السلام عليكم
أود أن أسال عن حكم اللى يتأخر 5 دقائق او 10 دقائق عن ميعاد العمل بالمدرسة ؟ أنا روحت المدرسة النهارده 8 وخمس دقائق . لقيت المدير شايل الدفتر فى المكتب وبعد ما وصلت طلعوه وقفل عليه . أنا طبعا أخدت نفسى ورجعت للمنزل . هل ما فعلته صحيح او ان المفروض انى اوقع فى دفتر تأخير ولا إيه بالظبط؟
أفيدونى أفادكم الله وشكراً

على حد علمى حضرتك ليك ربع ساعة تاخير واربع مرات بيوم عارضة

كنت سالت هو شطب عليك ولا هتمضى فى دفتر التاخير لانه من حقك التاخير ويومين تاخير بيوم اجازة عارضة كدة انت اتعملك عارضة مع انها كانت ممكن ترسى على تاخير او يروق ويطلع الدفتر وتمضى بلاش تاخد الامور قفش وتمشى على طول خلى بالك طويل

لو كملت 60 دقيقة تاخير فى الشهر الواحد تحسب يوم عارضة بسسس

على حد علمى
حضرتك ليك كامل الحق انك تمضى فى التأخير وكل 120 دقيقة تأخير تحسب يوم عارضة

من حقك تتاخر لغاية نصف ساعة يعنى لغاية 8 ونصف وتمضى تاخير وكل 120 دقيقة بيوم ....انت غلطان انك روحت .....غصب عنه كنت عتمضى ولو رفض روح الادارة امضى هناك وممكن تعمله محضر فى القسم انه رفض يخليك تمضى ده لو عاوز تادبه ويحرم يعملها مع حد من زمايلك .....بس الظاهر هو عمل كده عشان عارف محدش عيصده ......انا بهدى النفوس ......ههههههههه

ههههههههههههههههههههههههههه

شكرا على ردودكم الجميلة ربنا يخليكم ويبارك لكم . بس فى حاجة انا مقلتهاش فى السؤال أنا على فكرة كان عندى الحصة الأولى وبسمع ان معلمى الحصة الأولى لايجوز لهم التأخير .فهل هذا صحيح؟ وشكراً .

كدة بقى تفرق لان مدرس الحصة الاول المفروض يكون حاضر الطابور وواقف ادام فصله فى الطابور

طيب ولما يكون التأخير من ربع او ثلث مدرسين المدرسه يطبق نفس القانون بالاحقيه فى التوقيع فى الدفتر

ما تفرقش الحصة الاولى او التانية انت ليك حق فى التاخير بصرقف النظر وبعدين ما انت عتلحق الحصة الاولى حتى لو اتاخرت 15 دقيقة

يعنى ما حد جاوبنى اعرف ان اكتر من ربع اعضاء التدريس بالمدرسه تأخير او غياب يترتب عليه تحقيق

انا ستأكلم عن كيفية معالجة الوضع تربويا
الافضل لو حضرتك حضرت الي المدرسة متأخر وبالاخص لو حضرتك ليست من عادتك التأخير فعليك باتباع الاتي
1- حاول ان لا تسأل عن الدفتر وتعتبر نفسك وكأنك مضيت في معادك بالضبط
2- اطلع علي الفصل واشتغل مع الفصل ولابد ان يكون تحضيرك جاهز وتمام
3- لا تسأل احد الزملاء هل مضي ليا المدير ولا لأ لا ن هذا الامر سيثير حفيظتك وبالاخص من بعض الزملاء
4- لو تأكد ان المدير قفل عليك فعلا لا تغضب وتترك المدرسة وتروح
5- بعد انتهاء اليوم الدراسي لا تحاول ان تسأل عن الدفتر وتقول انا عاوز امضي انصراف
6- لو تبين لك في اليوم الثاني ان المدير قفل عليك لا تفتح هذا الموضوع مرة اخري لانك ستشتبك معه
وبذلك تكون تركت اثر حسن عند المدير ولن يقفل عليك مرة اخري وسوف يعوض لك هذا اليوم بطريقة اخري دون ان تعلم
وهذا عن تجربة مع مدير مدرستي وهو انسان في غاية الانضباط وفي النهاية ادعو الاخوة المدرسين الي الابتعاد عن ما يعكر صفو العلاقة بينك وبين مدير المدرسة او مع اي عضو بالمدرسة حتي لا ينعكس ذلك علي الطلبة داخل الفصل وتحدث امور لا يُحمد عقباها

شكراً جزيلاً