السلام عليكم ورحمه الله وبركاته




دلوقتى التنسيق ابتدى وانا مرحله اولى والمشكله انى مش عارفه ادخل ايه

انا جايبه 83% ادبى
وهفكر معاكم بس بصوت عالى

فاانا فكرت وقولت اداب انجليش او يابانى ولاتينى
لان القسمين دول شدونى اوى

فراحت بنت عمى احبطتتنى لانها فى اداب تاريخ

وقالتلى ان اداب انجليش ويابانى ولاتينى صعبين جدا لانك بتاخدى فيهم حضارة وتاريخ وشعر وادب وحاجات كتير اوى وهى صعبه

وكده يبقى فاضل اداب لغه عربيه واعلام وعبرى وتاريخ وعلم نفس وفلسفه

نمسك التاريخ تحس انك مش فى كليه اصلا مفيش نظام ولا انضباط ولا اى حاجه

وطول السنه هيصه الا اخر شهرين تروحى زى الشاطرة تجيبى الملزمه وتزاكرى وخلاص وسواء زاكرتى او مازكرتيش عمرك ماهتجيبى تقدير كويس

واهم حاجه انك تجيبى الكتاب وتدى للدكتور الورقه الى فيه عشان ينجحك:r;)

وكمان فى جزء تاريخ شيعى طب هو انا ناقصه وكمان بيدوة من تحت لتحت وخاصه الدكتورة زنوبه كانت بتدهولهم من غير ماتقولهم انه شيعى:rolleyes:


اعلامم
مينفعش اصلا لانى لو دخلتها هشتغل صحافيه

ومفيش اصلا فى مصر حاجه اسمها حريه صحافه
فعلى ايه

عبرى ملهمش مستقبل الا لو سافرت فلسطين^_^


واداب علم نفس واداب فلسفه بيقولوا نار وكلها حفظ وانا اصلا ماليش بالحفظ

فكده اداب خلاص سيبنا منها





فاضل تجارة وانا اصلا مش حباها و
امه لا اله الا الله فيها ومفيش اهتمام بالطلبه وسداح مداح

واحلى اقسام تجارة انجليش وخارجيه

وخارجيه فى حلوان وبيقولوا ان جامعه حلوان الدكاترة فيها معظمهم قلات الادب هم والطلبه طبعا الا من رحم ربى
بس بيقولوا الغالب

انا مش عارفه صح ولا غلط
وكمان بعيده اوى يعنى ساعتين رايح وساعتين جى


وتجارة انجليش مش عارفه بتاخد من كام فى الانجليش

وفى االبيت عندنا كده او كده لاغين تجارة اصلا


وبعد كده ناس كتير اوى نصحونى انى ادخل رياض اطفال

وقالو انى بحب الاطفال حنينه عليهم وعندى صبر وبعرف اتعامل معاهم فده هيبقى كويس ليه وكمان بحب الاعمال اليدويه


بس المشكله ان المجتمع بيبص ليهم نظرة غبيه فانا قولت انى ادخلها لانى مش شايفه حاجه تانيه وبعد كده

اخد كورس اوتذم واشتغل مدرسه اوتذم

والكليه هتفدنى لانى هدرس فيها علم نفس الطفل وكيفيه التعامل معهم ومع الفئات الخاصه

بس نظرة الناس ليها مخوفانى



وبعد كده لقيت حقوق بس سمعت انها صعبه دمااااااار

وانى حتى لو دخلتها ونجحت هبقى سياده الوكيل يعنى ولا ايه:rolleyes:
وفرضا اتخرجت ومش بقيت وكيله
وبقيت محاميه هبقى الاول تحت التدريب الى هو مرمطون المكتب(سورى يعنى)

ولما اخلص فترة تدريبى وبقيت مساعد محامى هبقى صبى المسؤل عنى او اى حاجه تحصل حتى لو مش مسئوله عنها هبقى فى وش المدفع

وفين وفين لما هامسك قضيه ولما اسمى يتعرف وابقى مشهورة

وكمان خايفه لانى اقع فى قضيه ومبقاش عارفه من الصادق ومن الكادب او انى اخلى المظلوم مسجون والظالم حر
لا ياجماعه الله الغنى

فانا حقيقى مش عارفه ادخل ايه وهى دى الكليات الى اعرفها
وكل كليه وفيها عقده مش عارفه ابجد
:eek::eek::eek::eek:
عندى حاله احباط