الاخوة الافاضل يارينت حد يجاوبنى بسرعة على هذا السؤال :

انا ربنا اكرمنى بزيارة الى السعودية يعنى هناك فرصة للحج ولما ذهبت للمنطقة اخد اجازة اعتيادية قالوا مفيش اجازة اعتيادية الا ليوم 30\ 8 وانا محتاج 90 يوما فياريت اللى عندة حل لهذة المشكلة ميبخلشى على بيه مع التوضبح لو كان هناك حل ارجو الرد فى اسرغ وقت

لو معك تاشيره الحج قدمها وخد اجازه للحج بس ذلك يكون مره واحده فى العمر اقصد الحج فى ناس معى عملو
كده وربنا معك وادعلى وانته بتحج وشكرا

اخي الفاضل

اولا اهنئك علي هذه الفرصة الثمينة وهي اداء فريضة الحج وزيارة قبر رسول الله صلي الله عليه وسلم

ثانيا :: انا هاحكيلك علي اللي حصل معايا وانا رايح اعمل عمرة وانا تابع لمنطقة الفيوم

ربنا رزقني بعمرة في الفترة من 1 مايو وحتي 15 مايو اللي فات وللاسف ده كان وقت امتحانات الدور الاول

حاولت اخد اعتيادي من رئيس الادارة المركزية للمنطقة رفض وقالي خدها من القطاع

سافرت القطاع وقالي مينفعش اعتيادي في الامنتحانات اعمل اجازة عمرة

عملت اجازة عمرة من المنطقة بتاعتي ولكن شيخ منطقتي بدل مايديني اجازة العمرة رفعها للقطاع تاني !!!

فطبعا كان الوقت سرقني فمكنش قدامي غير اني اسافر وانقطع ويحصل اللي يحصل

والناس معايا في المعهد وقفوا معايا ووقعوا لي في المعهد في الفترة من 1 مايو لغاية3 مايو لكن بعد يوم 5 مايو بدوا يقفلوا عليا علشان كانت بداية امتحانات النقل وكان فيه موجهين وكده

وعلشان ادي لنفسي اكتر من فرصة بلغت زوجتي تليفونيا بارسال تلغراف لمعهدي يوم 5 مايو بانني مريض وملازم الفراش

ولما رجعت يوم 13 مايو بدل مااروح القومسيون الطبي مثلا رجعت علي شغلي علي طول يوم 14 مايو وبكده طارت الأجازة الطبية لأني لازم اعرض نفسي علي اللجنة الطبية قبل رجوعي للمعهد مش بعد رجوعي

وبعد كده رحت القطاع علشان اخلص اجازة العمرة قالولي مينفعش لازم كان يبقي قبل العمرة مش بعدها

دخلت لوكيل رئيس القطاع للشئون القانونية قالي حلك الوحيد تحاول تاخدها اعتيادي وشيخ منطقتك يرفعها لرئيس القطاع وانا هاوفقلك عليها

رجعت للمنطقة علشان اخد تاشيرة من شيخ المنطقة واطلع علي القطاع تاني رفض ولقيت نفسي كمان اتحولت للتحقيق علشان مدة الـ 9 ايام عمرة !!!

في الوقت ده جالي عقد في السعودية والمفروض اني هاسافر بعد العيد وطبعا مكنش قدامي علشان اخد اجازة بدون مرتب الا اني اتحول للتحقيق وفعلا اتحولت للتحقيق ودخلت للمحقق حكتله كل حاجة والراجل الصراحة تفهم الموقف وقالي حاول تاني تخلص الاجازة وتطلع علي القطاع قلتله مفيش وقت حضرتك وانا عندي سفر ولازم التحقيق ده يتقفل علشان اخد الاجازة بدون مرتب فالراجل الصراحة عمل ادني عقوبة وهي خصم الـ 9 ايام بالاضافة إلي يوم واحد جزاء

وخلص الموضوع علي كده

انا باحكيلك اللي حصل معايا علشان ماتتبهدلش زيي

اولا اجازة الحج شهر واحد بس مش 90 يوم فمش هينفع تاخدها

حلك الوحيد - لو انت متثبت - قبل ماتسافر تشوف حد كده في التامين الصحي يكتبلك راحة 3 شهور وغالبا - لاقدر الله يعني - ممكن تضطر تجبس رجلك وفي الحالة دي انت فعلا ممكن تاخد 4 شهور اجازة مرضية كمان لان كسور الرجل بتطول وبعد ماتخلص في التأمين حد يطلع من أهلك علي اللجنة الطبية ومعاه جواب طبيب التأمين الصحي وياخد الاجازة المرضية ويسلمها للمعهد علي اصل ويحتفظ بالصورة مختومة باستلمت الاصل

او الحل التاني ممكن تاخد اجازة سنة بدون مرتب بس تكون اجازة داخلية لان الاجازة الخارجية محتاجة عقد عمل مووثق من الجهه اللي انت مسافر ليها
وممكن تاخد الاجازة دي مثلا رعاية اسرة او تحسن دخل بس في الحالة دي لازم تجيب مايفيد مثلا ان اسرتك بحاجة إلي رعاية زي مثلا لاقدر الله يعني الوالد او الوالدة لايستطيعون الحركة وانت العائل الوحيد اما اذا كنت عايز تجيب مايفيد تحسين الدخل فلازم تشوف عقد في مدرسة خاصة براتب ضعف راتبك او مثلا محلا بسجل تجاري وبطاقة ضريبية وماشابة ذلك
بس خد بالك في الحالة دي هتدفع تأمينات مش قليلة - مبلغ مش بطال يعني -

طولت عليك بس قلت اشرحلك كل أساليب التحايل علي مايسمي غباء الروتين الحكومي

تحياتي وبالتوفيق