منقول رائعه للشاعر عبد القادر امين كتبها حبا وكرامه للطيب عبدالستار القاضى
************************************************** **************
بعد اعتقال أخى الحبيب وتوأم الروح الأستاذ / عبد الستار القاضى الرابعة عصرا منذ شهر تقريبا بدأت هذه القصيدة وما استطعت إتمامها للألم النفسى واكتملت الآااااااااان بعنوان

" يا كش تولع ..."

فى السر واللا فى العلن
ما عدتش فارقة يا وطن
بيثبتوك .. عاوزين بطاقتك للمرور
كده عينى عينك
وماعدش فيه نضارة سودا
خرم الجريدة خلاص صبح وسع الوطن
شايفين ضميرك وانت ناوى تقول حرام
فيقولوا نقطع له اللسان
مشيك خلاص جوه الحيطان .. كتروا الودان
مين اللى بلغهم يا صاحبى عن مكانك
لما جولك فى العصارى وانت داخل لاجل ما تحضن ولادك
قلت نظرة تبل ريقك فى المهالك
كان ضرورى إنك تدارى بس برضه كان زمان
الحكاية خلاص يا صاحبى عينى عينك
والكلاب فضوا الميدان
حتى جارك اللى انت طول العمر شايله فوق دماغك
لما يمرض واللا بتسدد ديونه
رمضان بيشهد والشنط داخلة وخارجه
والعيدية والماهية
ده انت كان فاضل يا صاحبى تقدم ابنك له هدية
فجأة بيغنى ويهتف إنه تسلم له الأيادى
واللى فاتت يا ابن أوسخ جزمة فى رجل الأعادى
مش برضه كانت لك أيادى
بس تبنا م الساعة دى
مادام طلعتوا عبيد بيادة .....
يا كش تولع فوق دماغكم
ماتلاقوش اللى يطفى ف لحظة ناركم
هااستنى بكره يجيبوا داغكم
والخراب يوصل لداركم
وتنادوا يا اهل الخير غيتونا
راح اقول موافق تحت أمرك
شرط واحد ...
رجعولنا اللى ***تم أو حرقتم أو سحلتم أو سجنتم
ردى واضح من كلامى
يا كش تولع ع اللى سلمهم زمامى .
29 / 10 / 2013