Merooo
31-01-2006, 05:05 PM
ليه .. ليه
ليه لما نيجى نمشى فى المطر لظروف إستثنائية بنروح رافعين أكتافنا لفوق ؟ هاتعمل إيه يعنى
ليه لما نحس إن إحنا دخلنا طريق غلط وإحنا سايقين العربية بنخفض صوت الكاسيت أو راديو السيارة ؟
ليه لما بتكون بطارية الريموت شبه فاضية ، بنضغط على الزراير جامد ؟
ليه لما حد بيهادينا قلم جديد .. أول حاجة وإحنا بنجربه بنكتب إسمنا ؟
ليه بنقول هدية مجانية ..؟ مش المفروض إن الهدية تكون مجانية
ليه لما نكون جوه المنزل والسماء بتمطر بنسأل هو الجو بيمطر بره ؟ هى عمرها مطرت جوه
ليه لما واحد يقولنا خلى بالك الحائط لسه الطلاء مانشفش مانصدقوش ونمد صباعنا نتأكد ؟
ليه الخدمة بتكون سريعة لما المطعم يكون مزدحم أكتر من لما يكون نص نص ؟
ليه لما الواحد بيركن السيارة فى موقف فاضى اللى جاى وراك بيركن جنبك ؟
ليه دايما لما حد بيجري يلحق الأتوبيس تلاقيه مبتسم أو بيضحك ؟
ليه بنفتكر إن لما ندوس على زرار الأسانسير كتير هاييجى بسرعة ؟ أو مثلا ليه لو واحد جه بعديك وأنت مستنى الأسانسير بيدوس على زرار الأسانسير ولا كأنك موجود ؟
ليه وإحنا بنأكل الطفل الصغير فى فمه بالملعقة .. بنفتح فمنا ؟
ليه دايما عندنا إستعداد تام إننا نصدق أى حد بيكلمنا فى ودانا .. بيوشوشنا ؟
ليه لما بنتصل بالتليفون .. دايما النمر الغلط مابتكونش مشغولة ؟ وليه دايما لوحة أرقام التليفون أو الموبايل بتكون عكس لوحة أرقام الآلة الحاسبة أو حتى أرقام الكيبورد ؟ وبمناسبة التليفون ليه لما واحد يعطيك رقم تليفونه بيقوله بسرعة ؟ وليه عمرنا ماإستمتعنا بالموسيقى فى التليفون لما نكون على الإنتظار ؟
ليه لما بنصحى من النوم دايما بنحس إن كمية النوم ناقصها عشر دقايق ؟
ليه الشخص اللى بيشخر وهو نايم دايما بينام الأول
الأسكندرانية
31-01-2006, 05:55 PM
يمكن عشان اتوعدنا على كده
بس موضوع واقعى اشكرك
الأسكندرانية
31-01-2006, 05:56 PM
قصدى اعتادنا التصرف ده كروتين يعنى
basmala
31-01-2006, 08:16 PM
مش عارفه ياميروو حاجات كلها بتحصل فعلا واحنا بنعملها
بس مش عارفه ايه السبب
شكرا ميروو على الموضوع الواقعى
علمي علوم
31-01-2006, 11:08 PM
فعلا حاجات كلها مثيرة للتفكير
شكرا بجد على الموضوع الواقعى الرائع
بس انا عارفة ليه دايما النمر الغلط مابتبقاش مشغولة لان بسبب كدا عرفنا انها نمرة غلط واكيد ياما اتصلنا على نمر غلط وكانت مشغولة او ماحدش رد فعمرنا تقريبا ماهنعرف انها كانت نمرة غلط
وشكرا مرة تانية بجد
موضوع حقيقي جدا شكرا علي الموضوع يا ميرو
بس اكيد ليها سبب الحاجات دي ممكن يكون حاجات نفسية
korkosha
01-02-2006, 12:17 AM
موضوع جميل
تسلمي
بس مش عارفة ليه
اينشتاين
01-02-2006, 06:13 AM
Originally posted by Merooo@Jan 31 2006, 05:05 PM
ليه .. ليه*
ليه لما نيجى نمشى فى المطر لظروف إستثنائية بنروح رافعين أكتافنا لفوق ؟ هاتعمل إيه يعنى
عشان بنتصور اننا هنحمى راسنا من المطر
ليه لما نحس إن إحنا دخلنا طريق غلط وإحنا سايقين العربية بنخفض صوت الكاسيت أو راديو السيارة ؟ طبعا عشان نقدر نركز لان صوت الموسيقى او الاغنية اللى شغالة هتقصر على التركيز
ليه لما بتكون بطارية الريموت شبه فاضية ، بنضغط على الزراير جامد ؟
لاننا بنفتكرها معلقة
ليه لما حد بيهادينا قلم جديد .. أول حاجة وإحنا بنجربه بنكتب إسمنا ؟
عشان اسهل حاجة نقدر نكتبها بسرعة
ليه بنقول هدية مجانية ..؟ مش المفروض إن الهدية تكون مجانية
لان احيانا الهدية بتكون غير مجانية , مثلا لو رحت كارفور ممكن يبقى فيه عرض ان انت تشترى كيسين هامبورجر وعليهم كيس مكرونة هدية , يعنى شرط انك تكسب كيس المكرونة انك تشترى كيسين هامبورجر
ليه لما نكون جوه المنزل والسماء بتمطر بنسأل هو الجو بيمطر بره ؟ هى عمرها مطرت جوه
يعتبر تحديد فى الكلام , يعنى لما اقول لصاحبى رحت مدرسة الاورمان اللى فى الدقى مع ان مفيش اورمان غير فى الدقى
ليه لما واحد يقولنا خلى بالك الحائط لسه الطلاء مانشفش مانصدقوش ونمد صباعنا نتأكد ؟
يمكن عشان نتأكد او شكل صباعنا بيبقى حلو وهو مدهون بوية* :blink:* :blink:
ليه الخدمة بتكون سريعة لما المطعم يكون مزدحم أكتر من لما يكون نص نص ؟
عشان العمال بيبقوا شغالين بذمة عشان يمشوا الزباين , بس انا عمرى ما شوفت كده , سواء المطعم زحمة او نص نص دايما الاوردر بييجى متأخر
ليه لما الواحد بيركن السيارة فى موقف فاضى اللى جاى وراك بيركن جنبك ؟
عشان لو حد كلمه يقول ما هو اللى جنبى راكن اهوه
ليه دايما لما حد بيجري يلحق الأتوبيس تلاقيه مبتسم أو بيضحك ؟
عشان شكله بيبقى بايخ ( حصلت معايا كتير )
ليه بنفتكر إن لما ندوس على زرار الأسانسير كتير هاييجى بسرعة ؟ أو مثلا ليه لو واحد جه بعديك وأنت مستنى الأسانسير بيدوس على زرار الأسانسير ولا كأنك موجود ؟
شىء من الخنقة
ليه وإحنا بنأكل الطفل الصغير فى فمه بالملعقة .. بنفتح فمنا ؟
عشان يقلدنا ويفتح فمه
ليه دايما عندنا إستعداد تام إننا نصدق أى حد بيكلمنا فى ودانا .. بيوشوشنا ؟
عشان كل تركيزنا بيبقى معاه بس برضه مش شرط نصدقه
ليه لما بنتصل بالتليفون .. دايما النمر الغلط مابتكونش مشغولة ؟ وليه دايما لوحة أرقام التليفون أو الموبايل بتكون عكس لوحة أرقام الآلة الحاسبة أو حتى أرقام الكيبورد ؟ وبمناسبة التليفون ليه لما واحد يعطيك رقم تليفونه بيقوله بسرعة ؟ وليه عمرنا ماإستمتعنا بالموسيقى فى التليفون لما نكون على الإنتظار ؟
ايش عرفك انها مش مشغولة , ممكن تكون مشغولة بس انت مش هتعرف طبعا انها غلط لان ما حدش رد عليك , لان الموبايل او التليفون استخدامهم واحد فالمصمم اللى صممهم خلى شكلهم واحد
بردضه الكيبورد و الالة الحاسبة استخدامهم واحد فالمصمم اللى صممهم كان ذوقه مختلف عن ذوق المصمم التانى فخلى شكلهم كده , لما حد بيدينى رقم تليفونه بيقوله بسرعة لانه اكيد ادهونى عشان حاجة مهمة لازم تخلص بسرعة , وعمرنا ما استمتعنا بالموسيقى لاننا بنكون مستعجلين وعايزين ننجز
بس انا عن نفسى بتعجبنى الموسيقى وبقعد اسمعها
ليه لما بنصحى من النوم دايما بنحس إن كمية النوم ناقصها عشر دقايق ؟
عشان النوم بيبقى طعمه حلو , وما يهونش على الواحد انه يسيب السرير
ليه الشخص اللى بيشخر وهو نايم دايما بينام الأول
عشان عنده دايما استعداد انه ينام على طول لان الشخير معناه انه تعبان فشىء طبيعى* انه هينام الاول 71006
اعتقد انه تفسير منطقى* :blink:* :blink:* :blink:
المخلص الي الابد
01-02-2006, 11:58 AM
كلامك واقعي جدا يا ميرو وشكرا علي الموضوع
وردك اغلبيته جميل وصحيح يا اينشتاين
coo_girl_ool
01-02-2006, 12:04 PM
فعلا دى كلها حاجات واقعية واحنا فعلا بنعملها
بس غريبة
اسماءفريد
01-02-2006, 01:36 PM
فعلا يا ميرو انا مع انيشتاين في الكلام اللي قاله كله
ده كان هيكون ردي لو مش هوا كان كتبه
msamido
01-02-2006, 05:33 PM
لما نمشي في المطر ولما نحس اننا دخلنا منطقة غلط ولما تكون بطارية الريموت فاضية الغريزه هي اللي بتخلينا نعمل الحاجات دي
ولما حد يهادينا بقلم هدية فعلا اول حاجه بنكتبها اسمنا لان دي اول كلمة بتخطر في بالنا
اما حكاية الهدية المجانية دي مش عارف والله ايه لازمة مجانية فعلا بعد هدية
ولما نبقي بنأكل الطفل بنفتح فمنا بس علشان يقلدنا الطفل
ولما حد يوشوشنا دايما بنحس انه هيقول حاجه سر فمستعد يخبيها علشان كده قابلة للتصديق اكتر والا كان قالها بصوت عالي بدون خوف ان حد يسمعه
وحكاية النوم دي انا مش بحس انه ناقصه عشر دقايق غير لما حد يصحيني لكن لو صحيت من نفسي بنحس ان النوم كان تمااااام
واكيد الشخص اللي بيشخر وهو نايم لازم ينام الاول لانه لو يعرف مش يشخر وهو نايم كان عملها فأكيد مش هيعملها وهو صاحي
وانا مع اميرة في حكاية النمر الغلط
وفي النهاية الموضوع كله بتحكمه حركات غريزيه طبيعيه في البشر علي اختلاف اشكالهم وجنسياتهم وعاداتهم ومنقدرش نقول غير سبحان الله
شكرا يا ميرووووووو علي الموضوع الواقعي جداااااا ده
فعلا الحاجات دى حقيقية جدااااااااااا
شكرا يا ميروووووووووو على الموضوع الجميل ده