المعهد بتاعنا هيتقسم - وسيتم فصل الإعدادي عن الثانوي - مع فصل الإدارة ومن هنا يأتي السؤال -

أيهم تفضل عزيزي المدرس أن تكون مدرسا بالمرحلة الإعدادية أم بالمرحلة الثانوية - ولماذا
ياريت كل واحد يقول بيفضل إيه بالضبط ، مع ذكر الأسباب - وشكرا

يااخى انت فى الازهر كله عايم فى مية البطيخ الازهر لايقدر عالم ولاغيره يعنى ممكن تكون صاحب اعلى الشهادات وحقك ضائع ولا يفرق معاهم تقديرك ولا امتى حصلت عى هذه الشهادات ولا كفاءه فى العمل ولا اى شى كل اللى يهمهم امتى يرنوا جرس نهاية اليوم ازاى يزوغوا من الحصص واليوم اللى هيوصل فيه /المرتب/ البدل / الحوافز /شهر الشيخ /وغيره وكتير وكفايه كده علشان تعبت من هذه المؤسسه الفاسده .

المرحلة الاعدادية بتتميز ان الطلبة بيحضروا اكبر وقت ممكن عن المرحلة الثانوية .... يعني فيه شغل ومادتك العلمية ما بتضعش بعكس المرحلة الثانوية مدرسينها نسوا المنهج من قلة حضور الطلبة ... وانا كلامي عن معاهد البنين

ميزة الاعدادى انى بستمتع بعملى اكتر وبحصد نتيجة تعبى بشكل اكبر وفرصتى بتكون احسن فى تأصيل المادة العلمية فى دماغ التلاميذ وسير الدرس بيبقى محكوم جوة الفصل والطلبة نفسها بيكون عندها دافع للتحصيل ومقبلين على التعلم اكتر من الثانوى لصغر سنهم النسبى ولان اهتماماتهم مش كتير يعنى لسه عجينة سهلة التشكيل

اما الثانوى فميزته ان الطلبة دماغهم كبرت وحسوا بكيانهم اكتر وبيكون فى مساحة كبيرة للتفاهم والنقاش والتواصل بلغة مشتركة يعنى مفيش وجع قلب فى السيطرة على الصف وشد الانتباه لمحتوى الدرس فى مقابل ان نتائج التعلم عشان تكون مرضية بتحتاج جهد اكبر واساليب تدريس متنوعة من المعلم واحتواء لعقلية الطالب وتفهم لنفسيته وادماجه فى عملية التعلم بمعنى رمى الكورة فى ملعبه دايما واشعاره انه هو نجم الحفلة وبالتالى عليه مسئوليات كتير لازم يكون قدها

لو بتحب البناء والتأسيس ونمط اتباع القواعد خليك مع الاعدادى
اما لو بتحب المغامرة والتجريب والتحدى خليك مع الثانوى

أنا أفضل الثانوى لأن المادة العلمية تدفعك للاطلاع المستمر
وعلى فكرة أنا مدرس فى معهد فتيات ع /ث وبدرس للمرحلتين

انا لا احب العمل فى الازهر لا اعدادى ولا ثانوى وكلامى على معاهد البنين اما معاهد الفتيات فالعمل فى المرحلة الثانوية الافضل لكنه متعب اكثر ومحتاج مدرس يكون سريع البديهة ومش عصبى لكن على قدر ماتعمل تنال ثمرة تعبك