دايما بقول مرسى مسئول عن كل شئ فى البلد
ولازم نحاسبه كل دقيقة
ولو كيس زبالة اترمى فى الشارع لازم يشيله
وكنت بنسى (او بتناسى) ان الشعب مسئول ولازم يتحاسب برضه زيه بالظبط

انهاردة قررت اكون ايجابى واتحرك واعمل بلقمتى لوجه الله ولاجل مصر
خططت لبعض الانشطة فى المعهد تخطيط دقيق
ونسقت مع الطلاب ووعدتهم بمسابقات وجوايز وتكريم وغيره
الطلبة كانوا فرحانين ومستعدين ومتحفزين جدا
وانا شخصيا كنت فرحان لما لقيت الفرحة فى عيونهم وكمان مستعدين
وطبعا اى نشاط محتاج دعم (مادى ومعنوى) من الادارة وشيخ المعهد
لكن اللى حصل خلى الواحد يضرب نفسه بالقديمة

الشيخ مكبر دماغه ولا كانه مسئول ولا له يد فى الموضوع
حرب ظاهرة وخفية من الوكلاء العواطلية وضرب تحت الحزام
فئة مانتخة طول اليوم مفيش وراها غير النميمة وتعطيل المراكب السايرة
غيرة شديدة وتريقة بالصوت العالى من الزملاء المدرسين
وكانى اعوذ بالله هعلم الطلاب ازاى يلعبوا قمار فى المعهد او بعلمهم انحراف
ونظرات غيرة وتهكم وانتظار للفشل من حزب كباية الشاى
يا عالم يا هووو يا شيخ الازهر الوكلاء فى المعاهد مبيعملوش حاجة ووجودهم زى عدمه
ان لم يكن عدمه افضل!

يا جماعة النشاط ده مهم وله تاثير على مستوى الطلاب الدراسى والمهارى
يا عم كبر دماغك
المعهد بفضل كسلهم ونومهم فى العسل اصبح مبنى كئيب بلا روح عامل زى الاصلاحية او السجن
مفيش انشطة ولا تعليم ولا مسابقات ولا اختبارات ولا اى نوع من انواع التحفيز
طلبة بتجى الصبح وتمشى بعد الضهر وكام كلمة تتقال او متتقالش ودمتم
والشغل الشاغل لهم امتى هنقبض ال 50% بتاعة الكادر
ملعون ابو الكادر على المرتب على المنح على اى فلوس تيجى من غير عمل

الخلاصة ولانى وعدت الطلاب بتنفيذ الانشطة اللى اتفقنا عليها
قررت انفذ الانشطة دى من جيبى الخاص وليكن ما يكون

عايز اقول ان الفلول مش بس شفيق وشوبير والهام شاهين
الفلول هو كل واحد بيقبض مرتب ومبيشتغلش لانه بياكل حرام ويعطل المصالح
الفلول هو كل شيخ معهد مبلط فى الخط ونسى انه مسئول عن الرعية
الفلول هو كل مدرس انانى همه نفسه وبس وتتحرق الطلبة عالازهر عالبلد كلها

الفلول هو كل جبان قاعد تحت الحيط يتريق عليك وينتظر فشلك
الفلول هو كل وكيل عاطل عن العمل وفاشل حتى فى ادارة الطابور
للاسف البلد مليانة فلول ويمكن نكون احنا نفسنا فلول ومش حاسين

واقسم بالله اننا ما هنتقدم الا اذا كل واحد فينا اتقى ربه وغير من نفسه للاحسن
عايزين ناكل ونشرب ونتقدم ونبقى محترمين واحنا نايمين .. فى المشمش طبعا
واكتر شئ ملاحظه بعد الثورة ان البلد كلها اتعلمت الرغى، الرغى وبس
كله بيرغى ويرغى ويرغى ومفيش لا عمل ولا انتاج ولا ضمير
ونيجى بعد كده نقول نحاسب الريس على ال 100 يوم !!!!!
روح حاسب نفسك الاول

باك الله فيك

بوركت يا اخي

تكلمت فأحسنت ياريت نحول هذا الموضوع لعمل ايجابى يفيد المجتمع من خلال الحوار الراقى البناء

طيب بالنسبة للى موجودين فى النقابات بيمثلوا فئات معينة مثل المدرسين والاطباء ومابيعملوش الى مطلوب منهمم فلوف وﻻ ايه ؟
لو على منطقك فلول
اذن يا صديقى البلد كلها فلول واولها الاخوان اللى فى النقابات

والله كلام جميل وانا معاك ولكن لا تنسى ايضا ان صلح الراعى صلحت الرعيه ومش لما الناس تطلب حقوقها عشان تكفى حياتها الطبيعيه او الحد الادنى من حياه كريمه لائقه يبقى شعب مش كويس؟
ثم هنجيب مثلا للطالب جوايز منين من المرتب الملاليم؟ بالله عليك بيكفى ليوم كام فى الشهر؟ بيضمن لك حياه كريمه وهدمه لائقه تدخل بيها الفصل ؟
انا بحب الدكتور مرسى وربنا شاهد لكن مش له معنى ان الى يختلف معاه بقى فلول يا سيدى الفاضل

انا بقضى يومى كل يوم اروح اجيب العيش وما ادراك ما العيش وطابوره الجميل--------------
ثم الانابيب ودى حاجه جميله جدا انبوبه تيجى الانيه تخلص وساقيه طبعا لانها بتيجى اصلا فاضيه
معهدى فى نفس البلد فا المرور مش مشكله لى اوى الحمد لله
الكهربا كل شهر يا سلام
والمياه كل شهرين فاتوره محترمه
والزباله مش بييجوا يخدوها ورفعوها من 2ونص الى 5 جنيه

عاوزين حزم اكتر من الدكتور مرسى -وعاوزين حكومه غير تقليديه مش وزراء وشاغلين مناصب وخلاص-- عاوزين العداله الاجتماعيه هى الحل لمشاكل كتير
الامن والامان -والله العظيم مازال العربيات بتتسرق والموتوسيكلات ومازال ومازال والشرطه ليس لها علاقه بالشعب

اكيد فى ايجابيات لكن فى رايى السلبيات مازالت تفوقها ونتمنى العكس

نظام التعليم النمطى الى احنا عايشين فيه الى بيصنع تعليم فاشل
مازالت المناهج منيله حشو على الفاضى
والموجه جاى عشان يشوف التحضير الى على الورق وكلنا عارفين والاكسرسايز ملزوق ولا لاء
وووووووو وبعدين؟

لان اختيار القائمين على التعليم نفس طريقه الاختيار القديم

جزاك الله خيرا وبارك فيك وأكثر من أمثالك

عندك حق في كل كلمة قلتها شيوخ المعاهد كلهم اسنمبة واحدة على مستوى الجمهورية

ما أعجبني في موضوعك هو حماسك المنقطع في مكانك
لكن ما أود أن اقوله لك ؟
هذا ليس عيبا في د مرسي كرئيس لجميع مؤسسات الدولة
الخطأ بل الأخطاء في الازهر نفسه
و سأكرر ما أقوله كل مرة
اذا صلح العقل صلح بقية الجسد و العكس صحيح
فاذا كانت ادارة الازهر - لا تصلح الا أن تكون ادارة كتّاب فقط - فهل سيصلح حال تعليم الازهر .
يا أخي أنت تتحدث في شئ بعيد كل البعد عن التعليم الازهري و الذي تعود
معظم طلابه على الكسل و الغش و من الفشل
و هذا نتيجة
فئة كبيرة من أشباه معلمين لا يجيدون الا فقط فن الغش ، لو بحثت عن قدراتهم في تخصصاتهم تجدها = صفر
ما يحدث الازهر الان - من المؤكد هو تراكمات سنوات - أي انه عملية اصبحت اعتيادية
قليلا و نادرا من وكلاء و شيوخ المعاهد تجد لديهم الحماس للعمل و هنا اقصد النشاط التعليمي التربوي المعروف و المعهود ( و سأضع قريبا في موضوع منفصل مقترحات ستوضح ماذا اقصد ؟)
و هم معذورين لأنهم تربوا على هذه الطريقة ، ولا يعرفون ما معنى نشاط تربوي تعليمي !!
فقل دوما
اللهم ولي الازهر من يفهم

ايوه والله يااستاذى صدقت

ربنا يبارك فيك

مشكور ولكن المثالية دي زيادة شوية حضرتك بتقول: "الشغل الشاغل لهم امتى هنقبض ال 50% بتاعة الكادر" لو حضرتك بتقبض 639 وعندك أسرة مكونة من 5أفراد وبتركب مواصلات إلى المدرسة أعتقد مكنتش فكرت كده أليس كذلك ؟

لن يدوم هذا الهدر لطاقات المخلصين من ابناء هذا الوطن
وإن غدا لناظره قريب

ياشعب مصر الغالى يجب علينا ان نهدأ ونعمل أولا ثم ننتظر النتيجة