مواد طب بيطري الزقازيق :
اولا ف التيرم الاول عندنا 7 مواد
وراثة واحصا وهستو وفسيو و اناتومي وانجليش وبيو كيمستري

الادوات بقى :
البالطو
انابيب الكيميا
ادوات التشريح (عدة صغيرة) عشان الضفادع ف الفسيو

ف التيرم التاني بقى 7 مواد برده نفس المواد بس بدل الاحصا و الانجلش هيبقى حقوق انسان وفيزيا حيوي والفيزيا دي بناخدها ف كلية علوم
.............

الوراثة دي مادة حلوة جدا وقسمها احسن قسم ف الكلية عشان بيساعدونا جدا
ف التيرم الاول النظري عامل زي بتاع ثانوي بالظبط والعملي عبارة عن مسائل مندل وكده
ف التيرم التاني بقى بتبقى سهلة اكتر وجميلة وشبه البيو بالظبط والعملي بتاعها سهل جدا 5 انواع مسائل وبس
والدكاترة كويسين جدا وهينجحوكوا هينجحوكوا

.. الكيميا بقى مادة لذيذة بس هتحسوا انها صعبة ف النظري بتاعها ف التيرم الاول بس عشان مش واخدين عليها بس بالتركيز والمذاكرة هتبقى سهلة والعملي بقى تجارب بسيطة وسهلة
ف التيرم التاني بقى شغل molecular زي الوراثة بالظبط بس العملي مش فيه تجارب هتبقى سكاشن نظري بس لازم تتحفظ اول بأولوبرده دكاترها بيدوا درجات كتير لان عادة كل الاقسام ف اولى بتدي درجات كتير عشان عارفين ان دي اول سنة وكده

.... الهستو بقى النظري بتاعه رخم شوية ومحتاج تركيز جدا ف المحاضرات بس العملي بتاعه سهل بتشوفوا شرايح تحت الميكروسكوب وتحفظوا شكلها كويس جدا وقبل الامتحان بيبقى في سكاشن مراجعة بيبقى فيه اهم الشرايح اللي اخدتوها ممكن تصوروها (من ورا الدكاترة طبعا :D) او بتعتمدوا ع رسموكوا طول السنة

..... الفسيو بقى بنعتبره اغلس قسم بس الملتزم طبعا محدش هيكلموا
هتحسوا برده انكوا مش فاهمين فيه كتير بس اللي هيركز ف المحاضرات اوي هيفهم كويس
عملي التيرم الاول شغله مع الضفادع ولازم محدش يقرف [:D]
والتيرم التاني هيعتمد ع شغل تجارب بسيطة كده وميكروسكوبات

.... الاناتومي بقى النظري هتلاقيه سهل طول ما انت بتحضر محاضراته وبتفهمها والعملي بقى ده لازم تركزوا فيه جدا جدا جدا لانكوا هتشتغلوا ع عينات قديمة وف الامتحان بيجيبوا عينات جديدة ف لازم تبقى مذاكر كويس
ملحوظة: العينات دي عبارة عن جثث حمير ف طبعا ممنوع القرف ويرجى احضار جلوفز وكمامة عشان الفورمالين

.... الانجلش بقى مادة هبلة دكتورها مش بييجي اصلا بس طالما جبت المذكرة و حضرت الامتحان وسلمت الشيت ف ميعاده هتجيب امتياز مرتاح

..... الحقوق بقى دي دكتورها برده مش بييجي غير اربع خمس محاضرات وبينزلها ورق كده آخر التيرم بتحفظة وتدخل تمتحن ومش بتنضاف ولا ليها لازمة

.... الفيزيا دي بقى مادة عسل ليها يوم محدد بنروح في كلية علوم ف الجامعة نفسها "وده طبعا لاننا كلية منفصلة بعيد عن الجامعة"
بينزلها كتاب وف آخر التيرم بينزل ورق بتجارب العملي وامتحانها بييجي من امتحانات السنين السابقة بالكلمة يعني لو بصيت فيهم قبل الامتحان هتجيب امتياز مرتاح انا عن نفسي مش بصيت فيهم وجبت جيد جدا

... واخيرا بقى الاحصا ودي لو ذاكرتوها هتبقى بيس جدا معاكوا واهم حاجة مش تضايقوا الدكاترة عشان مش يغلسوا عليكوا ويجيبلكوا امتحان صعب ولازم تسلموا الشيتات ف ميعادها

م الآخر بقى كليتنا كلية حضور يعني هتحضر محاضرات "وتركز فيها" وتحضر سكاشن هتجيب جيد او جيد جدا اما بقى لو عملت كده وذاكرت كويس واول بأول هترتب كمان لان زي ماقولت عندنا الدكاترة بتدي درجات وبيرفعوا ف الآخر كمان

وبخصوص الاماكن ف مدرج اولى معروف المدرج (أ،ب) ف الوش وانتوا داخلين [:D]
ده غير ان اول يوم ان شاء الله اتحاد الطلبة هيعملوا جولة يعرفوكوا الكلية كلها والاماكن وكده

بخصوص أول يوم :
هو عامة الناس بتبقى مش فاهمة حاجة ف اول يوم وفي ناس بتفهم بعد اسبوع وفي ناس بعد شهر وفي ناس بعد التيرم الاول كله
ع حسب كل واحد يعني
اما اول يوم ف احنا اشتغلنا محاضرات عادي واشتغلنا سكاشن بس كله ع خفيف كده وعملولنا حفلة كده والدكاترة والعميد رحبوا بينا واتحاد الطلبة عملوا لنا جولة تفقدية ف الكلية

السكاشن عادي جدا يعني الدفعة بتتقسم ابجدي ع 6 سكاشن (أ.ب.ج.د.ه.و) وكل واحد يحضر ف سكشنه وف ميعاده ف الجدول وبس

ربنا يوفقنا جميعااااااااااااااااا

شرحتيلى صدرى انا داخله اولى بيطرى اسماعيليه بس لسه هحول الزقازيق ان شاء الله