موضوع للتعريف بكليه الهندسه جامعه الاسكندرية لمن يرغب فى دخولها [الأرشيف]

مشاهدة النسخة كاملة : موضوع للتعريف بكليه الهندسه جامعه الاسكندرية لمن يرغب فى دخولها

eng mohamed elwan

18-07-2013, 12:43 PM

بسم الله الرحمن الرحيم
معكم م/ محمد علوان من كليه الهندسه بالاسكندرية
اى استفسار عن الكليه ان شاء الله هكون متواجد ويسعدنى الاجابه على استفساراتكم

Islam Ayman

18-07-2013, 12:49 PM

لو سمحت أنل جب مجمموع 95.61 وعايز اعرف ايه الفروع المتاحة ليا من كلية الهندسة وايه احسن قسم و ايه اللى اعمله عشان تنسيق الكلية معلش انا لسه جديد ع الكلام ده

eng mohamed elwan

18-07-2013, 01:10 PM

اولا مبروك يا باشمهندس
دلوقتى بالنسبه لموضوع التنسيق فالموقع لما يفتح هتدخل تختار كل كليات الهندسه على مستوى الجمهورية و تختارهم بالترتيب الاقرب لمحافظتك هما 48 رغبه هتملاهم ولما نتيجه التنسيق تظهر لو قدر الله ودخلت هندسه مش فى محافظتك بمعنى
انت من القاهرة وهندسه القاهره كانت 97% -- وانت دخلت هندسه طنطا مثلا
هيبقى فى تحويل الكترونى بيفتح بعد نتيجه المرحله الاولى على النت بتقدم طلب تحويل لهندسه القاهره وكله بيقبل غالبا
ولو مقبلش فى تحويل ورقى وده بفلوس بتروح مكتب التنسيق فى القاهره وتدفع حوالى 300 جـ وتقدم طلب التحويل وكله بيتقبل
يعنى الخلاصه انت مجموعك حلو ما شاء الله و اطمن انت كده دخلت هندسه ومحافظتك بغض النظر عن التنسيق وده لان التحويل معظمه بيقبل ان لم يكن كله

اما الفروع المتاحه فى كليه الهندسه فالاقسام كتيرة والحمد لله ومتشغلش بالك بيها من دلوقتى لانك هتدخل اعدادى هندسه هتبقى زى رابعه ثانوية عامه على حسب مجموعك فيها هتدخل القسم (تنسيق برضوا ).

وده كتاب اسمه ما بعد اعدادى اختار القسم المناسب

بيوضحلك كل قسم مجالات شغله ايه واعتقد هيفيدك لانك هتعرف من خلاله القسم المناسب ليك
http://www.mediafire.com/?uv0myqvsrxlox5e
ولو فى اى استفسار انا موجود

Islam Ayman

18-07-2013, 01:36 PM

يعني هو ممكن الكليات توصل لـ 97 ؟ انا سمعت انها كانت واخدة من 94.7 ولا ايه؟

waleed_korra

18-07-2013, 02:09 PM

السلام عليكم
انا كنت عايز اسأل هل الدراسة بالانجليزى ولا لا ؟
لانى عندى مشكلة كبيرة فى الانجليزى فايه اللى بيكون بالانجليزى (الكتب / المحاضرات .....)
وشكرا

eng mohamed elwan

18-07-2013, 02:10 PM

فى كليات بتبقى 97 و كليات 95 و اقل كليه العام الماضى كانت 94.27
انت مجموعك كويس الحمد لله وان شاء الله داخل هندسه الفكرة اللى حبيت اوضحهالك هيا التحويل يعنى لو دخلت هندسه بعيده عنك انك هتقدر تحول بسهوله ان شاء الله ( الكترونى - ورقى ).

eng mohamed elwan

18-07-2013, 02:11 PM

السلام عليكم
انا كنت عايز اسأل هل الدراسة بالانجليزى ولا لا ؟
لانى عندى مشكلة كبيرة فى الانجليزى فايه اللى بيكون بالانجليزى (الكتب / المحاضرات .....)
وشكرا

اول سنه فى هندسه اسكندرية (اعدادى ) الدراسه عربى
وبعد كده فى الاقسام (اربع سنين ) انجليزى
ومش هتلاقى مشكلة ولا حاجه هيا بس مسأله وقت وهتتعود على النظام الجديد

waleed_korra

18-07-2013, 02:23 PM

اول سنه فى هندسه اسكندرية (اعدادى ) الدراسه عربى
وبعد كده فى الاقسام (اربع سنين ) انجليزى
ومش هتلاقى مشكلة ولا حاجه هيا بس مسأله وقت وهتتعود على النظام الجديد

معلش بس حضرتك الدكاترة بتتكلم انجليزى بحت فى المحاضراااات ؟؟؟؟؟
وهل دا فى اسكندرية بس ولا كل الجمهورية لانى غالبا داخل (شبين الكوم)

eng mohamed elwan

18-07-2013, 02:28 PM

الدراسه فى كل كليات الهندسه بالانجليزى
ماعدا الاسكندرية والقاهره وممكن كليه تانيه اعدادى عربى والباقى انجليزى

ومش بيكون انجليزى بحت ولا حاجه انت هتلاقى مشكلة بس فى الاول وبعد كده هتتعود ولو اى حاجه وقفت معاك فى المحاضره او السكاشن بتسأل الدكتور او المعيد وبيجاوب عليك وممكن تروحله مكتبه يشرحلك اللى مش فاهمه تانى

000000000000000

18-07-2013, 03:51 PM

يوسف 95

18-07-2013, 07:42 PM

تفتكر هندسة اسكندرية هتاخد من كام السنة دى يا باشمهندس؟؟؟

eng mohamed elwan

19-07-2013, 01:53 PM

اتشرف بيك المهندس محمد علوان
انا فى شبين الكوم جبت الحمد لله 98.9 علمى رياضة أكيد و مش فدماغى بترول و تعدين السويس
كنت عايز اعرف كذا شئ
1- التنسيق الاقليمى يمنعنى من انى اروح اى كلية خراج محافظتى ؟
2- لو ينفع انى اروح مثلا اسكندرية اسمع ان اول سنة اعدادى كل زى بعضه هل انا اخد اعدادى فى شبين و بعدين احول و لا الافضل انى اخد اعدادى هناك؟؟؟
3- هندسة اسكندرية تتميز بقسم النووى تقريبًا القسم ده ايه نظامة ؟؟؟؟؟؟؟؟؟؟؟؟؟
4- المدينة الجامعية مريحة و لا ؟؟؟؟؟؟؟؟؟
5- حضراك شايف ايه افضل قسم فى الهندسة من حيث انه قسم مفتوح معلوماتيًا يعنى مش متحدد بكتاب معين عايز قسم متفتح ؟؟؟؟؟؟؟؟؟؟؟؟؟؟؟؟؟؟؟؟؟؟؟؟
كفاية كده انتظر ردك :d

ممكن تدخل شبين وتجيب ورق لقرايبك من اسكندرية وتعمل تحويل لاسكندرية عادى

اما عن قسم نووى فانا جبتلك كل حاجه عن قسم نووى مميزاته وعيوبة و مجالاته

بسم الله الرحمن الرحيم

كاااابوووووووووووووووووووووووووووووووووووووووووووو وووووووووووووووووووم
طبعاً اول ما بنقول نووية اول حاجة بتيجي في دماغك حاجات بتفرقع وناس بتسيح وكلام كده
احب اقولك "لا يا ابو لسان طويل" القسم عندنا مسالم جداً "مش مسالم قوي يعني :d" ويا رب اقدر ابين معرفتي بالقسم

"قسم الهندسة النووية والإشعاعية" اتأسس سنة 1963 "ايوه يعني مش قسم جديد" كجزء من تطور المشروع النووي المصري ومسك رئاسة القسم ده ناس عظيمة جداً على رأسهم دكتور "يحي المشد" الله يرحمه ... بدأ القسم كقسم "للهندسة النووية" فقط وبعد كده تمت اضافة "الهندسة الإشعاعية" عشان يتوافق مع سوق العمل "حلوة يتوافق دي :d" والكلام ده كان في التسعينيات

موقع القسم ... الدور الخامس مبنى كهربا ... القسم كله بسلطاته ببابا غنوجه في الدور الخامس في مبنى كهربا

بخصوص المواد فانت اعتبر نفسك انك في اعدادي بتدرس شوية من كهربا "دواير وخلافه" على شوية من ميكا (شوية كتير) "رسم ميكانيكي في اولى وثرمو بقى وحاجات من دي في باقي السنين" على شوية من مدني "استراكشر وخلافه برده :d" على شوية رياضة صغيرين جداً "اكتر تلات اقسام بتاخد رياضة كهربا وحاسبات ونووية :d" على حاجات التخصصية بقى زي "مقدمة في الهندسة النووية ده في اولى وفي السنين اللي بعد كده عندك هندسة مفاعلات وفيزيا نووية وميكانيكا الكم وبلازما وخلافه :d"

زي ما قلنا القسم كله في الدور الخامس مبنى كهربا ... بما في ذلك الدكاتره ومكاتبهم ... اغلب الدكاتره علاقتهم جيدة جداً جداً بالطلبة ... بس طبعاً الحلو ميكملش :d

المعامل اغلبها في الدور برده "معمل الفيزيا الحديثة" وفي معمل تاني بيترمم وفي معمل اخير للدراسات العليا ده موجود كمبنى مستقل بذاته قدام العيادة

القسم مواده غير سهلة بالمرة ... بس امتحاناته حتعرف تحل فيها نوعاً ما ... معتقدش ان في قسم سهل في الكلية ... لو عاوز حاجة سهلة الحق حول من هندسة كلها اساساً

مجالات العمل والحاجات دي في المميزات والعيوب

حاجة اخيرة "القسم لا علاقة له على الإطلاق بكيفية تصنيع القنابل" الكورسات دي انت بتاخد مبادئها فقط انما الدخول في التفاصيل ممنوع بموجب اتفاقيات ماضية عليها مصر ... يعني لو عاوز تبني قنبلتك اللي بتحبها ... مكانك مش هنا :d

استنونا كمان شوية مع المميزات والعيوب

نكمل مع بعض مع مميزات قسم هندسة نووية واشعاعية

1- القسم عدده صغير جداً "دفعة اولى السنة دي 43 واحد اللي بيحضر منهم 20 واحد " وده بيخلي التعامل سهل جداً وانك تتلقى المعلومة عملية مش صعبة

2- المناهج اللي انت بتاخدها بتاخدها من مراجع عالمية ... يعني الأساسيات اللي انت بتدرسها هي هي نفسها اللي بتدرس في اي حتة في العالم ... الإختلاف حنقوله في العيوب

3- لأن العدد صغير فتعاملك مع الدكاترة بيكون جيد جداً والدكاترة بيرحبوا بيك في اي وقت لو حابب تستفسر عن حاجة وبيساعدوك بشدة

4- مجالات الشغل عندنا مفتوحة جداً ... لو مش حتنضم في الجزء الأكاديمي فانت جوه مصر تقدر تشتغل في مجال الطب النووي والإشعاعي والأجهزة الإشعاعية في المستشفيات ... او تقدر تاخد كورسات وتشتغل في مجالات الكهربا والميكانيكا ... ده بالإضافة انك بتكون عندك خلفية كبيرة جداً في علوم المواد وتقدر تتخصص فيها

5- المجال الأكاديمي فالقسم بياخد معيد واحد كل سنة داخل القسم بالإضافة لأكثر من واحد في اقسام العلوم الطبيعية والرياضيات ... ده بالأضافة انك لو تقديرك العام كويس تقدر تقدم في اي جامعة بره تاخد منها ماجيستير ودكتوراة ولأننا القسم الوحيد في مصر فالإتصال بجامعات بره بيكون دائم وجيد جداً

6- على الرغم من ان المناهج بتاعتها قد يبدو انها صعبة ومعقدة بس امتحاناتها كويسة وتقدر تأدي فيها ... "ده لو العملية بايظة قوي يعني "

7- ومش عارف ده ميزة وللا عيب بس احنا اول قسم نتيجته بتظهر في الكليات كلها ... نتيجتنا اليومين دول ادعولنا الله يكرمكوا

استنونا كمان شوية مع بوست العيوب

نكمل مع جزء العيوب في قسم الهندسة النووية والإشعاعية

1- القسم عدده صغير جداً "برده" فالناس معروفة بالأسامي :d ... احذر يعني :d

2- زي ما قلنا انك بتدرس نفس المناهج اللي بتدرّس في اي حتة في العالم بس يظل الفرق الأكبر هو التطبيق العملي ... في اوروبا والدول المتقدمة :) بيبقى عندهم استغفر الله العظيم يا رب مفاعل جوه الحرم الجامعي عشان الأغراض الدراسية فهما بيبقى عندهم جزء الخبرة العملية اكبر ... بس مفيش مشاكل يعني لو انت حابب تتفوق عليهم حتعرف ... المصري يغلب اي حد :d

3- من اكبر مميزات القسم الوظائف المتوفرة بشدة في المفاعل النووي اللي في الضبعة اللي بيخلصوا ورقه من 2005 بس الراجل اللي بيوزع عليهم شاي مش بيوافق ( هأووووووووووووووو + موت يا حمار :d ) ... خلاصة الكلام يعني ان الجزء الخاص بهندسة المفاعلات مش موجود في مصر ليه اي مجال شغل حتى الآن

4- النظرة المجتمعية لطلبة نووية انهم "فشلة" عشان القسم بيقبل تقديرات قليلة ده بالإضافة لنظرة انهم "مجانين" وده لأنك داخل اي حاجة ليها علاقة بالمجال ده

5- بعض الدكاترة تعاملهم مش جيد مع الطلبة ... ولأن العدد قليل فانت ملزم انك تستحمله وتتأقلم معاه ... زي ما قلنا الحلو ميكملش

6- القسم زي ما قلنا واحد من اكتر الأقسام اللي بتاخد رياضة "كهربا وحاسبات ونووية" فحاول على قد ما تقدر انك تقوي نفسك في الرياضة ولو مش بتحبها ... مكانك مش هنا برده :d

7- "ومش عارف ده ميزة وللا عيب بس احنا اول قسم نتيجته بتظهر في الكليات كلها ... نتيجتنا اليومين دول ادعولنا الله يكرمكوا" تاني :d

اتمنى اني اكون قدرت اوضح على قد ما اقدر معلومات القسم
لو في اي استفسارات انا في الخدمة
شكراً جزيلاً
السلام عليكم

بخصوص المدينه الجامعيه معرفش والله لانى مسكنتش فيها بس الناس بتقول انها مريحه شوية

افضل قسم ده بيكون على حسب ميولك انت والحاجات اللى انت بتحبها وحاسس انك هتشتغل فيها وفى لينك وضعته بالاعلى فيه كل اقسام هندسه باستثناء نووى وانا حطيتلك كل حاجه بخصوص نووى دلوقتى
تقدر تحمله وتقراه وساعتها هتعرف تقرر اى الاقسام هيبقى مريح ليك وهتعرف تتعامل معاه وتتفوق فيه

واى استفسار انا موجود

eng mohamed elwan

19-07-2013, 01:56 PM

تفتكر هندسة اسكندرية هتاخد من كام السنة دى يا باشمهندس؟؟؟

غالبا هتكون فى حدود 96.5%

بس ممكن تعمل تحويل عادى جدا ورقى او الكترونى وهندسه اسكندرية بتقبل كله متقلقش

000000000000000

20-07-2013, 05:18 PM

ehabelsapa

20-07-2013, 05:29 PM

انا جايب 95.85 % مجموع 393 ومن محافظة الدقهلية وانا مليش الا هندسة الزقازيق او المنصورة

لكننى عايز اروح هندسة القاهرة او اسكندرية .......... فهل بإمكانى ام لا ؟؟

le jasm!n

21-07-2013, 12:25 AM

يا جماعه بليز انا مجموعي 96.22 مش عارفه كدا هتجبني هندسه اسكندريه ولا لا!!

YahiaAshraf

21-07-2013, 12:50 AM

انا فى تالته ثانوى السنه دى علمى رياضة و انا من الاسكندريه و يا مسهل ادعولى ادخل هندسة

nada elsawy

21-07-2013, 03:00 AM

eng mohamed elwan

29-07-2013, 12:48 PM

أولن ألف شكر ليك يا باشمهندس ع ردك
ثانيًا لو انا ناوى ادخل قسم مش موجود فى الكلية عندى فى شبين و اكيد التخصص بعد أعدادى طيب انا آخذ اعدادى عادى فى شبين و بعدين احول و لا اخذ اعدادى فى الكلية اللى انا هكمل فيها أفضل ؟؟؟؟؟؟؟؟؟
معلش كمان سؤال
لو انا عندى قسم زى ميكانيكا موجود عندى فى شبين و موجود فى كلية زى عين شمس او القاهرة او اسكندرية هل لو خلصت كليتى فى شبين زى ما اخلص نفس القسم فى كلية اسمها عريق ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

ممكن تاخد اعدادى فى شبين عادى وبعدها تحول للكليه الاخرى وتختار التخصص اللى انت عايزة

اما بخصوص انك تاخد تخصص من كليه وموجود فى كليه تانيه اسمها عريق فده مش مقياس لان المنهج متقارب جدا فالمقياس الوحيد هو كفائتك انت وقدرتك على التعامل مع الحياه العمليه بعد كده ان شاء الله

eng mohamed elwan

29-07-2013, 12:50 PM

انا جايب 95.85 % مجموع 393 ومن محافظة الدقهلية وانا مليش الا هندسة الزقازيق او المنصورة

لكننى عايز اروح هندسة القاهرة او اسكندرية .......... فهل بإمكانى ام لا ؟؟

ممكن انك تجيب عنوان لاحد اقاربك من القاهره او اسكندرية وانك ساكن معاهم فى نفس العنوان ده وبكده تقدر تحول بعد القبول فى هندسه الزقازيق او المنصورة

eng mohamed elwan

29-07-2013, 12:53 PM

يا جماعه بليز انا مجموعي 96.22 مش عارفه كدا هتجبني هندسه اسكندريه ولا لا!!

مبروك يا باشمهندسه تم ظهور نتيجه التنسيق وهندسه اسكندرية 95.6

الف مبروك

eng mohamed elwan

29-07-2013, 12:55 PM

حضرتك انا جايبة 94.6 وكدة هيجيلى ان شاء الله هندسة اقاليم وكنت عايزة احول اسكندرية لان دة المكان الوحيد الى اقرب ليا لانى من البحيرة هنغع التحويل ولا ؟؟؟؟

ولو التحويل ورقى المفروض اروح فين ؟؟؟

ان شاء الله بعد القبول فى احد كليات الهندسه هيتم فتح التحويل الالكترونى هتعملى تحويل ومعظم التحويلات بتتقبل

لو لاقدر الله ومتقبلش التحويل
بتروحى مكتب التنسيق فى الاسكندرية (كليه حقوق) وبتعملى تحويل ورقى ب300 جـ العام الماضى تقريبا وده كله بيتقبل

والف مبروك يا باشمهندسه

le jasm!n

29-07-2013, 02:50 PM

مبروك يا باشمهندسه تم ظهور نتيجه التنسيق وهندسه اسكندرية 95.6

الف مبروك
الله يبارك ف حضرتك الحمد للللله بجد انا مبسوطه جدا وبالتوفيق للجميع

eng mohamed elwan

30-07-2013, 01:42 AM

الله يبارك ف حضرتك الحمد للللله بجد انا مبسوطه جدا وبالتوفيق للجميع

الف مبروك يا باشمهندسه

ده ايفنت اتحاد الطلاب للتعريف بالكليه واقسامها وكل شئ عنها فى الكليه ان شاء الله
https://www.facebook.com/events/488145214602493/?ref=3

https://www.facebook.com/groups/303415139805167/?hc_location=stream

وده جروب دفعتك يا باشمهندسه هتلاقى عليه كل الاخبار واى استفسار انا موجود

ehabelsapa

30-07-2013, 06:27 AM

ممكن انك تجيب عنوان لاحد اقاربك من القاهره او اسكندرية وانك ساكن معاهم فى نفس العنوان ده وبكده تقدر تحول بعد القبول فى هندسه الزقازيق او المنصورة

ممكن ايميل حضرتك استفسر لان عندي اسألة كتيرة اووى :friendsxs3:

To Be Is To Do

30-07-2013, 06:47 AM

بشمهندس محمد علوان باشا
يا محاسن الصدف بجد :)
انا khaled zakareya :d

eng mohamed elwan

30-07-2013, 02:49 PM

ممكن ايميل حضرتك استفسر لان عندي اسألة كتيرة اووى :friendsxs3:

ده ايميلى على الفيس تقدر تكلمنى فى اى وقت

https://www.facebook.com/engmohamed.elwan.9

eng mohamed elwan

30-07-2013, 02:51 PM

بشمهندس محمد علوان باشا
يا محاسن الصدف بجد :)
انا khaled zakareya :d

حبيبى يا باشمهندس :*

والله واحشنى جدا

singer111

30-07-2013, 02:59 PM

ارمو حمولكم علي الله

To Be Is To Do

30-07-2013, 03:15 PM

حبيبى يا باشمهندس :*

والله واحشنى جدا

ربنا يخليك يا حبيبى :)
إنت أكتر والله :d
اتوصى بالشباب هنا بالله عليك :) :P

hassan201022

30-07-2013, 03:24 PM

انا عاوز اخد رايك انا جايب 98% وان شاء الله خلصت اتقبلت ف هندسه شبين وهروح هناك وهستمر مش هحول
كنت محتار بس لما اختار القسم اخش كهربا ولا مدينى
عاوز قسم شغله كويس وف نفس الوقت ميكنش صعب اوى او الواحد يمشى فيه مستريح
كهربا ولا مدنى وخصوصا من حيث الدراسه والراحه النفسيه فيه والشغل ايضا

le jasm!n

01-08-2013, 03:49 AM

الف مبروك يا باشمهندسه

ده ايفنت اتحاد الطلاب للتعريف بالكليه واقسامها وكل شئ عنها فى الكليه ان شاء الله
https://www.facebook.com/events/488145214602493/?ref=3

https://www.facebook.com/groups/303415139805167/?hc_location=stream

وده جروب دفعتك يا باشمهندسه هتلاقى عليه كل الاخبار واى استفسار انا موجود
تمام ماشي ميرسي اووووووووووي