السلام عليكم ورحمة الله وبركاته

انا موضوعي طويل شويه فاستحملوني وياريت اللي عنده اجابه ليا يقولي اعمل ايه
انا بداية شغلي كانت سنة 2008 واشتغلت انا وزمايلي كمدرسن حاسب ألي وبعد كده بسنتين حصلت مشاكل في الاداره وقالوا ان قسم التطوير عندهم عجز فلازم مدرسين الحاسب الزياده يتحولوا تطوير اللي هما احنا طبعا
بالفعل نقولنا كأخصائيين تطوير تكنولوجي واحنا طبعا معندناش اي خبره بالموضوع ده ولغاية دلوقت فيه حاجات كتير منعرفهاش وانا اولهم طبعا
اللي كان بساعدني السنين اللي فاتت دي اني كنت باكون مع حد تاني عنده خبره فمكنتش بحس بمشاكل
المهم
السنه اللي فاتت الموجه قرر يعملي انتداب لمدرسه تانيه ثانوي صناعي بحجة ان المدرسه دي فاضيه مفيهاش حد في معملها هناك
وفعلا رحت المدرسه دي
ملقتش فيه معمل تطوير اصلا ولا المدرسه تعرف يعني ايه تطوير تكنولوجي والمدير قالي يعني انتي جايه هنا علشان الاحصاء
قعدت اشرحله طبيعة عملي ولقيت ان مش موجود في المدرسه كلها غير معمل الكمبيوتر اللي طبعا ما يخصنيش
وجهازين كمبيوتر في اوضة المدير
المهم بعت للموجه ان مفيش معمل موجود في المدرسه فبعت لجنه للمدرسه علشان تعمل معمل
راحت المدرسه واخده فصل وعامله عليه بوابه حديد فقط وقالولي هو ده معمل التطوير علي قد امكانيات المدرسه المدسه مفيهاش فلوس والشبابيك مكسره ومفيش فرش للارضيه ولا ستاير ولا اي شئ قلتلهم انا عاوزه شباك حديد علي الشبابيك قالولي احنا في الدور التالت مش مستاهله
واصلا كانت الميزانيه موجوده في المدرسه
واستلمت جهاز تليفزيون وريسيفر وفيديو
واللي مضي علي العهده امين المعمل
والسجلات بتاعتي كلها فاضيه علشان مفيش تشغيل والمدرسه طول السنه اللي فاتت والسنه دي مش عاوزين يعملولي جدول
علشان انا معنديش اشرطه تعليميه ولا اجهزه
بعدين جده الموجه قالي انتي مش بتشتغلي وشغلك مش مظبوط وقال ان فيه جداول لازم تتعلق وانتي مش عملاهم

امبارح بس انا اخدت الجدول اللي المدرسه عملتهولي بواقع 42 حصه وعل شرط انها متوزعه علي خمس مواد فقط مش عارفه ده بقي صح ولا غلط

مشكلتي بقي اللي انا حاسه اني هاروح فيها في داهيه
ان انالما روحت المدرسه دي كانت العهده دي مع امين معمل تاني وقالي ان الفيديو عطلان
ولما استلم امين المعمل اللي موجود دلوقت قالي نفس الكلام
وطبعا مفيش كبلات ولا كان فيه كهربا اصلا علشان اتاكد من العطل فاخدت بكلامهم
وبعت اربع بلاغات اعطال بس محدش جه يشوف العطل

لما الموجه جه وانا ما كنتش في المدرسه لقي وش الفيديو مخلوع فقال لو جات لجنه او حد من الصيانه ولقي الفيديو بالحاله دي اخصائي التطوير هو اللي هيروح في داهيه مع ان انا ما استلمت عهده ولا مضيت علي حاجه
راح امين المعمل واخد الفيديو بالاتفاق مع ادارة المدرسه وراح موديه خارج المدرسه يتصلح
وقالي النهارده في المدرسه لما رحت
الفيديو اشتغل
طيب يا سيدي اشتغل ازي
انا رحت صلحته
طيب فين الورق اللي الفيديو طلع بيه من المدرسه واتصلح بيه واتصلح فين
قالي احنا صلحناه ودي كده وبالاتفاق مع الموجه
قلتله طيب وبلاغات الاعطال اللي انا بعتها انا اعمل فيها ايه دلوقت

طبعا الاداره شعارها الصمت
وطول النهار وانا محروق دمي ومش عارفه اعمل ايه


انا عارفه طولت عليكوا جدا بس ارجوكم فيدوني ارجوكم
مش مستحمله يتحقق معايا تاني وانا اصلا المره الاولانيه اخدت جزا تعسفي

بسم الله الرحمن الرحيم

الأول : ومبدئيا وقبل كل شئ حضرتك بتقولى ما استلمتش عهدة المعمل ولا مضيت على حاجة .. طب حاليا عهدة المعمل فين ؟؟ ومين ال ماضى عليها ؟

ثانى حاجة : لو ها تستلمى العهدة ما تعتمديش على محاضر الإستلام ال قبل كدا اعتمدى على دفتر العهد ال موجود مع أمين توريدات المدرسة ... واعملى محضر إستلام بالأجهزة والسجلات الموجودة ... وفرضا لو فيه جهاز فيه مشكلة أو عطلان مثلا اذكرى دا فى محضر الإستلام علشان تحمى نفسك .

ثالثا : المفروض ما كنتى بعتى بلاغ اعطال اصلا للجهاز طالما انتى مش ماضية على العهدة لأنه فرضا الجهاز ضاع ولا جراله حاجة ... وقتها ها تنسب ليكى عهدة المعمل وها يسألوكى منين مش مستلمة العهدة ومنين باعته بلاغ أعطال

باختصار شديد احمى نفسك بالآتى

1 - إستلام العهدة كاملة وبحالتها الموجودة أثناء الاستلام من واقع دفتر العهد المستديمة ال مع أمين التوريدات .

2 - اتأكدى ان الفيديو بيعمل بكفاءة قبل ما تستلميه ... ولو التطوير جالك علشان يصلح الجهاز قوليله أمين المعمل السابق صلحه بمعرفته ( ما تقوليش انه صلحه بره ) وهم بقى يسالوه صلحه فين.... على فكرة طالما الفيديو شغال كويس مش مهم اتصلح فين .

3 - خدى صورة من محضر استلام العهدة وخليها معاكى

============================================

اعتقد فى كل ال قلتيه مفيش اى مسئولية قانوينة عليكى .... إلا اذا كنتى استلمتى عهدة المعمل وفيها اجهزة مش شغالة او فيها مشاكل وما ثبتيش دا فى محضر الاستلام