انا فى مشكلة كبيرة انا مدرسة اعدادى ويصر التوجية لانتدابى للثانوى رغماا عنى لسد العجز \
والمشكلة مش فى الثانوى بالنسبة لى لكن المشكلة انة ثانوى بنين وانا غير قادرة على التعامل مع البنين فى هذا السن مش هقدر ادخل حتى الفصل لان المدرسة مشهور شغب طلابها الحل اية حد يدلنى اعمل اية

عشان يتم انتداب المدرس غصب عنه من التعليم الاعدادى للتعليم الثانوي لا بد أن يكون هو أقدم مدرس في التعليم الاعدادى علي مستوي الادارة و غير ذلك فهو غير قانونى

لا انا مش اقدم ولا احدث الموجودين اتصرف ازاى؟

كله زفت طلاب ابتدائى واعدادى وثانوى

علشان المدرس مرتبه يادوب ياكله عدس وفول ولو اكل زى الدكتور او الظابط حيعرف حقه ويدور عليه علشان كده مش عاوزين المدرس يفهم حقوقه ( مش سمير غانم قال اللى بياكل فول يبقى غبى )هما عاوزين المدرس كده اتمنى ان الوزير او اى مسئول يفطر ويتغدا ويتعشى فول كل يوم وبعدين نشوف النتيجه

انا مدرسة ف ثانوى بنين وسمعتها برضه زفت عن الولاد لكن من تجربتى ثانوى افضل لان اعدادى كثافته كبيرة جدا وعدد نصاب الحصص لك ف ثانوى اقل 18 حصة اما اعدادى فتصل الى 22 واحيانا 24
المهم تكون ممتمكنة ف المادة مش اكتر الطلبة بيحترمو المتمكن ف مادته

تتصرفي كالأتى
و نفس مشكلتك حدثت في ادارتى و مدرستى
أولا متمضيش علي الانتداب لما يوصل المدرسة
ثانيا :قدم تظلم للأدارة حيث الاسباب الاتية ........
... و أذا أصر الموجه بتاعك يمكن تقديم شكوي للشئون القانونية
و عندنا كمان الموجه الاول لما عرف بالموضوع كان حيحول الموجه للتحقيق بس المدرس كان اشتكى في الشئون القانونية فألغت الشئون القانونية انتداب المدرس و عاد لمدرسته
لو عوزة صيغة التظلم ممكن أساعدك بس أتمنى متكونيش نفذتى الندب
في الواقع عن خبرة كمدرس ثانوي أفضل مرحلة بالتعليم للمدرسة هي الاعدادية و الابتدائية أما الثانوية فستعانين من مشاكل مع الزملاء و الطلاب

أولا بالنسبة لنصاب الحصص في اعدادي 21 حصة و محدش يقدر يخليك قانونا تأخذ أكثر من 21 حصة و لو حتى خمسة دقائق حتى لو كان وزير التعليم الا اذا كان مدرس جبان و بيفرط في حقه و أكيد عارفه انه الفصل بيأخذ 6 حصص في الاسبوع يعنى المعلم في محافظتى أقصي واحد 18 حصة في اعدادي و في الثانوي المعلم نصابه 18 حصة أعتقد الاعدادى أريح و بالنسبة للمادة العلمية محدش بيهتم غير فصول البنات أما فصول الأولاد ففي داخل الحصة مهما شرح المدرس لا يهتموا بسب الدروس الخصوصية لكن في القري بس ممكن أقلك ممكن الأولاد بيسمعوا الشرح داخل الفصل و ده الواقع بدون تجميل للصورة أو تزييف للحقائق

شكراا على الردود لكن فعلاا اصر مدير مدرستى على تنفيذى الندب ورحت المدرسة ومش عارفة اتعامل مع الطلبة ولا حتى مدينى فرصة اتكلم مش اشرح اعمل اية؟
وادارة المدرسة كمان بتدينى حصص احتياطى بتكون كارثية حقيقى مش عارفة اعمل اية لو اخدت اجازة نص اجر يلغى دة الانتداب والا لا

ربنا معاكى يابنيتى

المشكلة مش ثانوى ولا إعدادى المشكلة تكمن فى شخصية المدرس أو المدرسة
فكونى قوية الشكيمة ولا تخافى أحد

زميلتى العزيزة
أولا لكي تتعاملي مع طلاب الثانوي الأولاد هناك خطوات أولا لا بد أن تتخذيها
1- تعلمي نصابك القانونى أذا كنتى علي ترقية معلم فجدول حصصك + الحصص الاحتياطي= 18 حصة في الاسبوع و أذا كنتى معلم أول نصابك 17 حصة جدول + احتياطي و لا تأخذي أي حصة أكثر من ذلك و هناك معلومة أخري أنه لكل معلم في جدول المدرسة مكتوب (ح ) أحتياطي يعنى لو مش مكتوبلك في الجدول احتياطي متأخذيش . فلا بد أن تكون شخصيتك قوية مع زملاؤك و مدير المدرسة لأنها أول طريق النجاح داخل الفصل و لا أقصد شخصية قوية انى اعمل مشاكل و أزعق هذا مفهوم خطأ لقوة الشخصية (عندما لا يحترمنى شخص ليس عيب في شخصيتى و انما هو عدم تربية عند الأاخريين )و انما قوة الشخصية أن تعرف ما لك من حقوق و ما عليك من واجبات و لا تفرط في حقك
= هذه النقطة مهمة لانه هناك مدرسين للأسف بتبين للتلاميذ أنهم اذا تصرفوا بطريقة سيئة مع مدرسهم فانه لا يستطيع أن يفعل لهم شيء و خصوصا مديري المدارس حاليا سلبيين و مش مهم تشرح المهم يكون في الحصة فيه مدرس و خلاص و يسيب المدرس يعانى مع الطلاب و لا يتخذ أي اجراء مع التلاميذ
و علي فكرة أغلب المدارس في الجمهورية في الثانوى العام بيعملوا نظام التبديل أي أن المدرس الغائب بيأخذ حصته مدرس الحصة الاخيرة كبدل و يروح الفصل قبل ميعاده بعد الحصة الخامسة أو الرابعة لأن أساسا المدرس في الثانوي بيقدر علي الطلاب بالعافية ما بالك بالحصة الاحتياطى و أي شخص يقول غير كده فهو كاذب و أن تعلمي بصورة خاصة مادة الانجليزي الطلبة مش فاهمين حاجة و مش عوزين أصلا يسمعوا في الحصة
= أتمنى يكون الزملاء كويسين و أخذتى جدول سنة أولى
= لو الطلبة ما سكتوش في الحصة عادي ما تتعبيش نفسك و تشرحي و طول ما انتى محضرة درسك خلاص و لا تستخدمى أي شتائم في الفصل عشان محدش يدينك في شكوي و تحافظى علي نفسك داخل الفصل و المدرسة و ما تنسيش معاكي أعمال السنة و اسئلى و شوفي كتاب التدريبات و حطى علي درجات و لازم تستخدم اعمال السنة و لا أقصد في ظلم الطلبة و لكن كوسيلة للسيطرة و حفظ النظام داخل الفصل لأن الطالب مش حيخاف منك غير بأعمال السنة طالما أن مدير المدرسة غير حازم و صارم و يقوم بفصل الطالب السييء
=أثناء امتحانات نصف العام تكونى صارمة سواء في الملاحظة أو في التصحيح و ليس في أسئلتك فقط و لكن حتى في أسئلة زملائك لأن معظم الطلبة سترسب أنا مدرس ثانوي و متأكد من ذلك و هذا سوف يفيدك في الترم الثانى فستجدي الطلبة محترمين و خايفيين منك و كمان حتلاقي زملائك حيخلوا مدير المدرسة يخلي الموجه يلغي انتدابك وده افضل شيء ليكي و (علي فكرة والله بجد مدرسيين الثانوي بيعانوا و لو براحتهم يرجعوا اعدادى ) و أصلا الموجه بتاعك زي ما عندنا في مدرستى محتاجين مدرس لف علي كل مدرسين اعدادي و رفضوا يجوا ثانوي بس الموجه بتاعك استغل انك طيبة و حضرتك لم تستشيري أحد قبل ما تنفذي الانتداب
= اياكي تكتبي طلب نقل او تثبيت للثانوي و حتى لو جالك نقل او تثبيت ما تمضيش علي اي حاجة لحين ما تلغي انتدابك
= سيبك من اجازة نصف اجر و الكلام ده لكن لكي أجازات عارضة و كمان اجازات اعتيادية و لو حبيتى تأخذي اجازة اعتيادية تعاملي رسمى مع مدير المدرسة و قدمى طلب و لو رفض يخليه يكتب علي الاجازة و هو مش يقدر و لا مدير الادارة لانك لو احتفظتى بهذه الورقة سف تأخذي فلوس بسبب رفضهم الاجازة الاعتيادية
= نصيحة أيضا لو الموجه جه عندك في الفصل و دخل اشرحى بأقل مجهود عشان حيشوف شرحك مش كويس يا أما حيسكت يا اما حيلغى انتدابك و مفيش جزاء علي ذلك المهم تصححى كتاب التدريبات أول بأول و بعدين انتى حتشرحي زي ما الوزارة عوزة ( القواعد متشرحيش من مخك و تتعبي نفسك اشرحي صفحة الدرس الثانى من الكتاب و الطلاب يحلوا و الدرس الثالث خلي الطلبة كلهم يقرأوا بالواحد ووقفيهم يجاوبوا علي الاسئلة و الله الطلبة و الموجه عجبهم الشرح بيبقي كويس مش عجبهم حيلغي انتدابك
=أخيرا جايز ربنا يريد بأجازات جبرية تلغي انتدابك مثل أجازة رعاية طفل أو .......... الخ اما اجازة نصف أجر ده يرجع الي أشياء كتير هل الموجه حيجيب حد كلي مكانك و لا يغيظك و يجيب واحد انتداب جزئي و تبقي انتى خسرتى و ما استفدتيش بحاجة أو انك تأخذي نصف جدول و أكيد زملائك حيشيلوا باقي حصصك و مش حتستفيدي بشيء و عشان أرد عليكي في موضوع نصف الاجر لاز تعرفي نصاب حصص زملائك و فيهم حد ممكن يوافق يشيل أكثر من نصابه و لا له
علي العموم أنا واثق انك بعد ما تقرئي الرد حتنجحى مع الطلبة لحد ما تلغي انتدابك لأان الثانوي عوز مدرس رجل و الدروس الخصوصية تهمه و يعرف ازاي يصاحب الطلبة عشان يأخذوا دروس عنده
=بجد أنا و بعض زملائي في اللغة الانجليزية في المدرسة بطلنا دروس خصوصية و فتحنا مشروعات صغيرة بسب سوء طلاب الثانوي في جيل اليومين دول
ربنا يعينك و لو محتاجة أي مساعدة أو رأي فلا تترددي في ذلك و خذي الموضوع ببساطةضوع ببساطةو ربنا يوفقك
هذا

شكراا جزيلاا على النصيحة
طب لو كتبت تظلم ورفعتة للمحافظ او لو لوكيلة الوزارة ممكن ينفع؟؟

ينفع لأن كل شيء فعله الموجه غير قانونى لأنك مش أقدم واحدة بالادارة في المدرسين في تخصصك في التعليم الاعدادي و كمان لم يأخذ منك موافقة كتابية قبل ما يعملك الندب (و لأنه حتى لو الموجه قال أنك أفضل مدرسة انجليزي في الاعدادي فالأولي بالموجه يندب حضرتك لمدرسة ثانوي بنات أو مشتركة و ينتدب مدرس رجل لمدرسة البنين و لا كمان الموجه حيقول ما فيش مدرسة عندكم فيها بنات؟؟ )
روحي لوكيل الوزارة و قولى ليه و قدمى طلب بس ركزي في كلامك علي أنك مدرسة و دي مدرسة أولاد و مشاغبين و قولي في سوء سلوك الاولاد شعر ............. انك مش قادرة تشرحي من سوء الطلاب فأنا تعبت نفسيا و جالي احباط و فكرت انى أخذ اجازة بدون مرتب أو مش حروح الشغل تاني و انه فيه مدرسين أقدم منك يروحوا الثانوي و قولي أي كلام يتأثر بيه وكيل الوزارة و (يعنى لو الموجه محتاجك أوي خلاص مفيش مشكلة بس تكون مدرسة بنات و العبارة دي براحتك عوزة تقوليها لو معندكش مانع تكون ثانوي بنات و لو عوزة ترجعي اعدادي بلاش تقوليها )
لو عندك نقيب معلمين محترم و كلمتيه حيلغي انتدابك و لو قابلت وكيل الوزارة حيلغي الندب بس ركزي علي انك مدرسة و دول أولاد مشاغبين
و ربنا يوفقك و ينصرك على هذا الموجه

شكرااا جزيلاا على الرد ربنا يعديها بخير علشان انا فعلاا زهقت جداا جداا

حبيبتى انا هقولك انا تجربتى فى اعرق مدارس المنصورة بنين اولا لابد وان تكونى متمكنة من المادة بتاعتك جدااااا
المدرس الشاطر غصب عن الطلاب بيقعدوا ويستفيدوا ... لاانكر ان الشخصية القوية والعلم هما سلاحك مع المراهقين وبخاصة ان مفيش قوانين تحمى المدرس صدقينى تلاميذى الى الان لو قابلتهم فى اى مناسبة بيجى يسلم علىيا لانى كنت اوفر عليهم فلوس الدروس بالشرح الشيق والجيد بشهادتهم العلم لوحدة مش كفاية خليكى قوية وتوكلى على الله ربنا هيساعدك بس كونى جادة داخل الفصل وبرة الفصل صاحبيهم واعملى لهم مجموعات مجانية بكدة تكسبى ثوابهم

عذرا أبلة نبيلة
أنتى حضرتك مدرسة جيولوجيا و ليست مدرسة لغة انجليزية
عندنا برضة مدرسة جيولوجيا بتدرس للبنين و مفيش مشكلة لكن لو حضرتك مدرسة انجليزي حتشوفي الفرق
أي أبلة ممكن تدرس للبنين و مفيش مشكلة لو كنتى بتدرسي مادة بتتكلمي بالعربي و الطلبة فاهمين انتى بتقولي ايه فبيسمعوا ليكي و ينتبهوا للشرح و مفيش مشكلة
لكن بالنسبة للانجليزي الطلبة درسوه من زمان و هما مستواهم ضعيف جدا جدا و مش فاهمين المدرس بيقول ايه سواء في الفصل أو في الدرس الخصوصي فأكيد طالب مش فاهم حاجة و فاضي حيعمل أيه ؟أكيد حيعمل مشكلات و خصوصا لو كانت مدرسة و ليس مدرس
ختقولي طيب الطلبة بتنجح أزاي في الانجليزي ؟
لما تدخلي لجنة الامتحان و تلاحظى علي الاولاد في الامتحان و كفاية بس يغشوا بعيونهم لما يشوف بس اجابة زميله في الاختياري و الأسئلة اللي اجابتها كلمة واحدة و كمان لما تيجي و تشوفي التصحيح بتاعنا و خوف المدرسين من الجزاءات و ازاي بيعطوا درجات بزيادة و لما تشوفي اننا بنعطي درجتين كمان رأفة حتعرفي ازاي بينجحوا
فالابلة مدرسة الانجليزي لا تعاني لأنها ليست علي مستوي علمي عالي و لكن بتعانى لضعف مستوي الطلبة لذلك هما لن يسمعوا لأي أحد في الحصة حتى لو كان عالم في الانجليزي لأنهم مش فاهمين هو بيقول ايه بسب تراكم الانجليزي لسنوات دون استيعاب الطلاب
هذا للتوضيح فقط
و الانسان يعمل اللي عليه و الباقي علي ربنا