مشاهدة النسخة كاملة : لان انا مبسوط


دموع الروح
19-12-2012, 08:55 PM
إشتري علبة شوكولاتة مستوردة غالية و كلها. بص على بنت حلوة و إعرف أنها لو عرفتك كويس أكيد هتحبك. إلعب لعبة مالعبتهاش من و إنت صغير. إعرق و إنهج و حس إنك عايش. إطفي نور أودتك شغل التكييف إسمع أكثر مزيكا بتحبها و إسرح معاها.
بص لأهلك و عرفهم قد إيه بتحبهم.
بص للي تحتك و إعرف قيمة كل حاجة معاك.
بص للي فوقيك و إعرف إن رغبتك إنك تبقى زيهم هي اللي مدية طعم لحياتك.
إستمتع بشمس الصيف.. بصلها و قولها إنك مش كارهها.. حتى لو عرقتك و لزقتك..
روح أقعد على البحر.. دخل رجليك في الرمل.. و خرجها.. بطل تفكير.. و إبدأ حس..
في الشتا إنزل تحت البطانية و حط كوباية الشوكولاتة السخنة جمبك.. إبتسم و غمض عينيك و نام.
إشتغل لحد ما تحس إنك مت.. نام ثاني و إشحن و روح موت نفسك ثاني.. وإعرف إنك زودت حاجة للدنيا ماحدش كان هيزودها غيرك.
إعرف إنك كائن مهم و في كل لحظة بتغير إتجاه التاريخ.
بص لشحات واقف جمبك.. ماتديلوش ولا نكلة.. بس سلم عليه و إضحكله و قوله “عامل إيه؟ تمام؟”
سلم على واحد صاحبك و خدوا بالحضن.. و زود مدة الحضن ثانية زيادة.. هتقوله حاجات كثير.. – بس إتأكد إن نيته سليمة و إنه عارف إنك “مستقيم” –
بص لبنت مغرورة و إضحك من جواك.
بص لبنت وحشة و عاكسها بنظراتك و إعرف إنها هترجع البيت مبسوطة.
بدون سبب إبعت رسالة لأي حد بتحبه قوله حاجة حلوة.
إفتح شباك العربية و إطلع على طريق سريع خلي الهوا “يطس” في وشك.. صرخ.. بس إتأكد إنك مش داخل على لجنة و إنك لوحدك و مافيش حد تعرفه في العربيات اللي حوليك.
إضربها جزمة.
خلى اللي يكره يكره و اللي يشتم يشتم وإعرف إنهم مضيعين وقتهم.
إتأكد إنك لو عارف إنك هتموت بكرة هتعمل نفس اللي بتعمله دلوقتي.
حب جامد قوي حتى لو حبك مش هيستمر لحد بليل.
كل أكلة حلوة قوي.. بس ماتخليهاش تشبعك.
إشرب مشروب دخلت المطبخ و إخترعته و لو ماعجبكش إرميه في الحوض و إنزل إشرب حاجة ثانية بتحبها.

أكسب نفسك و حب حد بيكرهك.
إكسب نفسك ثاني و حب حد بتكرهه.
إكسب نفسك ثاني و إنسى حد لسه بتحبه من غير ما تكرهه.
إتفرج على ماتش كورة لفرقتين ماتعرفهمش و شجع واحد فيهم قوي.. قوي.. حتى لو كان بيلعب زي الزمالك.
إنزل شجع مع الزملكاوية لما يكسبوا.. حتى لو إنت مش زملكاوي.
إقرا الكلام ده من غير ماتعلق عليه و لو مش عاجبك بطل قراية.

لما تقابل واحد مش فاكر إسمه و مش بتسلم عليه عادة خده بالحضن و قوله واحشني جدا يا معلم..
إقرا كتاب عن موضوع معقد مانتاش فاهمة و بعدها إنزل مع صحابك.. هتتبسط قوي.
جرب أكلة جديدة في مطعم فخم.. ثمنها يخرب بيتك.. و روح و إنت مبسوط.

إلبس أحلى لبس عندك و إنزل إمشي في الشارع و إنت فارد ظهرك.. و ماتحطش إيديك في جيبك خليهم أحرار.
إشتري ورد لواحدة تعرفها عادي.. و قولها أصلك زي أختي و بعزك قوي.. هتتجنن.
إرقص حتى لو في أودتك و إنت قافلها بالمفتاح.. ممكن تغني كمان و إنت ماسك الفرشة على إنها ميكروفون.
إفتكر قبل ما تنام كل الكلام الحلو اللي سمعت الناس بتقوله عنك.
كل ما تلاقي حد بيحكي عن مشكلة دورله عن الجانب المشرق فيها.. مهما كانت عويصة.. طلعله فيها فوايد و باركله.
كل ما حد يقولك إزيك عامل إيه؟ قوله الحمد لله مبسوط قوي.. قولها بسرعة من غير ماتفكر و إبتسم.. لوحدك هتتبسط فعلا.
شوف إيه أكبر مشكلة في حياتك.. فكر في أسوأ حاجة ممكن تحصل بسببها و هتلاقيها مش هتموتك و هتفضل برضه في الآخر فوق الأرض مش تحتها و إن الدنيا هتمشي و إحمد ربنا.
فكر في الموت كويس.. و إعرف إنه لسة ماجاش و إعرف إنه قبل ما ييجي لازم تعمل كل اللي نفسك فيه.. و لازم تتبسط و ماتضيعش لحظة مدايق مهما كان السبب.
سافر حتة ماروحتهاش قبل كده.. صورها و صور نفسك فيها.. صلي فيها.. أو بوس أرضها.. أو خد منها تذكار و إرجع ثاني نام على سريرك و عرفه إنه وحشك.
إستحمى في نص ساعة.. خلى المية تنزل على وشك و إسمع صوتها كويس.
جيب لنفسك هدية و إستنى لحد عيد ميلادك و إديها لنفسك.
جيب هدية لحد بتحبه من غير مناسبة.. و إديهاله في عدم إهتمام كأنك ماعملتش حاجة غريبة.
إنزل من بيتك بشبشب و شورت من غير ماتسرح شعرك.. و إتأكد من جواك إنه عادي جدا.. أنا مش مهتم.. و خليك واثق من نفسك.
إشرب مية كثير.
ماتغضبش مهما حصل.
أشكر كل الناس بسبب و من غير سبب.
لو حد إتريق عليك إضحك.. حتى لو من جواك بتضحك عليه.
لو حد شتمك حط ده في تانك البنزين بتاعك علشان يبقى طاقة تحركك لقدام.
لو الناس بعدت عنك إعرف لأنكم مش زي بعض.. لا هما وحشين و لا إنت وحش.. إنتم بس مش زي بعض.. و إتبسط إنك مش بتضيع وقتك معاهم.
لو لقيت نفسك لوحدك شوية ده معناه إنك فريد و نادر من نوعك.. و مين في الدنيا يقول إن نوعك غلط أو وحش.. بس إنت تقدر تتأكد إن ده النوع المناسب ليك.. و إتبسط بيه.. و لو نفسك تغيره غيره.. مافيش حاجة بتلزق حتى إسمك و دينك.
بص لإمبارح.. و شوف إتعلمت منه قد إيه..
خطط لبكره بس إوعى تخاف منه .. إزاي تخاف من حاجة إنت اللي بتبنيها أصلا.. حاجة لسة ماحصلتش و ماحدش في الدنيا يقدر يعرف إيه اللي هيحصل فيها..غير ربنا
إستمتع بالنهاردة كويس.. لأن كل نهاردة هيبقى إمبارح بتاع بكرة زي ما كان بكرة بتاع إمبارح..

لما حد يحكيلك حاجة مملة علشان يبين مواهبه في الحياة إعمل نفسك متهم آخر حاجة و لما يخلص إعمل نفسك منبهر آخر حاجة برضه.. و كمان إسأله عن تكملة الحكاية.. بس ماتعملش كده كثير.. مرة كل فين و فين..
إفتكر أيام لما كنت بتصحى بدري علشان المدرسة.. و لما كنت بتذاكر فيزيا أو تاريخ.. و أهلك مانعينك من النزول و إتبسط إن ده كله خلص و مش راجع ثاني.
إتبسط.. و لو مش عايز تتبسط.. مش هتعرف تعكنن عليا.
لإن أنا مبسوط.

2( ESRAA )
19-12-2012, 09:27 PM
.

إنزل شجع مع الزملكاوية لما يكسبوا.. حتى لو إنت مش زملكاوي.
إقرا الكلام ده من غير ماتعلق عليه و لو مش عاجبك بطل قراية.





أنا أهلوية بس هعلّق:p
بجد توبيك جمييييل جداااااااا
بس ابقي كبّري الخط شوية انا عيني زغللت:blink:

mfa1
19-12-2012, 09:41 PM
بصراحه موضوع جميل و فيه كل فلسفة الحياه الجميلة و عصارة خبرات السنين و اللي يقدر يطبق الكلام الغالي دا يكون فعلاً موفق و تكون لها تأثير إيجابي كبير جدا على حياته بجميع نواحيها ال( العمل و المجتمع و الأسرة ) و كل شيء
موضوع موفق بارك الله فيكي

M..osama
20-12-2012, 06:41 AM
موضوع جميل ورائع حقا

يطلق عنان الحرية لتستمر السعادة

يطرد طريق الحزن للأبد

ولكنه يحتاج بشر من نوع خاص

ومن يمتلك تلك الطاقة والطموح والقدرة الهائلة

نقول له هنيئا لك بتلك السعادة

سلمت يداك على نصائحك الغالية

وأسعدك الله فى الحياة وحقق كل لك كل ما تتمنى

تقبلى مرورى

دموع الروح
20-12-2012, 08:43 PM
أنا أهلوية بس هعلّق:p

بجد توبيك جمييييل جداااااااا
بس ابقي كبّري الخط شوية انا عيني زغللت:blink:



الف سلامه على عنيكى يا قمر
بس مستر اسامه قام هو بالمهمه
مش لوحدك والله
انا برده اهلويه
بس الحمد لله مفيش تعصب
نورتى

دموع الروح
20-12-2012, 08:45 PM
بصراحه موضوع جميل و فيه كل فلسفة الحياه الجميلة و عصارة خبرات السنين و اللي يقدر يطبق الكلام الغالي دا يكون فعلاً موفق و تكون لها تأثير إيجابي كبير جدا على حياته بجميع نواحيها ال( العمل و المجتمع و الأسرة ) و كل شيء

موضوع موفق بارك الله فيكي

يارب نقدر نوفق فى حياتنا
شرفنى مرورك الكريم

دموع الروح
20-12-2012, 08:47 PM
موضوع جميل ورائع حقا



يطلق عنان الحرية لتستمر السعادة

يطرد طريق الحزن للأبد

ولكنه يحتاج بشر من نوع خاص

ومن يمتلك تلك الطاقة والطموح والقدرة الهائلة

نقول له هنيئا لك بتلك السعادة

سلمت يداك على نصائحك الغالية

وأسعدك الله فى الحياة وحقق كل لك كل ما تتمنى


تقبلى مرورى


اولا/ شكرا يا مستر على تكبير الخط
ثانيا /اسعدنى مرورك الكريم

Yes We Can
20-12-2012, 09:15 PM
توبيكـ جميل جدا جدا جدا جدا
و بجـد فيه حاجات فوق الرائعه و ساعات بنعملهـا كتير
احييكـى عـ التوبيك ده
و احييكـى على ثقافتك و تفائـلك للحيـاه و لبكره
اكتر جمله عجبتنـى جدا
" إستمتع بالنهاردة كويس.. لأن كل نهاردة هيبقى إمبارح بتاع بكرة زي ما كان بكرة بتاع إمبارح.. "
تقبلـى مرورى :)

To Be Is To Do
23-12-2012, 05:31 PM
بــ صراحه
تحيه كبيره جدا جدا جدا جدا جدا ...
بجد بجد موضوع قمه فى الروعه والجمال
جزاكِ الله خيرا على كل حرف كتبتيه وفرّح حد لما قراه
الصراحه أنا مش عاف أرد بــ إيه لإنى فعلا منبهر ب التوبيك القيّم ده
تحياتى لــ حضرتك ..... شكرا جزيلا على روعه الكلام :022yb4: