة أ بالنسبالى
وربنا يوفقك

Mohamed Omran

20-07-2012, 02:59 AM

Mohamed Omran

20-07-2012, 03:01 AM

mizo1166

20-07-2012, 03:08 AM

طب الكلية دي بتقبل كام طالب كل سنة ؟
طاب اللي جايب 408 يلحقها ولا لأ ؟

Mohamed Omran

20-07-2012, 03:12 AM

Mohamed Omran

20-07-2012, 03:22 AM

انا بفضل الله جبت98.17 عارفة ان هيه ممكن متلحقش الكلية دى بس لو ربنا قدر يعنى..... هل الكلية تنفع للبنات ولا لأ ؟......مع العلم انى من محافظة بعيدة جدا عن السويس
اولاً الف مبروك

اكيد طبعن وايه اللى يقل نفعها وفعلن فى بنات معانا فى الكلية من محافظات تانية جايبن من ثانوية عامة صحيح عددهم قليل بس فيه

بس انا شايف ان هندسة عادية احسن للبنات تختارى القسم اللى يعجبك وينف بيتك لما تتجوزى ان شاء الله

كليتنا اول قسم السنة دى مش هيبقى فى ولا بنت وهوا حفر بعد كدا فى تكرير وبتروكميا ودا روبنا حرام اى حد يخش ب 99.5 ويخش القسم دا

واحد بكالريوس السنة دى كان طكاتب ع الوول

|وماذا تعلمت من تكرير حتى اشتغل شغلتها| واحد رد عليه وقاتله | واين هيا شغلتها|

وهوا برده كتب |جه اليوم اللى احزن فيه ع 99 % واحد واحد| مش فاكر اقل احزن ولا اتحسر بس يلا بقى المهم المضمون

فى بقى فلزات مصانع حديد صلب وسراميك ولحام تحت الماء

يعنى يا تلحقى اول قسم وتشتغلى حاجة اسمها اوفيس تبع قسم هندسة البترول بيشتغلوا فى مكاتب وكدا يعنى مش صحرا وبريمة او ربنا يكون فى عونك بقى فى اى قسم تانى

Mohamed Omran

20-07-2012, 03:28 AM

السلام عليكم ورحمة الله وبركاته
انا كنت عاوز بس اسالك يا باشمهندس عن موضوع السكن هناك بيتم ازاى وكدا ؟؟
وياريت كمان نعرف عيوبها ؟؟ لان انت كاتب مش هقول لحد يجى او ميجيش بس انا شايف المفروض انك تنصحنا بعيوبها واحنا ان شاء الله نشوف هل العيوب دى تتوافق معانا ولا لا ؟
لكن لما ندخلها ونتصدم بعد كدا اظن مش هيكون افضل ابدا من انك تقولنا من دلوقتى
وشكرا ليك جدا يا باشمهندس
السكن فى المدينة الجامعية ، مدينة قذرة من اقذر المدن فى مصر ، لكن هتعيش مع اجمل واجدع صحاب هتقابلهم تنام وتاكل معاهم

واحنا ان شاء الله ناوين نظبط المدينة دى السنة دا خصوصن بعد ما خلصنا اعدادى وفوقنالهم

ممكن تاخدش شقة برا مع زمايلك عادى جدن بس جو المدينة زى الفل اى حاجة بتحتاجها فى اى وقت فى اى حاجة بتخبط ع لااوضة اللى جنبك وبس :d

انا رديت تقريبن شوية فى الكومنتات اللى فاتوا عن العيوب والكلام دا وبرضه بأكد كل طكلبة هندسة بيكرهوا اللكية دا شئ عادى جدن وكل واحد مفكر ان اى كلية هندسة تانية هبقى ارحم منه وداغلط كله بيتعلق أثاحبي

Mohamed Omran

20-07-2012, 03:35 AM

هل فعلا يتم تعيينك بمجرد التخرج أو يتم تدريبك فى السنة الأخيرة مثلا ب5000 جنيه
حسب ما سمعت
+ ما أوضاع السكن هناك وهل الدراسة اصعب من الثانوى ام لا
وجزاك الله كل خير
كلام التدريب دا هستك خالص دا اللكلية السنة دى جابت تدريب بالعافية للفرقة التالتة هههههههههههه مسخرة والله

انت بتاخد فلوس فى التدريب اه خصوصن لو فى شركة محترمة كبيرة لكن مش هتوصل للمبلغ دا حاجاة فى الحنين يعنى مش هتعيشك وبعهدين دا ترديب اسبوعين تلاتة شهر بالمتير مش شغل يعنى

مفيش حد بيخرج من اى كلية ويتلاقى الشغل مستنيه الا لو عندك واسطة هتلاقيه مستنيك طبعن ومتقلقش هتلاقى واسطة فى معارفك زى ما قلت قبل كدا هلتاقى واسطة فى كل التخصصات ممكن تشغلك فى قرايبك ومعارفك

الدرساة فى اى كلية اصعب من الثانوى لانك شم هتلاقى المدرس اللى كان بيديك المعلموة فى ببرونا

هتعمد على نفسك وهيوصل بيك الامر لأنك تفتح مراجع فى مادة زى الفزيا عندنا الان الدكتور بيجيب المسائل من المرجع

متخافش انت قدام فى المدينة يبقى اطمن اى حاجة قدامك الاوضة اللى جنبك على طول وتتحل

وهتعرف تتأقلم ع الوضع دا طول ما انت بتذذاكر اول بأول واعى تعمل زيي وتتزنق فى اخر ايام وتقعد طول السنة نفسيتك مدمرة ويتحرق دمك فى ايام الامتحانات

Mohamed Omran

20-07-2012, 03:45 AM

ما هي افضل اقسام الكلية
القسم الى بيتنافس عليه الدفعة كلها هوا قسم هندسة البترول

ودا افضل الاقسام فى عيون الطلبة والطلبة شايفاه انه افضل لااقسام

لكن مش بالضرورة يكون افضل الاقسام من نايحة التدريس او استف الدكاترة

Mohamed Omran

20-07-2012, 03:47 AM

هندسة بترول متوقع تأخد من كام السنادي ؟
الله أعلم ، استنى التنسيق :)

لكن اللى ترتيبه على شعبة رياضة من 500 ل550 او 600 ممكن يكون اخر واحد يلحق الكلية

Mohamed Omran

20-07-2012, 03:50 AM

هل هندسة بترول يتم التعيين فيها مباشرة
+ ما ظروف جامعة زويل وما شروط التقدم لها ومتى يتم فتح باب القبول
جامعة زويل لسه ما اتفتحش التقديم فيها على ما اظن تابع الجرايد ووسائل الاعلام باستمرار

Mohamed Omran

20-07-2012, 03:52 AM

طب الكلية دي بتقبل كام طالب كل سنة ؟
طاب اللي جايب 408 يلحقها ولا لأ ؟
بتاخد من اثانوية العامة تقريبن 280 -300 كدا

يلحق ان شاء الله

To Be Is To Do

21-07-2012, 10:22 AM

إستفسار رفيع جدا
تعدين ممكن تاخد كام السنادى ......................؟
بليز

mizo1166

21-07-2012, 11:24 AM

إستفسار رفيع جدا
تعدين ممكن تاخد كام السنادى ......................؟
بليز

والله انا بسأل نفس السؤال ؟
بس مشرف القسم ده قالي ممكن 406.5

abdou2day

21-07-2012, 11:32 AM

mizo1166

21-07-2012, 11:35 AM

To Be Is To Do

21-07-2012, 12:30 PM

والله انا بسأل نفس السؤال ؟
بس مشرف القسم ده قالي ممكن 406.5

ياااااااااااااااااااااااااااة
أنا جايب 5. 405
الحمد لله ربنا قدر الخير

ميزو 64

21-07-2012, 12:49 PM

ياااااااااااااااااااااااااااة
أنا جايب 5. 405
الحمد لله ربنا قدر الخير ايه المجاميع العالية دى ياههه 405.5 دا مجموع عالى اوى وفى رياضه ايه المجاميع دى ايه دا كتير اوى

ميزو 64

21-07-2012, 12:52 PM

انا جايب 408 وترتيبي 738 :(
كدة اكيد مش حلحقها ؟ياهههه ايه المجموع الصاروخى دا 408 كتير اوى عليك متستهلوش والبترول هتاخد 409.5 عشان تقلش منك

mizo1166

21-07-2012, 12:53 PM

ياهههه ايه المجموع الصاروخى دا 408 كتير اوى عليك متستهلوش والبترول هتاخد 409.5 عشان تقلش منك

انت فقر
روح نام بقي

ميزو 64

21-07-2012, 12:56 PM

انت فقر
روح نام بقي لولا انى انسان محترم كنت قولتلك كلام يضايقك بس انا هطلع احسن منك وابقا قابلنى لو دخلت بترول

mizo1166

21-07-2012, 01:18 PM

لولا انى انسان محترم كنت قولتلك كلام يضايقك بس انا هطلع احسن منك وابقا قابلنى لو دخلت بترول

اول مرة اشوف واحد ميتمناش الخير لغيره
هو عشان انت جايب 388.5 مش عايز حد يخشها
يخربيت النفسنة والحقد

ميزو 64

21-07-2012, 01:25 PM

اول مرة اشوف واحد ميتمناش الخير لغيره

ياسلام على الاحترام على فكرة انا مش فاشل اا جايب 388.5 يعنى ان شاء الله هندسة

hassan_eltobgy

21-07-2012, 03:46 PM

m3lsh 3ndy estfsar ya bashmohnds
hya msaref elkolya fe 7dood kam?
w2eh nzam el ksm el credit da?

abdou2day

21-07-2012, 03:49 PM

انا جايب 408 وترتيبي 738 :(
كدة اكيد مش حلحقها ؟

ان شاء الله نلحق

mo7ammad 3zzat

21-07-2012, 11:54 PM

m3lsh 3ndy estfsar ya bashmohnds
hya msaref elkolya fe 7dood kam?
w2eh nzam el ksm el credit da?

ايوة يا باشمهندس محمد عمران :):022yb4: , ربنا يكرمك على متابعة الموضوع معانا , انت عارف الواحد اليومين دول بيتعلق بأشاية ,

انا كمان عاوز اسال على المصاريف يوم التقديم هتبقى كام ... و بعد الدخول الكلية ,, هتبقى ظروفها ايه ؟
الواحد لزم ياخد احتياطاته :028ja7:

Mohamed Omran

22-07-2012, 08:31 PM

والله انا بسأل نفس السؤال ؟
بس مشرف القسم ده قالي ممكن 406.5

واحد اعرفه جايب 407 ترتيبه الف وشوية ، يعنى التنسيق مش هيقل عن 7.5 وخصوصن ان الإدارة عندنا كلمت مكتب التنسيق والوزير بخصوص خفض اعداد الطلاب

Mohamed Omran

22-07-2012, 08:37 PM

انا جايب 408.5 وترتيبي ال590 تقريبا ..... ممكن الحق
في ناس بتقول بلاش المدينة الجامعية وخد سكن برة احسن رايك وبالاخص لو هتبقى اول سنة في الكلية
السوال اللي انت مش عايز تجاوب عليه من وجهة نظرك نيجي الكلية ولا منجيش
هي احسن ولا هندسة اسكندرية وخلاص
اولاً الف مبروك

ثانياً اول سنة افضل المدينة لانها المصر الاساى للمعلومات لو واقع فى حاجة هتلاقى الف واحد يلحقك الا لو انت دحيح من اول السنة والعملية اشطة معاك وعلى فكرة دايمن الاوائل من المدينة

جو المدينة دا رزق على حسب اللى هيقعدو معاك فى الاوضة هتلاقى ناس بتعينك ع البوظان وهما بيذاكروا او بيعينكوا ع البوظان وهما مبيذاكروش برضه زيك

او هتلاقى ناس بتشجعك ع المذاكرة

وناس معاك يقتكروا انك لو ذاكرت ودخلت القسم هما مش هيخشوا بيبقى عايشين فى دور الخط بيخبوا اى معلموة يعرفوها وانا قابلت منهم كتير

هتلاقى ناس تانية بتديك اى حاجة انت عاوزها

لكن فى العام هتلاقى اللى يساعدك من كل حتة حتى لو مش فى اوضتك فى اوضة جنبك حواليك تلاقى اللى يقف جنبك فى مذاكرة فى اى حاجة

وهوا دا جو المدينة

انا مشفتش هندسة اسكندرية ومحدش هيعرف يجوابك ع السءال بتاع اخش ايه لان كل مكان ليه سلبيات وايجابيات يمكن انا من رأيي مثلاً طول السن كاره الكلية لكن لو قارنتها ببقية اللكيات هتلاقيها فلة وشغالة والدنيا ماشية

Mohamed Omran

22-07-2012, 08:40 PM

انا جايب 408 وترتيبي 738 :(
كدة اكيد مش حلحقها ؟
اولاً الف مبروك

ربنا يستر يا حج وتلحق كل اللى اعرفه ان مجاميعكوا عليت يا جدعان عن النسة بتاعتنا يعنى التنسيق ممكن يعلى ل 408 او اكتر

ربنا يقدم اللى فيه الخير المهم لو مجتلكش متزعلش صدقنى السلبيات مش قليلة واتن ببوقك هتشتم الكلية اول اما تروح تقدم :)) لكن برضه الكلية احسن من غيرها وشغالة :))

Mohamed Omran

22-07-2012, 08:42 PM

m3lsh 3ndy estfsar ya bashmohnds
hya msaref elkolya fe 7dood kam?
w2eh nzam el ksm el credit da?

المصاريف معدتش ال 300 جنيه يا جدعان دا تعليم حكومة يعنى متقلقوش :d

Mohamed Omran

22-07-2012, 08:44 PM

ايوة يا باشمهندس محمد عمران :):022yb4: , ربنا يكرمك على متابعة الموضوع معانا , انت عارف الواحد اليومين دول بيتعلق بأشاية ,

انا كمان عاوز اسال على المصاريف يوم التقديم هتبقى كام ... و بعد الدخول الكلية ,, هتبقى ظروفها ايه ؟
الواحد لزم ياخد احتياطاته :028ja7:
يا جدعان دى حكومة تعليم مجانى يعنى ، المصاريف مش هتعدى ال 300 جنيه هات معاك 500 احطيتى وكدا كدا انت هتقدم مدينة قبل تقديم اللكية هبقى انزل موضوع عن التقديم عشان متتمرمطوش فى الموضوع دا

mo7ammad 3zzat

22-07-2012, 10:04 PM

يا جدعان دى حكومة تعليم مجانى يعنى ، المصاريف مش هتعدى ال 300 جنيه هات معاك 500 احطيتى وكدا كدا انت هتقدم مدينة قبل تقديم اللكية هبقى انزل موضوع عن التقديم عشان متتمرمطوش فى الموضوع دا

يا ريت يا باشمهندس .:022yb4:
بجد انت عامل مجهود 100 100 ربنا يوفقك :078111rg3::028ja7:

fire sword

22-07-2012, 11:28 PM

kokoboto

23-07-2012, 05:27 AM

Mohamed Omran

24-07-2012, 12:40 AM

ألف شكر ليك يا محمد . والله ده في ناس كرهتني في الكلية دي لدرجة إن فيه ناس بتقول : دي ملهاش علاقة بالهندسة دي اسمها بترول وشغل جوجولجيا وكيميا وكدة
بس انا كتبتها أول رغبة لأن لقيت ناس زيك كدة تفتح النفس :d
---------
انا الحمد لله جبت 409.5 ، 360 على علمي رياضة ، إن شاء الله تيجي . أنا عاوز أعرف بس إيه نظام المناهج أصل في ناس بتقول انت تجيب ملخصات أخر السنة وتحفظها وخلاص وهتجيب تقدير
العفو على ايه يا هندسة

لا طبعن زى ما كتبت فى الكومنتات السابقة فى 5 اقسام ومفيش غير قسم واحد اللى هوا جيلوجيا ودا اللى بيخشه بيخش مجبر عشان مجموعه فى اعدادى

انما عندك هندسة البترول بتخصصتها ، حفر وخزانات وانتاج ، الخزانات دى هيا شغل العندسه يا عندسة ;)

كل واحد وشغلوا يا هندسة واللى بيذاكر من اول السنة بيجيب تقديرات

وفى ناس بتذاكر اخر السنة والتقديرات بتجبها ولله الحمد :d

طبعن اللى بيذاكر من اول السنة بيرتاح واحنا من اسهل اعداديات الهندسة فى مصر

من اسهل وليس الأسهل

وان شاء الله تدخل حفر أسديكى اطمن الدخول مش صعب لكنه مش سهل ونظام الكلية هنعرفكو عليه لما تخشوا ان شاء الله

Mohamed Omran

24-07-2012, 12:45 AM

يا جماعه لو سمحتوا كنت عايز اعرف حاجه هو مثلا انا لو جاتلى بترول وتعدين السويس وروحت شوفت الكليه قبل الدراسه ومعجبتنيش ممكن احول القاهره وهل هيكون التحويل سهل ولا معقد وممكن يقولى لا عدد الكليه اكتفى وازاى اقدر احول ولازم بالورق ولا ممكن تحويل من على النت

ارجو الرد ضروري جدا
التحويل من الأعلى للأقل فى المجوع بيبقى سهل شوية

لكن دى تسال فيها اكتر issac-newton هيفيدك اكتر

او تستفسر فى موضع هندسة القاهرة لالى متثبت لكن المشرف هيفيدك اطكتر لانه كان مترمرمط فى التحويل وعارف كل فسوخة عن التحويل

يوسفباشا

24-07-2012, 01:49 PM

Mohamed Omran

26-07-2012, 01:19 AM

شكرا ليك اوى يا باشمهندس والله مجهود رائع جدا واجاباتك كلها مفيده (( ابقى فكرنى لو شوفك هناك ابقى ابوسك :d بس اول يوم علشان بعد كدا ممكن انتحر :d ))

معلش انا كنت عاوز اسالك بس
هو مجال شغل بترول فيه اى فرصه للتجديد والابداع وكدا ولا كل شغلك اجفر وخد فلوس انا فى ناس كلمتنى عن شغلها وقالوا تقريبا ان تخزين اكترهم تفكير وكدا فا عاوز رايك
تانى حاجه انا سمعت ان من ضمن وظائف مهندس البترول حاجه اسمها (( اوفيس ))
ودى ميزتها ان مفيش سفر بس فلوسها اقل الكلام دا صجيج؟؟ وجتى لو صحيح هل الشغله ديه بتبقى متوفره ؟(( طبعا بعد الواسطه :d :d )) انا اقصد متوفره بنفس عدد وظائف الحفر؟؟
اخر حاجه يا هندسه ومعلش بقى هتعبك معايا (( حلاص بقى منا قولت هابقى ابوسك ومش بعيد اجيبلك معايا سندوتشات يا سيدى d ))
يا ترى تنصحنا بايه اول لما ندخل ((بمعنى ))اكيد انت لما دخلت فى حاجات لبست فيها وكنت تتمنى لو حد نصحك علشان تتفاداها انت بقى تنصحنا بايه ؟؟ اقصد يعنى عارف انت لما بتحش مرجله جديده بتحس انك تايه ومش عارف تعمل ايه وعقبال ما ترستأ نفسك تكون السنه ضاعت هل عندك مصايح بخصوص الموضوع دا ؟؟ :]
شكرا اوى يا ياشا

بوس ايه يلا ، يلا من هنا ياد :d

شغل تقليدى تقريبن ، لكن الخزانات فيها تشغيل دماغ كويس جدن

انا لسه متخصصتش لكن اما تيجى ويتعملكوا محاضرات للتعريف بالاقسام هتعرف اكتر

ايوة فى حاجة اسمها اوفيس بيشتغل فى مكتب فى التكييف :d

لكن مش عارف ايه نظام مرتباته نسألك الناس الكبيرة فى الموضوع دا

بص كل مادة وليها نصايحجها المختلفة

عمون النصيحة الشاملة العامة ، احفظ احفظ احفظ افهم حل امتحانات السنين اللى فاتت سرع ايدك فى الامتحان ، هترتب

ياريت متغيرش طريقة مذاكرتك يعنى لو بتدح من اول السنة وعيل مدح كدا تيت من العيال دى تحافظ ع الطريقة دى

لو واد برنس بقى من اللى بيظبطوا فى الآخر حاول تقرا ع الاقل اللى بتاخده فى المحاضرات ساعيتن كدا قبل ما تنام بس بحيث انك متجيش اخر السنة فى حاجات اول مرة تشوفها

بس تكون مررت عينك عليه ومادة زى الكميا لازم تقعد تحفظ فيها من اول السنة

الرسم الهندسي هوا الحتة السمينة اللى فى اعدادى اهتم بيه

المحاضرة مش هتفهم منها حاجة بس احضرها عان بيقول هينتات كدا ونقط بسيطة تحاول تتجنب اللى يقولك عليه فى الامتحان عشان متجيش ع الجرح بتاعه

الرسم دا احنا ظطلبة اللى هنظبطكوا فيه ان شاء الله وهنفهمكوا اليلة ماشية ازاى وازاى متلبسش فى اول ميد تيرم رسم وتشيل اوبح فيه زى ما حصل فينا كدا

alprince20013

28-07-2012, 09:35 AM

هو مفيش هندسة بترول في جامعة القاهرة؟

abdou2day

29-07-2012, 01:14 PM

شكرا ليك والله انت طمنت الواحد شوية وعرفتنا اكتر
انا الحمد لله قبلت في الكلية عايز منك بقى تكتبلنا كل حاجة عن التقديم وهنروح امتى وهنعمل ايه

mo7ammad 3zzat

29-07-2012, 05:08 PM

الحمد لله دخلللللللللللللللللللللللللت بتروووووووووووول
النتيجة بانت يا هندسة . عايزينك تقوللنا بقه ايه النظام و هنعمل ايه ؟؟
انقل لنا خبراتك بقه :) و قللنا ايه الغلطات اللى وقعت فيها عشان منقعش فيها تانى :)

http://www4.0zz0.com/2012/07/29/15/153120635.png

Mohamed Omran

29-07-2012, 07:23 PM

الف مبروووووووووووووووووووووووك يا دكاترة يا بشمعندسين هتنوروا السويس وربنا

هضيف إن شاء الله قريب إازاى تقدم فى المدينة وفى الكلية
خطوة بخطوة من ساعة ما تنزل ارض السويس لحد ما تروح عشانه متروحش وترجع السويس غير مرة واحدة :))

عزت ابقى فكرنى ع الفيس لو نسيت انزل الموضوع ع المنتدى هنا :d

mizo1166

29-07-2012, 08:09 PM

Mohamed Omran

31-07-2012, 08:08 PM

أبشمهندسين ممكن تشوفوا الايفنت دا ع الفيس

فى كل حاجة عن التقديم :)

https://www.facebook.com/events/255250381260204/

kokoboto

01-08-2012, 03:10 PM

Mohamed Omran

01-08-2012, 07:34 PM

لو سمحت يا محمد عمران كنت عايز اسألك سؤال وتجاوبنى بصراحه انا جبت 407.5 وطبعا فرقت معايا على نص درجه على بترول على العموم الحمد لله بس كنت عايز اسأل ان فى ناس قالتلى ان ممكن ادفع فلوس اول سنه وادخل عادى وبعدين اكمل زى الطلبه العاديين الكلام ده صح ولا اى كلام
احمد ربنا وبوس ايدك وش وضهر ، ربنا يحبك يا ابنى

ايوة فى قسم كريديت بيوازى قسم حفر لكن بيدفعله كل سنة كام باكو

والا مكنش حد غلب بقى اى حد جاب مجموع هندسة عادية كان دفعله قرشين اول سنة وكمل بقى عادى !!

وهسألك اذا كان ينفع حد بخش القسم دا من كليات تانية ولا لأ لان تقريبن اتأفل الموضوع دا من اول السنة دى

عمر المختار 94

02-08-2012, 05:13 PM

Mohamed Omran

04-08-2012, 12:50 AM

هلا يا شباب ...انا جاتلي هندسة الاسماعيلية عشان انا من طلاب السويس ...و ان شاء الله احتمال كبير احول هندسة بترول عشان من طلاب السويس ...عندي 3 اسئلة: 1 هل ممكن احول من دلوقتي لهندسة عين شمس علما باني حايب اقل من مجموعها ب درجة ..سمعت انه بالسكن بتاعك فب القاهرة ممكن تحول (التحويل الورقي) و ابيه شروط التحويل ؟
2 هل لو اضيت اعدادي في هندسة بترول ممكن احول بعد اعدادي لهندسة عين شمس ؟
3 هل ينفع ادخل قسم الكريتيد في بترول بعد اول سنة اعدادي في اي هندسة اخري ؟
مش هتقدر تحول قدام درجاتك اقل منها دا اللى ليهم سكن هناك لما بيعملوا تقليل اغتراب بيروحوا حلون مش القاهرة ولا عين شمس

لا اعلم هل يتم القبلو من بترول وتعدين لعينشمس ام لا

لان هندسة بترول ومنوف وطب اسماعيلة كليات مميزة ع الجمهورية ومش تعتبر كليات مناظرة للكليات اللى زيها

لا مينفعش تم منع هذه المهزلة لام تكون من ابناء الكلية عشان تخش قسم الكريدت

hafez94_a

04-08-2012, 03:45 AM

السلام عليكم

انا جالى هندسة المنصورة علشان التوزيع الجغرافى و كنت عايز بترول السويس بس ملحقتش

عايز اعرف عشان ادخل قسم بترول القاهرة .. هل ممكن من دلوقتى و لو مينفعش

ايه التقدير الى لازم اجيبه فى اعدادى عشان احول قسم بترول القاهرة ؟؟

و شكرا جزيلا

imagination boy

06-08-2012, 01:36 AM

معلش انا ليا كام سؤال كدا عن الكلية

اول حاجة هل في انشطة طلابية ورحلات مدعمة وكدا زي هندسة عين شمس : ) ونظامها ايه لو في ؟ ولا الكلية كلها نظام دح ومذاكرة وخلاص : )

قسم الحفر الكريديت هل بيبقى دراستة زي دراسه الحفر العادي الفرق انة بفلوس للى مجابش التقدير لا قدر الله ؟ وهل شهادتة بتبقى قوية زي الحفر العادي ؟

سؤال مهم جدا : ) >> في ملاعب فى الكلية ولا لا ^_^

Mohamed Omran

10-08-2012, 02:04 PM

sameh mostafa

20-08-2012, 12:48 PM

هو ايه الفرق بين
هندسة بترول السويس وهندسة بترول القاهرة

Mohamed Omran

21-08-2012, 04:12 PM

هو ايه الفرق بين
هندسة بترول السويس وهندسة بترول القاهرة
احنا كتخصص افضل

احنا بندبا تخصصنا من اول اولى
بترول او تكرير اوز فلزات او جيلوجيا او مناجم

بيختلف فى الكورسات اللى بناخدها عنهم

لانهم هناك قسم واحد اسمه تعدين وبيبدأوا بتخصصوا من سنة تالتة (دا اللى سمعته) واحد من القاهرة يفيدك اكتر عن القسم اللى هناك طبعن

واحب اقولك ان المهندس هوا اللى بيصنع نفسه مش كليته ناس متخرجة من القاهرة وشغالك فى اشلامبرجير اكبر شركة بترول

وناس متخرجة من قسم بترول فى السويس وشغالين فى شركات تعبانة

الخلاصة احنا افضل كتخصص لكن اللى بيتعب فى اى حتة وبيجتهد بيلاقي :)

sameh mostafa

22-08-2012, 11:12 AM

احنا كتخصص افضل

احنا بندبا تخصصنا من اول اولى
بترول او تكرير اوز فلزات او جيلوجيا او مناجم

بيختلف فى الكورسات اللى بناخدها عنهم

لانهم هناك قسم واحد اسمه تعدين وبيبدأوا بتخصصوا من سنة تالتة (دا اللى سمعته) واحد من القاهرة يفيدك اكتر عن القسم اللى هناك طبعن

واحب اقولك ان المهندس هوا اللى بيصنع نفسه مش كليته ناس متخرجة من القاهرة وشغالك فى اشلامبرجير اكبر شركة بترول

وناس متخرجة من قسم بترول فى السويس وشغالين فى شركات تعبانة

الخلاصة احنا افضل كتخصص لكن اللى بيتعب فى اى حتة وبيجتهد بيلاقي :)

الف شكر يا بشمهندس ع الرد وان شاء الله تكون من النوع اللى بيصنع نفسه بنفسه واكون معاك بعد سنتين :d

H a l a h

27-08-2012, 07:09 AM

هل هي كويسة للبنات يعني لو درست هتضطر أنزل صحراء ولو إشتغلت نفس الكلام هحفر وأروح الصحراء وكدا
هل الشغل حصر على مناطق معينة ؟ مع العلم إني من دمياط
لأن معظم الناس بيخوفوني منها

Mohamed Omran

02-09-2012, 03:20 AM

هل هي كويسة للبنات يعني لو درست هتضطر أنزل صحراء ولو إشتغلت نفس الكلام هحفر وأروح الصحراء وكدا
هل الشغل حصر على مناطق معينة ؟ مع العلم إني من دمياط
لأن معظم الناس بيخوفوني منها
هيا مش كويسة للبنات اوى اوى زى اقسام تانية

لكن فى بنات بتخشها

مش لازم صحرا طبعن ممكن لو دخلتى اول قسم اللى هوا قسم هندسة البترول تشتغلى حاجة اسمها اوفيس ودا بيشتغل فى مكتب عادى ومش بينزل الصخرا

غير ان فى اقسام تانية زى تكرير تشتغلى فى معمل تكرير مثلاً

فى قسم فلزات تشتغلى فى مصانع الحديد والصلب والسراميك ولحام تحت الماء وميتال استركشر

بس هما دول اللى ليكى فى الكلية لان مينفعش بنت تخش قسم جيلوجيا او مناجم !