السلام عليكم ..
انا جاتلى هندسة المطرية و الصراحة انا كان نفسى فيها اوى ..
انا المفروض خدت كورسات القدرات لفنون جميلة عمارة ..
هل بقى يا ترى هندسة عمارة هرسم فيها زى الكورسات ؟اناخايفة ئلائيها حمادة تانى خالص!!
بصوا انا الصراحة بحب الرسم و عندى الموهبه بس فى الرسم الفنى .. لما كنت فى الكورس الاستاذ قالى انى ايدى حلوة فيها اووى و ان لو دخلتها انجح ان شاء الله .. بس انا بقى مش عارفة و لما شفت الكلام هنا احترت اكتر و خصوصا انكوا بتقولوا لازم موهبة عشان انجح و انا خايفة متكنش عندى الموهبة دى للدرجة يعنى و انا مش عايزة اخش حاجة ابقى عدية فيها ...
و انتوا بتقولوا انها سهلة و كلوا زى بعض و انا كان نفسى فى ميكانيكا من اولى ثانوية الصراحة و كنت لاغية عمارة دى من دماغى بس لما خدت الكورسات حبيتها اوى !!
فانا عايزة اعرف هل يترى اخش عمارة و امرى لله ولا فى حاجات احسن زى ميكانيكا مثلا و ربنا يسهل ؟
اه كمان انا فى الكورسات كنت برسم غرف و عمارات و مبانى شاركات حمامات سباحة كبارى مترو ...إلخ فهل يا ترى كل دا تبع عمارة و لا دا مدنى و اية الفرق بنهم !
اه و على فكرة انا بنت عشان لو الموضوع دا يفرق يعنى :d

بسم الله ما شاء الله !!
فين الردود؟؟

طبعا أنسب قسم للبنات هو قسم العماره علشان مستقبل الشغل بعد كده بيكون فيه تخصصات كتيره جوه العماره منها جزء كبير بيكون بيشتغل في المكتب وفي نفس الوقت فيه كمان مهندسات معماريات بتنزل المواقع وبتشرف واحسن من اجدعها راجل
وموضوع الرسم الفني ده مهارة زي مهارات غيرها كتير بتتعلميها في الاقسام دي وفيه رسم بالادوات ورسم بالكمبيوتر وحاجات كتير بنشوف زمايلنا في العمارة بيعملوها يعني بيكون مرحله من مراحل الدراسه بس طالما انتي عندك الاساس لان الحاجات بتاعة الكورسات دي حاجات بسيطه يعني يبقى انتي تمام

الفرق بين عمارة ومدني
مبدئيا كده الاتنين بيكملو بعض
المعماري هو اللي بيبني العالم اللي انتي بتشوفيه حواليكي من اصغر حاجة عينك بتقع عليها في تصميم فرش بيتك لحد تخطيط المدن الكبيره ،
العمارة يعني الجمال انك تخلي الناس تحس بمعنى الجمال
ويعني الصحة انك تخلي المكان ياثر فيكي ويتفاعل معاكي ويحسن مزاجك وصحتك لو في بيت او مستشفى
ويعني الانتاج لو بتعملي مدرسة او شركة فيها تهوية واضاءة ومساحة مناسبة لكل انسان جواها تقدر تساعده في انه يادي دوره صح
ويعني الامان لو بتخططي شارع او حديقة لاطفال في ميدان او تجمع سكني في حي او شبكة شوارع بكراسيها واضاءتها وحدائقها وممراتها ونوافيرها في مدينة
ويعني حضارة لو بنخطط لامم وشعوب عاشت ازمان طويلة وكل اللي فضل منها اثار على جدران مباني عاشو فيها وكشفت عن اعجازات علمية او فنون او تكنولوجيا سابقة لزمانها
يعني مباني كتير ابراج وفنادق ومدارس ومستشفيات ومسارح و متاحف ومعارض ومطارات وناطحات سحاب
يعني تصميم و ديكور و تخطيط و تشطيب و تنفيذ و اشراف
ببساطة العمارة يعني ...نحن لانبني مبانينا ولكن مبانينا تبنينا


المدني مع المعماري هو اللي بيخلي كل الاحلام الجميلة دي تقف على رجليها ويفكر ازاي الحاجات دي نقدر نخليها قوية ثابتة غير قابلة لحصول تاثير عليها من اهتزازات او زلازل او رياح او غيرها وازاي يدعمها بحديد وخرسانة ويحسب كل ده كويس علشان ميكونش في اخطاء تاثر على سلامة المبنى والناس اللي فيه وهو كمان فيه تخصصات كتير زي العمارة مش كلها مباني وانشاءات فيه طرق وكباري وانفاق وري وصرف صحي وسدود وغيرها منقوووووووووووووول

وطبعا ميكانيكا ده قسم الرجاله .... والرجاله اوووووي كمان :) والشهادة فيه مجروحة بقى :cool:
نادرا مابيكون فيه بنات يعني البنت بتحس لو دخلته انها وحيده
وده ليه سبب علشان طبيعة التعليم والتدريب والشغل في المستقبل ومواقع العمل بتكون صعبهعلى البنت وعايزه راجل يتحرك بحريه ويجري ويشتغل في مصانع بعيده او الصحراء او غيرها ،،، ده غير طبيعه العمل والتعامل مع العاملين والفنيين
نصيحه خليكي في عماره قسم جميل جدا برده وفيه مميزات كتير ومناسب للبنات،،،،،،
وافتكري مفيش حاجة في هندسة اسمها قسم سهل ،،،، ده كلام فاضي
كل قسم ليه مميزاته وتقله وصعوبته في نواحي معينه يعني عماره اللي عايزه تدخليها دول اكتر ناس بنشوفهم بيسهرو ويتعبو ويختفو من الدنيا طول السنه شغل ومشاريع ،،،، ومدني قسم شيتات الواحد بيطلع عينه فيها ومواد كتير وشيتات اكتر وتسليمات وكورسات ،،، ميكانيكا بقى نفس الكلام صعوبة في المواد كبير جدا وعايزه تركيز ومتابعة مستمرة في الدراسة اول باول علشان الحاجات مبنيه على بعضها وسكيزات وشيتات وحكايه

المهم يعني اهم حاجة تتعبي وتثبتي نفسك في اي قسم هتدخليه علشان تبقي حاجه في المستقبل

السلام عليكم انا مجموعى 390.5 وجاتلى هندسة حلوان ومكنتش اعرف ان مفيهاش قسم هندسة معماريه
المهم انا عرفت انى عشان ادخل عمارة هتبقى فى المطريه ولازم اكون جايبه جيد جدا..ف هل عمارة المطرية تستاهل التعب والمغامرة دى ولا احول فنون عمارة حلوان؟