قصة حياتي [الأرشيف] - بوابة الثانوية العامة المصرية

Last Fantasy

29-06-2008, 02:47 PM

بسم الله الرحمن الرحيم

أنا بقي حبدأ بمرحلة الطفولة أنا بقي من مواليد مصر - البحيرة - إيتاي البارود

وليا 3 إخوات بنات (سمية وسندس وسارة )

أنا عندي 18 سنه 3 ثانوي
سمية 19 2صيدلة
سندس 13 سنه 2 إعدادي
ساره 8 سنين 2 إبتدائي
عمار ( الله يرحمه ) توفي
والدي مدرس إبتدائي
والدتي ربة بيت

أنا بقي حكايتي تبدأ من أول موالدي ووالدتي إتجوزا وسافروا اليمن والحمد لله العيشة كانت مستريحة
بعد كده ولدوا أخويا وأختي التوأم ( سمية وعمار ) وبعدين نزلوا بعدها بسنة مصر وأمي كانت حامل فيا
وهيا نزلة الكلام دا كان سنة 1989 المهم نزلوا بقي سنة 1990 وجيت أنا جيت أنا من هنا وبابا سافر السعودية
من هنا وبرضوا ولله الحمد كانت عشتنا مستريحة لحد كده تمام وعايشين تمام جات أختي سندس في 1995
وكنا سعداء برضوا وكلوا تمام ولحد سنة 2001 جات أختي سارة وتبدأ قصتي بقي اللي حكملها بعدين

مستني الردود وايه رأيكوا

روتاج

30-06-2008, 12:36 AM

ماشى وبعدييييييييييييييييييين.......................

Last Fantasy

30-06-2008, 03:06 AM

تبدأ بقي شق حياتي الصعب بعد كل ده بقي حصل شوية مشاكل بين والدي ووالدتي أدت إلي أن قررا إن والدي
ينزل نهائي لمصر بعد ما ضمن حياتنا إنوا إشترك في بنزينة مع 2 إصحابه و وكان ليه عند واحد صحبوا 330 الف
يعني كان كده ونبقي تمام المهم والدي نزل بعديها علطول مشروع البنزينة فشل علشان الناس كانت بتشكك
ومبيدفعوش المهم قفلت قلنا عوضنا علي الله والدي راح يطالب الراجل ده بالفلوس ( بتاع الـ 330 الف ) طلعت
مشكلة جديد الراجل قللوا دا الفلوس اللي أخدتها منك كلها خسرت والراجل بيتوا إتخرب وإحنا كمان فوالدي بعد المحن دي كلها رجع التعليم وإشتغل مدرس تاني ده ملخص حياة بابا وماما أنا بقي حبقي بعدين

مستني الردود

Nemo_92

30-06-2008, 09:48 AM

وبعدين !! كملى انا مستنية

emy_alex

30-06-2008, 03:52 PM

كملى مسنينينك كلنا تكملى ياللاتشجعى وقولى

ahmed anwer

30-06-2008, 08:22 PM

كمل انا متابعك

Last Fantasy

01-07-2008, 03:30 AM

بسم الله الرحمن الرحيم

يا جماعه أنا ولد وإسمي محمد معرفش مين اللي طلع الإشاعة دي وقالي إني بنت

المهم :
المهم بقي بعد موالدي رجع مدرس أنا جات سنة 2003 تقريبا شهر مارس توفي أخوي عمار ( اللي معرفتش قيمته غير بعد ما مات ) جات بقي الظروف المادية تسوء فكنت بضطر إني أشتغل فالحمد لله بعرف في الكمبيوتر كويس فرحت أشتغل في مطروح وتبدا حكايتي من هنا حعملها علي مراحل مرحلة الشغل في المصيف وبعدين حكاية تأجيلي وبعدين حكايتي مع البنات وبعدين حكاية أخواتي

ونبدأ بفترة المصيف :
جيت وأنا في صيف تانيه ثانوي بتاع سنة التأجيل حبيت أروح عند خالتي في مطروح أشتغل علشان أعرف أجيب لبس حلو علشان أنا يعني جمب زملاتي ماشاء الله حالتهم المادية مستريحة فكنت لازم أظهر بمظهر لائق بس برضوا مش علي حساب والدي فرحت أشتغل فأنا مبحبش من صغري إن حد يقولي كلمة صغيرة تجرحني فالحمد لله أنا بعرف في الكمبيوتر كويس جدا فرحت أدور في السنترالات علي حد عنده كمبيوتر علشان دي المهنة الوحيدة اللي محدش يقدر يزعلني أو يقلي كلمة فيها لأني أعرف في الشغلة دي أكتر من أي حد في مطروح دا غير إنهم عرب يعني أكتر من الفلاحين المهم هما مشهورين بالكرم بس في نفس الوقت عندهم خبث اليهود المهم رحت قعدت صيفت عند إبن خالتي أسبوع وقلت بقي لازم أشتغل رحت أدور علي شغل ملقتش يعني أروح سوق ليبيا إبن خالتي يقللي حتشتغل بياع فكنت أرفض قلتله تعالي نروح السيبرات قللي ماشي لقيناها كلها محجوزه يعني في ناس شغالة فقللي في شغلانه سهله قوي قللي حتشتغل علي ثلاجه بتاعت عصير قلتله لا ففضلنا ندور ملقناش أضطريت أقعد علي التلاجه قعدت فيها يوم واحد وراح الراجل جايب عيل معاه تاني يوم قلي مش حتنفع علي قد ما زعلت من الموقف بس فرحت المهم تنيت أدور علي سنترالات لحد ملقيت الراجل العرباوي ده فقلي عاوزين واحد علي كمبيوتر قلتله دا لعبتي قلتله علي كام قللي علي عشرة في اليوم وعلي فكرة دول شوية خالص بس قبلت غصب عني لأنه كان مفكرني جاهل المهم مكنتش أعرف موال الموبيلات دا خالص المهم رحت بعد السهرة علي الكورنيش زوغت من ولاد خالتي ورحت أجرت ساعة نت عرفت موال الموبيلات دا من أوله لاخره في النوكيا بس المهم رحت شفت شرح البرنامج بتاع النغمات ورحت منزل كام ثيم علي كام برنامج 6600 ورحت رايحلوا تاني يوم لقيت العملية سهلة إشتغلت يومين لقيتنه موسم والراجل ماشاء الله بقبضه فقلتله يزودني رفض رحت قلتله خلاص أنا حنزل بلدنا ودا أخري هنا لمهم من هنا لهنا سويناها علي 12 وأكل وشرب المهم جينا لمشكلة تانية الراجل عايزني أصحي من 8 الصبح لحد 12 بالليل رحت عمله يومين بـ 300 جنيه شغل يعني مظبطه أحلي تظبيط وبقيت أجي الساعه 12 الظهر وأمشي 12 باليل جه زعقلي أهو أنا بقي قاعد ألك علشان الحته دي ساعتها تظهر نقطة القوة ليكي قلتله أنا كده واللي عجبه عجبوا وقلتله أنا جبتلك 300 جنيه في يومين يعني ملكش حاجه عندي

ثبته من بعدها وبقيت ماشي علي مزاجي وكله تمام وبقيت أخد زيادات في الشغل وبقت العمليه 100 فل وعشره

مستني الردود والحكاية الباقية بعدين

متنسوش أنا محمد

Last Fantasy

01-07-2008, 02:31 PM

مفيش تشجيع

روتاج

01-07-2008, 02:52 PM

معاك كمل سمعينك

بندق__2007

01-07-2008, 03:49 PM

جميل اوى و مثال لشاب مصرى جدع بجد

ربنا يوفقك و يكتر من امثالك و هتستفيد خبرة فى الحياة اكبر من الاستفادة المادية

ربنا معاك يا باشا

و سلملى على صخرة العشاق

eng/yasmeen

01-07-2008, 03:55 PM

كمل فين الباقى!!!

Last Fantasy

02-07-2008, 04:46 AM

بسم الله الرحمن الرحيم

حكاية التأجيل ( حكاية الدراسة )

أنا بقي كنت مضيع خالص بسبب لعبة زفت رود ( Silkroad Online ) المهم اللعبه دي باختصار تحتاج علي الاقل 8 ساعات في اليوم المهم ضعت خالص وأنا علشان مينفعش اخد فلوس من والدي استغليت خبرتي في الكمبيوتر وعملتها زي نظام مصالح رحت السيبرات مثلا أعملهم صيانة وبعدين أقعد عندهم ببلاش المهم مشيت علي كده وبابا وماما يأسوا فسابولي الحبل علي الغارب المهم رحت مضيع خالص لحد مبقي فاضل شهرين علي الامتحان ومبرحش دروس ولا بحضر في مدرسه ( اللي مش إسمها مدرسه أصلا ممكن تكون أقرب لقهوة ) رحت بعد كده قلت أيه أشد حيلي الشهرين دول بس برضوا مينفعش محضرتش غير حصتين في الرياضه وكنت باخد طراطيش في الفرنساوي يعني كل شهر حصتين بكتيروا والانجليزي مكنش مشكلة بالنسبه ليا لأني بكلم أجانب كتير والكيمياء هيا أساس المشكلة بابا قلي خد فيها درس خصوصي اخر شهرين قلتله ماشي رحت حضرت بس برضوا معرفتش ألمها فبابا قلي لازم تأجل قلتله خلاص يبقي أاجل كيمياء لوحدها واخدها معي فيزياء ورياضه قللي مينفعش سألته ليه قلي دا واحد صاحبه شغال في الادارة قله مينفعش أاجل أقل من مادتين فشكل الراجل يقصد ماديتن علشان أعيد السنه المهم إتخنقت فمذكرتش وبقيت ممشيها بركاوي فرحت إمتحان الفرنساوي والمذكره التانيه ضايعة اللي هيا من الدرس 12 للدرس 16 يعني نص القواعد معرفش فيه حاجه و الانجليزي عديت فيه بالعافية والـرياضة دي بقي اللي سقطت فيها بسبب أستاذ الله يسامحه المهم حكاية الرياضه دي إني محضرتش في المنهج غير حصتين فبنت خالتي ماشاء الله حالتهم متيسرة فخدت اخر يومين درس عنده فرحت معاها فوق البيعه علشان جارنا وكده المهم حاولت ألمها يعني إن شاء الله حتي معرفه سطحية المهم شديتي حيلي في اخر يوم فكان فيه درسيم معرفش عنهم حاجه خالص فقلتله يا أستاذ أنا محضرتش الدرسين دول قلي مبيجوش في امتحانات فقلت مش مشكلة مش حتقف عليهم المشكله ان الدرسين دول جيهم وكان عليهم 4 درجات السبب التاني بقي ان فيه واد جارنا ماحللوش لعب كره غير يوم امتحان الرياضه وتحت الشباك بتاعي فهبد في المحلات اللي تحتنا معرفتش أنام وسمعت بعد كده أنه كان قاصد يصحيني أنا المهم يوميها طبقت لقيت نفسي بخرق في الامتحان للدرجة إن فيه سؤال أنا فكر بيقول تلت في نص = صفر أنا عملتها بتلت وعلي فكرة الولد ده مسكته بعد الامتحان تريقه لحد مخليتوا يعيط وكان حيعملها السنه دي رحت لوالده قلتله لو إبنك عمل الحركه دي تاني حخطفه وحدفنه بس الولد عقل يعني وعلي فكره أنا مش ببحث عن مبررات أنا بحكي حكايتي علشان تستفيدوا من أخطائي بس الحمد لله بعد ما أجلت ربن هداني ومبقتش ألعب اللعبه خالص وبقيت أذاكر وعلي فكرة الناس اللي بتلعب وبيحاول يوهم نفسه إن اللعبه دي هتكسبه مفيش غير رد واحد اللعبة دي مينفعش يلعبها غير أصحاب السيبرات غير كده خراب بيوت وعمرك متكسب من وراها حاجه غير الفشل المحتم

علي فكره أنا حطيت صورتي اللي عايز يشوفني

Last Fantasy

02-07-2008, 04:51 AM

نسيت أحط درجاتي

الفرنساوي 45.5 من 50
الانجليزي 23.5 من 25
الرياضه 41.5 من 50

MohammeD el_SadaT

02-07-2008, 05:34 AM

كمل يا محمد كلنا سامعين
بجد مش هتصدق
لو قلتلك
إن وأنا بقرأ كلامك بحس إنى معاك فى كل خطوه كنت بتخطيها

Last Fantasy

02-07-2008, 03:05 PM

متشكر قوي وربنا يخليكوا ليا يا رب

raghda1100

02-07-2008, 07:38 PM

قصة حلوة اوى

و مستنيينك تكمل

Last Fantasy

02-07-2008, 07:59 PM

ايه يا جماعه عايزين تعليقات يعني مثلا حاجه أنا عملتها غلط وكان لازم أعملها بطريقه تانيه علشان كلوا يستفيد أنا عامل الموضوع أساسا علشان تعلقوا علي الحكاية

مشتاقة لربى

03-07-2008, 02:22 PM

كمل كمل
علشان خاطرى

arabSquad

03-07-2008, 06:24 PM

فكره حلوه , كمل كمل !

Last Fantasy

04-07-2008, 05:16 PM

متشكر يا جماعه قوي علي تشجيعكم وإن شاء الله أكمل البارت الرابع بالليل علشان أنا مش فاضي دلوقتي وأنا اسف والله مش بإيدي

مشتاقة لربى

04-07-2008, 06:16 PM

مستنييك يا محمد

Last Fantasy

05-07-2008, 02:32 AM

بسم الله الرحمن الرحيم

بارت 4 : حكايات قطاقيط

أنا بقي حكايتي مع البنات والله عمري في حياتي مكلمت بنت غير في حدود الأدب وكمان معتقدش إن حصل حتي في حدود الأدب يعني لما أمي بتطلب مني أنده لبنت خالي بنت خالتي لكن بنتا عمامي فلاحين وعارفين عمر ما حاجه تحصل بنا فبتكلم عادي لكن عيلة أمي ماشاء الله هيا اللي وكلة الجو وعلي الرغم إن كل بنات خالي جمال إلا من رحم ربي بس محصلش حاجه وفي مرة كنت معجب بواحده من بنات خالي وكنت قررت إني أكلمها متجرأتش وبعدين نسيت يعني بقت عادي جدا يعني الحمد لله دماغي فاضية من البنات خالص لحد محصل موقف جديد كنت مره في البيت وحصل شد بيني وبين بابا رحت واخد الـ MP3 ورحت عندي زميلي أريح عندو شوية فكنت قاعد في البلكونة ومضايق فجات بنت زي القمر معدية قدام البلكونة في المدرسة اللي قدام العماره ورحت مشاور لمحمد زميلي عليها فشفتني فمعرفش ايه اللي حصل يعني هو إحنا كنا في عماره الدور السادس مقابل للدور الرابع بتاع المدرسة فهيا كان عندها إمتحان في الدور الرابع وإحنا في الدور السادس وحظي الأسود إن الأستاذ كان غايب فقعدنا مقضينها نظرات مع إني مبحبش الحاجات دي بس مش بإيدي وكان محمد زميلي جمبي فشجعني شوية يعني بس الحمد لله متطور الأمر عن كده وده ممكن يكون أكتر موقف مع البنات ومع ذلك ندمان عليه وغير سعيد بيه إطلاقا لأني حالف مححب في يوم من الأيام الا اللي حتكون مراتي علشان كده في كل المواقف اللي قبلتها بمسك نفسي والحمد لله بتعدي ويارب يوعدني بالبنت اللي تراعي ربنا فيا وأسعدها إن شاء الله بس بره مصر :D
وإن شاء الله أحكيلكم علي زملاتي المره الجاية

مشتاقة لربى

05-07-2008, 06:22 AM

اولا انت ولد مؤدب اووووى بجد
ثانيه انا مش لقيه سبب يخليك تتجوز من بره مصر
ثالثا هل انت هتتجوز جواز تقليدى يعنى ممن غير حب و ايه سبب ده يعنى ليه اانت ما تحبش الأول و تتجوز اللى قلبك حبها

و برده كمل قصة حلوة اوى

SARAH-KH

05-07-2008, 11:32 AM

بجد انا مش عارفة اقول اية بصراحة انت اسطورة ودرجاتك نش وحشة بالنسبة للى انت كنت بتعمله قصدى على الطناش وكدة يعنى وبجد انت مؤدب جدا ووالديك ليهم الفخر ان انت ابنهم وكمل بقى الحكاية علشان انا مش قادرة اصبر وارجو من المنتدى تثبيت الموضوع

ادعولى ادخل طب القاهرة

Last Fantasy

05-07-2008, 01:50 PM

والله يا جماعه أنا مش عارف أقولكوا إيه وأنا سعيد جدا بإني وسطيكم وعلي فكرة أنا مش حتجوز من غير حب أكيد بس حيكون إعجاب وبعد كده فترة الخطوبة يعني برضوا حيكون فيه حب وأكتر حاجه خايف منها فترة الكلية علشان بسمع إن بيحصل فيها بلاوي وأنا بخاف من نفسي

مشتاقة لربى

05-07-2008, 02:33 PM

SARAH-KH

05-07-2008, 03:33 PM

يلا كمل بقى
ولا انتا عاوز صقفة و صفارة
كمل بقى

goda2

05-07-2008, 03:54 PM

بجد يامحمد ده موضوع كويس
لانك حكيت عن الى انته عملته
ويارب كل شاب قرا حكايتك يتعلم منك
ولازم يكون امامه حلم يسعى لتحقيقه
ولازم ياجماعه كل واحد يشوف ايه الاخطاء الى وقع فيها محمد
ويحاول انه يستفيد ومش يقع فى نفس الغلط ده
والمميزات لازم يحاول انا فعلا يكون كده
وبجد انت شاب مؤدب والدليل هيا حكايتك انك مش عايز تكلم بنت بجد ده يؤكد على ادبك
وكمل بقه علشان انا مشتاقه لسماع الباقى

مشتاقة لربى

05-07-2008, 04:25 PM

انت ولد هاااااااااااااااايل بجد
ربنا يوفقك يااااااااارب

Last Fantasy

05-07-2008, 06:20 PM

إيه يا جماعه أنا متشكر جدا أولا وثانيا أنا مش حتجوز من بره مصر دا مبدأيا لكن أنا مش مقتنع إني ممكن أتجوز في خلال العشر سنين القادمة ثالثا متحسسنويش إني ملاك أنا يمكن علشان عندي مبدأ مش ححب غير مراتي من وأنا صغير علشان كده معملتش علاقات مع بنات بس معرفش أنا زملاتي بيقولولي إني شاذ علشان أنا عندي لا مبالاة من نحية البنات بس أنا برضوا زي أي شاب يعني ممكن أتهبل في لحظه وأقرر قرار لما أجي أفكر فيه بعد كده أحس بالبلاهه وأكيد دا بيحصلنا ضروري ربنا يطلعنا من الدنيا دي علي خير وإن شاء الله أكمل بس بعد مصلح جهاز واحد زميلي وإن شاء الله أحكيلكم حكايتي مع الكمبيوتر بعدين سلام بقي

مشتاقة لربى

05-07-2008, 09:01 PM

مستنييك يا محمد

الرهينه

06-07-2008, 12:49 AM

رونالدينهوو

06-07-2008, 01:13 AM

كلنا ممتنين ليك والحمد لله انك قدرت تفتح قلبك ليينا وتقول كل اللى فى نفسك ولو فى حجات مضايقاك فى الماضى ارميها ورا ضهرك وابدأ من جديد

Last Fantasy

06-07-2008, 08:36 PM

بسم الله الرحمن الرحيم

حكاية إخواتي

أنا بقي ليا حاليا 3 إخوات بنات هدايا من ربنا وبحبهم موت
سمية 19 سنة ( مخطوبة ) إدعولها بالتوفيق في كلية الصيدلة
سندس 2 إعدادي 13 سنة
سارة 7 سنين 2 إبتدائي

مش حعرف أحكيلكم عنهم غير إنهم أحلي إخوة ممكن أتخيلهم حنينين وطيبين بس حقولكم علي صفاتهم
سمية ممكن تكون عصبية شوية بس أنا مسميها أمي التانيه لأنها أحن واحده عليا بعد أمي و طيبة جدا ومحبوبة جدا
سندس دي أنا خايف عليها لأني بشوفها مع بنات مش عارف أقول عليهم مش كويسين بس بيئتهم كده يعني بيصرفوا كتير ومتعودين علي العلاقات الشباب ويمكن تكون شبهي شوية يعني عندها كرامتها فوق كل شيء بس دي أكتر حاجه خايف عليها منها البنات اللي بتمشي معاهم وإحنا مش حمل المصاريف اللي هيا متعودة عليها

سارة دي بقي زي السكر وزي العسل بس دي بردوا عندها صفة سلبية جدا هيا متعودة تتفرج علي التلفزيون كتير فبتتفرج علي أفلاك الكرتون الأكشن فتعودت تبقي عصبية ومتوترة علي طول ومتسرعه يعني مش هادية خالص يارب يبقي المعني وصلكم
وكان ليا أخ إسمه عمار مات وأنا في 1 ثانوي عمار ده بقي مفيش أشجع منه وطبعا حتفكروا إني بقول كده علشان هو كان أخويا ومات لا أبدا وعلي فكرة أنا معروف عني وأنا صغير إني كنت هادي بطريقة غريبة لدرجة إني صحابات ماما كانوا يشوفوني يقولولها تكشف عليا هو اه كنت إنطوائي شوية وجاد خالص بس كنت هادي بطريقة متتوصفش بس لما أشوف نفسي دلوقتي معرفش أقارن نفسي بزمان لكن عمار بقي كان شقي اللي مش هادي يعني أنا الهداوة وهو الشقاوة في البيت أنا كنت دايما بدخل في مشاكل كتير وأنا صغير علشان كنت طيب فبدل مروح لبابا زي أي طفل كنت أروح لعمار وهو اللي يجبلي حقي علي الرغم إننا مكناش متفقين خالص لكن اللي مريح ضميري شوية إن في اخر أيام ليه كنا متفقين وبنحب بعض شوية بس برضوا لما أفتكر المواقف اللي كنا بنتنافس فيها بزعل قوي وبيحن عليا وزملاتي اللي في المنطقة عندنا يقولولي إنتا بدأت تبقي ليك شخصية من بعد أخوك ممات لحد متعرفت علي وليد اللي ححكيلكم حكايته المره الجاية

Last Fantasy

07-07-2008, 02:58 PM

أدعولي يا جماعه أجيب مجموع علشان ألحق هندسة

gamal saber

07-07-2008, 03:29 PM

قصة حلوة اوى
وطرية سردها جميلة جدا
واكيد كل واحد فغينا بيقابل اشخاص يغيرو حياتة

Last Fantasy

07-07-2008, 10:04 PM

بسم الله الرحمن الرحيم

أنا بقي حكاية أصحابي فيهم أصدقاء الطفولة وفيه أصدقاء الجدد
أصدقاء الطفولة :
أحمد ومحمد علي فكرة الاتنين مش إخوات وعلاقتهم ببعض مش قوية زيها معايا يعني المهم أحمد ده أعرفه من وأنا في 4 إبتدائي أول ما نزلنا من مصر رحنا علي المدرسة فبما إني جاي من السعودية فكنا أطفال فبصولي في غيرة فأول ما دخلت الفصل مفيش حد راضي يقعدني جمبوا وأنا وشي أحمر مفيش غير أحمد اللي قللي تعالي أقعد جمبي من يوميها بالظبط وأنا بعتبره زي أخويا بس ثانوية يعني بعدت عننا شوية
أما محمد فمش عارف أوصفه إزاي إمبارح كنت حكتبلكم الرد ده بس كسلت جه حصل مستجدات خلتني أعيد حساباتي وححتجلكم في مساعدة بخصوص محمد الموضوع وما فيه محمد ده بحبه زي أخويا برضوا وهو دايما بقوله علي أسراري والوحيد اللي ممكن أحكيلوا علي أسرار بيتنا من غير مخاف يعني أثق فيه ثقة عمياء وما زلت لكن المشكلة بقي ووضحلي مش عارف إذا كنت صج ولا غلط هو كان ناوي يحدث جهازه في الاجازه فأنا معروف عني إني بجمع أجهزة يعني بتعامل مع تاجر مفكرني صاحب محل فبيبيعلي بسعر الجملة وده اللي بعتبره مصروقي يعني أنا أساسا مبخدش مصروف من والدي ولا والدتي فبتجيلي حاجات زي كده يعني علي سبيل المثال أنا بصيف علي حسابي يعني الظروف يعني المهم قلي عايز أحدث جهازي فقلتله ومالوا وأخدته للراجل علي إني بثق فيه فجمعتله الجهاز منه للراجل فمطبيعي المفروض لو لوحد عادي باخد منوا 100 في الجهاز لو كلف أكتر من 1000 لكن علشان أبقي أرخص من المحلات باخد 70 أو 50 جنيه المهم مأخدتش منوا حاجه قلت دا صاحبي ولازم أكرمه وأشترينا الجهاز وأخدته في البيت قسمتله الهارد وأديتوا اللي هو عايزوا مني وظبطه بعد دا كلوا أخد الجهاز من هنا ولا سمعت عنه حاجه ولا يسأل ولا أي حاجه فرحتله باليل بقولوا تعالي نتمشي شوية يقلي مش هينفع النهارده خلها بكره إتخنقت أوي قلت يمكن عنده حاجه أو سبب يمنعه جه تاني يموم مسألش رحت أدور عليه ملقتوش في البيت مشيت في الشارع لقيتوا ماشي مع واحد تاني مقدرش أقولكوا اللي حسيتوا ساعتها بس مفيش غير حاجه واحده هيا اللي توضحلكم لو سمتعوا أغنية أصالة بتاعت شوفت بعنيا لما تقول " ولقتني غصب عني بضحك عشان مبكيش " بقيت أضحك ومش عارف أطلع الكلمة وهو واخدها عادي جدا المهم رحت مروح وقلت هو دا أخري يبقي بعد كده سلام وبس يعني سلام عليكم وعليكم السلام جيت بعدها بيوم حن عليا فقلت أبدأ معاه كلام رحت لقيتوا بيلعب علي الكمبيوتر فبقولوا تيجي نتمشي شوية قللي ماشي قلي بس أقعد أستناني فأتنيته في أوضة الجلوس لقيت بيلعب كمبيوتر بقولوا يللا فقلي دا أنا لسه جاي من التمرين ولسه حدخل أخد شاور قلت في نفسي دا هو عايزني أخلع فعملت نفسي زعلان وقلتله خلاص أنا ماشي ولا عبرني ياريت تقولوا رأيكم في الموقف ده وأعمل ايه ؟! علشان بجد أنا مشتت قوي قوي

ebrahem_el

08-07-2008, 01:16 AM

بجد انت ولد راجل و جامد جدا
ربنا معاك و صدقني ربنا هيكرمك جدا بعدين و ياريت نكون صحاب
و انشاء الله انا هكتب بعدك لأن الفكرة دي شديدة

uoua

08-07-2008, 09:20 PM

احسن حل انك تصرحوا وتقالوا انك زعلان منه ممكن هو يكون زعلان منك فى حاجة انت طيب اوى وياريت تكون ذى اخويو انا اكون زى اختك بس كمل انا حبيت قصة بتعتك اوى ممممكافح عند مباديئ

Last Fantasy

09-07-2008, 03:12 AM

متشكر قوي بس خلاص صالحته وأنا متهنش عليا عشرة السنين دي وأنا أصلا بحبه قوي وأنا زي مابن المقفع قال إبذل لصديقك دمك ومالك إدعولي بس ألحق هندسة قولوا امييييييييييييييين

Last Fantasy

09-07-2008, 03:31 AM

بسم الله الرحمن الرحيم

أنا بقي وعدتكم إني ححكيلكم عن وليد كانت بداية معرفتي بوليد كنت مرة إشتغلت في سيبر بس بابا موفقش فكنت أروح أقعد شوية كده كمعرفة بصاحب المحل علي إنو صاحبي فكنت ممكن أقعد شوية كده لحد ما يروح مشوار ولا حاجه ففمره أقعدتله جه واد رخم كده وعايز يشغل موقع ***** فقلتله لا وكنت لسه في أول ثانوي وكان لسه جسمي صغير فقللي حتعمل ايه يعني بس أنا يعني في المواقف اللي زي دي مبخفش فرحت شادد الفيشة فضربني بالقلم علي جية وليد وأنا مكنتش لسه إتعرفت بوليد قوي فنادتله المهم مسكلي الولد وكان عنده بتاع 23 سنه مسكته ضربته لما هصت المهم أخدت حقي ومن يوميها وليد قللي ملكش دعوي حتي بأبوك لما يحصل حاجه ناديلي ومن يوميها وأنا معتبره زي أخويا الكبير بس وليد ده بقي ممكن اللي بستمد منه الشجاعه وليد ده أكتر حاجه يكرهها هيا الظلم أو بالمصري البلطجه يعني من مواقفه برضوا كان واحد صحبي مديني صورته من علي النت وجه بعدها قللي حطها علي الـ Mp3 قلتله ومالو فحطيتوا لقيته إتحرق فلبسهولي الوحيد اللي سأل فيا هو وليد ولا حتي مين كده عبرني وهو اللي دفعلي الفلوس وبعد كده إديتوا الـ Mp3 قلتله صلحه وحلال عليك وليد دا بقي في سنة رابعه تربية رياضية أصله من الصعيد بس متربي في السعودية وليد دا بقي أكتر مني من نحية البنات بيحكيلي مرة وراني بنت تعتبر جارتنا بنت في كلية صيدلة زي القمر يعني أنا شوفتها إتهوست بيقولي إتصلت بيه بتقوله أنا معجبه بيك وكده قلها إنتا عارفه إنتي بتكلمي مين أنا في تربية رياضية ومش حخطب دلوقتي خالص لأني ليا 4 أخوات صبيان قبلي متجوزوش تقولو حستناك وملكش دعوي قلها لو إتصلتي تاني حقول لأهلك فبسأله عملت كده ليه بيقولي علشان ميظلمهاش (منك لله يا مبارك ) وأخلاقه ماشاء الله وعلي فكرة هو سبب بعد فضل ربنا طبعا إني أشتغل في الصيف أنا وأنا صغير معودينا اللي يشتغل سباك ولا نجار ولا الحاجات دي يبقي قليل القيمة وليد هو اللي غيرلي المعني دا وعلي فكرة هو وإخواتوا شغالين في النقاشة وإن شاء الله حبقي أروح معاهم الصيف ده إدعولي ربنا يوفقني

كلمه حب

10-07-2008, 12:40 AM

اولا موضوعك حلو جدا يامحمد وفكرته تجنن بجد وعايزة اقولك حاجه واحده انك باختصار يعنى راجل وجدع وفخر لوالديك وربنا يخليلك اصحابك ويوفقك فى حياتك ومستنينك دايما .

Last Fantasy

10-07-2008, 03:28 AM

والله يا جماعه مش قادر أوصفلكوا أنا أد ايه مبسوط معاكوا علي الناس الجميله قوي دي

علا وعلياء عزمى عوض

10-07-2008, 05:15 PM

قصه فعلا شيقه مرسى

SARAH-KH

10-07-2008, 05:30 PM

يا رب تدخل هندسة زى ما انت عاوز و ادعولى ادخل طب انا كمان
وكمل بقى علشان بجد انت اسلوبك و قصتك اخر جمال

مشتاقة لربى

10-07-2008, 11:52 PM

انت ولد هااااااايل بجد
مكااااااااااافح مكافح اوى اوى اوى اوى
كمل من فضلك يا محمد

Last Fantasy

11-07-2008, 01:50 AM

بسم الله الرحمن الرحيم

دي بعض مشكلاتي
1- مشاكلي مش عويصه يعني بس لو كنت وأنا في تانيه ثانوي كنت حقولكوا مشاكل كتير بس أنا بالنسبه ليا مشكلتي الجامده أوي أوي يعني هيا سماع الأغاني ياريت تساعدوني بس معرفش مش عارف أبطل سماع أغاني وهيا بداية المشكلة إني مكنتش بسمع اغاني قبل ماروح مطروح وكنت بين زملاتي جاهل أغاني دلوقتي بقوا ميصدقوا يشوفوني علشان ياخدوا الجديد وبناء علي التجربة عرفت ليه الواحد مبيعرفش يطلع من غلط هو بيعمله بسهولة علشان الخطأ ده وصل لدرجة عاده أو شيء مش حيعود عليه بخطوره حديكوا مثال لو واحد مثلا شاب لسه 18 أو 19 سنه وشاف واحد قد أبوه بيشرب سجاير وهو مثلا عجبته الحكاية لكن في نفسه يقول مستحيل دا باب يأطعني صح لكن لو واحد شاف جماعه صحابه يقول إشمعنا أنا فحيشرب سجاير ولما والده يعرف أول مره مثلا أبوه حيوبخوا شوية ويسيبه لكن بعد كده توصل للشاب إنها عاده لأنها بالنسبه ليه ساعتها ملهاش نتايج خطر عليه أو تأثر عليه يارب يكون المعني وصل
2- مشكلتي التانيه إني مش عارف أدايم علي الصلاة
3- مشكلتي دي بقي مع البنات حشرحلكوا وإنتوا حتفهموا أنا عمري محبيت واحده يعني الحب اللي ميخليش الواحد ينام الحكاية وما فيها إني وحيد يعني مفيش ولد تاني غيري فأمي ليلها ونهارها تتكلم عن الجواز وإزاي حتجوزني وشتتني أعمل ايه يعني فاضل شوية وأعرف علي البنات قرايبنا أو المعرفه يعني زي ما هما يعرفوا عن نفسهم

uoua

11-07-2008, 03:22 PM

انا كل يوم اخش عشان اسمع بقيت الحكاية كمل بقى انا مش هعرف افيدك عشان انا بردو بسمع اغانى كتير اوى مش على طول بصلى ربنا يهدينا جميعا انشاء الله

Last Fantasy

17-07-2008, 12:55 AM

والله يا جماعه أنا إتخنقت أوي من ساعة مجات النتيجة علي المجموع الهباب اللي إن شاء الله ححكيلكو تفاصيل اللي حصل بس بعدين

ymymym

18-07-2008, 02:25 AM

انت عارف يا محمد انا كنت مدمنه اغاني دلوقتي بقي انا عكسك تماما معرفش حاجه عن الاغاني عارف ليه انا كنت دايما اقرأ قصص عن الموت وعذاب القبر وعذاب ربنا وايه اللي هيحصل بعد كده وان اللي بيسمع اغاني تقريبا هيدخل الرصاص في ودانه يوم القيامه حاجه زي كده المهم يعني كنت دايما بقول افرضي يا منه متي دلوقتي هتعملي ايه شكلك قدام ربنا هيبقي ازاي دا انتي لحم وشك هيقع لما ربنا يسالك السؤال دا تخيلت المنظر بس صدقني مجرد تخيل وبعدها اعض اعيط لغايه ما تجيلي حاله انهيار وببقي خايفه قوي و اتصل علي صحبتي وانا نفسيتي تعبانه طبعا موش مره واحده بطلتها يعني قعدت كده كذا مره لغايه ما بدلتهم بالقرآن والصلاه يا محمد انت ويويو ووالله انا نفسيتي ارتاحت قوي وربنا فرجها في وشي ولعلمك انا ساعه ما بضيع صلاه بروح لبابا بقوله اضربني علي ايدي جامد باعصايا عشان معملش كمده تاني ويا نهار ابيض علي ضربه بابا مقولكمش وسلام

Last Fantasy

19-07-2008, 06:05 PM

والله أنا مش عارف أقولك إيه وأنا مكسوف وأنا بكتب بس برضوا مش عارف أسيب الأغاني يعني صعب عليا

هدي اشرف

20-07-2008, 02:39 AM

حاول يا محمد صدقني دي بتبقي نيه جواك دا لو انت فعلا عاوز تسيبها وربنا يكرمك صدقني هتخلص من اللي انت فيه وهتعيش مرتاح وربنا هيرزقك باللي تقدرك يا محمد ليه تسيب الصلاه ليه يعني صدقني لما تبقي ناوي فعلا هتلاقي نفسك رحت تصلي وسبت الاغاني اللي هتودينا في داهيه الواحد دايما بيعمل لاخرته موش لدنيته خد الرابط دا اقراه هتلاقي حاجه كده عاوزاك تقراها ماشي اقراها موش هتخسر حاجهhttp://www.thanwya.com/vb/showthread.php?t=55899

Last Fantasy

21-07-2008, 02:17 AM

متشكر قوي يا جماعه بس أنا أحوالي النفسيه الفتره دي هباب قوي ومش عارف أفكر في حاجه دلوقتي فسيبولي فرصة شوية

uoua

21-07-2008, 07:35 PM

انا بقيت اصلى حمد الله لم تصلى هترتاح

Last Fantasy

21-07-2008, 08:39 PM

أدعيلي الله يخليكي

uoua

22-07-2008, 03:15 PM

ادعى انا والله كانت زعلانة عليك كانت اعدا بدعى اكيد انت تعبت و ده مش مجهودك بس ربنا عايز كده و صلاة هيشيل هم كبير انا كانت
تعبانة بسبب النتيجة تقريبا كانت راحة اموت يومين افتح عينى و يغم عليا مكتش عايزة اصلى خالص بس انتصرت ع شيطان و صلاة انتصر
انت كمان ع شيطان ربنا يهديك وتصلى

Last Fantasy

24-07-2008, 02:05 AM

مش عارف أقولك ايه والله بس كل ماشوف إسمك حتي ولو في موضوع تاني بستريح نفسيا انتي و"بنت مسلمة "

uoua

24-07-2008, 02:52 PM

شكرا اوىىىىىىىىىىىىى

Last Fantasy

25-07-2008, 04:24 AM

أنا حاسس إن الموضوع مات فياريت حد من المشرفين يكلمني علشان عايز أعدل عليه بس بسرعه الله يرضي عليكم

طالبهـ

25-07-2008, 06:07 AM

اولا بجد .. ماشاء الله عليك ... راجل بجد ومعتمد على نفسك ودا شىء جميل

انك تكون نفسك واحده واحده..وان شاء الله ربنا يكرمك فـ الآخر...

وبالنسبه لحكايه الصلاه .. حقولك على فكره جميله اوى بعملها مع اهلى واصحابى

طبعا صيف وكلنا بنسهر وبنصحى متأخر يعنى على 5 يكون فاتنا الضهر والعصر..

بالنسبه لى بصلى الفجر ف ميعاده..

وبخلى حد من اصحابى اللى يصحوا بدرى يصحونى على الضهر اصليه واكمل نومى ولما اصحى تانى اصلى العصر..

وبنقعد نرن لبعض عند كل صلاه عشان نشجع بعض على الصلاه..

ابداها واحده واحده .. اكتر الناس لما بتيجى تبدأ صلاه مش بتدوم عليها..

لكن واحده واحده حتتعلق بيها..

يعنى الحمد لله بقالى سنتين مش بقطع صلاتى...لانها فعلا اساس مهم اوى للتفوق والنجاح ف حياتكـ..

وربنا يوفقك يارب..

uoua

25-07-2008, 05:13 PM

ايه مش هكمل و لا ايه ارمى حمولك ع ربنا و نعد كلنا تانى و تحكى قصة و انشاء الله ربنا هيهديك صالى انت بس و هترتاح لم تصلى قالى ماشى

Last Fantasy

25-07-2008, 07:57 PM

معلش مش فاهم حاجه من اخر رد بس ياريت تحافظي علي ترتيب الحروف أصل إنتي شكلك بتكتبي بسرعه فمبترعيش الكلام ياريت تظبطي بس اخر رد علشان أنا متابعك بصفة خاصه فيهمني قوي

uoua

27-07-2008, 04:56 PM

كمل الموضوع لا اصلاك كانت مشغولة شوية

uoua

02-08-2008, 11:51 PM

mawdo3 5als wala 2ah nasht mawdo3tk

Last Fantasy

07-08-2008, 03:12 AM

اسف والله يا جماعه الفتره اللي فاتت دي كانت صعبه عليا جدا المهم أنا مش عارف حكمل الموضوع إزاي أنا اتهيالي قلتلكوا كل حاجه عني بس أنا عندي إقتراح إننا نخليها نظام إستفسارات وعلي فكره معتقدش إن فيه غيرك متابعني يا Uoua وأنا متشكر ليكي قوي

uoua

01-09-2008, 04:59 PM

3ala 2ah ana kman mot2sfa 3ashan kant mash3'ola el fatra deh kaml mowdo3k htl2y nas motb3a tany kol sana anta taeb

ندى رامي

01-09-2008, 05:53 PM

حاول تستبدل الاغانى بالأناشيد الاسلاميه
وان شاء الله ربنا يهديك

uoua

03-09-2008, 03:20 PM

عندى فكره حلوة حد تانى يحكى قصة حياته بعد اذنك طبعا

Last Fantasy

08-11-2008, 03:43 PM

اتفضلوا واسف علي الغياب الطويل بس إحنا في دراسه وكنا فاصلين النت بس ممكن حد يكمل الموضوع من بعدي

**تسابيح**

08-11-2008, 05:09 PM

بجد باين عليك شخصية محترمة اوي وعجبني شخصية وليد برده بجد صديق ممتاز يابختك بجد عندك اصحاب كويسين اوي ربنا يسعدك معاهم ويوفقك وتدخل هندسة بالنسبة للأغاني انت لو عايز تبطلها هطبطلها باين اصلا انك شخصية قوية وتقدر تعمل كل حاجة انت عايزة بادراة قوية بس ليه مش ملتزم في الصلاة ؟؟؟ مش انت عايز تدخل هندسة عشان كدا بتذاكر وبتعمل وتعمل عشان تدخلهاما بالك الجنة وبعدين اللي بيصلي ربنا بيقف جمبة ويحقق له هدفة صدقني الصلاة دي مفيش اجمل منها ولما تلتزم فيها هتتعب اول اسبوع التزام وبعد كدا هتحس انك لما تيجي تقف علي الححوض لازم تتوضي ومش هتسيب فرض بدا وربنا هيوفقك

Last Fantasy

11-11-2008, 01:55 PM

أنا متشكر ليكي أوي وعلي فكرة أسلوبك في الكلام جميل أوي

uoua

13-11-2008, 01:04 AM

ياااااااه حمدالله ع سلامة منتدى و حش جدا من غيرك والله ربنا معانة جميعا

الرحمة حلوة

13-11-2008, 01:23 AM

بجد انا بحيك على الشجاعة ده ونفسى اكون حتى شجاعة مع نفسى ومتهربش منها كالعادة وربنا يوفقنا

CoMMaNdo

13-11-2008, 12:27 PM

قصتك جميله وارجو انك تتذكر الحلو منها وتنسى الوحش وتبدا من جديد

Last Fantasy

01-12-2008, 09:50 PM

مقدرش الوحش مأثر عليا والله يا جماعه مش حتصدقو الفتره دي بالذات من عمري حاسس إن خبرتي وذكائي زاد أضعاف علي الرغم وحاسس بقلة ذكاء من الاخرين ممكن صيغة كلامي يكون فيها غرور بس مش دا القصد والله أنا قصدي يعني فيه حاجات كتير ظهرت ومعاني كتير وضحت بس أكترها للأسوء وأكترها عن والدي بس مش عارف أغيرها علي فكره أنا عندي مرونه في التفكير بطريقه متتخيلهواش بس مش عارف أجيبها من ناحية تانية بس ده تقريبا سببه إنو لما أجي أفكر عن والدي ببقي زعلان علشان كده ببني أحكامي غلط مش عارف حتفهمو كلامي ولا لا بس تقريبا Uoua ممكن تعرف تقريبا هيا تعرف عني كل حاجه

weathersand

23-01-2009, 12:03 AM

تعرف يا محمد أنا معرفكشى ولا إنتا تعرفنى لكن تعرف إنتا إنسان راجل بجد وعلى فكرة
الرجولة مش بالكلام الرجولة بالفعل إنتا فعلا خلتنى أفكر فى حاجات عمرى ما كنت بفكر فيها
قبل كده يمكن الواحد بجد مش عارف أقولك إيه غير إن فى ليا تعليق على أخر جزء إنتا كتبته
إنك مش قادر تداوم على الصلاة أقولك جاجه أنا برده ىكنت زيك لفترة قريبة من حياتى يعنى تقدر
لغاية ما دخلت الثانوية لكن الحمد لله دلوقتى مداوم عليها وربنا يثبتنى لكن أقولك حاجه متندمشى
على أى حاجه إنتا عملتها غلط أقولك إيه اللى خلانى أخد عهد على نفسى إنى على قد ما أقدر
مفوتشى صلاة هوا إنى عملت علطة لم أكن فى حياتى أفكر إنى أعملها وأنا فعلا محرج إنى أقولها
يمكن عشان معنديش شجاعتك بس هيا كانت فى حق نفسى ومفيش حد يعرف الموضوع ده غيرى
دى تقدر تقول إنها نقطة تحول فى حياتى غيرت مفاهيمى 180 درجة خلتنى أقدر أحافظ على واجباتى
الدينية اللى كنت من الآخر كده منفضلها معلشى بقى أنا طولت عليك بس حسيت إنى لازم أقولك الكلمتين دولة
وشكرا

Last Fantasy

22-04-2009, 06:54 PM

متأسف لتأخري في الرد ويشرفني رد حضرتك بس كل اللي أنا حكيته تقريبا نسيته لأني بدأتي - يعتبر - حياة جديدة وأرجو من حضراتكم تاخدو العبرة من قصتي وححاول بقدر الإمكان إني أصلح الغلط وأصحح مفاهيمي شوية زي ماكل الشباب محتاجين

fictional.girl

23-04-2009, 02:31 PM

اولا انا بحيييك علي شجاعتك الادبية في الاعتراف باخطائك
وانت من وجهة نظري شخص رائع مكافح وشجاع

*ساسُّو*

29-04-2009, 06:17 AM

على فكرة
انا متابعة معاك فى صمت من ساعة ما بدأت
بس لما انت وقفت كتابة وجيت*انا كنت بذاكر* ومش عرفت أرد
بس لو سمحت عاوزة اطلب منك طلب
اكتب الباقى بس please من غير تاخير
okay?
بجد قصة جميلة اوى مرسيي كتير ليك عليها
وليا سؤال بسيط هسأله ان شاء الله بس بعد ما تخلص القصة
ربنا يوفقك

Last Fantasy

21-06-2009, 03:20 PM

طيب ايه الفكره أنا تقريبا كل القديم مبقاش بالنسبه ليا حاجه دلوقتي وأنا قلت نخليها أساله بعد كده أحسن علشان التشويق والغرض من الموضوع في المقام الأول هو العبرة

BATSY15

23-06-2009, 05:44 AM

على فكرة دي اول مرة اقرا موضوعك
بس بجد قريت قصتك من اولها لآخرها ومش عايزة اقولك اني خلاص ادمنتها بجد
اولا بسم الله ماشاء الله
انا مش عايزاك تزعل على اي حاجة فاتت او الظروف اللي مش كانت موفقة اوي في الاول
عشان لولا كل دة مكنتش هتبقى الشخص اللي بيحترمه كل حد يقرا قصته ومعجب بشخصيته
بجد انا فخورة بيك جدا جدا جدا جدا جدا جدا جدا جدا جدا وبدون اي مبالغة
لإنك بجد عندك مباديء وبتمشي عليها ودي اهم حاجة اصلا
وفعلا انت قدوة لإن مش اي حد بيقدر اخواته واسرته زيك
وانك تقريبا شايف كل الناس حلوة وكويسة

تعرف ؟د. إبراهيم الفقي( حاول تتابع حلقاته هتفيدك اوي من عالنت اوك)
بيقول
ان الدنيا ماشية زي الدايرة
(دان تدان ولو بعدي حين ) دي تلخص كلامي الى حد ما
انت كل حاجة بتعملها كويسة لأي حد بترجعلك تاني
يعني مثلا لو ساعدت واحد صاحبك في محنة
في يوم من الايام هتلاقي اللي يساعدك ومن غير ماتتوقع اصلا
مش لازم تشوف نتيجة اعمالك دلوقتي بس هتلاقي النتيجة على مدار حياتك كلها
ومبدأك انك متكلمش بنات او متحبش غير اللي هترتبط بيها
دة هيخليك اسعد إنسان لإن دة معناه إن ان شاء الله ربنا هيكرمك ببنت من اجمل البنات قلبا وقالبا
وكل حاجة بتعملها دلوقتي بدافع الخير هيرجعلك عاجلا او آجلا
فياريت متزعلش اي حاجة مهما كانت ... لإن كل دة خير ليك
واثبت على الصح ربنا يوفقك إن شاء الله
وصدقني انت مستقبلك مشرق إن شاء الله
عشان تعبت في صغرك هترتاح لما تكبر اكتر يعني
كل اللي بجد اقدر اقولهواك
ان ربنا معاك ويوفقك وغن شاء الله تكون من اسعد البشر
وربنا يكرمك بالكلية اللي تحبها
واعتقد ان كل اللي تابعك في قصتك معاك بدعاه ليك حتى لو مكنش رد
استمر على الصح وعلى مبادءك
واستمر في قصتك لإننا اتعلقنا بيها اوي
ومستنيين آخر جديدك
تحياتي:d

lamis11

25-06-2009, 05:46 AM

هو صحيح حضرتك عندك أد إيه دلوقتي دخلت هندسة ولا لإ
الموضوع قوي شوية وباين عليك كده متودك في الكمبيوتر ربنا يوفقك ويحققلك كل أمانيك

Last Fantasy

10-07-2009, 08:12 PM

أنا متشكر أوي أوي بس أنا دلوقتي ظروفي إتغيرت خالص يعني في البداية أنا بحب واحدة وبكلمها من شهرين كده بس أنا من كتر حبي ليها عايز أقطع معاها علشان لو ربنا سهلي أجوزها ومسترخصهاش ساعتها علي أساس إني لسه بدري علي الجواز بالنسبه ليا بس هيا مش حتفهم كده وحتزعل ياريت تساعدوني بس أنا بصراحه حصل معايا حاجات كتير مع البنت دي لو عايزني أحكيلكوا أتفرج علي الردود الأول

*ساسُّو*

11-07-2009, 06:44 PM

بروف انس

11-07-2009, 07:23 PM

السلام عليكم يا محمد اولا انا مردتش اقرا اسطر من اللي كتبه لسبب وجيه جدا انت ربما تريد الفضفضه عن نفسك او انك تحب ان تتوج نفسك وتقول لقد فعلت كذا وكذا بهدف الباس نفسك السمو ..... الخ ثانيا احنا لسه في عمر 18 وكل الخبرات اللي اكتسبناها معظمها خبرات صبيانيه تساعدنا في الادراك في سن الرشد لذللك انا مكنتش عايزك تكتب قصح حياتك حالا لو انك عايز تعمل كده لسه العمر ان شاء الله طويل امامك وممكن تقدم فيها للقارئ مته عقليه وخبرات حياتيه يستفيد منها وشكرا علي حسن الاصغاء

Last Fantasy

13-07-2009, 03:11 PM

السلام عليكم يا محمد اولا انا مردتش اقرا اسطر من اللي كتبه لسبب وجيه جدا انت ربما تريد الفضفضه عن نفسك او انك تحب ان تتوج نفسك وتقول لقد فعلت كذا وكذا بهدف الباس نفسك السمو ..... الخ ثانيا احنا لسه في عمر 18 وكل الخبرات اللي اكتسبناها معظمها خبرات صبيانيه تساعدنا في الادراك في سن الرشد لذلك انا مكنتش عايزك تكتب قصح حياتك حالا لو انك عايز تعمل كده لسه العمر ان شاء الله طويل امامك وممكن تقدم فيها للقارئ مته عقليه وخبرات حياتيه يستفيد منها وشكرا علي حسن الاصغاء
يمكن كلامك يكون صح بس أنا نقلت التفاصيل بموضوعية مش بسطحية وانتا القاريء ليك تحكم ويهمني حكمك عليا ومتشكر أوى علي وجود حضرتك

Last Fantasy

09-09-2009, 05:05 PM

ايه كده الموضع مات ولا ايه

Last Fantasy

09-09-2009, 05:06 PM

أنا حعمل للموضوع جزء تاني

NOUFALL

09-09-2009, 06:53 PM

انا لسه حالا قارى قصه حياتك
بجد انت شخصيه محترمه جدا
وربنا يثبتك بالنسبه لموضوع البنات
وربنا هديك وتداوم ع الصلاه

ومنتظرين الجزء التانى

uoua

09-09-2009, 09:09 PM

ea rat tkml el ksa 3ashan an ba7bha

ضيِّ القمر

09-09-2009, 09:13 PM

انا شايفة انها مش قصة ماساة تماما
كل الشباب كده
وخاي بالك من نفسك
علشان حاسة انك ممكن تصيع sorry

Last Fantasy

10-09-2009, 04:57 PM

انا لسه حالا قارى قصه حياتك
بجد انت شخصيه محترمه جدا
وربنا يثبتك بالنسبه لموضوع البنات
وربنا هديك وتداوم ع الصلاه
ومنتظرين الجزء التانى

أنا متشكر ليك أوي بس موضوع البنات ده إنتهي خلاص لأني يعتبر خاطب دلوقتي

ea rat tkml el ksa 3ashan an ba7bha
أنا سعيد جدا بوجودك ومتابعتك للموضوع وإن شاء الله هكمل الجزء التاني النهارده

انا شايفة انها مش قصة ماساة تماما
كل الشباب كده
وخاي بالك من نفسك
علشان حاسة انك ممكن تصيع sorry
حلوه هتصيع دي ، ربنا مايجيب صياعه ولا حاجه بس هيا بترجع لشخصية الواحد وعلي المقام الأول الصحبة وده هيبقي سرده في الجزء التاني