http://up.graaam.com/uploads/imag-6/uploada69fdfc530.gif

بسم الله الرحمن الرحيم
و قبل اي كلام احب اقولكم ملاحظة بسيطة
اسفة لو هطول عليكو بس هتكلم فى اكتر من مشكلة
وحاولت اراعى فى الموضوع ده انه يكون خلاصة كلام كتييير رتيب و ممل
لإنى عايزاكو تقروه للاخر وتستقبلوه بنِفس كده عشان تستفيدو منه بأكبر قدر ممكن
وده للاسف مش بيراعوه الناس اللى بتحطلنا المناهج
وده اللى بيخلينا نزهق من المذاكرة ونبعد عنها
احنا نقدر نبص للمناهج على إنها ممتعة زي ماقولت فى الموضوع التانى خد المعلومة على انها دمها خفيف
او حط التاتش بتاعك

http://2.bp.blogspot.com/-KfkI-AJf3yQ/UnqC3KilzMI/AAAAAAAAOfY/ip_LURHzpSo/s1600/%D8%AD%D9%84+%D9%85%D8%B4%D9%83%D9%84%D9%87+%D8%B9 %D8%AF%D9%85+%D8%A7%D9%84%D9%85%D8%B0%D8%A7%D9%83% D8%B1%D9%87++%D8%B9%D8%B4%D8%A7%D9%86+%D8%AA%D9%86 %D8%AC+%D9%84%D8%A7%D8%B2%D9%85+%D8%AA%D8%B0%D8%A7 %D9%83%D8%B1+%D9%88%D8%B9%D8%B4%D8%A7%D9%86+%D8%AA %D8%B0%D8%A7%D9%83%D8%B1+%D9%84%D8%A7%D8%B2%D9%85+ %D8%AA%D8%B3%D8%B9%D9%89++%D8%B5%D9%88%D8%B1+%D9%8 3%D9%88%D9%85%D9%8A%D9%83+%D9%83%D9%88%D9%85%D9%8A %D8%AF%D9%89+%D9%85%D9%86+%D9%81%D9%8A%D9%84%D9%85 +%D8%BA%D8%A8%D9%89+%D9%85%D9%86%D9%88+%D9%81%D9%8 A%D9%87++%D9%87%D8%A7%D9%86%D9%89+%D8%B1%D8%A7%D9% 85%D8%B2%D9%89+%D9%88%D8%AD%D8%B3%D9%86+%D8%AD%D8% B3%D9%86%D9%89+%D8%B9%D8%A7%D9%84%D9%85+%D9%85%D8% B4%D9%83%D9%84%D9%87+%D8%A7%D9%84%D8%B3%D8%A7%D8%A E%D8%B1.jpg

دا لما تيجى تذاكر اصلا
طب انا مش بذاكر ومش عايز اذاكر !!
كلنا جوانا الشخصين دول "واحد بيقولك :ذاكر والتانى بيقول :ماتردش عليه"
دى المشكلة
طبعا اي مشكلة عشان نحلها لازم ندرسها
وعشان ندرسها لازم نعرف تلت حاجات :
1-سبب المشكلة
2-عوامل المشكلة
3-مش عارفة بس انا قولت تلت حاجات عشان اي حاجة بيبقا فيها تلاتة -معرفش ليه الرقم الغريب ده
المهم يعنى
انت مش بتذاكر ليييييييه ؟؟؟
اسباب مشكلة عدم المذاكرة كتيرة
اسأل نفسك السؤال ده وفكر كده ايه اللى هييجى فى بالك
اولاً خلينا نتفق على حاجات مفروغ منها
هو إن علاقتك بربنا تكون كويسة
وإن صحتك تكون بخير -بتاكل كويس بتنام كويس ..إلخ-
لو كل ده تمام يبقا انت المفروض تحمد ربنا وتستغل صحتك انك تنجز مذاكرتك

مشكلة الملل والزهقان :

طب انا مش عارف اذاكر ببص للكتاب و أتنح !!
متعقدش نفسك وتقول انك كده ضعت ومفيش حل والدنيا تقلب اسود وتنزل كلمة THE END
ليه ليه ؟!
ده اصلا طبيعى ومنطقى
محدش بيحب يلتزم بشيء معين ويبقا مُلزَم يكرره
بس خلينا نشوف اسباب الملل :
1-ضعف الدافع للمذاكرة او غموضه
2-إن اسلوبك فى المذاكرة يكون غلط او فى ظل اضطراب نفسى
3-انك تفقد الثقة فى نفسك وفى قدرتك على الفهم

طب الحل إيه ؟
بص:
1-حط قدامك دوافع ترفع همتك << انا مثلا مجرد مابتخيل نفسى وانا باشمهندسة
بجد بحس إن الحياة بقا لونها بامبى ده غير طبعا بابا وماما وفرحتهم اما أملهم فيا يتحقق بعد ما تعبو فيا -بجد معناها كبير اوى-
2-حدد اهدافك ونَظّم وقتك
هتقوللى انا ضع منى كتيير و اتكوم عليا كتير
هقولك "طب وفيها ايه!!" عااادى والله ابدأ من اللحظة دى وربنا هيوفقك ويعينك
يعنى مثلا تفضل كدا يتكوم عليك مذاكرة اكتر ولا تخلص جزء -حتى لو بسيط- من اللى عليك
مشوار ال1000 ميل بيدأ بخطوة :d
نظم وقتك من غير ما تخنق نفسك بجدول المذاكرة الممل اللى انت اكيد بتغيره كل يوم اصلا
زي ماكتبت فى كومنت قبل كدا :
جدول المذاكرة ده مش حاجة مقدسة يعنى هى الفكرة كلها اننا ننظم وقتنا صح ونستغله بأكبر قدر ممكن
انما فكرة التقييد بمواعيد محددة واشياء محددة دى فكرة تخنق اصلا
شخصياً اخدتها نصيحة من استاذ -ربنا يباركله- قاللى جدولك خليه عبارة عن اربع خانات
الاولى: مادة فهم
التانية: مادة حل
التالتة: مادة حفظ
الرابعة: مادة ضعف -ودى اختار مادة يكون مستوايا فيها ضعيف-
فيه مواد بيجتمع فيها اكتر من خانة طبعا بس الفكرة "حدد الأولوية"
الفهم: هيحتاج منك ذهن صافى وهدوء
خليه فى الوقت اللى من بعد الفجر لحد الساعة 9 كدا ودا وقت طبيعى بنكون كلنا فاضيين في معظمه حتى لو عندنا مدرسة
او من 5 المغرب لحد 9 او 10 باليل -دول احسن وقتين لتخزين المعلومات زي مانتو عارفين-
الحل و الحفظ
فى اي وقت ممكن تحل وتحفظ لو وقت فاضى فى المدرسة او حتى لو قاعد بتتفرج ع التليفزيون او لو انتى واقفة فى المطبخ .. دا هيوفرلك وقت
وخلى دايما الحاجات اللى بتحفظها تكون من تلخيصك انت فى وقت الفهم
اما مادة الضعف دى حطها فى تصنيفها وحاول تركز عليها شوية لحد ماتلاقيها اتحسنت
3-تنويع المذاكرة بردو بيكسر الملل بس متحاولش تذاكر مادتين صعبتين فى وقت واحد
4-لو حاجة معصلجة معاك اسأل واحد زميلك صدقنى وقتها هتثبت اكتر من انك تقعد تحفظها
5-كُل شيبسى ديلايتس عشان متتنفخش من الملل :p

مشكلة النسيان :

طب أنا علاقتى بالمذاكرة انها بتطير اسرع من السبرتو

http://sphotos-f.ak.fbcdn.net/hphotos-ak-snc6/s480x480/270434_380778298671890_47696145_n.jpg

يعنى انت بتنسى !
هقولك تعمل ايه
اصلا النسيان دا طبيعى فينا كلنا
لو سبب انك تنسى بيكون الفاصل الطويل بينك وبين المادة
1-حاول تستخدم المعلومة باستمرار او تربطها بحاجة فى الواقع اللى انت بتعيشه << عارفة طبعا هتقوللى ان دى هرتلة بس والله سهلة لو شغلت دماغك
2-راجع معلوماتك اكتر من مرة
زي ماقولتلك لخصها بإيدك عشان تفتكرها كويس
انا جبت ورقة من اسكتش كبير وتنيتها بالطول وكتبت فى كل جزء من التنية قوانين كل فصل من الفيزيا
والورقة معايا على طول فى اي وقت ببص فيها
والله العظيم انا حافظة القوانين مع إن انا بنسى بسرعة جدا بسبب ان الدم مش بيوصل لمخى بصورة سليمة من الانيميا والضغط الواطى والهبل دا كله
لو مادة فيها افكار ونقط تتحفظ اعمل ارتباط وتزاوج بين النقط دى لحد ما يخلفو ويجيبو عيال كمان :p

انما بقا فيه اسباب تانية للنسيان و هى بتكون ناتجة عن ذهنك المتشتت يا معلم
و ده هيدخلنا فى اكتر من مشكلة

http://files2.fatakat.com/2011/7/13107817774788.jpg
http://cdn2.alnaddycdn.com/images/2012/12/1354713868u2796w.jpg

انت ممكن تعمل المستحيل عشان تبعد عن المذاكرة
وتتلكك على اتفه الاسباب
يعنى مثلا انا كنت قاعدة بتفرج ع التليفزيون والنور قطع
قولت : يوووه هما هيفضلو يقطعو النور كدا وفاضل على امتحاناتنا كام يوم
طبعا الحاج بصلى -والحمد لله ان النور كان قاطع ماشوفتش البصة- بس سمعتو بيقول : ده على اساس ان النور قطع عليكى وانتى بتذاكرى !!

مشكلة ان عقلك يبقا فى ناحية وانت والمذاكرة فى ناحية تانية :

دى بقا متفاوتة بين كل شخص وشخص
انت عندك مشكلة و عملت اجتياح لحياتك و استولت على افكارك
هوب مش عارف تركز
ليييييه ؟!!
طز فى اي مشكلة تخليك مش بتفكر كويس فى مستقبلك
ده مستقبلك يعنى بهدوء وبراحة اي مشكلة ممكن تتحل
صفى ذهنك تماماً لو عندك مشكلة عائلية عاطفية -فاهمنى طبعا- اي حاجة من إياها دى
متفكرش فيها و احصرها فى مكانها
و إدى للمذاكرة حقها

خلااااااصة الهري اللى انا هريته دا كله :

دا كلام عن المشاكل بصورة عامة
بس انت الوحيد اللى تقدر تحدد مشكلتك
حددها و اختار الحل المناسب مش المريح
و قيّم نفسك من وقت للتانى
واحترم نفسك بمعنى انك تديها وضعها الطبيعى
و هو ان ربنا خلقك عشان يكون ليك هدف تحققه
وفيه مقولة بحبها اوى " النجاح لا يتطلب قدرات فذة ولكن يكفى استغلالك لقدراتك الحالية"

ابدأ من دلوقتى بجد و خدها ببساطة هتلاقى نفسك بجد اتقدمت جامد اوى

https://fbcdn-sphotos-h-a.akamaihd.net/hphotos-ak-ash3/406017_315923598509391_1526616887_n.jpg

اي حد عنده مشكلة تانية غير اللى انا قولتهم يتفضل يقولها

http://www.elfagrschools.com/uploads/ZYAhy8AHWKF9.jpg

فعلا وربنا حسبنا الله ونعم الوكيل !!!

جميل الموضوع
مشكورة كتير

جزاكى الل خيرا

الله يبارك فيكى ^_^
موضوع أكثر من رائع

حلوة النكت
ههههههههههههههههههههههههه
والموضوع احلى

ياجماعة الموضوع جميييييييييييييييييييييييييييل بس انا عايزة حد يساعدنى امتحناتى الاسبوع الجاى يوم 28 ولسه مرجعتش قولولى اعمل ايه وايه اسرع طريقة للمراجعة انا فى اولى ثانوى ساعدونى
وجزاكم الله كل خير

ياجماعة الموضوع جميييييييييييييييييييييييييييل بس انا عايزة حد يساعدنى امتحناتى الاسبوع الجاى يوم 28 ولسه مرجعتش قولولى اعمل ايه وايه اسرع طريقة للمراجعة انا فى اولى ثانوى ساعدونى
وجزاكم الله كل خير



انتي باقيلك من بكرة 8 ايام على الامتحان ..
هنقسم التمن ايام على مرتين ..
أربع أيام ( تاريخ - انجليزي - كيميا - رياضة )
أو ( جغرافيا - انجليزي - فيزيا - رياضة )

الأربع أيام اللي بعدهم ( عربي - فرنساوي - أحياء )
أو ( عربي - فرنساوي - فلسفة ) حسب المجموعة اللي اخدتيها

على فكرة التمن ايام دول ممكن يصنعوا المعجزات .. بس لازم التركيز فيهم ..

وده تقسيم المواد
التاريخ :
1- المقدمة والحضارة الفرعونية .
2- حضارة فينيقيا والعراق وشبه الجزيرة .
3- الحضارة الرومانية .
4- التواصل الحضاري + حل امتحانات .

انجليزي :

1- اول اربع وحدات وشابتر .
2- تاني اربع وحدات وشابتر .
3- تالت اربع وحدات وشابتر .
4- الشابتر الاخير + حل امتحانات .

كيميا :
1- الكيمياء مركز العلوم والكيمياء الكمية .
2- المحاليل والحماض والقواعد .
3- الكيمياء الحرارية والنووية .
4- الكيمياء والبيئة والنووية .

رياضة :
1- الجبر والعلاقات .
2- حساب المثلثات + حل امتحانات .
3- التشابه .
4- نظريا تالتناسب + حل امتحانات .

جغرافيا :
1- الجغرافيا ومصادرها وسكان مصر .
2- موقع مصر .
3- المناخ في مصر .
4- الأنشطة الاقتصادية + حل امتحانات .

فيزيا :
1- الكميات والحركة .
2- الحركة الدائرية والشغل .
3- الطاقة الحرارية والقوة المغناطيسية .
4- حل امتحانات .

فرنساوي :

1- الدرس الاول والتاني .
2- الدرس التالت والرابع .
3- الدرس الخامس + حل امتحانات .

عربي :
1- الاأدب والقراءة .
2- النصوص والبلاغة .
3- النحو والقصة والتعبير .
4- حل امتاحانات .

فلسفة :
1- التفكير الإنساني ونشأة الفلسفة .
2- خصائص التفكير الفلسفي ومعنى العلم .
3- خصائص التفكير العلمي والتفكير الناقد .
4- حل امتحانات .


بس ياريت التمن أيام دول يكون نظام يومك كالاتي .

تقومي الساعة 6

قيلولة ساعة ونص من وحدة لاتنين ونص

نوم 11.5 مساء

وباقي اليوم مزاكرة

دي كلها تمن ايام ..

ومعاكي نص السنة .. اعملي اللي انتي عايزاه ..

دعواتك

انا بشكرك كتيييييييييييييييييييييييييييييييييييير ويجعلة فى ميزان حسانتك وربنا يديك اللى انت عايزة ان شاء الله وانا بدعيلك واذان الظهر بياذن

لو سمحت يا استاذ احمد يعنى انا هذاكر كل يوم مادة ولا هذاكر كل المواد بالتقسيمة وعلى فكرة فين تقسيمة الاحياء وبجد شكرا انت رفعت من معوياتى جداااااااااااااااااااااااااااااااااااااااااااااااا ا

شكرا يا استاذ احمد انا عايزة اعرف انا هذاكر المواد كلهم فى يوم واحد حسب التقسيم ولا كل يوم مادة شكراااااااااااااااااااااااااااااااااااااااااااا

شكرا يا استاذ احمد انا عايزة اعرف انا هذاكر المواد كلهم فى يوم واحد حسب التقسيم ولا كل يوم مادة شكراااااااااااااااااااااااااااااااااااااااااااا

انتي هتزاكري المواد مع بعض .. على مجموعتين

الأحياء :

1- التركيب الكيميائي .
2- الخلية .
3- الوراثة والتطور .
4- التصنيف .
وخدي يوم من المجموعة التانية حلي فيه يعني ساعتين تلاتة كده ..

معلش برضو مش فاهمة ازاى ههههههههه

معلش برضو مش فاهمة ازاى ههههههههه

يعني اول اربع ايام هتزاكري فيهم تاريخ وانجليزي وكيميا ورياضة ..

والاربع ايام اللي بعدهم هتزاكري المحموعة التانية ..

على فكرة اربع مواد في اليوم مش صعبة ..

بما انك مش بتروحي المدرس معاكي من 6 - 1
سبع ساعات زاكري فيهم اي مادتنين .. ودي الفترة الأولى ..
ومن 2.5 - 11.5 تسع ساعات زاكري فيهم لمادتين التانيين ..