السلام عليكم ورحمة الله وبركاته

رمضان مبارك يابنات .. ربنا يختمه بالخير ويزيح عن مصر الغمه ويرزقنا ليلة القدر ويجعلنا من عتقائه فى هذا الشهر .. قولو أمين

الكلام دة تعبت أقوله فى لكل واحدة بتدعى هنا وعلى الفيس .. وبقالى فترة عاوزة أكتبه فى موضوع عام أحسن .. بس الكسل بقى لعنة الله عليه

بس أهو جيه وقته

************

طبعا كلنا عارفين ان الدعاء مخ العبادة يابنات .. ومهما اتكلمنا عن فضل الدعاء وإنه يرد القدر وبيعمل المعجزات .. مش هنلاقى مكان نكتب فيه من كتر الكلام

بس عاوزين نتأكد من حاجات مهمة قوى .. أولا ان دعاءنا دة يكون بالخير مش بالشر

ثانيا ان دعاءنا دة ان شاء الله يكون دعاء مستجاب

************

ساعات نيجى نشوف ناس بتدعى ... تحسى انه مش دعاء .. دة لوى دراع .. كإنها والعياذ بالله عاوزة الإستجابة تكون بالغصب ( تعالى الله عن ذلك علوا كبيرا )


يعنى تيجى بنت مثلا بتحب ولد ونقول لها صلى استخارة .. وقولى فى اخر الدعاء ( اللهم ان كنت تعلم ان فى هذا الأمر خير لى فى دينى ودنياى ومعاشى وعاقبة أمرى فاقدره لي ويسره لى ثم بارك لى فيه .،، وإن كنت تعلم ان فى هذا الأمر شر لى فى ديني ودنياى ومعاشى وعاقبة أمرى فاصرفه عنى وأصرفنى عنه وأقدر لي الخير حيث كان ثم ارضنى به انك على ماتشاء قدير )

وبعدين نقول لها ربنا يجعله من نصيبك لو كان ليكم خير فى بعض ،، ميعجبهاش الكلام

تلاقيها بتدعى وتقول ياااااااااااااارب اجعل الخير فيه واجعله من نصيبى

لأ ومرة والله العظيم قرأت لواحدة بتقول ادعولى فلان يكون من نصيبى حتى لو مكنش فيه الخير ... تخيلو ؟؟

يعنى انتى عاوزاه حتى لو كان هيبقى سبب شقائك وتعاستك ويمكن كفرك كمان ... ماهو الحب لو بقى فى القلب بالشكل دة .. يبقى غلب على حب ربنا عز وجل والرضاء بقضاؤه وقدره ،، وبالتالى انتى عاوزة إجابة الدعوة حتى لو هتسبب موتك كافرة والعياذ بالله

************

طيب تيجى واحدة تانية بتدعى بقى .. تحسى انها مش بتدعى دعوة وتترك لربنا عز وجل تقدير الأمر وغنه يرزقها بالأصلح

لأ دى بترسم خارطة طريق متكاملة وعاوزة إمضاء عليها بالموافقة ليس إلا

من فترة قصيرة كدة لقيت فتوكة حبيبتنا بتنقل دعوة من واحدة صاحبتها على الفيس بوك وبتستحلفنا نأمن على دعاءها .. صاحبتها دى بقى بتدعى بإيه ( بس انا مش فاكرة حرفيا يعنى )

المهم هى بتدعى بالزوج الصالح اللى مواصفاته كذا وكذا ( عاجلا غير أجلا ) لأ دى كمان حددت فى صيف 2013 .. وربنا يكرمها بالحمل فى أول جوازها بتوأم ولد وبنت ويرزقها فى اول جوازها برضو بالحج والعمرة ويرزقها بشغل كذا وكذا وكذا

عاوزين نتفق على حاجة ... طبعا ربنا عز وجل قادر على إجابة كل دعواتنا مهما كانت .. بس فين أدب الدعاء ؟؟

**************

اقرءوا الآية دى كدة يابنات

وَيَدْعُ الْإِنْسَانُ بِالشَّرِّ دُعَاءَهُ بِالْخَيْرِ وَكَانَ الْإِنْسَانُ عَجُولا

ودى كمان

( ولو يعجل الله للناس الشر استعجالهم بالخير لقضي إليهم أجلهم ) [ يونس : 11 ]


طيب معناه ايه الكلام دة ؟؟ الآيات بتتكلم على الإنسان لما يدعو دعوة ويحسب ان فيها الخير فى حين انها شر ليه

زى اللى يدعى على نفسه وعلى أمواله وأولادة ومستعجل قوى ... فى حين لو استجيبت الدعوة هيندم طول عمره .. وان ربنا عز وجل لو عجل لنا بالشر بنفس استعجالنا للخير .. كان زماننا موتنا

طيب إزاى برضو .. تعالو نوضح اكتر

لو بنت عندها 20 سنة وعاوزة تتجوز .. بس هى لسه بتدرس وصغيرة ومش قد المسئولية .. ودعت ربنا بإلحاح وفعلا اتخطبت واتجوزت .. بعد الجواز معرفتش توفق بين البيت والحمل والجامعه ... أو لقيت المسئولية ضخمة شوية .. أو حتى اتجوزت الشخص اللى ياما دعت ربنا انها تتجوزه بالعافية

وفجأة تبصى على حياتها تلاقيها متبهدلة ومتمرمطة وطلعانة عينيها .. ولا معرفتش تتأقلم أو ندمت على سوء اختيارها لدرجة انها اتطلقت فى السن الصغير دة

يبقى استعجالها دة كان خير ولا شر ؟؟

ويبقى الأفضل ليها انها كانت تدعى إزاى ؟؟؟ هنقول دلوقتى

************

الدعاء ليه اتنين من الأسرار مهمين جدااااااااااااا .. اليقين وعدم التعجل

اليقين دة موضوع كبير وعميق داخل النفس البشرية .. بس خلاصته انى مش هقول ( أنا واثقة فى ربنا وانه قادر على الإجابه ) كدة بلسانى بس وأنا مش واثقة ... أو حاسة انى طول عمرى منحوسة وعمر ربنا ماهيتقبل منى والعياذ بالله

لأ لازم اليقين يبقى زى طاقة كبيرة من الإستبشار جواكى .. واقرئى الحديث دة كدة

ما من مسلم يدعو بدعوة ليس فيها إثم، ولا قطيعة رحم، إلا أعطاه الله بها إحدى ثلاث: إما أن يعجل له دعوته، وإما أن يدخرها في الآخرة، وإما أن يصرف عنه من السوء مثلها، قالوا: إذا نكثر؟ قال: الله أكثر. رواه الإمام أحمد وغيره، وصححه الشيخ الألباني.

اللى نفهمه من الحديث اننا ندعى وننتظر الخير حيث كان .. يعنى إما الإجابة أو الثواب فى الأخرة ودة أجمل .. أو ربنا يصرف عنك سوء كان جاى والدعاء دة رده عنك



طيب كدة اقدار ربنا عز وجل أفضل .. ولا دعاءنا اللى عمالين نلح ونستعجل ونجرى ورا نفسنا بيه ؟؟



نقول بقى الأخطر من دة كله .. اللى بيفسد الدعاء خاااااااااالص ويمنع إجابته .. وتفضلى تدعى وتستغربى انتى ليه مش بيقبل لك دعوة


اقرءوا الكلام اللى جاى دة كدة بتركيييييييييييييز


فصل من آفات الدعاء

ومن الآفات التي تمنع ترتب أثر الدعاء عليه : أن يستعجل العبد ، ويستبطئ الإجابة ، فيستحسر ويدع الدعاء ، وهو بمنزلة من بذر بذرا أو غرس غرسا ، فجعل يتعاهده ويسقيه ، فلما استبطأ كماله وإدراكه تركه وأهمله .

وفي البخاري من حديث أبي هريرة أن رسول الله - صلى الله عليه وسلم - قال :يستجاب لأحدكم ما لم يعجل ، يقول : دعوت فلم يستجب لي .

وفي صحيح مسلم عنه : لا يزال يستجاب للعبد ، ما لم يدع بإثم أو قطيعة رحم ، ما لم يستعجل ، قيل : يا رسول الله ما الاستعجال ؟ قال يقول : قد دعوت ، وقد دعوت ، فلم أر يستجاب لي ، فيستحسر عند ذلك ويدع الدعاء .

[ ص: 12 ] وفي مسند أحمد من حديث أنس قال : قال رسول الله - صلى الله عليه وسلم :لا يزال العبد بخير ما لم يستعجل ، قالوا : يا رسول الله كيف يستعجل ؟ قال : يقول قد دعوت ربي فلم يستجب لي .


خدتو بالكم من الكلام .. أفات الدعاء يعنى مفسداته



وبالتالى مينفعش نقول يارب ارزقنى بكذا عاجلا غير أجلا ... يارب اجعلنى من متزوجات هذا الشهر .. مخطوبات 2013 .. لأ ومرة واحدة صاحبتى كانت زمان بتنصحنى انى أدعى وأقول يارب اجعلنى من مخطوبات هذا الأسبوع احلى ابتسامة يعنى الراجل هييجى ويروح ونفكر ونتفق ونعمل الخطوبة فى أسبوع واحد باضحك


أو اللى تقعد زى ما قولنا ترسم خارطة طريق ... سيبتى ايه للقدر ياحبيبتى علشان تتفاجئى بيه وبعدين ترضى بإختيار ربنا ليكى ؟؟؟ مانتى اخترتى لنفسك كل حاجة اهو



انتى ممكن تدعى ربنا بشغل قريب من البيت فى شركة كذا ومرتب كذا .. وسبحان الله يكون ربنا عز وجل شايل لك فى الغيب حاجة احسن بكتير بظروف أفضل



ممكن تدعى ربنا بعريس وسيم وشيك وبيشتغل دكتور بالتحديد .. ميكونش أى حاجة تانية إلا دكتور وإلا مش هينفع وتكون عنده عربية وعيادة وأمه متوفيه ومعندهوش اخوات ... و ... و ...


وفى الأخر يجيلك دة وينشغل بنفسه وشغله وطموحه .. وترجعى تقولى ياريت



مفيش أجمل من الدعوات البسيطة اللى فيها يقين بالله عز وجل وتفويضه فى إختيار الأفضل ... وشوفى كدة الدعاء فى القرءان



رب انى لما انزلت إلىَ من خير فقير



شوفتو سيدنا موسى بيطلب ربنا من رزقه وخيره السابق .. وهو فى نفسه عاوز زوجة صالحة وسبحان الله بنا رزقه من وسع قوى



رب هب لى من الصالحين



ده دعاء سيدنا إبراهيم .. طلب من ربنا الذريه بأهم مواصفاتها .. الصلاح


مطلبش ولد وبنت عينيهم خضرا وشعرهم أصفر وبينجحو فى المدرسة كل سنة ويطلعو احلى من ولاد عمتهم .. وبينوروا فى الضلمة باضحك


هو دة بالظبط اللى لازم ندعى ربنا بيه ونصبر ونثق فى الله عز وجل



اللى تلاقيها بقى بتدعى بالزوج الصالح ولا الذرية ولا سعة الرزق .. ولا حتى بتدعى على حماتها وسلايفها الاتنين باضحك وفى اخر الدعاء بتقول ( عاجلا غير أجلا ) هاتوهالى هنا بقى علشان انا تعبت من كتر الكلام معاهم



**********


دى فكرة بسيطة من تأملاتى يا بنات حبيت اننا نتشارك فيها



ولا طالبة منكم تقييم ولا بتاع .. احنا جامدين قوى على فكرة ابتسامة


بس هطلب منكم اننا ننشر الموضوع وننصح بعض بيه لتعم الفائدة ليس إلا



ودعوة بظهر الغيب فى الأيام المفترجة دى لعل منا مستجابة الدعاء وربنا يتقبل دعاءها ليا



*********


رب اجعلنى مقيم الصلاة ومن ذيتى ربنا وتقبل دعاء


اللهم لاتجعل رمضان يرحل عنا إلا وقد كتبت لنا فيه الصلاح والفلاح وجعلتنا برحمك وفضلك وكرمك من عتقائك من النار


اللهم أتمم حملى وولادتى على خير وأجعلنى وذريتى وزوجى من حملة كتابك الكريم


أمين يارب العالمين

جزاكم الله خيراً
وجعله الله فى ميزان حسناتكم