السلام عليكم ورحمة الله

انا طالبة في الصف الثالث الثانوي جديدة هنا في المنتدي الثانوية

بصراحه انا اعجبت بالمنتدي الجميل دا وقولت أشارك فيه لانة اجتماعي ويوجد به الكرم والعطاء وزي ما يكون اسرة واحده واحب ان تقبلوني صديقة خفيفة عليكم ودا يشرفني ويسعدني حقيقي


انا عايزه أشارك مشكلتي لمن له حل او رأي اتمني يساعدني بية :

بأختصار انا مش محبة لدروس الخصوصية وبحس انه اغلبية الوقت بيضيع وبحس اني بقدر اجمع معلومات بمذاكرة البيت


ولكن لابد ان اخذ دروس خصوصية


لان في المدرسة مش بيهتمو علشان اغلبية الطلاب مش بيهتمو

والسبب الرئيسي ال مخليني اخذ دروس خصوصية اني

محتاجة الحلول وتأكيد الحلول الصحيحة وهي دي المشكلة

فا انا بفهم معظم الشرح من كتاب المدرسة ولو شيء صعب بشوف شرحة من الكتب الخارجية والامثلة

ولكن ال مضايقني ان مفيش إجابات غير في المرجعات بتاعة اخر السنة

ونفسي اعرف طريقة للتأكد من حلولي بالاجابات


بعد ان عرفتو مشكلتي عايزة اسأل هل حد يعرف


في كتب خارجية للمواد العلمية بتجيب المسائل والحلول بتاعتها – وما هي هذه الكتب؟

وهل في كتب خارجية لمواد اللغة بتجيب الأسئلة والاجابة - وما هي هذه الكتب؟



والسلام عليكم ورحمه الله

وأود ان أقول مقولة مختصرة تساعد


Get busy living or get busy dying.....there ain't nothing in between

وعليكم السلام
اولا
اهلا وسهلا بيكي:)
ثانيا
انت لو متأكدة انك تقدري تعتمدي ع نفسك وتذاكري ومش محتاجة حد يزقك بمعني اصح في المزاكرة فمتاخديش دروس وده اوفر وقت وجهد (علي فكرة لو ينفع انا مااخدتش دروس كان حصل كدة من زمان)
ثالثا
في كتب خارجية فيها اجابات ونموذجية كمان في الامتحان كيمياء وفيزياء واحياء باجابات
وفي المثالي اجابات مسائل بس
وعلي فكرة في برامج تعليمية مفيدة جدا علي قنوات مش عارفة هو ينفع اقول ولا لأ
بس مش مهم عامة هي مفيدة كلها
في حاجة كمان سبب من الاسباب اني بروح دروس ان المدرس بيجبرك تذاكري بيعملك امتحان
فبتذاكري وبتعرفي مستواكي وهكذا انا دي بالنسبة لي مهمة جدا
انت شوفي لو عادي هتقدري تذاكري وكدة يبقي خلاص
اسفة ع الاطالة وربنا يوفقنا جميعا .

شكرا جدا لردك
اللهم امين يارب
ايوة دا صح في المواد العلمية الامتحان بينزل الاجابات طيب مفيش كتاب تاني غير الامتحان علشان انا بحسة الكتاب دا بقي زي كتاب الوزاره زي الاساسي كده

بس حضرتك نسيتي تقوليلي اي الكتب ال اقددر اجيبها في مواد اللغة علشان برضو دي مهمة وعليها درجات كبيرة
واخيرا احب اشكرك ثانيا لردك :)

شكرا جدا لردك
اللهم امين يارب
ايوة دا صح في المواد العلمية الامتحان بينزل الاجابات طيب مفيش كتاب تاني غير الامتحان علشان انا بحسة الكتاب دا بقي زي كتاب الوزاره زي الاساسي كده

بس حضرتك نسيتي تقوليلي اي الكتب ال اقددر اجيبها في مواد اللغة علشان برضو دي مهمة وعليها درجات كبيرة
واخيرا احب اشكرك ثانيا لردك :)
الشكر لله وولا يهمك
بصي في المثالي كويس وفيه حل واسمع ان الوسام كمان كويس وغالبا فيه حل بس مش متأكدة
في العربي كنت بجيب الاضواء بس السنة دي هجيب المعلم اسئلة وامتحانات اسمع انه كويس
ومعايا الاضواء كمان
في الانجلش بفضل سربريز وفي ناس بتفضل ذا بيست والاتنين كويسين
انا باخد فرنساوي
برافو كويس في الفرنساوي اما باقي اللغات بصراحة مش عارفة
نصيحة
لو عندك حد قريبك او معرفة او اي حاجة مخلصين وكانوا في علمي اطلبي منهم ملخصات
الملخصات القديمة مفيدة جدا ع فكرة وكمان انت هتجيبي اللي يريحك
والملخصات القديمة خليها للحل هتستفيدي منها
اتمني اكون افدتك :)

فعلا استفدت

السلام عليكم ..

احييكى يا هايدى على تفكيرك الجميل انك ماتاخديش دروس ما شاء الله عليكى .. بصى انا خلصت ثانوية عامة و رايحة اولى كلية .. انا كنت ع النظام القديم و احب انصحك بس بس مش عارفة ارائى هاتكون متناسبة معاكوا و لا لاء ..

بصى موضوع الدورس دا بالنسبة ليا كان مهم جدااا ف تالتة ثانوى بالذات لان المدرسة ماكنش حد بيروحها خاالص و مفيش مدرسين بيدخلوا فصل فاضى .. المهم انتى لو شايفة انك هاتقدرى براحتك بس دا مستقبلك و فكرى فيه كويس و يمكن يكون حظك حلو ف مدرسين فصلك و لعلمك كتير من اوائل الجمهورية السنوات اللى فاتت ماكانوش بياخدوا دروس ف كل المواد و اعتمدوا على نفسهم

موضوع الكتب بقى .. كتاب الامتحان ف الفيزيا و الكيميا مجاب و جميل جدااا و الوسام مجاب بس ماكنتش بحل منه بصراحة .. بس الاحياء ماعرفش لانى كنت رياضة 2

اما مواد اللغة انا كنت بدووخ على كتب مجابة ف الانجليزى بس مالاقتش ف تانية اما ف تالتة جبت Top Student و حملت اجباتة من ع النت ف المواجعة بجد افادنى جداااااااااااااااااااااااااااااااااا و كانت اسئلته تحفففففففففففففففة و جه منه سؤال بالنص اغلب اصحابى ماعرفوهوش بجد كتاب جااامد
لو انتى عايزة تعرفى الاجابات اسئلى المدرسين عندك ف المدرسة هايكون معاهم تقريبا لانى اكتشفت ف الاخر ان المستر بتاعى كانت معاه اجابات الكتب كلها

بس بجد نصيحتى توب روووعة و سيربرايز كويس بس سهل اووى هو تدريباته حلوة

و العربى انا جربت الاضواء عشان المعانى بتاعته مهمة و كان جميل فعلااا

و ربنا يوفقك و لو عايزة اى حاجة انا ف الخدمة :)

انا بصراحة فكرت اعمل كده لكن الدروس بقت فى دمنا
وغير كجه صعب انك تاخدى القرار ده مع اولياء الامور

بالنسبة للمراجعات فعلا ذا بيست وسيربرايز

ربنا يبارك فيكم ويكرمكم يارب اللهم امين

وعليكم السلام ورحمة الله وبركاته
انا عندى نفس المشكلة برضة ومع ذلك انا متفائلة للسنة دى ان شاء الله :)
بس حتة الدروس السنة دى مش هتبقى ضغط زى باقى السنين نظرا لصغر المناهج وانتى لو اخدتى فيها درس واحد مع مدرس واحد هيكون احسن ولما تبداى بدرى بدرى هتخلصى بدرى هيكون عندك وقت كبير تراجعى فيه
وبالنسبة للكتب الخارجية المواد العلمية مافيش افضل من الامتحان فيها سواء كيميا او فيزيا او احياء او جيولوجيا . اما بالنسبة للغات دى ممكن تجيبى الاجابات من على النت لان اغلب اجابات الكتب الخارجية فى اللغات اجابتها بتنزل على مواقع على النت انا المدرس بتاعى بيجيبها ليا . وربنا يوفقنا جميعا ونحقق احلامنا كلها يارب ^_^

شكرا ليكي بجد وانا هسأل المدرسين ربنا يبارك فيكي ويجعلة في ميزان حسناتك افدتيني