مشاهدة النسخة كاملة : صوتك هيفرق صوتك امانه


misterattia
19-05-2014, 06:03 AM
صوتك هيفرق
صوتك امانه
30 سنه ذل ومهانه
30 سنه والناس جعانه
والعصابه قطاع طريق
وكمان هجّانه
جا دورك
لجل يبقى لك مكانه
عايزين رئيس بجد
مش مجرد سد خانه
انت حر فى اختيارك
القرار اصبح قرارك
بايديك هترسم جنتك
بايديك هترجع بسمتك
بايديك هتبنى دنيتك
تختار تعجل اخرتك
والا هتطلع
عشان تقول
لجل ربك كلمتك
لازم تقول
لجل مايطلع نهارك
ولا عاجبك تفضل كده
فى دنيا فتانه
صوتك هيفرق
صوتك امانه
30 سنه ذل ومهانه
30 سنه والناس جعانه
والعصابه قطاع طريق
وكمان هجّانه
جا دورك
لجل يبقى لك مكانه
مش مجرد سد خانه
صوتك امانه
احرص عليه
واللى تقتنع بيه
تدِّيه
لو حد يزعل متسألش فيه
ايه ذنب ابنك تظلمه
وتجنى عليه
صوتك امانه
مصرنا
راح تعلى بيه
فاهم يابيه
خليك نبيه
صوتك دا قيمتك
راح تبقى بيه
لو بعت صوتك
وحد منك يشتريه
يفضلك ايه
صوتك كرامتك
لو تبيعه
سلامات على شرفك
راح يفضل ايه
تبكى عليه
وتبقى عديم القلب
راح تفرق ايه
عن الخرسانه
صوتك هيفرق
صوتك امانه
30 سنه ذل ومهانه
30 سنه والناس جعانه
والعصابه قطاع طريق
وكمان هجّانه
جا دورك
لجل يبقى لك مكانه
مش مجرد سد خانه
يا ازمه
مهما تسودى
او تشتدى
مسيرك تعدى
دا المصرى
وحيد عصرى
وردِّى أنا
وحيد حصرى
لازم افكر
واختار بحرص
واقول فى النهايه
عن يقين ردى
انا المصرى ومين أدى
وانا الضاحك
ف يوم حزنى
وانا دموعى على خدى
هقول صوتى
بكل امانه
وانا رايح
راح اتوضى
بأيدى
هفتح متاريسها
مهما يا ازمه تنسدى
هختار عشان بلدى
ومسيرك يا ازمه
تنهدى
انا قلت اللى جوايه
ومش عارف
مين معايه
ومين ضدى
وقلب مصرنا الزمرد
عمره ما يصدى
واللى يحب البلد
هيصبر وهيهدِّى
مصر مش مجرد وطن
مصركم انسانه
صوتك هيفرق
صوتك امانه
30 سنه ذل ومهانه
30 سنه والناس جعانه
والعصابه قطاع طريق
وكمان هجّانه
جا دورك
لجل يبقى لك مكانه
مش مجرد سد خانه
_________________
عطيه خضرى عطيه
قلين / كفر الشيخ

وائل رسلان
19-05-2014, 07:49 AM
وعشان صوتى امانه ..
واترمى كام مره فى الزباله ..
هاقعد فى بيتى
واحفظ كرامتى
هم عايزين صوتى فى ايه ؟؟ ....
يشرعنوا بيه الفساد ؟؟
يشرعنوا قتــل الولاد ؟؟
يشرعنوا قتــل الامل فى المعتقل ؟؟
يشرعنوا نهب العباد ...؟؟
ده كانت ايدى تتقطع ..

محمد أحمد محمد عبد الحميد
19-05-2014, 08:00 AM
كلام جميل بارك الله فيك

أبو العلاء
19-05-2014, 12:17 PM
وعشان صوتى امانه ..
واترمى كام مره فى الزباله ..
هاقعد فى بيتى
واحفظ كرامتى
هم عايزين صوتى فى ايه ؟؟ ....
يشرعنوا بيه الفساد ؟؟
يشرعنوا قتــل الولاد ؟؟
يشرعنوا قتــل الامل فى المعتقل ؟؟
يشرعنوا نهب العباد ...؟؟
ده كانت ايدى تتقطع ..



هوّا دا إلمستَفاد

كلام جميل يوزنْ بلاد

واللي ضيع الأمانة من زمان

عاوزني يابني أعامله تاني بالأمان ؟!!

طب تبقى إيه ؟!!

وولادي لمّا يقولو : يابا إنت سبت الحق ليه ؟؟

رحت أدي صوتي للي داس عليه ؟!!!

فين الكرامة

فين الشهامة

لما انت عارف

إن الأمانة

هتبقى رايحة

سلة قمامة ؟!!!!!

misterattia
19-05-2014, 02:48 PM
لو كان كده
خلاص بقه
قوم ندبحوها نفرقوها
ياللى قوموا نصقفوا
للى كانوا من ولادها
وكل يوم بيفجروها
مصر ايه
ملعون ابوها
ربنا موجود يا ناس
قادر بحفظه
يحفظ جنودها
ويحفظوها
الوطن مش بس
كلمه بنحفظوها
الوطن قيمه
ف نفوسنا
بنزرعوها
ليه رب
واسمه عادل
قادر يبيد
كل العبيد
اللى ناوين هيبيعوها
وانا كنت واحد
م الجنود
قاعد مفنجل ع الحدود
عمرى ماعبت يوم ف جيشى
ولاقلت عنهم غير جنود
يارب تهدى
كل واحد
لجل عدل الله يسود
واحفظ جنودها
واحمى حدودنا
ويفضلوا دايما اسود
اسود ودايما يحفظوها
رديت من الغُلب اللى فيِّه
رغم انى عارف
كل كلمه هتحذفوها

وائل رسلان
19-05-2014, 04:05 PM
كلنا كنا جنود
وطلع عين ابونا على الحدود
بلاش نتاجر بالوطن
بلاش نعاند الزمن
بلاش نفهم بالمقلوب
فاكرين لما الصهاينه ضربوا لبنان
فى 2006
وسط خذلان المصرى والسعودى
قامت الحرب
عشان رفاة جندى يهودى
القضية قضية انسان
كرامة انسان
اما عندينا مش مهم يتقـتل
الف او مية الف
فى عمر الزهور
عشان عندينا تور
تور جاموس
شاف فى الكابوس
انه بقى رئيس
وبدا يحارب الارهاب المحتمل
قصدى المصطنع
وكان قتـل الشباب على الهوا
لا كان فيه لوم ولا اختشا
وفى عز النهار مش فى العشا
لا دى اشاعه فى وسط البلد
ولا هى حكايه من غير سند
دى قصة فرعون اتولد
من دون الله هيتعبد
لا عنده فكر ولا مدد
الا التسول
وقلة القيمة
والبركه فى
المغيبين
والمريدين
والمصلحجيه
والمطبلاتية
ولو كان ليك قريب اتقـتل
او صديق فى المعتقل
هاتعرف انه الكلام ده جلل
او كانت بيك ذرة انسانيه
كانت اديك تتصاب بالشلل ..
قبل ما تنتخب واحد سفاح

misterattia
19-05-2014, 04:58 PM
لاحول ولا قوه الا بالله