انا جاتلي فنون جميلة عمارة ينفع احول لهندسة عمارة في اي جامعة تانية غير فنون جميلة

أكيد لأ .. التحويل لكلية غير مناظرة لازم تكون جايب مجموعها وطالما جالك فنون جميلة يبقى مجموعك ماجبش هندسة !!

على فكرة فنون جميلة عمارة افضل من هندسة عمارة من حيث الدراسة والشغل

شكرا للافادة

بنوتة مسلمة : انا عارف انها افضل بس المشكلة عندي ان الدراسة فيها بالعربي و انا لغات

على فكرة فنون جميلة عمارة افضل من هندسة عمارة من حيث الدراسة والشغل


خريج الهندسة فهو مهندس أكتر من انة فنان , و المعمار أصل الهندسة , مهندس بيخطط و ينفذ و ينزل المواقع و يرسم , بيساعدة انة بيدرس مواد من مدني زي المساحة و الاستراكشر و الخرسانة المسلحة و التشييد , و مواد عامة في اعدادي بتطعمة انة يبقى مهندس أكتر من فنان , مهندس كليتة بتهتم بالجانب الهندسي و بالجانب التطبيقي في العمارة لكن مع التركيز على الجانب الهندسي في المقام الأول في , لأن وظيفتة اسمها "مهندس معماري" , مش "فنان معماري"

المعمار أصل الهندسة ,مش الاتصالات ولا الميكانيكا ولا ... , أقصد بالمعمار هنا أقسام المدني و العمارة , يعني المباني و الانشائات , المدني بياخد مواد عشان يصبح مهندس لتنفيذ ما يرسمه المعماري ... اما المهندس المعماري فبياخد مواد من المدني زي الخرسانة و المساحة و التشييد و غيرها ... عشان يبقى فاهم بيرسم اية , المدني و المعماري أهميتهم واحدة في المشروع .

خدوا بالكو أنا قلت ان المعمار أصل الهندسة , مش أصل الفنون الجميلة ! , الفنون الجميلة أصلها , النحت و الديكور ,الزخرفة و الرسوم المتحركة .


كمان أهم حاجة يا جماعه هي ان احنا في مصر , مثلا شركة مقاولات فتحت جديد و طالبة مهندسين عمارة, اتقدم لها اتنين واحد خريج هندسة و التاني خريج فنون جميلة , تفتكروا حياخدو مييييييين ؟؟ أكيد الهندسة لأنها الأصل , كمان مش حيبقى عارف ان بتاع الفنون الجميلة دا مهندس أصلا


طيب واحد في ثانوية عامة و محتار بين هندسة عمارة و فنون جميلة يختار مين ؟ طبعا هندسة لأنة حيدخل ممكن يعجبة أي قسم تاني غير عمارة فيدخلة , أنا بقول كدا عشان في ناس رغباتها بتتغير بعد دخول الكليات و غير كدا ان هندسة كل أقسامها حلوة , السبب الأهم ان في ناس بتحول من عمارة لما بتلاقيها محتاجة مجهود بدني عالي جدا , و طبعا مكلفة , حتي لو انت خلصت أول سنة في هندسة عمارة و معجبكش النظام ممكن تحول لأي قسم تاني عادي جدا ,على عكس الفنون الجميلة ال لما تدخلها تبقى اتكتفت و لو عزت تحول مش حتلاقي غير تجارة


الخلاصة يعني لما تتخرج وتلاقي شغل محترم بمبلغ محترم او تلااااقي الشغل المحترم ده هو اللي بيدور عليك بره مصر قبل جوه مصر اللي بيطلبو " مهندس " خريج هندسة العمارة " من جامعة مصرية محترمة مطلووووبة ومعروف قيمتها عندهم من اشهر اقسام العمارة زي"عين شمس- المنصورة- القاهرة- اسيوط " ابقى قولي بقى علشان ناخد فكرة عن مين الشركات دي علشان ننصح خريجين فنون بيها ....
ولو حد عايز يتاكد يتصل باي شركة توظيف كبيرة او يجيب اعلانات لاكبر المكاتب جوه وبره ويشووووف الحقيقة

منقوووووووووووووووووووووووول

وعموما دي وجهة نظري بردوا

طبعا المدخل الوحيد للالتحاق بنقابة المهندسين من بره كلية الهندسة الحكومية هو ( فنون عمارة ) انا اعرف ناس في الاتنين لكن التاكيد ديما ان هندسة طبعا من الناحية الاكاديمية والعلمية وتنوع التخصصات جواها اعلى طبعا ومن ناحية سمعة الخريج خاصة لو كانت كليات هندسة وعمارة ليها اسم وسمعة بره مصر قبل جوه مصر زي عين شمس والمنصورة والقاهرة واسكندرية زي ماتكتب فوق ... وطبيعة شغلها وتدريبها حتى خلال السنين وطبيعة خرجيها بيكون مؤهل اكتر من فنون وكمان بيكون الجانب الهندسي عنده اعلى من فنون اللي بيكون فيه الجانب الفني اكبر شوية ...
لكن في نفس الوقت خريج فنون جميلة زي ماقولت بيدرس مناهج جيدة وخاصة الجانب الفني عندهم عالي وليهم فرص عمل خاصة لو معاهم البرامج والخبرة المطلوبة في السوق ... وفيه منهم دكاترة بتدرس في اقسام العمارة في كليات الهندسة بردوا والعكس صحيح ...

وعلى فكرة اغلب الجدال او الدفاع المستميت بيكون ديما من جانب اصحابي بتوع فنون علشان بتاخد اقل من هندسة وكده ومحاولة تاكيدهم على مواضيع زي لا احنا بردوا لينا شغل كويس في مجالات معينة افضل من هندسة ... واحنا معترفين بره مصر بردوا لان كان فيه مشاكل بره مصر اساسا بالاعتراف بخريج فنون في فترة ما انه مهندس او من باب القناعة الشخصية بره مصر ... وكلام زي كده مع اني مش بشوف ده من اصحابي في هندسة بحس انهم واثقين من نفسهم ومش محتاجين تاكيد على شئ بيعتبروه مفروغ منه لانهم ماليين اديهم في الدراسة والشغل طبعا .... يعني
ربنا يقدملك اللي فيه الخير ان شاء الله

فيه نقطة كمان في غاية الاهمية ...
الافضل بالتأكيد خريج هندسة عمارة لانه في مجال العمل الفعلي بالوطن العربي تختلط التخصصات بمعني ان خريج هندسة عمارة يكون علي دراية وخلفية بباقي الاقسام مثل مدني وكهرباء وغيرة بينما فنون جميلة لا يفعل ذلك بالاضافة لكون خريج فنون جميلة لا تعترف بة النقابات الهندسية كمهندس بل ينتمي للتطبيقيين في العديد من الدول العربية والغربية واكيد لازم تعمل معادلة للشهادة .

انت لو جايب الحد الأدنى لهندسه اللى هو 94.5 تقدر تحول لهندسه لكن لو مجموعك اقل منها مش هتقدر تحول

فنون جميلة عمارة افضل للاسباب التالية



طالب هندسة قسم عمارة بيدخلها 4 سنين بس
هتسالنى تقولى ليه هقولك لانك بتدخلها بعد ما تردس اعدادى هندسة والاخر تتخصص على حسب التقدير هنالك
لكن فنون جميلة بتدرس 5 سنوات بدءا من اعدادى عمارة



الشهادة واحدة والخريج من الكليتين ينضم لنقابة المهندسين



خريج فنون عمارة بيملك ذخائر حية فى الناحية الجمالية والفنية والابداعية والتطبيقية
خريج هندسة لا يملك القدر الكافى لانه لم يدرس بجانب العلوم الهندسية اى علوم فنية او ابداعية ويمتلك فقط خبرة تطبيقية وهندسية:)



فيه برامج يشتغل بيها الخريج زى ثرى دى ماكس واوتوكاد وفوتوشوب كلها تحتاج الخبرة الفنية والابداعية ليس هندسي فقط يبقى مين اللى افضل؟؟



عدد الطلاب فى فنون عمارة 200 بالكتير لكن بالهندسة الالاف دة غير ان هندسة بتخرج كل سنة الالاف من المهندسين فى المجال سواء حكومى او خاص :)



مشروع التخرج في كلية الفنون الجميلة قسم العمارة حر ويمكن عمل مشروع التخرج في أي من الشعب الثلاثة لقسم العمارة في كلية الهندسة ,بينما في كلية الهندسة مشروع التخرج محدود بشعبة واحدة من قسم العمارة سواء تصميم حضري أو إسكان أو مباني عامة.



دة الدراسة في قسم العمارة بكلية الهندسة أربعة سنوات منها سنة رابعة للتخصص في أحد الأقسام التالية : المباني العامة - الإسكان - التصميم الحضري. وأن مدة الدراسة بكلية الهندسة خمس سنوات منها سنة إعدادية عامة لجميع تخصصات كلية الهندسة ويتم بعدها اختيار التخصص بناءً على تقدير السنة الإعدادية

منقول

ده رد احد اصدقائي وهو شغال في مجال الهندسة المعمارية من فترة لما شاف الموضوع :
على فكرة الكلام المنقول ده ....
اولا - قديم جدا لان الكلام بتاع التخصص ده عفا عليه الزمن ودلوقتي في رابعة الواحد بيعمل في كل مادة وتخصص من دول مشروع نهائي في نهاية الدراسة ومشروع التخرج بيكون مفتوح قد يكون تصميم مبنى او تخطيط لقرية او مدينة مع التصميم فالكلام ده خاطئ تماما جملة وتفصيلا ...:)
وعلى فكرة نقطة اعدادي دي هيا اللي بتخلي المهندس " مهنددددس " بجد مش ورق لانه فاهم يعني ايه هندسة ومتاسس كويس وبالاضافة لده دارس الفن والعمارة مع الهندسة !!! يعني اتنين في واحد :d

ثانيا - موضوع لايملك القدر الكافي ده بيؤكد عقدة خريجي فنون من الهندسة وده متجسد بشكل واضح في الكلام المكتوب ... وطبعا لايحتاج للرد عليه لان اي حد فاهم وعنده خبرة عارف كويس حجم وطبيعة المواد اللي بيدرسها المهندس سواء المتعلقة بالفن او الهندسة !!!!

ثالثا - بالنسبة للعدد فالموضوع مش بالعدد ولا الموضوع بالكم المهم الكيف وحجم الخريج في السوق وطلبه والتشبيه باطل لان الكلام كان واضح فوق :
"الخلاصة يعني لما تتخرج وتلاقي شغل محترم بمبلغ محترم او تلااااقي الشغل المحترم ده هو اللي بيدور عليك بره مصر قبل جوه مصر " وريني مين بقى بيجري ورا خريج فنون بره مصر ... او جواها يعني لو حد فنون واتخرج واشتغل يرد بس باسماء شركات ومكاتب هندسية عملاقة !!!
وللعلم انا متخرج من خمس سنوات من هندسة عمارة عين شمس واعمل في السوق ولنا اسم كبير الحمدلله الان وعندي الاتنين بيجيلي الفنون والهندسة لطلب التدريب او العمل وبشوف كويس الفرق بين مستوى كل منهم خاصة الهندسة ومدى فهمه للتفاصيل الهندسية وابداعه فيها وفهمه للتخصصات الاخرى الهندسية وقدرته على التواصل معاهم ومع المنفذين والعمالة وغيرهم وعلى فكرة شغل السوووووق
مش عايز فنان قد ماهو عايز مهندس حقيقي بره وجوه مصر بل بالعكس الفنان الحالم ده مالوش مكان في المكاتب الهندسية لانه بيفكر في الخيال ومن دون مايعرف تبعات تفكيره او حدود تنفيذها او تكلفتها او ابعادها انشائيا وهندسيا بينما المهندسين كتير منهم فاهمين ده كويس جدا ...
واعلم جيدا ان اغلب دفعتي واغلب الدفعات اللي بعدي الان اتوظفوا كلهم من اول يوم اتخرجوا فيه وسافروا بنسبة 80 في المية بره مصر وبرواتب عالية كلللللللهم واللي فضل هنا ياما كان معيييد ياما دخل مهندس ضااابط في الجيش ونسبة محدودة جدا جدا فتحت مكتب خاااااااص بها من اول سنة تخرج ونجح وكبر في وقت قياسي !!!

واخيرا موضوع الكورسات ده اي كلام في اي كلام لانه معروف لاي حد بيشتغل البرامج دي ان فيه محترفين في البرامج دي خريجين تجارة حتى ولا فنون ولا هندسة ولا اي حاجة ... بيتاخد فيه كورسات وعدد ساعات للتطبيق وكل واحد وشطارته ....
ولو على الحتة دي بقى تحديدا معرووووف لكل السوق الهندسي بره وجوه مصر ان وحوش الجرافيك في العمارة مهندسين معماريييييين متخرجين من كليات معرووووفة على راسهم هندسة المنصورة والاسكندرية
وخرجينها بيشتغلوا زي ماوصفت بردوا فوق كلهم تقريبا بره مصر وباعلى رواتب خاصة المعماري الشاطر في الجرافيك ده يبقى زي عملة الدهب .... وده معروف جدا جدا لاي حد شغال او عنده خبره بالموضوع ده ...

يعني بلاش جو خريجين فنون جميلة وليا اصحاب كتير منهم على فكرة وهما نفسهم بيقولوا لطلبة فنون الكلام ده وبينصحوهم ان يتدربوا كتير في المكاتب والشركات الهندسية المعمارية علشان يحاولوا يعوضوا النقص في الخبرة الهندسية المعمارية ويلاقوا فرصة افضل للعمل بعد تخرجهم .... وشكرا