مشاهدة النسخة كاملة : انا الواد بتاع المشاكل(بقلمى)
Monier 12-10-2012, 11:43 PM دى بعض المشاكل اللى حصلت معايا فى الكلية
نبدا بسم الله
.
.
.
انت الواد بتاع المشاكل
كلمة بتتقالى كتير ... لدرجة انى شكيت فى نفسى
هو انا اللى فعلا بتاع مشاكل ولا المشاكل هى اللى بتحب تجيلى
(قالولى ابعد عن الشر وغنيله ... غنيتله لقيته جاى يرقص قدام بيتى )
المهم نبدا منين
ممكن نرجع بالزمن من 2010 وتحديدا فى شهر فبراير
مع بداية الترم الدراسى الثانى بكلية التجارة ببنها
انا دكتور كويس وبحترم الطلاب بتوعى وكله بينجح وعمرى ما اقدر استغل الطلاب
كلمه بنسمعها من كل الدكاترة
بس الدكتور دا كان كلامه فى حاجة غريبة
لهجته طريقة كلامه حاسس بسخرية
كانه بيقول حبت عيال اقدر اضحك عليهم بكلمتين
فبصيت لصاحبى الوحيد لقيته بيغمزلى بطريقة تعنى (كبر مخك)
هزيت راسى موافق هعمل ايه يعنى
المشكلة ان باقى الدفعة قاعدين ساكتين وعادى واللى مبتسم واللى مش مركز
قولت عادى يعنى كل دكتور وليه طريقته
وبدات المشكلة واول كلامه
فى كتاب ليا سعره ..... وانتوا لازم تجيبوه علشان اشرح المحاضرة بتاعتى
ايه ؟ لا يادكتور ؟الكتاب غالى اوى؟
يادكتور مش هينفع لا اللايحة بتقول كذا؟
استنكار حاد ورفض ومشادات مع الدكتور
دا اللى انا اتوقعته وقولت اكيد هيحصل دلوقتى
بس برضو نفس ابتسامة الرضا ع الوجوه ولا كان فى حاجة
قولت ايه يا جدعان انتوا هتفضلوا ساكتين
احنا لازم نرفض
دا كان من جوايا بس من برا ساكت
والكلمة اللى اجبرت ان اقولها
هو انا هتكلم لوحدى
بصيت للدكتور بنظرة اشمئزاز
بقا انت اللى مش هتستغلنا
قررت انى مش هسكت ولازم اتكلم مع ادارة الكلية
وهنا كانت المشكلة الاساسية
السلام عليكم
وعليكم السلام اتفضل يابنى
حضرتك عميد الكلية
ايوه يابنى
طيب لو سمحت انا كان عندى استفسار بسيط
اتفضل قول
هو مش اللايحة بتنص ان الدكتور مبينزلش كتاب غير لو المادة ملهاش ريفرانس (مرجع) وسعر الكتاب ميزدش عن 40 جنية
فعلا يابنى
طيب حضرتك دلوقتى دكتور فلان الفلانى منزل كتاب ب ......... جنية وبيقولنا لازم تجيبوه
قالى ازاى احنا يابنى هنتكلم مع الدكتور وهنتصرف فى الموضوع دا
طيب ياريت يا دكتور دكتور فلان ميعرفش انى جيت وكدا علشان ميستقصدنيش
اكيد يابنى متخافش
دا الحوار اللى وانا قاعد فى المحاضرة توقعت انه هيحصل لما اروح للعميد
بس اللى حصل فاق كل التوقعات
ولي عودة للتكملة باذن الله
الأستاذة ام فيصل 12-10-2012, 11:46 PM قصه مشوقه مش باين عليك بتاع مشاكل
منتظرين التكمله
تحياتي
Monier 13-10-2012, 12:01 AM خلصت المحاضرة
وخدت نفسى وطلعت ع العميد
مكتب السكرتارية
السلام عليكم
وعليكم السلام
لو سمحت العميد موجود
مش فاضى (تنهيده ) خير
والله انا كنت فى فرقة اولى وكان فى مشكلة وكنت عاوز اقوله عنها
راحت بصالى نظرة من يسال (بقا انت عندك مشكلة )
قالتلى ممكن تبلغنى المشكلة وانا هوصلهاله او تكتبها فى ورقة وتقدمهالى وانا هوصلهاله
قولتلها لا انا عاوز اكلم الدكتور نفسه
قالتلى وانا مش ماليه عينك
قولتلها حضرتك مش هتخدمينى فى حاجة كدا كدا هتوصلى الشكوى انما انا عاوز اتناقش مع العميد
قالتلى خلاص تعالاله كمان شوية
قولتلها كمان شوية دا اللى هو امتى
قالتلى هو عنده اجتماع دلوقتى لما يخلص الاجتماع تبقى تعالى
قولتلها طيب والاجتماع دا هيخلص امتى
قالتلى معرفش
حسيت بخنقه
رحت باصصلها وقايل (هى بينها سنة سودا)
قولتها ومكنتش عارف انها فعلا سنة سودا
روحت ع المدرج وانا اشعر بضيق شديد
اتكلمت مع صاحبى وقولتله حصل كذا كذا كذا (وقولتله على اللى حصل كله)
قالى طيب مقولتليش ليه علشان اجى معاك
-معلش ابقى تعالى معايا وانا رايح كمان شوية
خلصت محاضرات اليوم وخدت صاحبى وطلعت ع العميد
-السلاموا عليكوا
-خش خش انت لسه هتتكلم .... العميد جوا خشوا اتكلموا معاه
-عاطف صاحبى(بهمس) هى بتكلمنا كدا ليه ؟
-ياعم كبر مخك
فى مكتب العميد
-السلاموا عليكوا
-وعليكم السلام اتفضل ؟
-والله يا دكتور كان فى مشكلة فى الدفعة عندنا
-انت فى سنة كام يابنى؟
-فرقة اولى يا دكتور
-خير يا بنى
-والله يا دكتور دكتور الفلان الفلانى عمل ....( وروحت قولتله على موضوع الكتاب والللى بيحصل وكدا )
-قالى وانت تعرف اللايحة منين ؟
-قولتله والله يا دكتور انا قريت لايحة المجلس الاعلى الخاصة بالطلاب والدكاترة وكمان اللايحة بتاعة الكلية غير ان وكيل الكلية جه اتكلم معانا وقالنا نفس الكلام
-يابيه انت ملكش دعوة باللايحة
اللايحة دى بتربط الدكتور بالوزارة ... انت ملكش دعوة
-عاطف رد يعنى ايه ملناش دعوة هى مش دى فلوسنا اللى بتتسرق
-والله يا غالى محدش قالك اشتريه
-قولتله لا هو قال لازم تشتروه وهيبقى فيه تسجيل اسامى فى المكتبة
-بص يابيه انا حاليا هنشوف الموضوع
واذا فجاءة دخل الدكتور المقصود بالكلام
-واول ما شوفناه اترعبنا (ايموشن انا كدا اكيد ساقط)
وباينه مرار طافح
لى عودة للتكملة
الأستاذة ام فيصل 13-10-2012, 12:40 AM :dمتابعه
راحت بصالى نظرة من يسال (بقا انت عندك مشكلة )
ياااه صبغتك حمره
Monier 13-10-2012, 01:01 AM :dمتابعه
راحت بصالى نظرة من يسال (بقا انت عندك مشكلة )
ياااه صبغتك حمره
عادى بقا:d:d
الأستاذة / أم أمل 13-10-2012, 01:09 AM يا ابنى بطل التشويق ده
عامل مثل المسلسلات العربية
تقطع عند اهم مشهد
هههههههههههههههه
جميله يا منير متابعين
Monier 13-10-2012, 01:16 AM يا ابنى بطل التشويق ده
عامل مثل المسلسلات العربية
تقطع عند اهم مشهد
هههههههههههههههه
جميله يا منير متابعين
معلش بقا يا استاذة
بس الباقى هينزل فى اقرب وقت باذن الله
نورتينى
الأستاذة ام فيصل 13-10-2012, 09:18 AM يا ابنى بطل التشويق ده
عامل مثل المسلسلات العربية
تقطع عند اهم مشهد
هههههههههههههههه
جميله يا منير متابعين
عجبني تعليق الاستاذه ام امل
تحياتي
مـــــلك 13-10-2012, 09:34 AM هههههههههههههههههههههه
عارفاك انت مش هاتسكت على حقك ابداً
خلص بقا انا هاموت واعرف بقيه اللي حصل
Monier 13-10-2012, 11:40 AM هههههههههههههههههههههه
عارفاك انت مش هاتسكت على حقك ابداً
خلص بقا انا هاموت واعرف بقيه اللي حصل
حاضر يا كنارة من غير ضرب :slap1qk6:
هكمل :d
Monier 13-10-2012, 11:49 AM الحلقة الثالثة
كنا واقفين فين ....فين
اه لما الدكتور دخل علينا واحنا بنشتكيه عن العميد
واذا فجاءة دخل الدكتور المقصود بالكلام
-واول ما شوفناه اترعبنا (ايموشن انا كدا اكيد ساقط)
-السلام عليكوا ازيك يادكتور احمد
-اهلا دكتور فلان اتفضل
-لا شكلك مشغول
-لا ولا مشغول ولا حاجة .. دول طلاب الفرقة الاولى جايين يشتكوك
وكانت صدمة ليا انا وعاطف وحسيت انى عاوز اضرب العميد
- يشتكونى انا ليه
دى حتى محاضرة واحدة اللى دخلتهالهم انهاردا
-جايين ياسيدى يقولوا على سعر الكتاب واللايحة كلام كدا
-عاطف: لا مش كلام كدا احنا بنطلب حقنا
-العميد حقك يا حبيبى؟!! عموما الدكتور اهه واحنا هنتكلم معاه
حسيت ان مخنوق بطريقة غريبة
روحت لافف وخارج من غير ولا سلام ولا كلام
تانى يوم العميد دخل المدرج
-لوسمحت يا دكتور كنت عاوز الطلاب فى كلمتين
-طبعا يا دكتور اتفضل
-دلوقتى يا جماعة فى ناس جت اشتكت ان دكتور فلانى الفلانى منزل كتاب وبيقول انه غالى جدا
انتوا ايه رايكوا فى الكلام دا
-مين دول يا دكتور؟
-زميلكوا دا ودا ممكن تقفوا ؟
وقفت انا وعاطف مسبهلين
-لا يا دكتور ملناش دعوة بيهم واحنا مش رافضييييييييييين
وكانت صدمة
انا بطلب بحقى وحق الناس وهما ينكرو تمام اوى
عاطف : يعنى انتوا موافقين ان الكتاب يبقى ب.... جنية واجبارى انكوا تجيبوه
سكوت يلوذه رائحة الخوف والرعب
الناس خايفه تقول انهم رافضين احسن .... احسن الدكتور يبهدلهم
وكانت اول المشاكل تم تحويلى للتحقيق بتهمة اهانة دكتور(طيب هو انا اهانته امتى مش عارف) وبعد التحقيق واللذى منه
صدر الحكم
الدكتور سامحنى وسحب الشكوى كدليل على طيبته او علشان يبين لباقى الدفعة انه .... محترم
الدكتور حب يعملى قرصة ودن
طيب اشمعنى انا لوحدى مه عاطف كان معايا ( مش عارف)
بعد المشكلة باسبوعين وبعد ما اشترينا الكتاب مجبرين ويوم محاضرة الدكتور الفلان الفلانى
وصل الخبر ان العميد مشى الدكتور من الكلية
ليه ياجدعان
الحقيقة هى وجود خلاف بين الدكتور وادارة الجامعة والكلية
الحجة لان الدكتور خالف اللايحة ونزل كتاب بدون اذن الكلية(ايموشن نعم يادلعدى )
انتشر الخبر فى الدفعة وكان الرد
- هنعمل ايه يا منير؟؟؟
حسيت انى مش عارف افكر
مش منير دا اللى راح فى داهية بسبب الدفعة
بس حسيت انى حقى مغتصب اكتر دلوقتى انا جبت كتاب والدكتور مشى
هعمل ايه بالكتاب
-روحت للعميد انا واربعة من الدفعة
واول ما شفنى داخل من الباب بعد مشاجرة عنيفة مع السكرتارية
-انت تانى ؟ مش انت الواد بتاع المشاكل؟
بس المرة دى مكانش لوحده كان معاه نائب رئيس الجامعة والذى كان رئيس لجنة السياسات فى الحزب الواطى انذاك ورئيس الجامعة حاليا
-مشاكل ؟ انا بتاع مشاكل:o:o ؟ هو طلب الحق بقا مشاكل؟:mad::mad:
رديت (باستفزاز): ايوه انا بتاع المشاكل؟:mad:
وياريتنى مارديت
لى عودة للتكملة
مـــــلك 13-10-2012, 03:58 PM حرام عليك انت بتعمل كده ليه بتقطع عند اهم حاجه ليه
لا الموضوع كده هايخرج من ايديا وهايروح الايد التانيه ههههههههههههههههههههه
اخلص يامنير بقا
Monier 13-10-2012, 05:04 PM حرام عليك انت بتعمل كده ليه بتقطع عند اهم حاجه ليه
لا الموضوع كده هايخرج من ايديا وهايروح الايد التانيه ههههههههههههههههههههه
اخلص يامنير بقا
اصبرى بقا ياكنارة لما نشوف ردود الناس مش ممكن يكون حد مش عاجبه
بس برضو من غير ضرب :slap1qk6:
اصبرى شوية
مـــــلك 13-10-2012, 08:37 PM اصبرى بقا ياكنارة لما نشوف ردود الناس مش ممكن يكون حد مش عاجبه
بس برضو من غير ضرب :slap1qk6:
اصبرى شوية
مش عاجبه ايه بس يابني دي حكايه جميله
وطويب هاصبر بس بسرعه الله يخليك :(
انا اول ما بدخل بجري عشان اشوف انت كملتها والا
تامر الطويل 13-10-2012, 09:07 PM فى بلدنا دى فعلا اللى بيطالب بحقه يبقه بتاع مشاكل
ف أهلا بالمشاكل اذا كانت هتجبلى حقى المنهوب
بجد جميله وواقعيه وعجبتنى قوى لان اسلوبك متميز
امير الجروح
Monier 13-10-2012, 10:14 PM كنا فين
اه
- مشاكل ؟ انا بتاع مشاكل ؟ هو طلب الحق بقا مشاكل؟
-رديت (باستفزاز) ايوه انا بتاع المشاكل؟
- عاوز ايه ؟
- رد واحد من اللى معايا : هو دكتور فلان الفلانى مشى ليه ؟؟
- وانت مالك ؟
كان رد مستفز لابعد الحدود
- افندم يادكتور؟
- وانت مالك ؟ دا نظام كليه والدكتور خالف اللايحة ؟
احساسى جوايا عاوز اقوله (نعم يادلعدى )
بس تقريبا عاطف حس بيها وقال:
- مه احنا جينالك قبل كدا وحضرتك قولتلنا ان الدكتور ماشى سليم
- محصلش يابيه؟
حاسس انى عاوز اشتم
- لا حصل و الدكتور حولنى للتحقيق ساعتها بتهمة اهانته وبعد كدا قال ايه سامحنى؟
- يعنى انت عاوز ايه دلوقتى مش انت كنت رافض الدكتور واهه مشى
- واحد من اللى معايا : طيب وبالنسبة للكتاب اللى احنا جيبناه نعمل فيه ايه ؟
- والله يا بيه انا مليش دعوة انتوا اللى اضحك عليكوا
- رديت: افندم؟
- قالى اعملكوا ايه الدكتور مشى؟
- يعنى حضرتك مش هتعرف تجيبلنا حقنا؟
- واجيبهولك منين (وبضحكة شماته)؟
- شكرا يا دكتور
وروحت منسحب وخارج ولاقيت باقى الناس خرجوا ورايا
روحنا ع المدرج
- دلوقتى يا جماعة احنا اتكلمنا مع العميد وحصل كذا كذا كذا
- وانت مين قالك تتكلم باسم الدفعة ؟ (كان رد الشخص اللى جه وقالى هنعمل ايه يا منير)
حسيت انى ه***ه ولا اشتمه
- روحت باصصله وقولتله: انا بتكلم باسم صحابى وهما فلان وفلان وفلان وفلان ماشى وروحت طلبت حقنا احنا بس ..خلاص
بدات المشاورات الجانبية
- ومنير دا عاوزه مصلحته بس
- دا منير هيودينا فى داهية
خدت نفسى وخرجت هكلم مين ولا هرد على مين
- طلعت لصاحب المكتبة وقولتله انا عاوز ارجع الكتاب
- قالى مش هينفع لان الدكتور خد الفلوس وباقى الملازم
- طيب هات رقم الدكتور
- مش معايا
فى نفس اليوم لقيت الفراش معلق ورقه ومكتوب فيها
مجلس تاديب
يحول كلا من الطالب
- منير السيد منير
- محمد عاطف ...
- محمد محمود الخولى
- محمد نزيه عبد المنعم
- واحمد شبل ...
الى مجلس تاديب ويمنعوا من حضور المحاضرات حتى التحقيق معهم فى يوم الثلاثاء الموافق ././..
امضاء العميد
>:( >:( >:(
ساعتها ايقنت انى فعلا بتاع مشاكل
ولى عودة للتكملة
الأستاذة ام فيصل 14-10-2012, 12:30 AM انا عارفه قصتك مالهاش نهاية قصة لاتنتهي
لانك بتاع مشاكل:d والمشاكل لاتنتهي
بجد مشوقه متابعين معاك
الأستاذة / أم أمل 14-10-2012, 07:00 AM :slap1qk6: شكلك كده عملت اعتصام فى الكليه :022yb4:
مـــــلك 14-10-2012, 09:27 AM رحمـــــــــــــــــــــــاك ربي
انت ليه مش بتقول على طول ياباي
Monier 19-10-2012, 02:04 PM الحلقة الاخيرة
اممممم
اتحولنا مجلس تاديب هاااااااااار اسود ع العميد وسنينه السودا يا جدعان
نعم ايه دا ليه احنا عملنا ايه؟؟
طلعنا على العميد وبدون كلام مع السكرتارية اقتحمنا الاوضة
نزيه : مجلس تاديب ليه
- هتبقى تعرف فى التحقيق؟
- هو ايه اللى هبقى اعرف؟
عاطف – هو احنا عملنا ايه يعنى؟
- روح الشئون القانونية وانت تعرف
خرجنا وروحنا ع الشئون القانونية
- لو سمحت احنا عاوزين نعرف احنا متحولين مجلس تاديب ليه ؟
- بتهمة اثارة الشغب فى الكلية
- هاااااااااااااااار اسود شغب داحنا غلابة
- والعميد هو اللى مقدم فيكوا شكوى
- نزيه – بتهمة ايه ؟
- الاعتداء عليه
- اعتداء كمان ايه دا
-ويلا من هنا علشان ورايا شغل
خرجنا واحنا بنفكر لو اتفصلنا هنعمل ايه وهنشتغل فين
وقولنا نحضر المحاضرات لقينا كل دكتور ورقة باسمينا وبيطردنا برا المحاضرة
طبعا كانت مشكلة كبيرة
احنا لسه فى اولى وهنتفصل وموقف اهالينا
-نزيه : هو احنا اعتدينا عليه امتى؟
- شبل : والله ما عرف ؟
- نزيه : تلاقيه بيتبلى علينا علشان كذا مرة نطلعله ؟
- او ممكن يكون نائب رئيس الجامعة هو اللى خلاه يعمل كدا
- خلاص يا جماعة نستنى نشوف هنعمل ايه فى التحقيق وربنا يستر
وجاء اليوم الموعود
- السلام عليكوا
- وعليكم السلام افندم
- حضرتك احنا كنا متحولين مجلس تاديب وانهاردا مفروض التحقيق معانا؟
- اه هو انتوا لا يا حبيبى انتوا هتطلعوا على ادارة الجامعة وهيتحقق معاكوا هناك
- ازاى مه علطول التحقيق بيبقى فى الكلية
- المرة دى الموضوع مختلف لان نائب رئيس الجامعة هيحضر التحقيق
وساعتها ايقنت انى مفصول مفصول يعنى مش اى كلام
خرجنا من مكتب الشئون القانونية وطلعنا على ادارة الجامعة واحنا شبه ميتين من الخوف
مبقيناش عارفين نروح لمين فى ادارة الجامعة فاتكلمت مع الامن
فقالى اطلع لنائب رئيس الجامعة لشئون الطلاب
طلعنا على النائب السكرتارية كانت زوق بصراحة قالتلنا استنوا شوية لانه معاه ناس مهمين
وقعدت تتكلم معانا متخافوش ومش هتتفصلوا ولا حاجة هو بس هيتكلم معاكوا شوية وانتوا المفروض تخافوا على مستقبلكوا وتبعدوا عن المشاكل والكلام دا
بصراحة كلامها ريحنا شوية على الرغم انى كنت عارف انى مش هنفذه بس برضو حسيت ان الموضوع دا هيعدى على خير ان شاء الله
بعد ما يقرب من ساعة واحنا قاعدين فى مكتب السكرتارية
رن الهاتف اللى على مكتب السكرتارية
- ايوه يافندم
- الناس اللى متحولين مجلس تاديب من تجارة موجودين هنا يافندم
- تمام يافندم
موجهه كلامها لينا
- اتفضلوا خشوا للدكتور
- شكرا
طبعا احنا داخلين وبرضو مرعوبين
- السلاموا عليكوا
- وعليكم السلام اتفضلوا يا شباب
- شكرا يا دكتور
- بصوا علشان انا فعلا مش فاضى دلوقتى
انا اتكلمت مع دكتور احمد (العميد) وقولتله انكوا ولادنا وانكوا بس خدتكوا الحماسة وطلبت منه يلغى التحقيق بص بشرط انكوا تتعهدوا قدامى انكوا مش هتشاكلوا او تعتدوا على حد من الدكاترة
- والله يا دكتور احنا ماكلمناه خالص من ساعة اخر مره كنا عنده وحضرتك كان موجود
- مش انت منير؟؟
- ايوه يادكتور
- مش انت وقفت تهيج الطلاب ع الدكاترة وتقولهم اننا لازم نطلب بحقنا وفى ناس اعترضت عليك
- :o:o:o:o
- الاخبار كلها بتوصلى يابنى
- بس يادكتور .....
- خلاص ياحبيبى اهم حاجة تحترموا نفسكوا وتبطلوا مشاكل موافقين ولا حد عنده اعتراض
ساعتها اجبرنا اننا نحط لسانا فى بقنا ونتكتم ومن جوايا حاسس بقهرة على بلدى وعرفت فعلا معنى كلمة الظلم ومدى جبروت الحزب الواطى
وظلت النغمة المعتادة للعميد (انت الواد بتاع المشاكل)
وظلت نغمو الدفعة(منك لله يا منير وديتنا فى داهية)
وكان فى النهاية قصيدة اهداء الى الجامعة
يا جامعة بتزيدى همى
وكل يوم بتحرقى دمى
نفسى اعرف كان ايه ذنبى
كان كل منايا تحققى حلمى
وانى اتعلم كان كل املى
خليتينى لكل كتاب ارمى
وفى كل محاضرة منسى
دانتى نسيتينى حتى اسمى
اعمل ايه بقيتى نصيبى
ودايما مفلسة جيبى
اتمنى اليوم اللى ليا تسيبى
مريم السباعى. 19-10-2012, 03:08 PM روووووووووووووووووووووووووووووووووووعة يامنير
بجد اجبرتنا نستمتع بكل كلمة فيها ونتشوق
لمعرفة نهاية مشاكلك
بس مش تزعل يا منير
هو دة حال بلدنا لاسف
بنتمنى انه ينتهى على خير
دام ابداعك منير
مـــــلك 19-10-2012, 04:11 PM جميل اوي سردك لاحداث حقيقيه مريت بيها
وان شاء الله تتخرج منها على خير يارب
حقيقي تسلم إيدك يامنير
الأستاذة ام فيصل 20-10-2012, 02:54 PM ديما الذاكرة مليئه بالاحداث والمؤلمه ترسخ اكثر
عبرت باسلوبك الرائع والمشوق عن اساليب بعض الاساتذه البعدين عن رسالتهم الانسانيه ومع الاسف
دعواتي لك بالنجاح والموفقية
وبانتظار جديدك
تحياتي
نحلة المنتدى 24-10-2012, 12:37 AM -قالى وانت تعرف اللايحة منين ؟
حلو اوى الرد الى مش رد ده ههههههههههههه يا نهار اسود ده بيهرج
نحلة المنتدى 24-10-2012, 12:40 AM لان الدكتور خالف اللايحة ونزل كتاب بدون اذن الكلية(ايموشن نعم يادلعدى )
هههههههههههههههههههههههههههه هو لسه فاكر
اومال انت كنت بتتكلم ف ايه قبل كده
كمل كمل يا بنى ده انت غلبان اوى انا لو مكانك كنت علقته ف السقف
نحلة المنتدى 24-10-2012, 12:44 AM والله يا بيه انا مليش دعوة انتوا اللى اضحك عليكوا
لالالا دول زودوها اوى ايه ده
هههههههه حلو اوى الرد ده انت صبور اوى
نحلة المنتدى 24-10-2012, 12:48 AM هاااااااااار اسود ع العميد وسنينه السودا يا جدعان
ههههههههههههههههههههههههههههههههه والله عندك حق
بس عندى سؤال
انت قولت ديه جماعه بنها ؟
الله يكون ف العون ربنا معاك
وشكرا ع الموضوع الرااااااااااااااااااائع
نسيــــــم الجنـــــــــة 24-10-2012, 10:18 PM :):)
ســــــرد جميــــــل ومشــــــــــوق
بالتوفيق ان شاء الله
شيماء2000 25-10-2012, 12:31 AM تحفه يااستاز منير بجد جميله جدا وشدتنى انى اقراها كلها
تسلم ايدك
|